CleomHas.txt

#META#  TextURI          :: CleomHas
#META#  DEAF             :: http://www.deaf-page.de/fr/bibl/bib99c.php#CleomHas
#META#  TL               :: Cleom.
#META#  FEW
#META#  ARLIMA           :: https://www.arlima.net/ad/adenet_le_roi.html#cle
#META#  Author           :: Adenet le Roi
#META#  AuthorBorn       :: 1240
#META#	AuthorBornAmb    :: c
#META#  AuthorDied       :: 1300
#META#	AuthorDiedAmb    :: c
#META#	AuthorFl1
#META#	AuthorFl2
#META#  VIAF             :: https://viaf.org/viaf/215956894/
#META#  TextTitle        :: Li roumans de Cléomadès
#META#  TextSubtitle
#META#  TextVols         :: 2
#META#  TextSubj         :: Roman
#META#	TextDom          :: littéraire
#META#	Translation      :: false
#META#	Collection
#META#	CollectionNo
#META#  TextDescARL      :: Vers octosyllabiques à rimes plates
#META#  TextDescVers     :: 8
#META#  TextDateARL      :: Avant 1285 ou même 1283
#META#  TextDateAdj      :: 1283
#META#	TextDateMin
#META#	TextDateMax	     :: 1285
#META#  EdEditor         :: André van Hasselt
#META#  EdPlace          :: Bruxelles
#META#  EdPublisher      :: Victor Devaux
#META#  EdVol            ::
#META#  EdYear           :: 1865-1866
#META#  EdPages          ::
#META#  MsBase           :: BnF Ars. 3142
#META#  MsOther
#META#  MsNum            :: 13
#META#	MsDateARL        :: Fin du XIIIe siècle
#META#	MsDateAdj        :: f13
#META#	Form             :: v
#META#	Complete         :: 
#META#	NoWords          ::
#META#	NoLines          ::
#META#	DialAuth
#META#	DialScribe
#META#  ScanURL          :: https://archive.org/details/liroumansdecl01aden
#META#  ScanURIOther     ::
#META#  ArkID            :: ark:/13960/t7dr3q79b
#META#  LccnID
#META#  OclcID
#META#  WebAuthor        :: María Dumas (vol. 1, pp. 1-145; vol. 2 pp. 206-250)
#META#  WebAuthor        :: Karina Fernández (vol. 2, pp. 1-140)
#META#  WebAuthor        :: Gustavo Fernández Riva (vol. 2 pp. 141-205/251-293)
#META#  ORCIDWebAuthor   :: https://orcid.org/0000-0002-2202-6354
#META#  WebAuthor        :: María Florencia Vieyra (vol. 1, pp. 146-282)
#META#  WebReviewer      :: Gustavo Fernández Riva
#META#  ORCIDReviewer    :: https://orcid.org/0000-0002-2202-6354
#META#  MiscInfo
#META#  CCLicense        :: CC BY-NC-SA 4.0 International


*** START
PageV01P001
Folio1r
CLÉOMADÈS
En non de Dieu le créatour
Qui nous doinst, par sa grant douçour,
Que les ames li puissons rendre,
Vorrai à rimoiier entendre.
Je qui fis d'Ogier le Danois
Et de Bertrain qui fu ou bois,
Et de Buevon de Commarchis,
Ai un autre livre rempris
Moult merveilleus et moult divers.
Diex doinst que tex soit chascuns vers,
Que blasmés n'en soie et repris !
Moult est l'estoire de grant pris
Et à oyr moult gracieuse ;
Tant est diverse et merveilleuse,
Que je croi c'onques nus n'oy
Si diverse comme cesti.
Je m'esmay forment de l'emprise
Comment l’aie bien à chief mise ;
Mais ce me fait reconforter
Que me daignierent commander
Que je ceste estoire entendisse
Et à rimer l'entrepreïsse
Deux dames en cui maint la flour
De sens, de biauté, de valour.
PageV01P002
Leur nons ne vueil en apert dire :
Car leur pais aim et dout leur ire,
Si que bien sai que je morroie
De duel, se fait ne dit avoie
Riens fors leur plaisir et leur gré.
Pour ce seront leur non nommé
Se je puis si couvertement
K'entendre ne puissent la gent
Les nons d'eles quant les liront,
S'on ne leur monstre où li non sont.
# |
La fin de ce livre cerchiés
Se vous les nons trouver cuidiés
Des dames dont m'oés parler ;
Là sont, là les convient trouver,
Là les querés se vous voulés.
Bons jours leur soit hui ajornés,
Et demain, et après aussi
Leur aviengne ce que je di.
# |
Diex en ces II dames assist
Tant de bonté quant il les fist
Et de beaulté, k'à souaidier,
I porroit on petit aidier ;
Car il n'i faut, par vérité,
Chose qui afière à biauté.
Sage et courtoise et debonaire
Est chacune ; car examplaire
Puet on de tous biens prendre en eles,
Tant par sont et bonnes et beles.
# |
Dès ore mais vueil commencier,
Ceste matere aprochier ;
Car j'en ai tel commandement
Que n'i doi metre longuement.
PageV01P003
Moult me tieng à boneüré
Quant tés dames m'ont commandé
De faire chose qui leur plaise;
Liez en doi bien estre et aaise.
Et vous dirai raison pour quoi
Joie de cuer avoir en doi,
Pource que n'ai sens dont seüsse
Venir à chief se je n'eüsse
En leur dous commant pris l'avis
De l'uevre que ie vous devis.
# |
Dames de si très grant hautece
Qu'eles sont, firent gentillece
Quant me daignièrent commander ;
Et certes moult en doi amer
Humilité par cui le firent.
Par li fu ce qu'eles me dirent
K'à faire empreïsse ce livre.
Diex, se il li plaist, m'en delivre
En tel maniere et en tel point
Que ià de mesdit n'i ait point.
Car seur tous vices, sans mentir,
Doit on le mesdire haïr.
Et à ce a bonne raison ;
Car mesdis muet de traïson,
Et cil qui en traïson maint,
Ce sevent bien maintes et maint,
N'a part en Dieu ne Diex en lui.
Or gart Diex de honte et d'anui
Folio1v
Ceaus qui mainent en loiauté,
Et me doinst par sa volenté
Que je puisse venir à chief
De recorder de chief en chief
La très plus merveilleuse estoire
Qui onques fust mise en memoire.
PageV01P004
Bien doit estre en autorité,
Pource qu'ele est, de verité,
Estraite dou tans ancien,
Dès le tans Deoclesien.
Dire le vous vorrai briément ;
Vez en ci le commencement.
# |
Ès estoires dou roi d'Espaigne
Trueve on que uns rois de Sartaigne
Fu jadis, qui Caldus ot non.
Poissans fu et de grant renon
Enfans ot, mais ne sai pas quans ;
Mais bien sai que à celui tans
Ot en Espaigne une pucele
Qui avoit non done Ynabele.
Plus bele ne convenist querre.
Hoirs fu de trestoute la terre
D'Espaigne et de tout le pays.
Sage fu en fais et en dis.
# |
Caldus li rois, qui moult fu ber,
La fist requerre et demander
Pour I sien fill, et ainsi vint
Que le mariages avint.
Marcadigas à non avoit;
Sages et biaus et preus estoit,
Et larges et courtois et frans.
Moult par furent les noces grans,
Car arréées telement
Furent qu'il afiert à tel gent.
PageV01P005
Ne s'entramèrent pas agas
Ynabele et Marcadigas ;
Mais comme amis et comme amie
Moult menèrent honneste vie.
# |
Cil d’Espaigne moult honnorèrent
Roi Marcadigas et amèrent ;
Car moult fu sages et vaillans,
Et à toute honnour entendans,
Et dous et courtois et loiaus,
Et dou cors hardis et vassaus.
À point sot donner et prometre
Et largement ens es bons metre.
Une teche en son cuer manoit
Tele que adès li sambloit
Qu'il ne povoit trop honnorer
Les bons, ne trop dou sien donner.
# |
Gent estraite de vilonnie
N'amoit point en sa compaignie,
Ains i amoit les chevaliers,
Les damoisiaus, les escuiers,
Qui de lignage èrent gentil.
Tel gent entour lui amoit il ;
Car tel gent convoitent tousiours
L'onneur et le preu leur seignours.
Tel gent pour leur seignour morroient,
Là où li vilain s'en fuiroient;
Car li vilains par droit ne crient
Honte quant de vilain lieu vient,
Ne vilain ne sevent cremir
Honte, quant il cuident morir ;
Dont n'afiert pas que li vilain
Aient nul grant prince en leur main.
PageV01P006
Riches vilains ne serviroit
Jamais, se son preu n'i savoit ;
Car sa nature à ce le coite
Que plus a et plus il convoite.
Pou li touche de quel part viengne
Avoirs, mais k'à son ces le tiengne.
Pour ce, Marcadigas haoit
Les vilains, et gentis amoit ;
Car bien savoit que li gentis
Feroit vilonnie à envis.
# |
Li haus hom moult folement oevre
Qu'il grant conseil vilain descuevre ;
Car qui par vilain veut ouvrer
De s'onnour bien doit meserrer ;
Car jà vilain ne loëront
Nule honnour, puis qu'il i verront
Que seur aus en puïst escheoir
Periex, ne de cors ne d'avoir ;
Car pieçà, con dist ce proverbe :
"De pute racine pute herbe ;"
Et si redist on à la fois :
"Adès reva li leus au bois."
Bon fait entour lui avoir gent
Qui aiment miex honnour k'argent.
# |
Cis rois en haute honnour monta
Pource que les gentis ama.
Les bons sot bien vers lui torner
Et moult les sot bien honnorer ;
Et dou sien largement donnoit,
Chascun selonc ce qu'il valoit.
Ainsi le fist cil rois adont ;
PageV01P007
Et, se li roi qui ore sont
Et li prince ainsi le faisoient,
Je croi bien que miex en vaurroient.
# |
De sa femme dirai I mot.
Done Ynabele, qui ainc n'ot
Son cuer saoulé d'onnour faire,
Dame fu de très bon afaire.
Les povres gentis damoiseles
Et les orphelines puceles
Et les dames desconseillies
Estoient par li adrecies.
Et leur fist mainte grant bonté ;
Car plaine estoit d'umilité,
Et de pitié, et de douçour,
Et de sens apensé d'onnour ;
Car largece la couronnée
Fu en son cuer enracinée.
Le roi ama moult et chieri,
Et li rois l'ama moult aussi.
# |
La premiere année orent il,
Ce tesmoigne l'estoire, I fil,
Tel ainsi com je truis lisant
Que plus preus, ne puis ne devant,
Ne fust trouvez en nul pays
Ne qui d'armes si très grant pris
Folio2r
Eüst, ce sachiez, com cil ot,
Sicom la mer la terre clot,
Fors que Judas Macabéus
Et Hector de Troies, sans plus.
Mais à ces II n'aatiroie
Nului, k'à envis mentiroie.
# |
Biaus et gens et nobles et nès
Fu, et ot non Cléomadès,
PageV01P008
Je ne cuit pas que plus courtois
Veïst onques princes ne rois
Que il estoit, n'en doutés mie
K'ains une seule vilonnie
Ne dist ne ne fist à nului,
Tant par avoit franchise en lui
Et fine debonaireté,
Et sens norri en loiauté.
De tout bien fu si entechiés
Que n'i failli riens, ce sachiés.
# |
Si tost que il pot chevauchier,
Le fist ses peres envoiier
En Grece et aprendre griiois.
Quant grieu sot, pour savoir tiois
Vint à Couloigne en Alemaigne.
Avoec lui avoit grant compaigne
De barons et de chevaliers,
De damoisiaus et d'escuiers,
K'à lui ert bien aferissant
Qu'il menast noble vie et grant.
À ce tans, c'est verités fine,
Avoit non Couloigne Agrapine.
En cel pays tant demora
Qu'il sot tyois ; lors s'en ala
Ou roiaume de France droit
Que on adont Gaule nommoit,
Pour aprendre sens et honnour
Et ce qu'il afiert à valour.
Fu lonc tans en celui pays ;
Car en es anciens escris
PageV01P009
Trueve on que tousjours a esté
France la flours et la purté
D'armes, d'onnour, de gentillece,
De courtoisie et de largece ;
Ce est la touche et l'examplaire
De ce c'on doit laissier et faire.
# |
Tant amenda cil damoisiaus,
Que nus mieudres ne nus plus biaus
Ne fust en nul pays trouvés,
Ne de toutes gens si amés.
En France demoura lonc tans.
# |
N'ai pas nommé tous les enfans
Qu'ot Marcadigas li gentis
De done Ynabele au cler vis.
Trois filles orent, dont l'ainsnée
Fu Elyador apelée ;
Et l'autre ot non Feniadisse,
Qui n'estoit ne laide ne nice,
Mais bonne et bele et ensaignie
Si que de tous biens fu garnie;
Et la tierce avoit non Marine,
Qui tant par avoit biauté fine
Que nature faire le sot,
Qui le fist au miex qu'ele pot.
Si gentement estoit taillié
Que se on l'eüst souhaidié ;
Car en li former à droiture
Mist Diex entierement sa cure.
Nature riens n'i oublia ;
Car je croi Diex li commanda.
Pour ce n'i osa oublier
Rien que Diex li volt commander,
PageV01P010
Et ele fist si le commant,
Qu'ele fu bele et avenant.
# |
Tant amendèrent et tant crurent
Les trois sereurs, que eles furent
D’aage tel que par raison
Peüst chascune avoir baron.
De leur teches vous parlerai
Au plus briément que ie porrai.
Bien vous puis dire au premier mot
Que nule d'eles teche n'ot
Qui ne fust toute de bonté.
Or revenrai à leur biauté
Dont le voir dirai, se ie puis,
Selonc ce k'en l'estoire truis.
Si bele en Espaigne n'avoit
Que toute la mains bele estoit.
De chascune deviserai
La biauté au miex que porrai.
# |
L'ainsnée fu bele et plaisans,
Sage et courtoise et avenans,
Et de maniere fu et d'estre
Tel comme pucele doit estre.
Cors et membres ot si faitis
Que, se à droit le vous devis,
Je ne croi que en li fausist
Rien qui par droit aferesist
À damoisele noble et gente.
Et s'ert d'assez joene jouvente.
Vint et trois ans ot la pucele.
# |
Or est droit que je vous espele
La biauté de sa suer seconde.
Blanche fu et vermeille et blonde ;
PageV01P011
Sachiez qu'ele ot XX [et] Il ans
Et près ert plus bele II tans
Que cele que i'ai devisée.
# |
Or vous dirai de la mainsnée
Briément : parmi le bois m'en vois ;
Ce fu la plus bele des trois.
De trestout bien fu ses cuers plains ;
XX ans avoit, ne plus ne mains.
# |
À mon povoir monstré vous ai
De chascune ce que j'en sai.
# |
Dès ore mais seroit saison
Que je monstrasse la raison
Por quoi Cléomadès estoit
Si preus que chascun le prisoit
Et que tout s'en esmerveilloient
Cil qui de lui parler ooient.
De ce sai bien la vérité.
Moult longuement avoit esté
Li rois Marcadigas en guerre;
Car tolir li vorrent sa terre
V roi qui à lui marchissoient.
Poissant furent, et moult avoient
Seur Marcadigas grant envie,
Pour ce qu'il menoit tele vie,
De la terre que il tenoit,
Que chascuns s'en esmerveilloit.
Pou parloit on se de lui non
Tant par estoit de grant renon ;
PageV01P012
Sens, honnour, vallour et noblece,
Humilité, pitié, largece,
Folio2v
Debonnaireté, courtoisie,
Ot tous jours en sa compaignie.
Hardis et de seür corage
Fu moult et de fier vasselage.
# |
Li V roi dont je ci parol
Firent que musart et que fol,
Qui monstrèrent leur cruauté
À home de si grant bonté.
Mais ce fist envie la male
Qui en enfer mainte ame avale.
Par envie enprent on souvent
Ce dont on trop tard se repent.
# |
Cil roi tout ensamble jurèrent,
Sor Marcadigas assamblèrent,
Moult longuement le guerrièrent,
Lui et sa gent moult traveillèrent
Et li firent maint grant damage.
Mais, com hom de grant vasselage,
Se tint contre ses anemis.
Mais moult l'orent arriere mis
De sa terre k'essillie orent,
Dou pis li firent que il porent
Tout li V roi sans nul deport,
Ni regardoient droit ne tort ;
Car moult avoient grant desir
De leur volenté acomplir.
# |
Et quant rois Marcadigas vit
Qu'il li faisoient tel despit,
Que sa terre à essil metoient
Et sa povre gent destruisoient,
PageV01P013
Sachiez que moult près li touchoit.
Mai[s] partout estre ne povoit;
Car de toutes pars l'assailloient
Cil cinc roi qui le guerrioient.
Maintes fois leur vint au devant,
Mainte envaye forte et grant
Leur fist Marcadigas souvent;
Car moult deffendoit aigrement
Lui et sa gent et son pays,
Com chevaliers preus et eslis.
# |
Un message as V rois transmist
Et de par lui savoir leur fist
K'à I d'aus combatre vorroit
Le quel que il miex lor plairoit,
Ou au plus vaillant de lor gent
Cors à cors, et par tel couvent
Que, se cil à cui combatroit
Par ses armes le conqueroit,
K'Espaigne lairoit à tous jours
Ne mais n'i seroit ses retours ;
Et, se cil est par lui conquis,
Qu'il voisent fors de son pays.
Ce pour quoi tel chose manda,
Ce fu pour la pitié qu'il a
De sa gent qu'il voit essillier,
Ne n'a povoir del adrecier;
Car moult avoient grant povoir
Cil V roi, ce sachiez de voir.
# |
Quant li roi ce mant entendirent,
Leur avantage pas ne virent
En ce ; car trop estoit vaillans
Rois Marcadigas et poissans.
Et pour ce li ont remandé
PageV01P014
Que, se bataille à jour nommé
Veut prendre à terme de II mois,
Que chascuns d'aus se tenra quois,
Et que riens ne li forferont
Dusques à tant que il venront
Tout droit au jour de la bataille ;
Car bien cuident que ce lor vaille,
Car bien trois tans de gent avoient
Que tout li Espaignol n'estoient.
Marcadigas leur remanda
K'à celui jour se combatra
À aus, ce sachent par verté.
Donnée en fu la seürté,
Si que ambes II les parties
S'en tinrent très bien apaiies.
# |
En tel point iluec demorèrent,
Et les nouveles s'en alèrent
En maint pays ; tant qu'il avint
Que à Cléomadès en vint
La nouvele. Là il manoit
El roiaume de France droit.
Quant cele nouvele oy ot,
Au plus tost que il onques pot
S'esmut pour aler cele part
K'à envis quitteroit sa part
De deffendre ce dont devoit
Estre sires quant Dieu plairoit.
# |
Je croi k'ains hom de si pou d'ans,
Selonc le point de celui tans,
Eüst tel force com cil ot
Que XX [et] V ans sans plus n'ot.
PageV01P015
Adont ert pour enfés tenus
Cil qui n'avoit XXX ans ou plus.
De tous jeus où apartenoit
Force et vigour, tous ceaus passoit
Qui de tel jeu s'entremetoient.
Li plusour moult se mervelloient
Que il qui si joesnes estoit
Tel force et tel vigour avoit.
À paines trouvast on nului
Plus bel ne plus apert de lui.
# |
Cléomadès tant esploita
Qu'il vint en Espaigne droit là
Où li rois ses peres estoit.
Et quant Marcadigas le voit,
Savoir povez, grant joie en ot.
Et quant ses fiex salué l'ot,
Ainsi com il apartenoit,
Comme cil qui tout bien savoit,
Droit vers sa mère s'en ala,
Li et ses sereurs salua.
# |
Là endroit fu, bien le sachiez,
Souvent acolés et baisiés.
Moult très grant joie li faisoient
K'en lonc tans veü ne l'avoient.
De sa venue grant joie orent
Cil dou pays quant il le sorent.
Quant leur damoisel ont veü,
Si bel, si gent, si par creü,
Si courtois et si afaitié
Que il ert, moult en furent lié.
# |
Quant Cléomadès son point vit
De parler, à son pere a dit
PageV01P016
Que il le face chevalier.
De ce ne se veut plus targier
Que chevaliers ne soit sans faille ;
Car estre veut à la bataille :
Ce ne lairoit pour tout l'avoir
C'on li porroit ramentevoir.
# |
Folio3r
Marcadigas li debatoit
Pour ce que trop joesnes estoit ;
Et cil dist bien certainement
Que chevaliers outréement
Sera dedens cele journée
Que la grant bataille est nommée,
Et dist bien qu'il ne s'en tenroit
Pour plain val d'or, s'on li donnoit.
# |
Sachiez k'au roi vint moult à gré
Quant vit la bonne volenté
Que ses fiex avoit de bien faire.
Ne l'en volt plus dire contraire,
Ains dist chevalier le fera
Puis que tel volenté en a,
Par si k'en convent li aroit
Que vers les bons larges seroit ;
Car grans princes ne puet avoir
Très haute honnour, tant ait d'avoir,
S’il ne set les bons honnorer
Et dou sien largement donner ;
Car ne vaut riens princes eschars,
S’il avoit d'or charchié M chars.
Cléomadès avant passa
Et li dist que larges sera ;
Or ne s'esmait de ce noient
Car il li tenra bien convent.
PageV01P017
"Biaus fiex, dist-il, Diex vous en oie
Et vous tiengne en la droite voie
Des bons honnorer et servir
Et de leur service merir."
# |
Tantost fist li rois commander
Que on feïst tost arréer
Cotes de dras d'or et mantiaus
Pour trois cens chevaliers nouviaus,
Et chascun armes et destrier
Veut c'on leur face appareillier
Pour amour de ce k'adouber
Veut son fill et armes donner.
# |
Tost fu la besoigne arréée,
Puis que li rois l'ot commandée.
Chevalier furent au tiers jour.
Sachiez que mainte grant honnour
Y ot faite, et maint don donné;
Don n'i furent pas oublié,
Ains i furent bien en saison ;
Donné y ot maint riche don.
La feste fu et bele et grant,
Et li jours aloit aprochant
Que la bataille estre devoit.
# |
D'ambes II pars vinrent là droit
Où estre devoit la bataille.
Lacié y ot mainte ventaille
Et mainte fort broigne endossée ;
Si ot mainte trenchant espée,
Et maint hiaume cler reluisant,
Et mainte ensaigne flamboiant,
Et mainte targe et maint escu,
Et mainte lance à fer agu,
PageV01P018
Et maint dart et maint roit espier,
Et maint gavelot pour lancier;
Maint chevalier riche et poissant
Y ot et maint cheval corant.
# |
Cléomades sor I destrier
Séoit fin [et] fort et legier ;
Les armes son pere à label
Portoit, qui moult li sirent bel ;
Et estoient d'un vert dyaspre
Li label, et moult trouvoit aspre
Le cheval sor quoi il séoit ;
Si à point afrenés estoit
Que tournans estoit à son gré
Et mouvans tout à volenté.
En armes ert moult bien séans,
Et gracieus et avenans.
Apers ert et amanevis.
Sachiez nel vit pas à envis
Ses peres, mais moult li plaisoit
La maniere k'en lui avoit ;
Car moult ert bien aparissant
K'en lui auroit home vaillant.
# |
Ses batailles a ordenées
Marcadigas, et arréées.
Trois batailles fist de sa gent,
Moult les ordena bel et gent,
Bien et à droit leur devisa
Comment l'une après l'autre ira.
En chascune bataille aloit;
De bien faire les semonnoit.
En la premiere son fill mist ;
Tout aviséement le fist,
Car bien à son samblant véoit
PageV01P019
Que ses cuers à honnour baoit.
Moult très à droit le chastia.
"Biaus fiex, fait il, or i parra
Se hui monsterrés que c'est voirs
Que d'Espaigne soiez drois hoirs."
# |
Cléomadès li respondit.
"Sire, fait il, je vous afi
Que je ferai tout mon povoir
Que on me tiengne pour vostre hoir;
Car, se je faz bien, on dira
C'est vostre fiex qui fait aura;
Et se autre chose en faisoie
Vos fiex pas à droit ne seroie.
Et pour ce me vorrai pener
De non de tel pere sauver.
Il n'i a que dou chevauchier
Et des anemis aprochier;
Car j'espoir que bien deffendrons
L'onnour que nous tenir devons."
# |
Quant Marcadigas l'entendi
Trestous li cuers l'en esjoï.
Quant de son fill ot tel confort,
S'il en ot joie, n'ot pas tort.
À sa gent dist qu'il chevauchassent
Le pas sor frain, et si pensassent
Que cil qui pert son heritage
Par lascheté fait grant folage :
"Folement se sont embatu
Cil qui ci sont seur nous venu;
Car seur nos droit nous deffendons,
Por quoi Dieu en ayde avons;
PageV01P020
Et, en deffendant son pays,
Doit chascuns hom valoir aus X
Ou plus, ce vous di je por voir.
Au besoing doit li biens paroir.
Chascuns ait seüre esperance ;
Car Diex sera en nostre aidance."
# |
Ainsi sa gent amonnestoit
Marcadigas, et chevauchoit
En conroi ordenéement.
Moult chevauchoient noblement.
Folio3v
Ce fu à une matinée.
Mainte ensaigne desvolepée
Y ot au vent, et maint penon;
Si ot maint escu, maint blazon
Et maint riche hiaume luisant,
Et maint chevalier desirant
D'acroistre le non lor seignour
Et d'aquerre non de valour.
De deffendre leur herités
Sambloit chascuns entalentés.
Sagement et bel chevauchoient,
Com gent qui d'armes duit estoient,
Les batailles l'une après l'autre,
Le petit pas, lance sor fautre,
Escus as couls, hiaumes laciez.
# |
En l'avant bataille estoit chiez
Cléomadès, cui moult tardoit
Que l'estours assamblés n'estoit.
La seconde après lui sivant
Menerent doi frere vaillant.
Li uns avoit non Fercatas,
PageV01P021
Et li autres Helyadas.
Bel et preu et loial estoient.
De guerre ambedui moult savoient.
Li uns portoit armes vermeilles
À II blanches passans oueilles ;
Li autres teles les portoit,
Mais que labiaus bleus i avoit
Qui moult très bien i avenoient.
Li dui frere moult s'entramoient,
Dont ne faisoient pas folage;
Et cil qui tienent cel usage
Font que sage et com avisé.
Souvent en ont esté blasmé
Frere, quant il se descordoient,
Et encore demain feroient.
Bien en doivent estre mains fort
Frere, quant ne sont d'un acort.
En l'arrière bataille fu
Marcadigas, qui tant valu
Que nus hom povoit plus valoir.
# |
Or vous vorrai amentevoir
De ceaus qui sont à l'autre lés,
Où maint en ot qui bien armés
Estoit, et seur corant destrier.
Mainte baniere baloier
I veïssiez et mainte ensaigne.
L'uns d'aus monstre l'autre et ensaigne
La gent Marcadigas venir.
Lors veïssiez les rens fremir.
V batailles faites avoient ;
PageV01P022
Vers Marcadigas aprochoient
Le passet rengié et serré.
# |
Mais n'ai encor pas devisé
Qui les V batailles guioit.
Chascuns des rois une en avoit.
# |
La premiere ot Garsianis.
Cil estoit moult entalentis
De ceaus d'Espaigne faire mal
Et estoit rois de Portingal.
C'ert la bataille ou chief devant.
Espaignol vont moult maneçant,
Et moult leur tarde k'assemblé
Ne sont à aus et ajousté.
Seürement vont aprochant
Les Espaignos, et moult jurant
Que, s’il les truevent, n'iert pas gas.
Mar virent roi Marcadigas.
Plain erent d'outrageus bobant.
# |
L'autre bataille après sivant
Menoit li rois Bondars li Gris.
De Gascoigne ert nés et norris,
Et si en estoit rois clamés.
C'estoit de tous li miex montés.
Seur I cheval liart séoit,
Tel que meilleur ne convenoit ;
Car fins ert et seür et fors.
Pour sus combatre cors à cors,
Ne nol meillour cheval de guerre
Ne trouvast on en nule terre.
# |
La tierce bataille guia
Galdas des Mons, qui bien cuida
PageV01P023
Celui jour destruire Espaignos.
Mais on dist : "Cuidiers fu uns sos."
Cil ert sires des Toulousans.
C'ert adont uns roiaumes grans.
De Bourdiaus d'usqu'à Montpellier
Ot toute la terre á baillier.
Bien ert sa bataille estofée
De gent noblement arréée.
Bien cuidoient cel jour conquerre
Marcadigas, lui et sa terre.
# |
La quarte bataille menoit
Uns rois qui grant desir avoit
Que li estours fust assamblés.
D'Arragonne fu rois clamés,
Et ot non Agambars li Lons,
Ainsi k'en escrit le trouvons.
Cil recuidierent moult bien faire
Sor ceaus d'Espaigne lor afaire.
# |
La quinte ot rois Sormans li Rous.
Cil estoit li plus fel d’aus tous
Et qui plus savoit de malice.
Roi fu dou regne de Galice.
Par lui fu premiers commencié
Icele guerre et atisié.
# |
Quels armes orent li V roi
Deviserai, si com je croi.
À droit, si com l'ai entendu,
Garsianis portoit l'escu
Dyaspré de vert et de jaune,
À une noire teste d'aune ;
Et la teste estoit coronnée
D'une coronne à point ouvrée
PageV01P024
De gueules, qui bien i séoit.
Et Agambars li Lons portoit
L'escu d'or palé de vermeill.
En toute l'ost n'ot son pareill
De longueur ne de grande taille ;
Cil desiroit moult la bataille.
De gueules et de vert partis
Ert li escus Bondart le Gris,
Et i avoit d'or I lion
Passant, à teste de mouton.
Armes portoit moult desguisées
Sormans li Rous, mais devisées
Les vous arai assez briément :
L’escu d'or à I vert serpent
Portoit, et ot eles vermeilles
Li serpens, et bleues oreilles ;
Et ot aussi la teste bleue,
Et ot blans piés et noire keue :
Folio4r
C'erent ses armes, vraiement.
Galdas des Mons l'escu d'argent
Portoit, à trois coronnes noires,
À I ourle de verdes poires.
# |
Jà avoient tant esploitié
D'ambes II pars, et chevauchié,
Que entre aus n'avoit c'un biau plain;
Veöir se porent tout à plain.
# |
Quant les batailles s'entrevirent,
Sachiez que d'ambes pars fremirent.
Cléomadès vit aprochier
Les anemis. Sans plus targier
Dist à sa gent que il brochassent
Et k'à ces premiers assamblassent.
Et, si tost qu'il les ot semons,
PageV01P025
Chascuns feri des esperons.
Mais devant tous, près d'une archie,
S'en venoit, la lance enpoignie,
Cléomadès moult fierement
Comme hom plain de grant hardement.
Le premerain qu'il encontra
De coup de glaive le porta
À la terre mort estendu.
Dou tronçon a si referu
Un autre, que il l'abati.
De cel poindre trois encheï
Qui onques puis n'orent santé.
Lors a le bon destrier hurté
Des esperons, et trait l'espée
Qui ert trenchans et acerée.
Enmi les anemis s’embat,
Trenche et coupe, et fiert, et abat
Hiaumes, escus, targes, blazons,
Nés et visages et mentons.
Ne povoit nus hom soustenir
Les grans coups qu'il povoit ferir.
# |
Tost fu redoutés malement.
Après lui assamblent sa gent
Qui durement conforté sont
De ce que tel chevetaine ont.
Ains qu'il fussent parassamblé,
En ot maint à terre porté,
Qui onques puis ne releva.
La seconde bataille ala
Assambler moult hardiement,
Com gent de grant apensement
Et qui d'armes estoient duit.
Maint arçon i veïssiez vuit,
Et mainte resne traynant,
PageV01P026
Et maint home à terre gisant.
Fercatas le fist bien ce jour,
Il et ses frères et li lour.
# |
Quant Marcadigas vit sa gent
Assambler si très noblement
Et vit que cil là réusoient
Où sa gent assamblé estoient,
Sachiez que pas ne li desplot.
Si tost que perceüs les ot,
À sa gent dist : "Or leur alons ;
Sachiez desconfis les avons."
# |
Lors veïssiez chevaus brochier,
Escus et targes embracier
Et brandir maint espie trenchant.
Marcadigas trestout devant
S'en venoit la lance en poignie.
À l'assambler : "Castele !" escrie.
Maint escu percié et troé
Y ot, quant furent ajousté,
Et mainte targe depecie,
Et maint cors de vassal sans vie,
Et mainte lance tronçonnée.
Moult par i ot fiere mellée.
Moult fu la bataille crueuse
Et fiere et aspre et perilleuse.
# |
La bataille en fuie tourna
Où Cléomadès assambla.
Garsianis ert chevetaine
De la bataille premeraine;
C'estoit cele qui s'en fuioit.
Grant noise et grans cris i avoit ;
Mais moult i ot des leur ocis,
PageV01P027
Et navrés et à meschief mis,
Ains qu'il fussent à ce mené
Que il fussent dou champ tourné.
# |
Cléomadès tant redoutoient
Que ses coups atendre n'osoient.
Et à ce avoit bien raison ;
Car ne puis veöir que nus hon
Peüst ferir coups si despers.
Hiaumes, ne escus, ne haubers
Ne povoit nului garandir,
Puis k’à coup i povoit venir
Que de ce coup ne le tuast
Ou au mains qu'il ne l'afolast.
# |
Cele bataille s'en tourna.
En une autre bataille entra
Comme desconfit s'en venoient ;
Car entre leur gens se féroient.
Mais sachiez que Cléomadès
Les sivoit au dos moult de près
Et sa gent après le sivoient
Qui de ses fais merveille avoient.
# |
Que vous iroie je contant
Ne la besoigne pourloignant?
La chose vous acourcerai.
Li V roi que nommé vous ai
Des V batailles que il orent
Firent une, si tost qu'il porent.
Estour y ot fier et mortel.
Je cuit k'ainc puis ne vit nus tel
Si aspre ne si assaillant,
Si aigre ne si deffendant ;
Car dou matin jusqu’à la nuit
PageV01P028
Ne menerent autre deduit
Fors que toute jour chaploiier
Et de l'un l'autre damagier.
# |
Sachiez que ne se tint pas quois
Cléomadès à cele fois.
Enmi le tas des anemis
S'estoit, comme chevaliers, mis.
Ou plus dru d'aus s'ert embatus.
Mains en fu par lui abatus
Le jour, et mains deffigurés,
Et mains mors, et mains afolés.
# |
Quant Marcadigas son fill voit
Comment les rens fremir faisoit
Et les batailles remuer,
"Castele !" li ot escrier.
Toute la bataille branloit
Au lez là où il se tournoit.
En son cuer en a Dieu loé,
Quant son fruit vit si meüré
Folio4v
Et moult plus que devant ama
L’ente qui si fait fruit porta.
# |
Lors se feri Marcadigas
Si anemis ou plus grant tas.
Moult durement les assailloit;
Car de très grant vaillance estoit
Et de très grant apensement.
Souvent avoit l'ueill à sa gent.
Quant aucun en véoit retraire,
Ne vous sarois je pas retraire
Comment les savoit ravoiier
PageV01P029
Et à droit d'armes ensaigner.
Quant il véoit qu'il en ert poins,
Souvent li ot valu cis poins.
À paines fust nus si doutiex,
Qui fesist mal devant ses iex,
Tant que il cuidast ne seüst
Que Marcadigas près li fust;
Car en son bon ensaignement
Prenoient tel apensement,
Que il plus honte redoutoient
Que il à mourir ne faisoient.
# |
Cléomadès point n'arrestoit,
Mais tout adès les assailloit.
Roi Agambart ot abatu
À la terre tout estendu.
Au cheöir si fort se bleça
K'ains puis ce jour coup ne donna ;
Mais sa gent l'orent relevé
Et sor son cheval remonté.
# |
À celui point tout droit avint
Que Galdas des Mons là sorvint.
Entre lui et Bondart le Gris,
Sous Cléomadès fu ocis
Ses chevaus à cele venue.
Mais je croi c'onques mais veüe
Fust nule merveille si grant
Com de lui v[e]öir deffendant.
Quant à pié fu en mi aus tous,
Mustiaus et cuissel et genous,
Moult chier comparer convenoit
Ce que ses chevaus mors estoit.
PageV01P030
Dou bran qui ert soilliez et tains
S'aidoit com chevaliers certains
De prouèce et de seürté
Et de hardement apensé.
Entour lui si grant parc faisoit
Que nus assaillir nel osoit.
Ce de quoi plus il l'assailloient,
C'estoit de dars qu'il li lançoient.
Près de lui n'osoient aler
Tant se faisoit à aus douter.
Savoir poez qu'il l'ocesissent
Moult volentiers, se il pouissent.
# |
Dou rescourre moult se penoient,
Sa gent et grant paine i metoient.
Mais tant erent afebloié
De lui qui estoit mis à pié
Que moult en erent esbahi ;
Leur cuer et leur coup amenti ;
Et avoit chascuns tant à faire
Qu'il ne savoit auquel lez traire.
# |
Boudars li Gris estoit montés
Seur I cheval qui estoit tés
Que on ne peüst souhaidier
À fin souhait meilleur destrier.
Et Cléomadès le choisi
Haut et grant et fort et fourni.
Vers lui s'en vint moult fierement,
Le cheval par la resne prent,
Le bran tint qui estoit soilliez
De couper bras et poins et piez
Et d'espandre sanc et cervele,
Mainte entraille et mainte bouele,
PageV01P031
En fist espandre aval les chans ;
Car fors ert et li brans trenchans.
Si en feri Bondars le Gris
Que dou coup fu si estordis
K'à la terre cheï pasmés;
Et Cléomadès est montés
Seur le destrier fort et isnel,
Cui que il soit lait ne cui bel.
Lors muet à aus com hom irés ;
Cui il ataint cil est alés.
Si anemi se desconfirent
Forment quant remonté le virent,
Et li sien sont rasseüré
Quant il le virent remonté.
# |
Marcadigas tout en tel point
Avoit esté droit à ce point.
Sormans li Rous li ot ocis
Son cheval, et Garsianis.
Ne vous puis pas tout devise[r] ;
Grant paine ot à lui remonter.
Là ses chevaus demora mors ;
Fu un petit navrés ou cors,
Mais n'estoit pas plaie mortés.
Tant ot fait qu'il fu remontés,
Et venoit rescorre son fill
S'on li ot dit en quel perill
Il avoit longuement esté.
Liez fu quant il l'a retrouvé
En autre point qu'il ne cuidoit.
En son cuer Dieu en gracioit.
"Castele !" escrie hautement.
En l'estour rentra fierement.
Lors li vint rois Galdas ; adont
PageV01P032
Des brans entr'acointier se vont.
# |
Moult y avoit fiere mellée.
Souvent fu "Castele !" escriée.
Mais tant vous di que là endroit
Marcadigas trop pou avoit
Des siens ; car si chargié estoient
Que tous les bras plains en avoient
De toutes pars et de tous lez.
Li chevaus sur quoi remontez
Fu Marcadigas li gentis,
Fu là endroit souz lui ocis.
N'est merveille s’il ot anui
Et meschief de cuer, quant souz lui
Fu mors ses chevaus à cele heure.
Galdas des Mons li corut seure,
L'espée ou poing ; car moult desire
Forment qu'il le peüst ocire.
Quant Marcadigas se vit mis
À pié entre ses anemis,
Bien vit que il mestier avoit
De deffendre, et il en faisoit
Son pouvoir à loi de vassal ;
L'espée ou poing rendoit estal
À guise de hardi sengler.
Qui li veïst esboueler
Chevaus et entour lui ferir,
Folio5r
Bien le deüst à preu tenir.
# |
Sa gent durement se penoient
Dou rescorre et abandonnoient
Moult très hardiement les cors.
Mais tant i ert grans li effors
De leur anemis là endroit
Que trois contre I en y avoit ;
PageV01P033
Ce n'estoit pas comparoison.
# |
À Cléomadès le dist on
Que ses peres ert en tel point,
Et il tantost le cheval point
Des esperons. Lors s’adreça
Droit là où cil li ensaigna
Qui dite l'en ot la nouvele.
L'espée ou poing, criant "Castele !"
S'en vint droit à cele mellée
Qui estoit fiere et drue et lée.
# |
El plus grant tas moult aigrement
S'embat plains d'ire et de talent
De ses anemis damagier.
À terre en fist maint trebuchier
Ains que à son pere venist.
Droit devant son pere se mist
Qui bien mestier d'ayde avoit;
Car s'espée brisié estoit
Et ses escus tous découpés
Et ses hiaumes tous descerclés.
# |
Sachiez que tost fu conneüs
Cléomadès quant fu venus
À cel estour que je vous di.
Tost furent li renc aclari.
Ne se faisoient pas priier
Si anemi de traire arrier.
Li uns sor l'autre s'entassoit
Au lez là où il se traioit;
Car si très perilleus estoient
Si coup, k'atendre nes osoient,
K'armeüre n'avoit durée,
Tant fust forte ne bien ouvrée,
PageV01P034
Contre les coups que il féroit.
Pour ce chascuns le redoutoit.
# |
Vers le roi Galdas s'adreça ;
Et Galdas vers lui se torna,
Car moult ert chevaliers hardis
Li rois Galdas, et de grant pris.
Chascuns tenoit le bran haucié.
Tost ot li uns l'autre aprochié.
Si à point l'un l'autre encontrerent
Que les espées s'assenerent ;
Car les coups geterent ensamble.
Mais ainsi avint, ce me samble,
Que l'espée Galdas trencha
Si que l'autre parmi coupa
En la moienne tout parmi ;
La piece à la terre en cheï.
Quant Cléomadès vit s'espée
Qui estoit en mi leu coupée,
L'espée forment convoita
Qui la sene ainsi coupée a.
Sachiez qu'il fera son pouoir
S'il puet de cele espée avoir.
Un petit le cheval brocha.
Au roi Galdas les bras geta,
Par la chaienne le saisi
À quoi li brans d'acier pendi
Que il convoitoit moult forment ;
À lui le tire telement
Que le roi Galdas reversa
Seur le cheval, et rompue a
La chaienne tout erramment.
L'un et l'autre, si com j'entent,
L'espée et la chaienne aussi
Enporta, pour voir le vous di.
PageV01P035
Ne sot pouoir de retenir
Galdas, ainçois convint cheïr
Lui et le cheval en I mont.
# |
Liez fu Cléomadès adont
Quant il ot l'espée conquise
Dont il avoit grant convoitise.
Ressoignie ot l'espée à non ;
Ne croi k'ains mieudre veïst on.
# |
Quant Cléomadès se senti
Dou bran le roi Galdas saisi,
Savoir povez, moult en fu liez,
Et li rois Galdas moult iriez
Quant relevez fu et il voit
Celui que il de mort haoit
Qui de s'espée estoit saisis
Moult en fu de cuer abaubis.
Sachiez que mainte grant colée
Fu par Cléomadès donnée
Puis ce di à ses anemis
De l'espée que vous devis.
# |
Galdas des Mons fu remontés.
Mais ains puis le jour ne fu tés
Qu'il tornast vers Cléomadès,
Ainçois eschivoit tout adès
Les lieus là où il le savoit;
Car moult à redouter faisoit.
Cléomadès le bran d'acier
Tint en son poing, que moult ot chier.
Le premerain qu'il en féri
Jusques ens es dens le fendi.
Tant féri de çà et de là
PageV01P036
Et les rens si aclaroia
Que ses peres ot recouvré
Cheval, et l'orent remonté
Sa gent, qui moult grant joie avoient
De ce que remonté le voient.
Une autre espée li baillierent,
À sa chaienne la lierent ;
Car s'espée avoit depecie
En deffendant honnour et vie.
Bien le cuidierent, tel fois fu,
Sa gent dou tout avoir perdu.
Si eüssent il, cest passé,
Se ses bons fiex n'eüst esté
Qui le rescoust, si com vous di :
Au besoing connoist on l'ami.
# |
Quant Marcadigas vit son fill
Qui l'ot rescous de tel perill,
N'est merveille s'il en fu liez.
Li rois n'est gaires detriiez.
Après ce qu'il fu remontez,
Tantost est en l'estour rentrez.
Tout en combatant, Dieu prioit
Que il de son fill garde soit;
Car bien voit, se il le perdoient,
Que perdu et alé seroient.
Moult se maintenoit noblement
Marcadigas et fierement.
Folio5v
Sa gent savoit bel rassambler
Et de bien faire amonester.
Mains coups fu iluec departis.
PageV01P037
Encor gisoit Bondars li Gris
Droit enz ou lieu où il cheï
Quant Cléomadès l'abati.
De lui rescorre se penerent
Sa gent, tant qu'il le remontèrent.
Molt ot esté en pasmoison
K'en lui n'avoit sens ne raison.
Et, quant à lui fu revenus,
Sachiez tout vraiement que nus
Ne l'eüst mené de plus près
Là où seüst Cléomadès ;
Car essaié ot malement
Sa grant force et son hardement.
Souvent cele part regardoit
Là où Cléomadès savoit.
Mais de plus près ne l'aprochast
Pour tant escorchier se laissast ;
Car qui veïst les rens cerchier
Et ses anemis damagier
Cléomadès en pluseurs lieus,
Bien desist : "C'est d'armes li diex."
On pouoit bien, pour voir, jurer
Que tex hom faisoit adouter.
# |
Puis ce di que remontez fu
Cléomadès, et qu'ot tolu
À Bondars li Gris son destrier,
Firent pou plus que traire arrier
Cil qui leur aversaire estoient.
Peureusement [il] se tenoient ;
Car Cléomadès si menés
Les ot, puis qu'il fu remontés,
Qu’il estoient de toutes pars
PageV01P038
Brisié et derrout et espars.
# |
Cléomadès tant redoutoient
Que devant s'espée fuioient
Com fait ane devant faucon
Et grue pour l'alerion.
Morir ou cheöir convenoit
Celui qu'il à plain coup féroit.
Ce jour a bien as siens paru
K'en lui avoit force et vertu ;
Car je croi mal leur fust alé
S'il n'eüst là ce jour esté.
# |
Espaignol apertement voient
Que cil de là se retraioient
Aussi com en desconfisant.
Tantost perçoit leur convenant
Marcadigas. Lors escria
As siens : "Seignor, or i parra
Se ainsi nous eschaperont ;
Veöir pouez, desconfit sont."
# |
Droit après ce I seul petit
Que Marcadigas ot ce dit,
Orent leur anemi torné
Les dos, comme desbareté,
Et s'en aloient qui ains ains.
Lors veïssiez parmi ces plains,
Et parmi mons et parmi vaus,
Grans pourrieres et grans enchaus.
Trestous li chans estoit jonchiez
De mors, de navrez, de bleciez,
De nés coupez, de chiés, de mains.
Jambes, piez, bras n'i ot pas mains.
Tant en gisoit de tous costés
PageV01P039
Que ce fust à veöir pités.
Tant y ot de mors et de pris,
Que n'i saroie metre pris
Ne somme ; tant en y avoit,
Que chascuns s’en esmerveilloit.
Tant avoit li enchaus duré
Que il estoit près k’à vespré.
# |
Lors fist Marcadigas sonner
Ses cors, pour sa gent rassambler.
À celui tans coustume estoit
Que, si tost com les cors ooit,
Devers leur chief se retraioient
Cil qui les cors oys avoient.
Et cil aussi ainsi le firent.
Leur gens parmi les chans requirent,
Dont assez mors en y avoit.
Chascuns son ami requeroit,
Et estoit coustume à ce jour
Que cil qui erent vainqueöur
Tout droit en ce lieu demoroient
Où la victoire eü avoient.
# |
Li vainqueöur là demorerent,
Et li desconfit s'en alerent
Si dolent et si irascu
Com cil qui estoient vaincu.
Tout droit au lieu sont retorné
Dont au matin erent sevré.
Tentes et aucubes et trés
Y ot ne plus ne mains k'assés,
K'à tout leur pouoir i estoient
Venu, pour ce que il cuidoient
La terre d'Espaigne conquerre :
Pour ce orent empris la guerre.
PageV01P040
Mais entre savoir et cuidance
Sachiez a moult grant differance.
Cuidiers a maint home arrieré,
Et savoirs maint home alevé.
Puisque savoirs fait avancier,
Fols est qui se tient au cuidier.
Pou voit on venir à honneur
De gent qui trop soient cuideur.
Grant seigneur, petit, ne moien
Tant a en cuidier fort loien
Que nus desloier ne s'en puet,
Se il conseil croire ne vuet,
Et se pert si en pluseurs lieus
Que ce est damages et dieus.
# |
Sachiez k’ainsi ert avenu
Que tout V erent revenu
Li roi et arrier retorné,
Moult dolent et moult tormenté.
N’est merveille se dolent erent;
Car le tiers pas ne ramenerent
De ceaus qu'il en orent menez,
Tant en ot en l'estour remez.
# |
Quand cil qui furent eschapé
Furent là endroit rassamblé,
Conseil prirent qu'il s'en fuiroient.
Li plus d'aus à ce s'acordoient ;
Car, s'il atendent lendemain,
Il seront tous pris à la main
Et honni et destruit et mort.
Au fuïr ont pris leur acort,
PageV01P041
Car deffense i vaurroit petit.
Li V roi s'i sont assentit.
# |
Folio6r
Tous ont guerpi, tentes et très.
Chascuns d'aus s'est de là sevrés ;
Car lendemain tant redoutoient
Que là plus demorer n'osoient.
Sachiez que moult pou atendirent
L'un l'autre, quant de là partirent.
Tous ceaus qui n'en porent aler
Convint là endroit demorer ;
Et encore demain feroit
Là où tel besoigne avenroit.
Grant chose a en faire l'estuet ;
Bien savez : qui ne puet, ne puet.
# |
Chascuns des rois tant esploita
Que de là endroit eschapa.
Que vous diroie je lonc conte,
Fust à honneur ou fust à honte,
Ne comment qu'il fust avenu?
En leur pays sont revenu ;
De leur meschief sont conforté,
En ce que il sont eschapé ;
Car bien sevent tout en apert
Cil qui pert la vie tout pert.
Trop lonc parlement vous feroie
Se de chascun vous devisoie,
Comment ala ne comment vint,
Ne k'à son r'aler li avint.
Chascuns ne fist pas ce qu'il vot,
Ains fist chascuns au miex qu'il pot.
# |
La bataille que je vous di
Fu par I jour de merkedi.
PageV01P042
Chascuns cele nuit trespassa
Si comme li tans l'aporta.
En l'ost Marcadigas disoient
Que par Cléomadès avoient
Sauvé trestout entierement,
Vie et honnour et tenement.
# |
À merveille fu regardés,
La nuit que l'estours fu finés.
De sa très grant poissant valour
S'esmerveilloient li plusour.
Sachiez volentiers le baisast
Ses peres, se faire l'osast,
Pour ce que de cuer l'amoit tant ;
Mais n'ert pas chose aferissant.
N'ert merveille se il l'amoit
Pour la bonté k'en lui savoit.
# |
La plaie le roi fu tentée
Et à point remise et bendée.
Lié sont de ce qu[e] il n'i a
Perill, et que très bien garra ;
Car li maistre ainsi dit leur ont.
N'est merveille se lié en sont.
Cele nuit fu bele et plaisans,
Car il faisoit si très douz tans
Que se on l'eüst souhaidié ;
Ce leur a moult la nuit aidié.
# |
Lendemain, droit à la jornée,
Furent leur gent toute arréée
Pour aler au lieu où cuidoient
Les rois qui fuïs s'en estoient,
Ainsi com vous oy avés ;
Mais n'i trouverent fors navrés
PageV01P043
Et gent qui fuïr ne s'en porent.
De ceaus tirent ce que il vorrent
Et ce que il i apartint
Ne sai pas kan qu'il i avint.
Mainte tente, maint paveillon
Et maint tré de riche façon
Trouverent, et moult d'autres biens.
Car n'en avoient porté riens
Li roi ne cil qui s'en fuioient ;
À l'eschaper plus entendoient.
Departi fu en pluseurs mains
Cele jornée le gaains.
Sachiez que maint coffre effondré
Y ot, et maint sac desciré,
Et mainte bouge decoupée,
Ainçois qu'ele fust deffermée.
Entre argent et joiaus et or
Trouverent moult très grant tresor,
Or en paillole et en tarin,
Maint anel d'or et maint bacin
Trouverent, et maint grant jouel
Qui estoient et riche et bel.
Mainte riche vaisselemente
Touverent, bele et noble et gente,
Pos, hanas et platiaus d'argent ;
Car moult estoient riche gent
Li roi qui s'en erent fuï.
# |
Quant poins en fu, de là parti
Se sont, et arrier retorné
Quant tout orent pris et troussé.
# |
Marcadigas si departi
Le gaaing qui fu fais iki,
K'ains n'en retint IIII besans.
PageV01P044
Se il en i eüst X tans,
Si l'eüst il trestout donné
Ceaus qui en avoient sué
Ou hiaume, et leur sanc espandu.
Sages et larges et preus fu.
Dou sien propre tant leur donna
Que chascuns de lui se loa.
En leur pays sont repairié
Riche d'avoir, et de cuer lié
De ce que desconfit avoient
Ceaus qui destruire les cuidoient.
# |
Marcadigas est demorés
De joie riches et comblés.
Son roiaume a bien deffendu.
Il et ses fiex sont revenu
Là où done Ynabele estoit
Et ses filles que moult amoit.
Ne demandez pas se il furent
Conjoy, car estre le durent.
# |
Quant done Ynabele parçoit
Son fill, dont tant de bien avoit
Oy dire les repairans,
Moult fu ses cuers liez et joians ;
Car par son fait erent vaincu
Li autre, et li sien retenu.
De li fu baisiez moult souvent
Et de ses sereurs ensement.
# |
Cléomadès I veu voua
Tel, que jamais ne finera
De guerroier tous les V rois
Qui orent fait tant de desrois
À son chier pere par envie.
Ou il i laissera la vie,
PageV01P045
Ou il les fera repentir
De ce qu'il cuidierent honnir
Son pere et ceaus de son pays.
Ainsi l'a voué et empris.
Folio6v
Et sachiez que tout acheva
Le veu, ains riens n'en oublia.
Mais, ains qu'il le peüst furnir,
Enconvint il maint coup férir
Et mainte grant paine endurer ;
Ne pourquant le fist achever.
# |
Trop i metroie longuement
Se je vous disoie comment
Le veu qu'il fist à chief mena.
Si asprement ceaus guerroia
Qui envers son pere mesprirent
Et qui à lui guerre entreprirent,
Qu'il en prist cruel vengement.
Mais je vous dirai moult briément
La venjance que il emprist,
Ainsi que l'estoire le dist.
# |
Cléomadès si se prouva
En armes, et si esploita
Que loez fu de ses amis
Et doutez de ses anemis.
Car les V rois qui guerroiié
Orent son pere et damagié
Fist tous venir à sa merci
Et furent tout à lui sougi.
# |
Quant à merci furent venu,
Tel raēnçon et tel treü
Li rendirent comme lui plot ;
Ne tout entour la terre n'ot
Prince ne roi ne haut baron
PageV01P046
Ne fust en la subjection
De Marcadigas et de lui.
Trop longuement et à anui
Vous tenroie, se recorder
Vous vouloie et tout deviser
Les emprises, les féreïs,
Les batailles, les poigneïs,
Les assaus ne les grans estours
Des chastiaus, des viles, des tours,
Les fuïrs ne les enchauciers,
Les retours ne les raliiers
Qui i furent, ains k'achevée
Fust la guerre ne afinée.
Je ne l'aroie pas conté
En tout le plus lonc jour d'esté.
Mais par Cléomadès avint
Que la guerre à si fait chief vint.
À paines vous recorderoie,
Jà si pener ne m'en saroie,
La valour qui en lui estoit
Et adès i monteplioit.
# |
C'ert li arbres de hardement
Enracinez d'apensement,
Entez de très haute prouece,
Fueillis d'onnour et de largece,
Floris de bonne volenté,
Fructefiez de seürté,
Assavorez d'umble douçour,
Meürs de force et de vigour.
# |
Sa gent qui avoec lui estoient
Sachiez que si grant cuer prenoient
Es grans fais d'armes qu'il faisoit,
Que chascuns hardis en estoit.
PageV01P047
Li couart hardi devenoient
Quant lez Cléomadès estoient.
Tous cuidoit estre asseürez
Qui lez lui estoit ajoustez.
Ses hardemens et ses avis
Faisoit les siens preus et hardis ;
Et s'en lui hardement avoit,
De tel povoir avoec estoit
K'à paines povoit il férir
Nului, nel convenist chéir
De son cheval, ou vif ou mort.
Bien durent avoir grant confort
Gent qui avoient tel seignour
Où tant ot prouece et valour.
Mais de lui ore me tairai ;
D'autre chose vous parlerai.
# |
Sachiez que droit à celui tans
Ot el regne des Aufricans
Trois rois qui grant richece avoient ;
Car moult très grant terre tenoient.
Li uns de l'autre marchissoit
Moult près, et moult l'un l'autre amoit.
Chascuns savoit moult de clergie,
D'ingromance et d'astronomie ;
Car à celui tans vraiement
Ert coustume communaument
Que li grant seignour qui estoient
Adont de clergie savoient
Et savoient de tous langages.
Tex estoit adont li usages.
# |
Les trois rois vous vorrai nommer
Dont j'ai commencié à parler.
L'uns avoit non Melocandis ;
PageV01P048
Cil fu sages clers et soutis.
Biaus et gens, nobles et courtois
Fu, et de Barbarie ert rois.
Et l'autres ot non Baldigans ;
Cil refu grans clers et sachans.
Et fu moult biaus et bien tailliés,
Nès et courtois et afaitiés.
Plains fu de grant chevalerie.
De Maroc tint la seignorie.
# |
Et li tiers avoit non Crompars ;
Cil sot presque tous les VII ars.
Lais et petis fu et boçus.
Iex enfossez et nés camus
Avoit, et si ot courbe eschine
Et le menton sor la poitrine.
Moult fu sages et bien lettrés.
De Bougie fu rois clamés.
# |
Un jour se furent ajourné
Cil troi roi que j'ai ci nommé,
En leur pays, je ne sai ù.
Mai[s] ce dont leur parlement fu
Sai ainsi com l'oy conter.
Moult avoient oy parler
Des trois plus beles Espaignoles
Dont on tenist onques paroles.
Par oïr dire les amoient ;
Car ainc veües nes avoient.
À ce s'assentirent tout troi
Qu'il iroient à grant conroi
Au roi Marcadigas rouver
Ses filles pour aus marier.
Lors s'est rois Crompars avisés
Que laidement ert figurés,
PageV01P049
Et pour ce envis li donroit
Cil rois sa fille saroit droit.
"Seigneur, fait il, n'est pas agas
Li grans povoirs Marcadigas,
Folio7r
Car sougit et obéissant
Sont à lui tout li marchissant
Par la proece de son fill ;
Mais qui ore avoit cuer soutill,
Par quoi peüssions arréer
Que chascuns peüst presenter
I jouel de très grant richece
À ce roi qui a tel noblece,
Je croi que valoir nous porroit."
Lors dist chascuns bon lor sambloit.
Quant Crompars ot qu'il s'assentoient
À ce que les joiaus feroient,
Cele chose moult li plaisoit ;
Car son avantage i cuidoit.
"Seignour, fait il, quant fait arons
Nos joiaus, tout ensamble irons
En Espaigne à ce noble roi.
Et sachiez bien que je i voi
Une chose, s'en sui creüs,
Qui moult nous puet metre au desus.
Tout ce sai je bien vraiement,
Et vous dirai raison comment.
Rois Marcadigas a tel non,
Que chascuns dist k'ains si preudon
Ne fu, ne de tel convenance.
Car tout dient que sans faillance
Tient kan que en conve[na]nt a ;
Et pour ce, kant nous venrons là,
Nos joiaus li presenterons
Par si cun don de lui arons
PageV01P050
Tel que nous li vorrons rouver ;
Et il n'a pas le cuer aver,
Ains l'a si large que, sans faille,
Nous donra le don, quoi qu'il vaille.
C'est li poins par quoi miex poons
Venir à ce k'empris avons ;
Car, se de lui avons l'otroi,
Ses trois filles aurons nous troi ;
Car nous li dirons c'est li dons
Que nous de lui avoir volons.
Jà n'i faurrons, au mien espoir;
Car quan qu'il dist tient on pour voir."
Tout troi sont à ce assenti
Que il le feroient ainsi.
Ne vous sai pas bien deviser
Comment il sorent achever
Les joiaus, ne quel terme il mirent
Au faire ; mais si fais les firent
Que nus n'i peüst amender,
Jà tant s'en seüst bien pener ;
Car li desiriers qu'il avoit
D'avoir celes dont tant ooient
Dire de bien à toute gent,
Leur i fist tout entierement
Metre cuers et cors et pensé.
Tant firent que si achevé
Furent li jouel, et si fait,
C'onques puis ne furent si fait.
# |
Or deviserai les joiaus.
Moult fu chascuns riches et biaus.
Une geline, ce m'est vis,
De fin or fist Melocandis,
Et trois poucines qui sivoient
PageV01P051
Cele geline, et si chantoient
Si doucement que il sambloit
Chascun qui chanter les ooit
K'ains n'oy si grant melodie.
# |
Baldigans ne s'oublia mie,
Ains fist un home de fin or
Qui valoit plus d'un grant tresor ;
Une trompe en sa main tenoit
Où mainte riche pierre avoit.
En tel maniere ert arréés
Li tromperes et compassés,
Que qui le trompeëur eüst
Trestout certainement seüst
Ke, se nus pourchaçast vers lui
Traïson ne mal ne anui,
Li tromperes trompast tantost
Si très haut, que parmi I ost
Fust bien de toutes pars oys :
Si fais fu com je vous devis.
# |
Or vous dirai dou roi Crompart.
Cil refist grandement sa part ;
Car il fist un cheval de fust.
Je ne croi k'ainc puis nus tex fust.
Si faitement le sot ouvrer
Li rois Crompars, et arréer,
Que, quant il vouloit, il estoit
Assez tost où estre vouloit,
Et tout aussi tost retournés
Ert arriere quant c'ert ses grés.
# |
Li chevaus ert tous de benus,
Fors tant que desouz et desus
PageV01P052
Avoit chevilletes d'acier.
Par ces chevilles adrecier
Povoit on faire le cheval,
S'on vouloit, amont ou aval,
Ou par en coste, ou de travers.
Par foi cil cheval fu divers ;
Car, quant on l'avoit esmeü,
Jamais ne l'eüssent veü
Nule gent, ce sachiez de voir,
S'il ne fussent à l'esmouvoir.
Nes cil qui au mouvoir estoient
En petit d'eure le perdoient ;
Car trop plus tost ert esloigniés
Que karrel qui est descochiés.
# |
Or sont li troi jouel nonmé
Qui Marcadigas présenté
Furent, pour ses filles avoir.
Chascuns valoit moult grant avoir.
Gent de petit entendement
Demandent à la fois comment
Tels choses pueënt estre faites
Que je vous ai ici retraites.
Aucun en sont tout esbahi.
Et savez vous que je leur di?
Je leur di que nigromancie
Est moult merveilleuse clergie ;
Car mainte merveille en a on
Faite pieça, bien le set on.
# |
Bien savez que Virgiles fist
PageV01P053
Grant merveille quant il assist
II chastiaus seur II oes en mer ;
Et si les sot si compasser
Que qui l'un des oes briseroit
Tantost li chastiaus fonderoit
Où ens on auroit l'uef brisié.
Encor dist on que essaié
Fu d'un des chastiaus, et fondi.
À Naples le dist on ainsi.
Folio7v
Encor est là l'autres chastiaus
Qui en mer siet et bons et biaus ;
Si est li oes, c'est verités,
Seur quoi li chastiaus est fondés.
# |
Près de Naples un vile a,
Puchole le claime on pieça,
Où Virgiles fist pluseurs bains
Qui faisoient malades sains,
Et ot seur chascun baing escrit
De quel maladie garit
Estoient cil qui s'i baignoient ;
Par l'escripture le savoient.
Mais sachiez que fisicien,
Qui ont fait maint mal et maint bien,
Depecierent tous les escris ;
Car ce n'estoit pas leur pourfis.
Encor se de tels bains estoient
Croi je que pou les ameroient.
PageV01P054
À Naples fist il de metal
Seur I piler un tel cheval
Qui chascun cheval garissoit
D'aucun mehaing, se il l'avoit,
Mais con le loiast au piler.
C[e] ay, pour voir, oy conter.
Li mareschal qui lors estoient
Ens ou pays ne gaaignoient
Nule riens à mareschaucier.
Pour ce le firent depecier ;
Dont il firent mal et outrage,
Mais trop leur faisoit grant damage.
Je croi qui à Naples iroit
K'encor le cheval trouveroit.
À Ronme fist, c'est verités,
Virgiles plus grant chose assez ;
Car il i fist I mireöir
Par quoi on povoit bien savoir,
Par ymage qu'il y avoit,
Se nus vers Romme pourchaçoit
Ne fausseté ne trayson
De ceaus de leur subjection.
Et fist une mousche d'arain
De quoi encor le pris et ain.
À Naples cele mousche mist,
Et de tel maniere la fist
Que, tant com la mousche fu là,
Mousche dedenz Naples n'entra.
Mais je ne sai que puis devint
PageV01P055
La mousche, ne qu'il en avint.
# |
Encor Virgiles fist un fu
Qui longuement à Romme fu.
Adès et nuit et jour ardoit,
Grant aise à pluseurs gens faisoit.
Devant ce feu ot I arcier
Qui n'ert ne de fer ne d'acier,
Ains ert de coivre ; si sambloit
Qu'il vousist traire ou feu tout droit.
En son front escrites estoient
Lettres qui en ebrieu disoient :
"Qui me ferra je trairai jà."
Et un musars passa par là
Qui d'un baston l'arcier féri,
Et il traist el feu : s'estaint si
Que ains puis ne fu ralumés.
Ainsi avint, c'est verités.
# |
Moult ot en Virgile sage homme
Et soutieu ; car il fist à Romme
Une chose moult engingneuse,
Moult soutieu et moult merveilleuse
Briément la vous deviserai,
Au plus adroit que je porrai.
Ne cuidiez pas que ce soit guile ;
Car as IIII cors de la vile,
Seur IIII tours de la cité
Qui erent de la fermeté,
Fist IIII grans homes de piere
De très merveilleuse maniere ;
Car fait erent par nigromance
La longueur d'une droite lance.
Erent grant et d'une façon.
Seur chascune tour tout enson
PageV01P056
En mist I, quant si fais les ot
Comme lui sist et com lui plot.
En tel maniere fait estoient
Que tout droit adès se tenoient,
Chascuns tous ses menbres avoit
Tels com au cors apartenoit.
# |
Or vous dirai que là faisoient
Cil home, ne de quoi servoient.
En la main d'un des homes mist
Virgiles, au jour qu'il les fist,
Une grant pomme de laiton.
Par cele pomme savoit on
Des IIII tans la verité,
Si com de printans et d'esté,
Et de gayn, qui après vient,
Et puis d'yver. Or me convient
K'entendre face clerement
De ces tans le departement.
Pour ce furent li homme mis
Seur les tours que je vous devis.
L'une des tours ot non printans,
La seconde, estés, li plaisans ;
La tierce, gayns, li amés ;
La quarte, yver, li redoutés.
Si tost comme printans passoit
Et li tans d'esté revenoit,
Li hons qui ert desus la tour
De printans, ert de tel atour
Que il getoit droit en la main
Del homme d'esté tout à plain
La pomme que tenue avoit ;
Et li hom d'esté la getoit
Tout droit à l'oume de gayn
Quant ses termes avoit pris fin ;
PageV01P057
Et li hom de gayn l'avoit
Tant que ses drois termes venoit ;
Adont la getoit, à ce point,
À l'oume d'yver tout à point.
Chascune main ert si bendée
De fer et si bien atornée,
Que ele brisier ne povoit
Quant la pomme à li s'asséoit.
# |
Ainsi aloit, n'i faillist jà,
Cele pomme qui dont fu là ;
Car adès à point s'esmouvoit.
De l'une tour à l'autre avoit,
Ç'ai oy tesmoignier au mains,
Trois milles, pou plus ou pou mains.
Par cele pomme adont savoient
Le droit point quant li tans entroient,
Par la chose que vous devis,
Cil de Romme et cil dou païs
Folio8r
Et cil de mainte autre contrée;
Car c'ert chose moult renommée.
Moult longuement dura ainsi
Cele pomme k'ains ne failli
Que ele n'alast à son droit,
De tour en tour, là où devoit.
Mais puiscedi fu essillie
Romme et la chose depecie ;
N'ainc puis ne fu, par verité,
Romme de tel autorité
Que ele à celui tans estoit
Que Virgiles i repairoit.
Ne puis ne fu clers qui refaire
Seüst pomme de tel afaire.
Ou il ne l'osent entreprendre,
Ou il entendent plus aprendre ;
PageV01P058
Car convoitise deçoit mout
Clergie et laie gent par tout.
Il en sont pou qui entechié
Ne soient de celui pechié.
De ce ne vueil or plus parler ;
À autre chose vueil viser.
# |
Moult fit Virgiles de grans fais.
Mais de lui à parler me tais ;
Car se tous ses fais vous disoie
Trop longuement i meteroie.
Grans clers fu, sages et soutiex,
Virgiles, n'en cuit nus de tiex.
Car il fu tex clers à son tans
Que pou en estoit de si grans.
Encor pert bien à son ouvrage
K'en lui ot soutieu home et sage.
Par l'ueuvre connoist on l'ouvrier,
Ce puet on par droit tesmoignier.
# |
Savez pour quoi j'ai recordées
De ses merveilles et contées?
Pour ce que vous devez savoir
K'aussi bien porent sens avoir
Li troi roi de merveilles faire ;
Car clerc furent de grant afaire
D'astronomie et d'ingromance,
Car apris l'orent dès enfance.
S'en sorent tant, au dire voir,
Que on n'en porroit plus savoir.
# |
De ce plus ne vous parleroie.
Qui croire m'en veut, si m'en croie,
Et qui ne le veut, si le laist ;
Car dès ore en avant me plaist
PageV01P059
Que die, sans longue bargaigne,
Comment li troi roi en Espaigne
Porterent le riche present
À Marcadigas le roi gent.
# |
Quant il se furent arréé
Après ce ont pou sejorné.
Tant ont li uns l'autre atendu
Que ensamble sont revenu.
Lors dist Crompars qu'il loëroit
Se chascun d'aus s'i acordoit,
Que il meüssent si à point
Qu'il venissent là à ce point
Que rois Marcadigas fu nés.
Ce seroit li mieudre d'assés ;
Car trop grant feste celui jour
Font Espaignol pour leur seignour.
"Et s'à celui jour li rouvons
Le don que requerre voulons,
Ce jour plus tost le nous donroit
Que un autre jour ne feroit.
La feste iert, vraiement le sai,
Tout droit le premier jour de may
Ce jour fu nés li rois d'Espaigne,
Tout droit en Cales, en Sartaigne;
Pieça que j'en sai la nouvele
Par un marcheänt de Castele
Qui en ma terre est repairans.
En mon pays vient tous les ans
Pour acheter singes et ours
Et marcheändises plusours."
"Je lo que le façons ainsi,"
Dist Melocandis. "Je l'otri;"
"Aussi faz je", dist Baldigans ;
"C'est chose bien aferissans."
PageV01P060
Leur afaire ont apareillié
Que n'i ont gaires detriié.
De leur pays, si com moi samble,
Murent li troi roy tout ensamble.
Que vaurroit que je vous diroie
De leur voie, ne conteroie ?
Tant firent k'en Espaigne furent
Et se maintinrent com il durent
Et com à rois apartenoit.
Marcadigas trouverent droit,
Ainsi com ai dit et conté,
En Espaigne, en une cité
Qui moult ert noble et bien séant,
Et a non Sebile la Grant.
Là ont Marcadigas trouvé
Le jour de sa nativité.
Pour ce grant joie et grant baudour
Ot à Sebile celui jour;
Car li haut baron dou regné
Estoient illuec assamblé.
# |
À ce tans, à coustume avoient
Li grant seigneur que il faisoient
De celui jour qu'il erent né
Grant feste et grant sollempnité.
Et pour ce grant feste faisoient
Li Espaignol ; car moult amoient
Marcadigas, lor bon seignour,
Car sages fu et plains d'ounour.
À Sebile ot maint haut baron
D'Espaigne et dou regne environ.
Le jour que cil roi vinrent là,
Auscuns moult s'en esmerveilla
Pour quel raison venu estoient
En Espaigne, ne qu'il queroient.
PageV01P061
Cléomadès, comme courtois,
Ala encontre les trois rois
À tout grant plenté de sa gent,
Et moult les reçut bel et gent,
Et très à point les honnora.
Devant son pere les mena
Qui moult grant joie à son cuer ot
De leur venue, quant le sot.
Moult très bel les sot recevoir ;
Car moult ot en lui de savoir.
Chascuns leur fist honnour et joie
Plus que dire ne vous saroie.
Chascuns regardoit à merveilles
Crompart, qui avoit grans oreilles.
Bouche et visage et iex et nés
Ot tels que miex sambloit maufés
Folio8v
Qu'il ne faisoit hom terriens.
De biau n'ot en lui nule riens
Dont on se peüst percevoir;
Ce vous di je bien tout pour voir.
De si diverse taille estoit
Que chascuns s'en esmerveilloit.
Quant virent lor lieu de parler,
Devant le roy vinrent ester.
Cléomadès les compaignoit,
Comme cil qui tous biens savoit.
# |
Melocandis premiers parla
Au roy, et moult biau li moustra
La raison pour quoi il estoient
Là venu, et que il queroient,
Tout belement et par compas.
Tantost ne li descouvri pas
La chose qu'il plus desiroit ;
Car moult à point parler savoit.
PageV01P062
Quant au roi ot assez parlé
Si li dist : "Biau sire, aporté
Vous avommes de no pays
Trois joiaus riches et soutis."
Lors li devise mot à mot
Quel force chascuns joiaus ot.
Et li rois les en mercia ;
Car les joiaus forment prisa,
Car moult furent bien à prisier.
Dist Baldigans : "Je vous requier
Sans plus I seul don pour nous trois"
"Et je le vous doing", dist li rois,
"Puisque venu m'estes veöir ;
Or n'espargniez pas mon avoir,
Ne vile k'aie, ne chastel,
Ne or, ne argent, ne jouel ;
Mais demandés hardiëment,
Car je vous tenrai bien couvent."
Quant Crompars l'ot, tost respondi :
"Sire, la vostre grant merci.
Liez nous avez fais et joians ;
Car li dons est riches et grans,
Sire, que donné nous avés.
Ainc si biaus dons ne fu donnés.
Maintenant vous deviserai
Que jà plus n'en atenderai
Quel don de vous avoir voulons :
Vos trois filles vous demandons.
Pour ce sommes nous esmeü
De nos pays et çà venu.
Otroié avés no requeste,
PageV01P063
Drois est que la chose soit preste
Par quoi nous avez otroiié
Le don dont nous sommes si lié;
Quant vous plaira, nous moustrerons
Les joiaus que dit vous avons."
# |
Quant Marcadigas l'entendi
Moult courtoisement respondi.
Bien voit que on deceü l'a,
Mais ainc pour ce ne se mua.
Del otroi riens ne li grevoit,
Fors Crompars, qui si lais estoit.
Des autres se passast assés,
Se li rois Crompars ne fust tés
Que vous m'avez oy retraire.
Mais ce li torne à grant contraire.
"Seignour, fait il, requis m'avés
Don qui moult est de moi amés ;
Mais sachiez bien pas ne cuidoie
Que vous deüssiez tele voie
Aler que mes filles requerre.
Viles, chastiaus, tresors, ou terre
Cuidai que avoir vousissiez,
Dont j'estoie joians et liez.
Si vous pri, se vous tant m'amés,
Que de ce don me deportés.
[Je] nel di pas pour ce, sachiez,
K'assez vaillans gens ne soiez.
Moult ai oy de bien retraire
Et de vous et de vostre afaire.
Mais ne vueil pas k'en I seul jour
Aient mes trois filles seignour.
Plus volentiers, se je povoie,
À trois fois les marieroie.
PageV01P064
Ne vueil pas en I jour passer
Ma joie de les marier."
# |
Et cil dient : "Comment qu'il aille,
No don voulons avoir sans faille ;
Car ce k'en couvent nous avés
Créons bien que vous nous tenrés.
Miex vorriens estre tout troi mort
Que dou don nous feïssiez tort."
Et dist li rois : "Je vous tenrai
Couvent, puisque j'en couvent l'ai ;
Car je ne vueil pas commencier
À mentir, car trop lait mestier
Y a, et cil qui le maintient
À mauvaise teche se tient.
Ne rois ne doit pas estre tés
Que il soit de mentir restés.
Et chascuns s'en doit bien tenir ;
Car laide chose est de mentir."
Quant cil l'oient, joie en ont grant
Le roi en vont moult merciant.
# |
Crompars s'est un pou avant trais,
Qui hideus ert et contrefais,
Mais de clergie avoit grant non.
De Marine a rouvé le don ;
Car bien avoit enquis que ele
Estoit de moult loing la plus bele.
"Rois, fait il, je vorrai avoir
Vo mainsnée fille, pour voir.
L'ainsnée ne vueil pas rouver."
Bon se fait d'outrage garder.
Et li rois n'a rien respondu,
Moult li desplot que si lais fu
Cil qui sa fille li rouvoit ;
PageV01P065
Mais à envis l'en mentiroit.
# |
Lors a Melocandis rouvée
Au roi Marcadigas l'ainsnée,
Et la moienne Baldigans,
Qui moult ert bele et avenans.
Com gent apensée et honneste
Firent, sagement lor requeste.
# |
À Cléomadès moult desplot;
Mais, pour ce que ses peres l'ot
Otroié, n'i mist contredit,
Fors tant k'a conseil li a dit
Que de cel otroi moult li poise.
Et li rois dist que il s'en coise ;
Car ce que en convent leur a,
Ce dist, loiaument leur tenra,
S'il nel perdent par trayson
Ou par aucune mesprison.
Folio9r
"Une autre fois me garderai
D'otroier don tant que saurai
Quel don on me vorra rouver.
Mais tart en sui à aviser."
# |
Dist Cléomadès : "Moult m'anuie
Que cis hom à ce nés de truie
Doit avoir Marine, ma suer.
Sachiez que moult me touche au cuer
K'ainc ne fu si bele riens née,
Ci a trop dure destinée.
À envis m'i assentiroie
Se je pour vous faire l'osoie."
Dist li rois : "Faire le convient."
Adont li consaus le roi vient
PageV01P066
Que Cléomadès ot mandé.
Au roi ont ensamble monstré
Qu'il seroit bon c'on essaiast
Les trois joiaus et esprouvast
Pour savoir se tel povoir ont
Li jouel k'entendre li font.
Et li rois dist bon li sembloit
Et que bien raison y avoit.
# |
À Baldigant a li rois dit
Que il feïssent sans respit
Les joiaus iluec aporter :
Veöir les veut et esprouver.
Et cil nel ont pas destriié ;
Tout tantost i ont envoiié.
Et uns vallés trestout errant
Vint as filles le roi courant.
Ces nouveles leur a contées
Ainsi qu'il les ot escoutées.
Ne leur dist pas qu'il ne savoit
Liquels laquele avoir devoit.
Forment en furent esmaries.
Toutes trois sont de là parties;
En une chambre sont entrées,
Et puis si se sont avisées
Qu'eles en tel lieu se metroient
Que tout à plain veöir porroient
Ceaus qui les avoient rouvées
Au roi leur pere et demandées.
Lors fist chascune en coste I huis
De son coutelet I pertuis.
Nus veöir ne les i povoit
Et chascune par tout véoit.
# |
Les trois rois virent lés leur pere
Près de Cléomadès leur frere.
PageV01P067
Melocandis et Baldigans
Chascuns leur sambla moult plaisans
Et courtois, et de tel semblance
Que bien samblent gent de vaillance ;
Mais dou tiers sont en grant errour,
N'i a cele n'en ait paour,
Quant eles le virent si lait,
Si hideus et si contrefait.
Moult desiroient à savoir
Laquele le devoit avoir.
Chascune grant fréour avoit
Qu'ele donnée ne li soit.
N'i ot nule qui miex n'amast
Morir que ce c'on li donnast.
# |
Ainsi par la chambre esgardoient
Les puceles tant qu'eles voient
Aporter les riches joiaus,
La geline et ses pouciniaus,
Et l'oume de fin or massis
Où mains rubis estoit assis,
Et le chevalet de benus :
Tel cheval ne vit ainc puis nus.
# |
Lors fu la royne mandée,
Done Ynabele la senée.
En la chambre le roi entra.
Chascuns des rois la salua.
La royne moult sagement
À chascun d'aus son salu rent,
Car moult ert courtoise et sachant.
Un petit ot le cuer dolant
Dou don que otroié avoit
Li rois. Mais moult biau s'en passoit.
Son pensé couvroit, comme cele
PageV01P068
Qui de maniere ert bone et bele.
Lors s'assist li rois erraument,
Et la royne et l'autre gent.
# |
Quant par la chambre sont assis
Chascuns se taist ; mos n'i fu dis.
Lors a rois Melocandis prise
La geline d'or et l'a mise
En la chambre trestout enmi
Et les trois poucins d'or aussi ;
Et lors si s'est d'une part trais.
Et chascuns se tint tout en pais ;
Car moult durement desiroient
Cil et celes qui là estoient
Celle merveille à esgarder.
Lors commencierent à aler
Tout IIII ensamble maintenant,
Mais la geline aloit devant ;
Aussi com se chascuns fust vis
Aloient, ce leur fu avis.
# |
Quant alé orent ensement
Lors commencierent doucement
Et très plaisanment à chanter,
Et si à point à acorder,
Que je ne croi c'onques oye
Fust si très plaisant melodie ;
Si que trestout s'en esjoïrent
Cil et celes qui les oïrent.
Dist li rois : "Bien avons trouvé,
Melocandis, en verité,
K'ains riens si volentiers n'oy
Ne si riche jouel ne vi."
# |
Melocandis à tous plaisoit
Et il et ce que fait avoit ;
PageV01P069
Car moult ert biaus et bien tailliez,
Et sages et bien afaitiez.
Moult plot le roy et la royne
Et le poucin et la geline,
Et cil qui les ot aportés
Fu et d'aus et de tous loés.
# |
"Sire, ce dist Cléomadès
Moult samble estre courtois et nés
Melocandis, et de bon sens.
Ma suer ait, c'est bien mes assens.
De cestui me tieng apaié :
Je redout moult pieur marchié."
"Voire, ce dist Marcadigas,
Et si ne tient pas terre agas ;
Car il est rois de Barbarie,
Qui est assez grant seignorie.
Moult me samble bien emploiez
Li dons qui li est otroiez.
Folio9v
Alez, portez li de par moi,
Sa demande je li otroi."
# |
Quant done Ynabele l'entent,
Au roi dist que bien s'i assent,
Et bien li plaist que sa fille ait
Puis que il l'en a le don fait.
# |
Et Cléomadès maintenant
Li dist devant tous, en oïant
Que ses peres li a donnée
Sa fille qu'il a demandée :
"De tout la vous a otroiie
Et bien la tient à emploiie ;
Aussi fait ma dame ma mere,
Puis qu'il plaist ainsi à mon pere,
PageV01P070
Et je m'i assent bien aussi
Puis qu'il plaist à mon pere ainsi.
Elyador aurez l'ainsnée,
Puis que avez cele rouvée."
# |
Et Melocandis enclina
Vers le roi, et l'en mercia.
Liez fu, car bien i ot raison :
En son cuer fu joie en saison.
# |
Quant Elyador entendi
Que cis avoit l'otroi de li,
Moult en fu lié en son corage ;
Car bien sait que dou mariage
De li et dou lait roi Crompart
Estoit ele quite à sa part.
À pou que ne failli li cuers
De grant paour à ses II suers,
Si par furent en grant effroi
Pour maistre Crompart, le lait roi.
# |
Lors passa avant Baldigans
Qui moult fu biaus et avenans,
Et dist au roi : "Je vous present
Cest home d'or, par tel couvent
Que, se nus vers vous pourchaçoit
Trayson, tantost tromperoit,
N'à nului de vostre lignie.
Si fais est il, n'en doutez mie,
Et iert, de ce soiez certains,
Tant qu'il sera entre vos mains ;
Et, s'à un autre le donnés
À celui resera tous tés.
Tous jours pour celui trompera
Qui vers lui comme sien l'aura ;
PageV01P071
Ce vous vueil je pour voir jurer,
Nel puis ore autrement prouver."
# |
Et li rois dist bien l'en créoit
Et que sa fille li donroit.
Donc Ynabele de celui
N'ot au cuer ire ne anui,
Et à ce avoit bien raison
Car assez estoit riches hon ;
De Grenate fu rois et sire,
Ainsi l'ai, pour voir, oï dire.
# |
Feniadisse li otroie
Li rois, et cil en a grant joie,
Le roi en encline et mercie.
# |
Or ne fu pas Marine lie,
C'or cuide ele bien entresait
Que li lais rois à femme l'ait.
S'en fu si de dueil acorée
K'à la terre cheï pasmée,
Et ses serours la releverent
Et doucement la conforterent.
Mais confors n'i valoit noient ;
Qu'ele se pasmoit si souvent
Que c'ert pitez à esgarder.
Ne la povoient conforter
Ses sereurs qui moult s'en penoient,
Mais à chief venir n'en povoient.
Et Elyador, comme sage,
Envoie à son frere I message
Que à li viengne tost parler
Hasteëment, sans arrester.
# |
Cléomadès i vint errant,
Et, quant il sot le couvenant
PageV01P072
Pour quoi sa suer ploroit si fort,
Si li dist qu'ele se confort
Et qu'ele ne s'esmait noient ;
Car il fera, s'il puet, comment
Li rois Crompars pas ne l'ara ;
À son povoir s'en penera.
"Ainçois, fait-il, vous reponroie
Et metroie hors de la voie
Là on ne vous porroit trouver,
Que le deüssiez espouser."
# |
De ce que Cléomadès dist
Marine I petit ensousrist.
Triste ot esté et esplorée ;
Mais ce l'a moult reconfortée
Que Cléomadès dist li a
Que Crompars pas ne l'auera.
Mais I petit trop longuement
Tinrent iluec lor parlement,
Car, entrues que il là estoient
Et Marine reconfortoient,
Parla rois Crompars en tel point,
Si sagement et si à point,
Que rois Marcadigas li a
Otroié que Marine aura.
# |
Le cheval ot ja receü
Marcadigas et retenu,
Et tant avoit li rois raisnie
À la royne et conseillie
Que ele li avoit graé
Que il feïst tout à son gré
Et qu'ele bien s'i assentoit
Puis que faire le couvenoit.
PageV01P073
Ne vous puis pas tout deviser
Leur paroles, ne raconter.
Tant firent qu'il orent tout troi
De roi Marcadigas l'otroi
Dou don qu'il leur avoit promis,
Si que jà ot leur joiaus pris ;
Et, quant Cléomadès le sot,
Au plus tost que il onques pot
Vint à son pere tout irés ;
Mais, com sages et avisés,
Sot bien couvrir ire et anui
Quant il en avoit point en lui.
Devant son pere vint ester ;
Moult très bel li prist à moustrer
À conseil que ne l'oy nus
Fors il et ses peres, sans plus,
Et sa mere qui tant l'amoit
Que plus amer ne le povoit.
# |
"Sire, fait il, moult me merveil
Où vous preïstes tel conseil
Qui otroiastes à nul fuer
À ce roi Marine ma suer
Folio10r
Qui tant est bele et debonnaire
Que nature la sot miex faire.
Et rois Crompars par est si lais,
Si hideus et si contrefais,
Que je croi que, se ele l'a,
K'à nul jour mais joie n'aura,
Ains morra de dueil, ce sachiez ;
Et ce seroit trop grans meschiez ,
C'onques ne vi jour de ma vie
Plus bele ne miex ensaignie;
Et vous en avés fait le don
À ce roi qui est sans raison.
PageV01P074
Je ne sai à quoi tex hom vaille;
N'est pas hom, ains est devinaille.
N'est drois que si laide figure
Ait si très bele créature.
À envis m'i assentiroie
Se je pour vous faire l'osoie.
Maintenant sui de li venus ;
Ains si grans duels ne fu veüs
Qu'ele a demené puiscedi
Que ceste nouvele entendi.
Je vous pri, se vous tant m'amés,
Que ma suer pas ne li donnés ;
Se pour moi le voulés laissier,
Moult vous en vorroie priier."
# |
Dist Marcadigas : "Je li ai
Otroié, et je li tenrai;
Car drois rois ne doit pas mentir.
Pour ce li vorrai je tenir
Couvent, que k'avenir m'en doie ;
Car pour riens je n'en mentiroie.
Autrement feroie je mal.
Et s'ai receü son cheval,
N'en puis par droit arriere aler
Se ne me vueil deshonnorer."
# |
Dist la royne : "Biaus doux fils,
Moult devriez vouloir à envis
Que mon seigneur fust reprouvé
Que il eüst fait fausseté.
Onques ne menti à nului,
Et non fera il à cestui.
Puisque avenu est ainsi,
Couvent leur tiengne, je l'en pri.
Tous jours reprouvé nous seroit
S'en mençonge trouvez estoit."
PageV01P075
Quant Cléomadès entendi
Le roi, moult li desabeli,
Et plus près dou cuer li toucha
Que par semblant ne demoustra.
"Sire, ce dit Cléomadès,
Ne savons se cil chevalès
Est tex qu'il nous fait entendant.
À tout le mains, sachiez avant
Se ce est veritez ou non
Qu'il parait de ma suer le don."
# |
Et li rois dist bien li plaisoit,
Et k'à l'esprouver s'assentoit.
# |
Lors fu rois Crompars apelez
Qui estoit boçus et pelez.
Bien voit au samblant dou visage
Cléomadès qu'au mariage
Ne fassent pas bien, ce li samble.
Tous li cors de fréour li tremble.
Bien pense qu'il s'en vengeroit
S'en aise et en lieu en venoit.
# |
Cléomadès dist que savoir
Veut dou cheval se tel povoir
A en lui comme dit leur a.
Dist Crompars : "Vous le saurez jà.
Et, se vous voulez esprouver
Le chevalet et sus monter,
Assez tost saurez vraiement
Se je di voir ou se je ment ;
Et, se trouvez sui en mençongne,
J'otro c'on me face vergongne,
Car je l'arai bien desservi."
Dist Cléomadès : "Je l'otri ;
PageV01P076
Sus monterai, comment qu'il aille,
Ce vous ai je en couvent, sans faille.
Tout maintenant essaierai
Le cheval, plus n'arresterai."
De ce mot fu Crompars moult liez,
Car bien pensoit c'or iert vengiez
De Cléomadès se il puet ;
Car de cuer la venjance vuet,
Car moult crueus et fel estoit,
Sa façon par droit le devoit.
# |
Et lors li tromperes trompa
Pour ce que rois Crompars pensa
Vers Marcadigas trayson.
De la trompe oyrent le son
Cil qui là assamblé estoient;
Mais moult pou garde s'en prenoient
Que Crompars eüst enpensé
Vers Cléomadès cruauté.
# |
Au trompeëur petit penserent
Et legierement s'en passerent,
Pour ce que cil qui marchissoient
Entour aus leur songit estoient
Et pensoient k'à la mellée
Vers aus n'aroit nus rois durée.
Pour ce le laissierent ester,
Ni orent cure de penser
Qu'il ne doutoient que nus hon
Leur osast faire desraison.
# |
Le cheval mainent en la court,
Et chascun i va et acourt
PageV01P077
Pour savoir se ainsi iroit
Cis chevaus que Crompars disoit.
Sele y ot bonne et bien séant
De benus, forte et bien tenant,
Et estriers tels et si faitis
Que s'uns grans hom ou s'uns petis
I montast, trestout à droiture
Fussent à point et à mesure.
Fraint y ot tel qu'il convenoit
Et k'à tel cheval aferoit.
# |
Marcadigas dist à son fill
Qu'il sache s'il y a perill
Ainçois que il soit sus montés.
Dist Crompars : "Sire, n'en doutés
Que jamais ne se verseroit
Cis chevaus, ains va tous jors droit ;
Tex est li chevaus, sans mentir."
Cléomadès ne volt souffrir
Que nus sur le cheval montast
Ne la grant merveille essaiast
Fors il. Et il [y] est montez,
Et Crompars est avant passez.
Au front dou cheval vint tout droit.
Une chevillete y avoit ;
Folio10v
Un petitelet la tourna,
Et li chevalès s'en ala
Si très tost, que cil qui le virent
Mouvoir, assez tost le perdirent,
Ne sorent qu'il fu devenus.
S'en fu chascuns tout irascus.
# |
Dist Marcadigas à Crompart :
PageV01P078
"Faites retourner ceste part
Le cheval, trop est esloigniez ;
Il me samble assez essaiez ;
Je ne quier que on plus l'essait."
"Sire", dist Crompars entresait,
"Je n'ai povoir dou retorner;
Car j'oubliai à deviser
À Cléomadès, au partir,
Comment il porroit revenir.
Ne m'en souvint s'en fu alés.
Moult en sui de cuer tormentés.
Tant en ai grant ire et contraire
Que ne le porroie retraire."
"Biaus amis", dist Marcadigas,
"Ne sai se vous dites agas
Ou à certes. Mais, par ma loi
Ne par la foi k'à mon fill doi,
Se Cléomadès tost ne r'ai,
Griément à soufrir vous ferai;
Car mais de prison n' isterés
Si sera ici retornés
Cléomadès li miens chiers fis ;
De ce povés estre tous fis.
Par l'oume d'or savoir puet on
K'envers moi pensiez trayson.
Par son tromper le sai et voi ;
Mais trop à tart m'en aperçoi.
Bien me doit torner à anui
Que si mal apensés en fui,
Que vous meïsmes n'essaiastes
Le cheval que vous me donnastes."
Toute la gent fu tormentée
Qui là endroit ert assemblée ;
PageV01P079
Car bien cuident avoir perdu
Celui qui tant leur a valu.
Par parole moult se deffent
Crompars. Mais ne li vaut noient;
Car il fu menez en prison
Tantost, sans point d'arrestoison.
Dolans fu quant il ot empris
Ce pour quoi Espaignol l'ont pris.
# |
Volentiers se repentesist
De son malice, s'il povist.
Pour ce se fait bon aviser
À com fait chief on puet torner
De la chose ains c'on l'ait emprise.
Qui lui et s'onnour aime et prise
Bien en doit chascun souvenir
Que à honeur bee à venir.
# |
Pour Cléomadès demenoient
Grant duel et moult le regretoient.
Bien le devoient regreter ;
Car à son tans n'avoit nul per
K'en lui ot, ce sachiez de voir,
Kan k'en chevalier doit avoir,
Si com de sens et de valour
Et de gentillece et d'onnour,
Et de vigour et de povoir
Et de tous biens, au dire voir.
# |
Je ne vous saroie pas dire
Le grant duel ne le grant martire
Que menerent ses trois serours.
Pasmées, en lermes, en plours,
Les enporta on toutes trois.
Marcadigas, com sages rois,
PageV01P080
Confortoit ses filles, et lui
Ne pourquant, se nus ot anui
Corelment, il l'avoit si fort
Qu'il se haoit plus vif que mort ;
Et ne pourquant si sagement
Confortoit et lui et sa gent,
Que nus hom le povoit plus faire ;
Car moult fu de très bon afaire.
# |
La royne fit duel si fort
Que au sien duel n'ot nul confort.
Sa maisnie l'en ont portée
En sa chambre toute pasmée,
Et l'ont desus son lit couchie
Triste et dolente et esmarie.
# |
Tost fu de joie en duel muée
La gent qui là ert assemblée.
# |
Moult fu Melocandis dolans,
Aussi fu li rois Baldigans ;
Conseil prirent que il iroient
Au roi, et si s'escondiroient
Entre aus II de celui meffait
Que li rois Crompars avoit fait.
Ainsi le firent que vous di.
Marcadigas leur respondi
Que nul mal gré nes en savoit
Ne riens ne leur en demandoit,
Ains se tenoit d'aus apaié ;
Et cil l'en ont moult merciié.
# |
Dist Baldigans : "Puis que vous dites
Ce chascuns de nous en est quites
Et que riens ne nous demandés
PageV01P081
De ce meffait, dont nous donnés
Le don que nous avez promis."
# |
Dist Marcadigas : "Biaus amis,
Droit a en ce que dit avés.
Dou don ne quier estre quités,
Puis que en couvent le vous ai.
Mais, dus qu'à tant que je saurai
De mon fill aucunes nouveles,
Ne sai lequel, laides ou beles,
Ne vous porrai tenir couvent;
Quar je cuit bien certainement
Que mes filles de duel morront
Se eles leur frere ne r'ont.
Pour ce n'est raisons k'ens ce point
Parlons de les marier point,
K'en ce point pas ne le feroient ;
Pour tant ocire se lairoient."
# |
Cil voient bien que raison a
En ce que li rois leur monstra.
Lors penserent k'au demorer
Povoient petit conquester.
Ainsi leur plot que il prendoient
Congié au roi, si s'en iroient.
# |
"Sire, ce dist Melocandis,
Nous en irons en nos pays,
Tant que vous nous remanderés."
Et li roi dist c'est bien ses grés,
Et que il les remanderoit
Quand verroit que poins en seroit.
Folio11r
Et cil li ont en couvenant
Que il revenront à son mant.
De lui se tinrent apaié;
PageV01P082
En lermoiant ont pris congié.
# |
Li rois andeus les acola
Au partir. Lors s'en retourna
Dedens sa chambre, à cuer destroit
Pour son fill que tant il amoit.
Bien cuida couvrir son meschief ;
Mais il n'en pot venir à chief.
Quant les autres ot confortés,
N'i valut riens, sens naturés,
Ne avis, ne apensemens,
Que, si griés ne fust ses tormens
Pour son fill que tant il amoit,
K'en lui nul confort ne savoit.
# |
Bien cuidoit que il fust perdus.
Droit ert qu'il en fust irascus ;
Car bien connoissoit sa vigour
Et sa très grant poissant valour.
Moult fu dolans et esmaris.
Cele part se traist où ses lis
Estoit ; tantost sus se coucha
À tele heure k'ains n'en leva
Dusqu'à tant que nouveles sot
De celui que tant amer pot.
Trop plus que ne vous ai conté
Sont partout dolant et iré.
# |
De là se sont parti li roi.
De la sale issirent andoi.
De la royne pas ne prirent
Congié ; car pour ice le firent
Que ele si grant duel faisoit
Que nus à li parler n'osoit.
N' encore pas veü n'avoient
PageV01P083
Celes que il avoir devoient.
Savoir povez qu'il les veïssent
Moult volentiers, se il pouissent;
Mais ce c'on amender ne puet
Savez bien que laissier estuet.
# |
De là endroit sont departi.
Ainsi s'en vont com je vous di.
Dolant furent que mescheü
Au roi Crompart telement fu ;
Mais bien virent apertement
Qu'il ot tout aviséement
Le preu Cléomadès tray.
S'en erent triste et abaubi ;
Moult très mauvais gré en savoient
Roi Crompart, et moult le haoient,
Et bien pensoient k'à nul jour
N'auroient mais à lui amour.
Car par trayson destourbés
Les avoit et dehonnorés ;
Car par son meffait esloingnoient
Ce pour quoi là venu estoient.
Sachiez que moult près leur touchoit.
Chascuns d'aus moult Crompart haoit.
Souventes fois fu d'aus maudis.
Et Crompars dolans et pensis
Demora, k'amender nel pot ;
Maint anui en la prison ot.
Trayson l'ot à ce mené,
Ele et sa serour Fausseté,
Qui mainte gent ont fait anui.
# |
À tant me tairai or de lui ;
Quant tans en iert g'i revenrai.
De Cléomadès parlerai.
PageV01P084
Qui seur le chevalet s'en va.
En petit de tans le porta
Si loing qu'il ne sot où il fu.
Lors vit il bien que deceü
L'avoit Crompars et engingnié ;
Mais n'ot pas le cuer esmaié,
Ains l'ot si ferm en seürté
Com cil où ains n'ot lascheté.
Car au besoing voit on l'avis
Des seürs cuers et des hardis.
Bien voit qu'il n'aura autrement
Confort, s'en son cuer ne le prent.
Et là en pot il assez prendre ;
Car n'en estoit pas à aprendre
Li cuers, ains en ot tant apris
Que li cors en avoit grant pris.
Lors se commence à aviser
C'une cheville vit torner
Crompart, droit ou front dou cheval.
Lors tasta amont et aval
Pour savoir que ce povoit estre.
À une chevillete à destre
Assena, et il l'a tournée ;
Et li chevaus, sans demorée,
S'est tantost à destre tournés.
Lors tasta au senestre lés ;
Pluseurs chevilles i trouva ;
L'une après l'autre ressaia,
Tant qu'il vit bien qu'il torneroit
Le cheval quel part qu'il vorroit.
# |
Moult durement li abeli
Que la chose trouva ainsi.
De ce dut il bien estre liez ;
Car jamais ne fust repairiez
PageV01P085
Se il ne se fust avisés
Des chevilles dont vous oés ;
Car par les chevilles aloit
Les chevaus quel part c'on vouloit.
Vers la poitrine retasta,
À une cheville assena
Qui en tel fourme faite estoit
Que, si tost que on la tournoit,
Li chevaus, tout en arrestant,
Aloit vers la terre avalant,
Si belement et si soué
Com pluie en avril chiet sor blé.
# |
Tant fist que il sot la maniere
D'aler et avant et arriere
Et bas et haut quant il vouloit.
En ce moult se rasseüroit.
Moult volentiers fust revertis
Au lieu dont il ert departis ;
Mais ne sot quel part commencier
Pour vers Espaigne radrecier,
Car li chevaus l'ot formené
De ce que si tost l'ot porté.
# |
De ce ne vous esmerveilliez
Se il fu las et traveilliez
K'en une nuit et mains d'un jour
Le porta de si grant radour,
Que il vint en une contrée
Qui ore est Toscane apelée.
Adonc avoit non autrement
Cil pays, mais ne sai comment.
# |
Folio11v
C'ert un roiaumes moult poissans.
Sires en ert li rois Carmans.
PageV01P086
Ce fu uns rois de grant noblece,
De grant povoir, de grant richece.
Femme avoit bonne et bele et sage
Et estraite de haut lignage,
Et si avoit à non Clarmonde.
N'ot meilleur dame en tout le monde.
Entre done Ynabele et li
N'orent pas; à bonté failli ;
Car II meilleurs dames n'avoit
Si loing com li siecles duroit.
# |
N'erent orgueilleuses ne fieres,
N'outrageuses, ne bobantieres ;
En eles manoit courtoisie
Et humilitez la florie.
Est dont florie humilitez?
Oil ; et les flours de li [sont] téz,
Que cil qui en Paradis sont
Des fleurs de li lor chapiaus font.
Les esclices sont de pitié
Et les liures d'amistié.
Tel chapel sont plus avenant
Que cil qui sont fait de bobant,
Ne d'orgueil, ne de gloutenie :
Cil sont chapel de dyablie.
# |
Lonc tans ot esté mariée
Done Clarmonde la senée
Au roi Carmant ; mais ainc avoir
Ne porent que I tout seul hoir.
Ce fu une fille; mais ele
Fu de tout le mont la plus bele.
PageV01P087
Clarmondine fu apelée.
Plus bele ne fu oncques née;
Plus estoit gracieuse et gente
Que ne soit en may fleur seur ente.
# |
À celui tans pou savoit on
Roi qui plus fust de grant renon
Comme li rois Carmans estoit
Qui celui roiaume tenoit,
Fors Marcadigas. Mais à lui
Ne doit on comparer nului
Qui à son tans fust rois clamés :
De tous biens les ot tous passés.
À son tans ne fu si parfais.
Mais de lui ore à tant me tais.
# |
Cléomadès vit I chastel
En coste I plain, très fort et bel,
Où il ot mainte bele tour ;
Bos et rivieres vit entour,
Vignes et praëries grans.
Moult fu li chastiaus bien séans.
La façon dou chastel deïsse,
Mais je dout moult que ne meïsse
Trop longuement au deviser,
Pour ce m'en vueil briément passer.
# |
Dou chastel vous dirai le non.
Miex séant ne vit ains nus hon ;
Lors l'apeloit on Chastiau noble.
N'ot tel dusqu'en Costentinnoble,
Ne de là dusqu'en Osteriche
N'ot plus bel, plus fort ne plus riche.
Carmans à ce point i estoit
Que Cléomadès vint là droit.
PageV01P088
Forment li sambloit li chastiaus
De toutes pars riches et biaus.
# |
Cléomadès lors s'avisa
Que vers ce chastel se traira.
Bien pensoit qu'en tel lieu manoient
Gent qui de grant afaire estoient.
Ce fu si k'après la jornée,
Moult faisoit bele matinée ;
Car mays estoit nouviaus entrés.
C'est un tans qui moult est amés,
Et de toutes gens conjoys ;
Pour ce a non mays li jolis.
Une très grant tour, haute et forte,
Avoit assez près de la porte,
Qui estoit couverte de plonc,
Plate deseure ; car adonc
Les faisoit on ainsi couvrir
Pour engiens et pour assaillir.
# |
Cléomadès a avisée
La tour, qui estoit haute et lée ;
Lors pense qu'il s'arrestera
Sor cele tour tant qu'il sara,
Se il puet, la certaineté
Quel pays c'est qu'il a trouvé.
Lors a son cheval adrecié
Vers la tour de marbre entaillié.
Les chevilletes si tourna
Que droit seur la tour s'arresta.
Si coiement s'est avalés
Que seur aigue coie vont nés.
# |
Quant Cléomadès fu venus
Seur la tour, tantost descendus
PageV01P089
Est dou cheval. Si esgarda
Une entrée qui estoit là
Par où on povoit avaler
Ou chastel, et par tout aler.
Lors pensa c'u chastel iroit,
Et son cheval iluec lairoit ;
Car moult très volentiers menjast,
Ce sachiez, se il le trouvast ;
Mais moult biau deporter se sot
De ce que amender ne pot.
# |
Iluec a laissié son cheval.
Par les degrez s'en vint aval.
Moult noble lieu par tout trouva.
Tant ala de çà et de là
Qu'il est venus en une sale
Qui n'estoit ne laide ne sale,
Mais moult bele et nouviau jonchié.
Une table y avoit drecié
D'yvoire à pierres de cristal.
Tout si fait furent li hestal.
Très blanche nape ot desus mise
Ouvrée de diverse guise.
Sor l'un cor de la table avoit
À mengier kan k'il convenoit,
Et sor l'autre coron à destre
Ot vin si bon que vins pot estre,
En pos d'or et hanas autés.
Viande et vin i ot assés.
# |
Or est raisons que je vous die
Que cele table senefie,
Ne pourquoi on mis i avoit
PageV01P090
La viande qui sus estoit
Et le vin et la blanche nape.
Ainçois que li contes m'eschape,
Vous en dirai la verité.
De lonc tans ert acoustumé
Folio12r
En ce chastel et establi
Que on, II mois en l'an, ainsi
Le faisoit, et ne plus ne mains.
Mays en estoit li premerains ;
Car en ce mois le commença
Cil que cel chose acoustuma
Dès le premier commencement.
Or vous di je certainement
Que li secons estoit gayns
Qu'il fait bon aler es jardins.
Ces II mois, chascune vesprée
Estoit la viande atournée ;
Desus la table la metoient
Et puis le vin, lors s'en aloient
Quant fait l'avoient beneïr
À leurs prestres au departir.
Pour may et gayn honnorer
Fist on cele chose estorer :
Le may pour sa joliveté
Et le gayn pour sa plenté.
Lendemain si tost revenoient
Que leur diex aorez avoient
Selonc le tans qui lors estoit.
De cele viande menjoit
Carmans ou II morsiaus ou trois,
Et puis si bevoit une fois,
Et puis li autre grant seignour
Faisoient ainsi tout entour.
# |
Et, quant il avoient mengié
PageV01P091
Entour la table et soulacié,
Adont leur feste commençoit.
Plenté d'estrumens y avoit :
Viëles et salterions,
Harpes et rotes et canons
Et estives de Cornouaille.
N'i failloit estrumens qui vaille ;
Car li rois Carmans tant amoit
Menestreus, que de tous avoit.
# |

O lui avoit quintarieurs,
Et si avoit bons leüteurs,
Et des flaüteurs de Behaigne,
Et des gigueöurs d'Alemaigne,
Et flaüteöurs à II dois.
Tabours et cors sarrazinois
Y ot. Mais cil erent as chans
Pour ce que leur noise ert trop grans.
N'estoit maniere d'estrumens
Qui ne fust trouvée léens.
# |

Cléomadès, qui fain avoit,
Fu liez quant la table perçoit,
Et pense que il mengera
Puiscedi que il trouve là.
Au chief de la table devant
Ot une fontaine sorjant,
Ouvrée de marbre liois
Plus bele ne vit quens ne rois,
À IIII lionciaus d'argent
Qui erent ouvré richement,
Par où venoit cele fontaine
Cler sourdant par conduit d'araine ;
Et Cléomadès i lava
PageV01P092
Ses mains, et tantost il ala
Vers la table, se s'i assist
Com cil qui volentiers le fist.
# |
Assez menja tant com lui plot ;
Et, quant mengié et beü ot,
Si s'est de la table levez.
Vers l'uis d'une chambre est alés
Qu'il vit un petit entrouvert.
Savoir veut de quoi cis huis sert.
En cele chambre entra errant ;
Un grant vilain trouva gisant.
Près ert aussi grans c'uns jaians ;
Moult ert fel et fiers et poissans
Et outrageus et pou bontables.
En sornon ot non Desrainables
Et en son droit non Rustemans.
Maus gracieus estoit et grans.
Tout vestus seur I lit dormoit.
De barbe tant ne quant n'avoit ;
Car tex fu, ce sachiez de voir,
Que barbe ne devoit avoir.
# |
À son chevet avoit pendues
Espées, guisarmes, maçues,
Misericordes et fauchons,
Et bracheus et bouclers roöns,
Et une targe navaroise,
Et une grant mache turcoise ;
Et si avoit pendu encor
Une arbaleste fait de cor,
PageV01P093
Et un cueure plain de quarriaus :
En travers parmi ses mustiaus,
I ut un grant hace danoise.
N'ot pas talent de faire noise
Cléomadès, ains s'avisa
Que il pas ne l'esveillera ;
En coste lui, moult belement,
Passa outre tout coiëment.
# |
Quant le grant vilain ot passé,
Lors a I aloir trespassé
Qui en coste I praël séoit
Où moult de floretes avoit.
Quant au cor de ce praël vint,
Un petitelet coi se tint ;
I huis vit entaillié d'yvoire.
Sachiez que fort seroit à croire
De cel huis com fais il estoit
Qui la façon vous en diroit.
# |
Cléomadès vers l'uis se traist ;
Pour la biauté qui moult l'en plaist.
Une piece l'uis regarda,
Et après à lui le tira
Un pou, et li huis erranment
Ouvri moult debonairement.
Lors est Cléomadès passez
Un pou avant, si est entrés
En une chambre k'ains nus hon
Ne vit chambre de tel façon ;
Car tuit cil qui ainc chambre virent,
Ne de chambre parler oïrent,
PageV01P094
Ne virent si très merveilleuse,
Si riche ne si gracieuse.
À grant merveille riche estoient
Li piler qui la soustenoient.
# |
Plus bele ne vit quens ne rois.
Ne de pilers ne de parois
N'i ot œvre qui entaillié
Ne fust d'uevre triforiié.
D'estoires d'ancienneté
I ot il ouvrage à plenté
Qui fu fais de maistres ouvriers.
Or me seroit il bien mestiers
Folio12v
Que je fusse si avisés
Que li combles bien devisés
Vous fust de la chambre et adroit
Là où Cléomadès estoit ;
Ne pourquant au miex que porrai
La façon en deviserai.
# |
Li combles fu d'uevre esmaillié.
Mainte œvre à point faite et tailliè
I ot de diverse coulour.
Li combles fu de tel valour,
Que la disme pas n'en porroie
Recorder, car jà ne saroie.
Mais de tant sai bien la maniere
Del ouvrage que mainte piere
I ot très riche et precieuse.
Moult fu la chambre deliteuse.
Fenestres teles i avoit
Com à tel chambre apartenoit.
PageV01P095
D'yvoire et de benus estoient
Si ouvrées k'à tous plaisoient.
# |
À piece n'auroie conté
De ce lieu toute la biauté.
Se chascune chose en vouloie
Deviser, trop i meteroie ;
Car, à deviser seulement
La richece dou pavement
De la chambre dont vous oëz
Seroie je tout encombrez ;
Et pour ce le lairai ester,
Car trop metroie au deviser.
# |
Li rois Carmans et la royne
Orent ce lieu pour Clarmondine
Si arréé que je vous di ;
Car il la paramoient si
Que on povoit plus fille amer.
Et, pour le lieu et li garder,
I estoit li grans vilains mis
Qui à l'uis gisoit endormis.
# |
Par dedenz cele chambre entra
Cléomadès. Lors s'arresta,
Tant que il ot bien esgardé
La chambre dou lonc et dou lé.
En esgarder se deduisoit
La grant merveille qu'il veöit.
Clarté de chandoiles i ot
Par quoi bien partout veöir pot ;
Et si estoit jà ajourné,
Par quoi i ot assez clarté.
Sachiez que moult pleü li a
La noblece que il trouva.
PageV01P096
Trois lis vit où ens se gisoient
Trois damoiseles qui dormoient,
Moult beles, ce li fu avis.
Moult erent riches chascuns lis
Où eles estoient couchies ;
Courtoises et bien ensaignies
Furent, et de moult grant lignage.
Chascune ert bonne et bele et sage.
L'une d'eles ot non Florete,
Et li autre avoit non Gaiete,
Et la tierce ot non Lyadès.
Moult regarda Cléomadès
Les trois lis, mais ne sot que faire,
Ou aler avant, ou retraire.
# |
À l'autre lés à destre avoit
I autre lit qui tex estoit
Que vous m'orrés jà recorder.
Briément le vous vueil deviser.
Je ne croi k'ains nus hom veïst
Nul si biau lit, ne tant vausist.
D'or ert, et mainte riche piere
I ot de diverse maniere.
N'erent pas pierres de cristal,
Mais fin rubi oriental,
Esmeraudes et kamahieu ;
Tels pierres orent là lor lieu;
Jagonces, toupaces, saphir
Et gros pelles pour l'embelir ;
Car gros pelles blanc d'Oriant
Sont moult gracieus et plaisant
Pour I riche ouvrage acesmer.
Tant parfist cis lis à loer
PageV01P097
K'ainc si riche lit ne vit nus.
I esprevier ot par desus
Qui moult riches et biaus estoit.
Le lit tout entour pourprenoit
Li espreviers que je vous di :
Et, selonc ce que j'ai oy,
Puis je bien pour voir tesmoignier
K'ains nus ne vit tel ne si chier.
# |
La façon en deviserai
Au plus adroit que je porrai.
De soie ert ouvrez par maistrie,
D'uevre cointe, noble et jolie.
Partout avoit chançons escrites,
Les meilleurs et les plus eslites
C'on peüst nule part trouver
Au tans dont vous m'oez parler.
Tout estoient li chant noté,
N'en y avoit nul oublié,
Et s'erent faites si adroit
Les lettres, que riens n'i failloit
D'uevre si très fine et riche,
Qu'on ne doit pas tenir à niche
L'ouvrier qui la fist, ne celui
Qui tel le fist faire pour lui.
Dou cele de la chambre issoit
Une main d'or à quoi pendoit
Cil espreviers moult gentement
Et tendoit si faiticement
Que nus n'i peüst amender
Jà tant s'en seüst bien pener.
# |
Bien devoit estre cis lis gens
[Et] biaus et riches ; car dedens
Gisoit, si com l'estoire dist,
PageV01P098
La plus bele k'ains nus veïst,
Ne je ne croi que mais veöir
Puist nus si bele, au dire voir,
Si k'en l'escrit le truis et voi ;
Et vous dirai raison pourquoi.
# |
Puis que Diex le monde forma
Et k'Evain à Adam donna,
Ne fu si bele creature,
Tant par estoit bele à droiture
Que, s'ele peüst departir
De sa biauté pour embelir
Autres qui mestier en euïssent,
En li assez biauté preïssent,
C. ou plus en enbelesist
Et assez biauté retenist.
Et sachiez bien que de plaisance
Par ot si très grant abondance,
Folio13r
Que nus nel peüst regarder
Cui ne convenist oublier
Anuis et corrous et ahans,
Tant par ert gente et avenans ;
Et s'ert si plaine de tous biens
K'en li ne failloit nule riens.
# |
Quant Cléomadès veü a
Ce lit, cele part s'aprocha :
Car volentiers vorroit savoir
Qui si biau lit povoit avoir
Et qui dedens povoit gesir.
De ce avoit moult grant desir,
K'ains n'ot veü si riche lit.
Et tant l'aprocha que il vit
La bele pucele dormant.
De plus bele nul ne demant;
Car on ne la porroit trouver
PageV01P099
Ne deçà ne delà la mer,
Ne à ce tans ne puis ce di,
Ne devant ce qu'ele nasqui.
# |
De li la taille devisasse
Se je seüsse ne cuidasse
Que je la moitié en pouïsse
Deviser, je l'entrepreïsse ;
Mais je dout tant que je ne faille
À deviser la noble taille
Et la très grant biauté de li,
Que je forment m'en esbahi.
Et ce n'est pas moult grant merveille;
Car sa biauté n'ert pas pareille
De riens nule à autre biauté;
Car d'autant com plus grant clarté
Donne li solaus que la lune,
Ne se prendroit femme nesune
À la biauté que ele avoit.
De si loing toutes les passoit,
Qu'il n'i avoit comparison
Ne de taille ne de façon,
Ne de riens k'à biauté afiere,
Ne de gracieuse maniere,
Ne d'estre, ne de contenance,
Ne de riens qui tourt à plaisance.
Et s'estoit li cuer de li tés
Qu'il n'i manoit fors que bontés ;
Et s'estoit fine débonaire.
Tel pucele devoit bien plaire.
X [et] IX ans ot, et plus non.
Clarmondine ot la bele à non.
# |
Un petitelet s'abaissa
PageV01P100
Cléomadès, si esgarda
La pucele qui se dormoit ;
Et, quand Cléomadès la voit
Si plaisanment blanche et vermeille,
De sa grant biauté s'esmerveille
Plus que de riens qu'il veïst onques.
Bien tesmoignoit ses cuers adonques
Que onques mais n'avoit veü
Si bele riens com cele fu.
Lors se pensa que, s'il osoit,
Moult volentiers la baiseroit.
Tant s'enhardi qu'il la baisa
II fois, et ele s'esveilla,
Les iex ouvri en souspirant
Qui moult erent dous et plaisant.
Moult durement s'espaouri
Quant I home vit devant li.
# |
Moult s'esmerveilla dont venoit
Cil hons ne quel chose il queroit.
N'ert merveille s'en ot errour ;
Un petit trambloit de paour.
Son douz vis a vers lui torné,
Cléomadès a regardé;
Bien li sambla k'ains mais damel
Ne vit si plaisant ne si bel.
# |
Cléomadès s'agenoilla
Devant li et la salua ;
Et ele son salu li rent
Et li dist : "Biau sire, comment
Estes vous ci endroit venus?
Folement estes enbatus ;
Ne sai qui vous i amena,
PageV01P101
K'ainc mais céens nus hom n'entra
Dusqu'à tant que fusse levée.
Irié en sui et tormentée,
Car fait [m']avez trop grant outrage,
Se fiex n'estes le roi d'Arcage
Qui a [à] non Bleopatris :
Cil là doit estre mes maris.
Ses peres Balcabé a non
Qui moult est rois de grant renon.
Je ne cuit pas que ce soiez.
Se c'estes vous, ne le noiez ;
Car, se vous Bleopatris n'estes,
Se vous aviïez Ve testes
N'en porriez vous une porter,
Ce ne vous quier je jà celer.
Et mes peres li rois Carmans
M'a dit, bien a passé II ans,
K'ou monde si bel home n'a
Que cil à cui donnée m'a.
Et je cuit bien que nus fors il
Ne se metroit en tel peril :
Et pour ce ne sai que j'en die.
Voir m'en dites, je vous en prie;
Car estre me samblés courtois,
Et biaus et nobles et adrois,
Avenans et plaisans et nès."
"Bele", ce dist Cléomadès,
"Plus biau de moi sont il assez ;
Si sui je cil dont vous parlez,
Et si sui cil qui sans faillir
Sui tous à faire vo plaisir.
Pour ce, par fine amour vous pri,
Ne vous anuit que je sui ci."
# |
"Dont me dites, ne soit celé,
PageV01P102
Qui vous a céens amené,
Ne pour quel raison fait l'avés."
"Damoisele, jà le saurés.
De mon regne sui çà venus ;
Ne sevent que sui devenus
Cil de la terre et dou pays
Là où je fui nés et norris.
Moult vous desiroie à veöir,
Pour ce que vous devoie avoir ;
Pour ce sui céens embatus.
Bien croi que ne m'i sache nus.
Et, puis que veüe vous ai,
À vostre congié m'en r'irai ;
Car ne vueil pas tant demorer
Que de riens vous doie grever.
À envis vous corrouceroie."
Clarmondine l'ot, s'en ot joie ;
Folio13v
Car trestout vraiement cuidoit
Que cil là Bleopatris soit.
Tout ce retint pour verité
Que Cléomadès ot conté.
# |
La maniere moult li plaisoit
De Cléomadès. S'avoit droit ;
Car de courtoisie et d'avis
Ert la toupace et li rubis.
Moult volentiers l'ot escouté
Et à chief de fois esgardé;
Et, quant ele plus l'esgarda,
Plus li plot et plus le prisa.
# |
Li sens de lui et la biauté
Ont le cuer de li si donté,
Que dou dart se senti atainte
Qui navré en a maint et mainte :
PageV01P103
C'est li dars que amours set traire
Ceaus qu'ele veut à li atraire.
Amours à point ce dart lança
K'à I coup II cuers assena.
Cléomadès droit à ce point
Senti son cuer de ce dart point;
Dou dart d'amours, si com moi samble,
Furent andoi navré ensamble.
# |
Quant Clarmondine se senti
En si fait point que je vous di,
Ses damoiseles a huchies
Et eles se sont esveillies.
Chascune moult s'esmerveilla
Pourquoi cil hons ert venus là.
Et Cléomadès, com courtois,
Les salua trestoutes trois ;
Mais nule ne l'en respondi,
Tant erent leur cuer esmari.
# |
Cléomadès tantost perçoit
Que sa venue leur pesoit,
Et pour ce tantost s'avisa
Que de cele chambre istera
Tant que eles soient levées ;
Bien voit qu'eles sont effréées
Pour ce qu'il estoit venus là.
Et Clarmondine dit li a
Que il ne li tourt à anui
Se eles n'ont parlé à lui ;
Car, quant la vérité saront
De lui, grant joie li feront.
Moult debonairement li proie 
Que point ne se mete à la voie
PageV01P104
Si leur ait dite la raison
De sa venue et l'ochoison ;
K'à vergoigne li torneroit
Se chascune bien ne savoit
Pourquoi ne comment il vint là.
Cil dist que ainsi le fera
Ne de là ne se partiroit
Dusqu'à tant que il li plairoit.
# |
Or, sachiez que de ce commant
Ot Cléomadès joie grant ;
De joie tous li cuers li rist.
Après ce mot de la chambre ist.
Si entra en I praëlet
Moult gent et moult noble et moult net,
Où ot mainte diverse flour
Qui getoient très bonne odour.
Là s'est Cléomadès assis,
D'amours alumés et espris ;
Car onques mais n'avoit sentu
Nul dart d'amours tel com cil fu.
# |
Et la pucele s'est levée
Qui noblement fu acesmée;
Mais, ainçois k'acesmée fust
Ne que de son lit se meüst,
Vinrent à li ses [trois] puceles
Si effréées comme celes
Qui cuidoient estre honnies
Dou roi Carmant et mal baillies ;
Car Clarmondine leur conta
La chose si com ele va
PageV01P105
Qu'ele n'i a riens oublié ;
Car bien cuidoit, par verité,
Que ce que il dit li avoit
Fust voirs, ensement le créoit.
Celes dient que le vorront
Veöir, et sa parole orront.
Et Clarmondine leur a dit
K'ainc si courtois de lui ne vit,
Plus sage, ne plus bel parlant,
Ne plus bel, ne plus avenant.
Forment plus as trois damoiseles
Quant entendirent les nouveles
Que Clarmondine dit leur a.
Chascune d'eles bien cuida
Que ce fust toute verité
Que ele leur avoit conté.
S'en sont auques rassouagies ;
Et, quant furent apareillies,
Trestoutes IIII sont issues
Fors de la chambre, et sont venues
Enz ou praël, là où séoit
Cil qui amours saisi avoit,
Et cele enz ou praël entra
Cui amours aussi saisie a :
Ses puceles furent o li.
Et Cléomadès sus sailli ;
Liez est de ce que venir voit
Cele qui tout son cuer avoit.
# |
Contre li s'en vint sans demeure.
"Bele, fait il, à très bonne heure
Puissiez vous hui estre levée."
"Biau sire, tele destinée
PageV01P106
Vous soit destinée à tous jours
Que vous aiez joie d'amours."
"Damoisele, cil vous en oie
Qui les amans puet donner joie,
Et d'amours si grans biens vous viengne
K'a son servise vous retiengne ;
Car, s'ainsi estoit que je di,
Dont n'auroit pas amours failli
Qu'ele n'eüst de son maisnage
Bele pucele et bonne et sage."
"Biau sire, se je tele estoie
Que vous dites, lie en seroie."
# |
Cléomadès courtoisement
Les trois puceles erranment
L'une après l'autre salua.
À chascune moult agréa
La maniere k'en lui véoient ;
Son sens et sa biauté prisoient.
Tout V s'assisent ou praël ;
Ne croi k'ainc nus veïst si bel.
Moult ont Cléomadès trouvé
Courtois et à point emparlé ;
Folio14r
Car sages fu et entendans,
Et tous jours à honnour tendans,
Et par tout aidier se savoit
Si bien que miex ne convenoit.
# |
Cléomadès couvertement
Enquist, ce n'oublia noient,
Tant qu'il sot bien en quel regné
Li chevaus l'avoit aporté,
Et que cele qu'il amoit tant
PageV01P107
Estoit fille le roy Carmant.
De li meïsme le savoit,
Dont en son cuer grant joie avoit
Que il avoit assis s'amour
En fille à roy de tel valour ;
Car li rois Carmans à ce tans
Estoit des rois uns des plus grans
En tant que de très grant richour
Et de gentillece et d'onnour.
Une piece ensamble parlerent,
D'amoreus iex se resgarderent
Cléomadès et Clarmondine.
Amours en leur cuers enracine ;
Car que plus l'uns l'autre véoit
Plus l'uns l'autre amoit et prisoit.
# |
Tant furent là k'ainsi avint
Que li vilains cele part vint
Qui ert mis à l'uis pour garder,
Dont ore m'oïstes parler.
Par une fenestre esgarda
Cléomadès qui séoit là.
Li vilains très grant merveille ot
Par où cil hom là venir pot ;
Car bien cuidoit avoir fermées
De cel lieu toutes les entrées.
Moult fu dolans et esbahis,
Et courrouciez et esmaris,
Et jure que mais ne croira
Femme nule, quant cele là
Qui de tous biens avoit le non
A faite tele mesprison.
Bien pense que ses damoiseles
En orront, s'il puet, gries nouveles.
PageV01P108
D'iluec s'en est tournés atant,
Dire l'ala le roi Carmant.
Quant li rois tel nouvele oy,
Sachiez pas ne li abeli ;
Corrouciez fu et plains d'anui.
De sa maisnie prent o lui.
Vers le lieu s'en va où estoient
Cil et cele qui moult s'amoient.
Par le pertuis d'une fenestre
Regarda au lés devers destre,
Tant que Cléomadès choisi
Et sa fille lez lui aussi.
Sa fille I chapelet faisoit,
Et Florete les flours cueilloit
Entre li et Cléomadès,
Entre Gayete et Lyadès
Servoient de soie baillier
Pour le chapel faire liier.
# |
Moult durement fu despaisiez
Li rois Carmans et courrouciez
Que uns hom k'ains veü n'avoit
Si privez de sa fille estoit
Qu'ele l'avoit là amené
Sans son seü et sans son gré.
Lors se pense qu'il mandera
Lyadès ; car savoir vorra
Comment ele fu si hardie
Qu'ele a tel chose consentie.
Le grant vilain lors i envoie
Cui cele chose moult anoie,
Car à garder li ert livrée
PageV01P109
La pucele sage et senée.
Ens ou praël s'en vint tout droit.
Quant Lyadès venir le voit,
Trestout erranment s'est levée,
Car moult fu sage et avisée,
Et pensa qu'ele li diroit
La chose, et li descouverroit,
Pour ce que il pas ne cuidast
Que on nul malice i pensast
En ce que là venus estoit
Cet hom qui là trouvé avoit.
# |
Bien se perçut que corrouciez
Estoit li vilains et iriez.
Et il, moult despiteusement,
Li dist : "Venez hastéement
Au roi, qui mandée vous a."
Et cele tantost s'avisa
Pourquoi li rois l'avoit mandée.
Errant est vers le roi alée,
Et l'a en la chambre trouvé.
Melancoliëus et iré
Le trouva; mais tout erranment
Li a conté tout l'errement
Si com Cléomadès l'ot dit.
Quant li rois Carmans entendit
Que cil dist que Bleopatris
Estoit, tous en fu esbahis ;
Bien sot que n'est pas verités.
Tantôt est ou praël entrés,
Et cil dou praël sus saillirent
Sitost que le roi Carmant virent.
# |
Ne fist pas samblant effréé
Cléomadès ; mais salué
PageV01P110
A le roi moult courtoisement.
Mais ne li respondi noient
Li rois, ains dist c'om le presist.
Chascuns de sa gent main i mist.
Legierement se laissa prendre
K'ains ne fist samblant de deffendre;
Tout apenséement le fist,
Car deffense pou li vausist.
Quant la pucele a ce veü
Moult en ot le cuer irascu ;
Car ne set pourquoi on le prent,
Com cele qui mal n'i entent.
Devant le roi s'agenoilla ;
Li rois meïsmes l'en leva.
# |
"Sire", fait ele, "ce que doit
Que vous voulés ici endroit
Celui faire mal et hontage
Qui sera, s'il vit, roi d'Arcage;
Et si m'avez dit grant pieça
C'est cil qui à femme m'ara.
Ce li demonstrez povrement
Quant pris et liiez l'ont vo gent.
Pour ce, se venus m'est veöir,
Ne doit il pas tel honte avoir ;
Car aussi ait m'ame pardon
Que il n'i entent trayson,
Folio14v
N'il n'en a ouvré faussement."
# |
Et, quant li rois sa fille entent,
Bien entent que par li n'a mie
Celui emprise sa folie,
Et que moult très grant tort auroit
Cil que de riens l'en mescroiroit.
PageV01P111
"Fille", ce dist li rois, "sachiez
Ce n'est pas cil que vous cuidiez.
Onques mais cest home ne vi.
Grant merveille est dont il vint ci.
Croire vous faisoit fausseté :
N'est pas fiex le roi Balcabé.
Quant il venra en ce pays,
Tous mes palais verrés emplis
De rois, de princes, de barons.
Je croi k'assez tost le verrons.
Sachiez que cil est un guilerres
Mauvais et traytres et lerres ;
Vostre honneur vou vouloit tolir.
Tart en venra au repentir ;
Car je le ferai escorchier
Tout vif, et la teste trenchier,
Pendre, ou ardoir, ou enfouir :
À l'un ne puet il pas faillir."
# |
Quant Clarmondine l'entendi,
Près que ses cuers ne li parti ;
Car bien vousist que femme fust
Celui, et k'avoir le deüst,
K'ains n'ot veü, à son avis,
Nul plus courtois, ne miex apris,
Ne si bel, ne si avenant.
Moult li va près dou cuer touchant
C'on l'a en mençonge trouvé
Dont ele cuidoit vérité
Et qu'estre deüst ses maris ;
Dont ses cuers fu si esmaris
K'a la terre cheï pasmée.
De là l'en ont sa gent portée
Moult dolente et moult courroucié
De cuer, et moult forment irié.
PageV01P112
Ses puceles la reconfortent.
Tout droit sus son lit l'en reportent
Et li dient : "Laissiez le aler;
Puis que il nous vouloit guiler,
N'avons de tel home que faire ;
Car il n'est pas de bon afaire.
Encor soit il et biaus et gens,
C'est un deceveres de gens.
Puis [que] il est de tel mestier,
Drois est qu'il en ait son loier."
# |
À Clarmondine ainsi parloient ;
Car reconforter la cuidoient.
Mais ce ne li ert nus confors ;
Car ses cuers n'ert pas en son cors,
Et, pui que li cuers n'i entent
Au confort, ce ne vaut noient.
Et comment i entendera
Li cuers, quant il ne sera là
Où on le cuide conseillier ;
Ce ne porroit fructefiier.
Avoec Cléomadès fu pris
Li cuers Clarmondine et saisis.
# |
Done Clarmonde est là venue.
Quant la nouvele ot entendue,
De la chose s'esmerveilloit;
Sa fille moult reconfortoit,
Et li dist que ele avoit tort
Que ele menoit duel si fort
Pour un home que ne savoit
Qui il ert ne dont il venoit.
# |
Lors li a Clarmondine dit
K'ains si courtoise riens ne vit,
PageV01P113
Ne de ce nului ne croiroit
Que de bon lieu venus ne soit;
Car ne porroit estre autrement
Que nus hom de tel escient
K'en lui avoit, fust jà venus
Fors de bon lieu n'en parolt nus.
# |
Sa mere à ce mot se leva
Et pense que veöir vorra
Cel home que tant a prisié
Sa fille. Lors n'a plus targié.
Tantost s'en vint au lieu tout droit
Là où Cléomadès estoit.
En la court l'avoient mené ;
Entour lui s'erent assamblé.
# |
Quant done Clarmonde vint là,
Cléomadès moult regarda.
Bien li sambla que voir ot dit
Sa fille de ce k'en lui vit.
Chascuns li demande et enquiert
Quels hons est, où va, ne que quiert,
Ne comment il ert apelez;
Mais ses nons leur fu bien celez.
# |
Moult à envis se nommeroit
S'autrement eschaper povoit.
À chascun respont sagement
Et si très apenséement,
Que trestout s'en esmerveilloient
De l'avis que en lui véoient;
Et à ce se tenoit li plus
Que de bon lieu estoit venus
Et que moult grant pechié feroit
Li rois Carmans s'il destruisoit
PageV01P114
Si bel home comme cil ert,
Et qui si bien gentiex hom pert;
Et cil qui ce li loëront
Grant mal et grant pechié feront.
# |
Li rois Carmans li demanda
Comment il estoit venus là,
Et pourquoi il avoit empris
À tolir sa fille son pris
Si bon qu'ele l'avoit eü
Dou tans que ele avoit vescu,
K'ains de nule n'oy parler
Cui il vousist miex ressambler
Se il fust de toutes à chief,
Pour ce li devoit estre grief.
# |
Et, quant Cléomadès l'oy,
Au roi erranment respondi
Que pour ce n'ert pas venus là
N'onques vers li mal ne pensa ;
Et, se nus l'en vouloit rester,
Il seroit tous près de prouver
Si avant que li rois diroit.
Et li rois dist prouvé estoit.
Ne quiert qu'on le prueve autrement;
Mais volentiers sauroit comment
Ne par où léens venir pot,
Quant nus sa venue ne sot.
Dist Cléomadès : "Jel diroie
Se estre creüs en povoie.
Folio15r
Sire rois, fait il, entendés.
Par tout estes moult renommés
De sens, d'onnour et de raison ;
Et, pour ce k'avez tel renon,
Vous dirai comment je ving ci,
PageV01P115
En espoir de vostre merci.
Chevaliers sui, c'est verités.
Destiné me fu, quant fui nés,
Une chose moult merveilleuse,
Moult diverse et moult perilleuse.
Tous jours, au chief de III années,
Me prennent en mon dormant fées,
Seur I cheval de fust me metent,
Moult me mainent, moult me degetent,
Moult me font de paine endurer;
Mais je ne le puis amender,
Car ainsi le convient à estre.
Une fois me mainent à destre,
Et à senestre l'autre fois ;
Par mons, par vaus, par chans, par bois,
En tel point me vont pourmenant,
L'une heure arriere, l'autre avant.
Des travaus que me font avoir
Me font perdre tout mon savoir ;
Car si me mainent rudement
Que j'en pert tout mon escient ;
Et, pour ce, doi avoir deport
Quant eschapez sui de la mort.
Trois jours, ne vous mentirai mie,
Sui adès en leur conpaignie ;
Et, quant ce vient droit au quart jour,
Seur toute la plus haute tour
Que à ce point trouver porront
Me metent, et puis si s'en vont.
Hui main, si tost qu'il ajourna,
Me mirent seur cele tour là.
Sachiez que moult me traveillierent.
Moi et mon cheval là laissierent.
Encore i est li chevalès,
Car celui me laissent adès
PageV01P116
Seur quoi en tel point me travaillent.
Tous jours nouviau cheval me baillent.
Or n'aurai mais garde en trois ans
Que j'aie plus de tels ahans.
Et, se de ce ne me créés,
Seur la tour le cheval querés.
S'ainsi n'est que m'oez conter,
Si me faites le chief couper.
Je vous pri que là envoiez
Ainçois k'à la mort me jugiez.
Et, se vous voulés, je irai,
Le chevalet aporterai ;
Car, se nus fors je l'aportoit,
Espoir tost le debriseroit,
Car n'en sevent pas la maniere.
Faites moi devant et derriere
A vostre gent si près garder
Que je ne leur puisse eschaper.
Se il n'est ainsi que je di,
Onques n'aiez de moi merci.
Et, s'en verité trouvez sui,
Ne me faites mal ne anui ;
Car ce seroit maus et pechiez
Se sans raison me destruisiez."
Et li rois dist jà le saura.
Tantost sus la tour envoia
Cléomadès, et de sa gent
Envoia avoec lui granment
Qui moult le guetoient de près.
Seur la tour vint Cléomadès.
Son chevalet trouva tout droit
Ainsi que il laissié l'avoit;
Devant le roi l'a aporté,
Et li rois l'a moult regardé.
PageV01P117
Dou cheval moult se merveilloient
Tout cil qui là endroit estoient.
N'i ot nul esbahis ne fust
Quant virent le cheval de fust.
Li rois forment s'esmerveilloit
De la merveille qu'il véoit.
De grant piece mot ne sonna,
Cléomadès moult regarda.
De Cléomadès ot pité
La royne si que ploré
En ot moult entrues qu'il contoit
Sa besoigne au miex qu'il povoit
Pour querre tour de delivrance ;
Car ne vit pas, à sa semblance,
Que il peüst en lui avoir
Par droit, fors bonté et savoir.
# |
Lors s'est vers le roi aprochie
La royne bien ensaignie.
Moult doucement au roi a dit
Que il eüst de lui mercit.
Tant li dist et tant li pria
Et tant de bons poins li moustra,
Que li rois l'eüst tout quité
Se ne fust ce qu'il l'ot trouvé
Lès sa fille ou praël séant,
Et ce qu'il li fist entendant
Que estre devoit ses maris
Et que c'estoit Bleopatris ;
C'estoit ce qui près li touchoit.
Et à ce bien raison avoit ;
Car bien li sambloit que traïr
Volt sa fille et s'ounour tolir ;
Et, pour ce, à mort le jujoient
Moult de ceaus qui iluec estoient.
PageV01P118
Ne pourquant li a demandé
Li rois et forment conjuré
Pour quoi sa fille fist cuidier
K'avoir la devoit à moillier
Et que fiex ert roi Balcabé ;
Voir l'en die, ne soit celé.
Et Cléomadès dit li a
Que la verité l'en dira.
# |
"Sire", fait il, "quant aportés
Fui seur la tour que vous veés,
Trestout erranment s'en allerent
Les fées qui m'i aporterent.
Là demourai tous esbahis.
Delez ce chevalet m'assis ;
Car forment estoie lassez
Et traveilliez et afamez.
Quant je fui revenus à moi
Et un petit reposé m'oi,
Par une entrée que trouvai
Jus de la tour m'en avalai ;
Car moult très volentiers seüsse
En quel pays, se je peüsse,
Les fées m'avoient laissié
Hui main quant d'eles oi congié.
Folio15v
Car, seur m'ame, je ne savoie
En quel pays venus estoie.
Amont et aval tant alai
K'en une sale me trouvai
Qui netement ert atournée
Et moult gentement arréée.
Là trouvai la table drecie
Et blanche nape de liie;
Viande et vin i ot assez,
Et je, qui estoie lassez,
PageV01P119
En menjai, car grant fain avoie.
Et lors si me mis à la voie,
Quant je oi mengié et beü;
N'avoie encor nului veü.
Un huis vi entrouvert I poi.
Au plus tost que je onques poi
Entrai en cel huis. Tout errant
I grant vilain trouvai dormant.
Lez lui tout coïement passai,
En la plus bele chambre entrai
Qui soit el mont, si com je croi;
Trois damoiseles devant moi
Vi qui seur trois lis se gisoient ;
Bien me sambla qu'eles dormoient.
En sus de leur lis m'eschivai,
Au coron de la chambre alai
Où il en avoit I des lis,
Dont je fui trestous esbahis
De la chambre et de la noblece
Dou lit et de la grant richece
Que je de toutes pars véoie.
Durement m'en esmerveilloie.
Vostre fille en ce lit trouvai,
Que fouls fis, car je l'esveillai,
Pour ce que je savoir vouloie
En quel pays venus estoie.
Et, si tost que l'oi esveillie,
Moult durement fu esmarie.
Lors me dist que moult folement
Estoie venus telement,
Et grant outrage fait avoie,
Se je Bleopatris n'estoie
À cui vous l'aviez otroiie.
Quant j'oi cele parole oye,
Je li dis trestout erranment
PageV01P120
Que j'estoie certainement
Bleopatris, lors le cuida,
Et que venus estoie là
Pour ce que volontiers l'eüsse
Veüe ainçois, se je peüsse,
Que li mariages fust fais.
Or, regardez se c'est meffais
K'ainc malice n'i entendi,
Ne je ne vostre fille aussi.
Mais, pour le bien k'en li trouvai
Quant en sa chambre à li parlai
Et pour la biauté que g'i vi,
M'avisai je de ce tour ci;
Car à tous jours, se je pouisse,
Avoecques li manoir vousisse
Despuis que premiers l'oi veüe.
Mais sachiez très bien que tolue
Ne li vorrois avoir s'onnour
Pour plain d'or cele haute tour,
Ne onques pour li decevoir
Ne ving ci, se sachiez de voir.
Mais pour ceste raison cuida
Que voir deïsse. Lors hucha
Ses trois puceles erraument,
Et eles moult hastéement
Se leverent isnel le pas.
Mau gré ne les en sachiez pas ;
Car bien samblerent hors dou sens
Quant eles me virent léens,
K'ainc d'eles ne fui respondus,
Ne pour bon jour ne pour salus,
Que onques leur seüsse faire,
Tant avoient ire et contraire
De ce que léens ere entrés.
Ireusement fui regardés,
PageV01P121
De toutes trois. Lors m'en tournai.
Dedenz I praëlet entrai.
Quant vi qu'eles durent lever
N'oi raison de plus demorer.
Aval le praëlet alai
Et tant i fui que j'esgardai
Vostre fille et ses trois puceles
Qui vers moi venoient com celes
Qui bien sembloient rapaisies
De ce dont furent corroucies.
Lors vi bien que tout devisé
Lor ot vostre fille et conté
La chose k'entendre li fis.
Delez li ou praël m'assis.
Des damoiseles m'acointai ;
Bonnes et sages les trouvai.
Ne fusse pas drois chevaliers,
Ains fusse faillis et laniers,
Se en tel lieu ne remainsisse
Si longuement que je pouisse,
Mais n'en quéisse remouvoir.
Or, vous ai conté tout le voir ;
N'ainc malice n'i entendi,
Si puisse je partir de ci,
Et pour ce merci vous requier
Que ne me faites destourbier
Ne de mon cors ne de ma vie ;
Car n'ai pas la mort desservie."
# |
Quant li rois ceste chose entent,
D'une part apela sa gent
Et son conseil pour demander
Comment il en porra ouvrer.
Li un le jujoient à mort.
Aucun disoient c'iert à tort,
PageV01P122
Et que grans damages seroit
De tel home s'on l'ocioit.
Plusour dient c'on li coupast
I poing, et puis si s'en alast.
L'uns disoit avant, l'autre arrier.
Grand debat avoit au jugier.
En la fin fu li acors fais
À ce que il seroit desfais.
# |
Lors dist li rois c'on le pendist
Et que on plus n'en atendist.
Cil commans moult desabeli
La royne quant l'entendi ;
Moult en fu dolente et irie.
De là endroit s'est departie,
Car n'eüst pas de v[e]öir cuer
Que on feïst mal à nul fuer
Celui qui si grant grace avoit
Que nus hom plus avoir povoit.
# |
Folio16r
Et quant Cléomadès entent
De lui le mortel jugement,
D'un moult sage point s'avisa;
Au roi Carmant moult biau parla.
"Rois", fait il, "s'en vous a noblece
Ne droite honnour, ne gentillece,
Puiscedi k'eschaper ne puis,
Par gentillece I don vous ruis,
C'est que vous pas ne me pendez
Comme larron qui est prouvez ;
Car les chevaliers ne doit on
Pas pendre, s'il ne sont larron,
Ou s'il n'ont par trayson fait,
Murdre ou autre vilain mesfait.
Et, puis c'ocire me voulez,
PageV01P123
J'aim miex estre tous découpez
D'espées et [de] dars molus
K'estre comme lerres pendus.
Et, pour ce, vous requier et pri
Que seur ce chevalet ici
Me laissiez monter sans estrif.
Car j'aim autant cestui c'un vif ;
Et, s'un vif me voulez baillier,
De tant ferez plus à prisier.
Si tost que monté me verrez
Seur quel cheval que vous vorrez,
Faites me tuer maintenant
D'armes, et je miex ne demant.
Puis que je doi mort recevoir
J'aim miex d'armes la mort avoir,
Que ne feroie estre enfouis,
Escorchiez, ou ars, ou boulis,
Puis que ainsi m'est destiné;
Or me faites ceste bonté
En l'onnour de chevalerie."
# |
Folio16r
Et li rois Carmans l'i otrie ;
Car moult pou li chaloit comment
Cil eüst pris son finement.
Et quant Cléomadès l'oy,
Trestous li cuers l'en esjoy.
Moult sagement les decevoit
En ce k'autre cheval rouvoit ;
C'ert pour ce que on ne cuidast
Que son cheval plus convoitast
Que il I autre ne feïst.
Tant parla au roi et tant dist,
PageV01P124
Et si sagement esploita,
Que li rois congié li donna
De monter seur son chevalet.
Et lors s'assemblerent vallet
Et plusours gens de maintes pars
À espiex, à lances, à dars,
À espées et à bastons ;
Grosses pierres en leur girons
Prendoient aucun pour ruer.
Cléomadès ala monter
Seur son cheval si tost qu'il pot
Quant dou roy le congié en ot.
# |
Liez fu quand il se sent montez,
Car bien sot qu'il fu eschapez.
Lors n'atendi pas longuement,
Ains mist la main apertement
Au front dou cheval, et tourna
La cheville, et lors s'en ala
Li chevaus à tout lui errant,
Si très tost parmi l'air fendant,
K'à merveilles s'en esbahirent
Cil qui de là partir lé virent.
Moult se tinrent pour deceü
Quant ainsi eschapez lor fu.
Li uns vers l'aultre regardoit.
Chascuns si esbahis estoit
Que il ne savoient que dire ;
Corroucié furent et plain d'ire.
# |
Dist li rois : "Bien nous a tray
Cis hom qui nous eschape ainsi ;
Maternent nous a deceüs
Quant ne savons qu'est devenus."
PageV01P125
Dirent sa gent : "Sire, sachiez,
N'est pas hom, jà ce ne cuidiez ;
Miex créons que ce soit maufez
Qui fors d'enfer soit eschapez
Et se soit mis en guise d'onme.
N'est pas hom mortex, c'est la sonme;
Car nule riens ainsi n'iroit
Se dyables d'enfer n'estoit."
# |
Ainsi entre aus se derusoient.
De plus en plus s'esmerveilloient.
Et Cléomadès s'en ala,
Qui moult très petit aconta
Se il furent lié ou dolant.
À ce aloit petit pensant ;
Car tout adès li souvenoit
De Clarmondine, et bien baoit
Li à reveöir temprement.
Quant Clarmondine sot comment
Cléomadès d'aus eschapa,
En son cuer joie en demena
Et en gracia asés Diex,
Car moult l'en aleja ses diex.
# |
Comment que il s'en soit alez,
De ce n'iert jà ses cuers ostez
Qu'il puist estre que hom si fais
Venist onques de lieu mauvais;
Si gens, si nobles, si plaisans,
Si biaus, si courtois, si sachans,
Fors que de bon lieu ne venoit.
Dou tout à ce point se tenoit.
PageV01P126
De lui encore reveöir
N'avoit pas perdu son espoir.
# |
Cléomndès qui s'en aloit
Le cuer Clarmondine enportoit;
Le cuer Cléomadès aussi
R'avoit Clarmondine avoec li.
Ainsi de cuers changié avoient ;
Mais le change pas ne savoient.
Changes de cuers si amoreux
Ne fu ainc fais com de ces II.
À II cuers moult forment plaisoit
Li changes qui d'aus fais estoit.
# |
Ne se tinrent pour engingnié
Li cuer, mais si bien apaié
Que au change faire, sans faille,
Ne mirent onques repentaille;
Car le change si fait avoient
Que repentir ne s'en povoient,
N'il n'en avoient volenté ;
Car amours leur ot commandé.
Car en tous lieus a son commant
Amours, ce sevent li auquant.
De ce vous lairai ore ester ;
D'autre chose vorrai parler.
# |
Folio16v
Cléomadès tant esploita
Seur son cheval, et tant erra,
Qu'il vit de la terre d'Espaigne
Maint val et mainte grant montaigne.
Tant ot li chevalés porté,
K'à Sebile, la grant cité,
Vint tout droit, par I merkedi.
Par fine verité vous di
PageV01P127
C'onques ne fu joie veüe
Si grande k'à sa revenue.
# |
Bras ouvers contre lui ala
Marcadigas, quant veü l'a ;
Baisié l'a, tenir ne s'en pot ;
Car onques si grant joie n'ot,
Ne onques mais seü n'avoit
Que grant joie de cuer estoit.
Mais adont primes le sot il,
Quant vit Cléomadès son fil
Que il cuidoit avoir perdu.
De toutes pars sont acoru
Cil qui la nouvele entendirent ;
Mais, quant de lui parler oyrent,
Ses trois serours tel joie en orent,
K'à paine soustenir se porent.
# |
Tant firent k'à leur frere vinrent.
Toutes trois en leur bras le tinrent ;
Des bras leur mere l'ont osté
Qui le tenoit fort acolé ;
Baisié l'ont moult et conjoy.
C. tans plus que je ne vous di
Ont par la cité joie eüe ;
Car ne croi qu'il i eüst rue
Où on [n']oïst pas Dieu tonnant,
Tel joie aloient demenant.
Pour Cléomadès font tel joie
K'à paines dire le porroie ;
De toutes pars s'esjoïssoient
Pour Cléomadès qu'ils r'avoient.
# |
Son pere mena d'une part
Et sa mere. Moult li fu tart
PageV01P128
Que dit leur eüst et conté
Dont il vient et qu'il a trouvé.
"Sire", fait il, "je vous dirai
Merveilles, car assez en sai.
Sachiez que ne fu pas eschars
Envers vous li lais rois Crompars
Quant le chevalet de benus
Vous donna. Car je croi k'ains nus
Ne vit jouel de sa valour.
Plus vaut d'or que plaine une tour.
Sachiez vraiement, sans cuidier,
C' on ne le porroit esprisier.
Nel di pas pour ce k'à nul jour
Me plaise qu'il ait ma serour ;
Car trop seroit mal emploiie,
Encor soit il rois de Bougie.
Trop me pariroit près dou cuer,
Je ne le vorroie à nul fuer.
Dirai vous pourquoi je le di.
Bien sai, quant je de ci parti,
Que vous mauvais gré li seüstes
De ce que tost ne me reüstes,
Et croi bien que, pour ce mesfait,
Li avez aucun meschief fait.
Ne sai s'il est enprisonnés ;
Mais, s'il i est, si l'en getés
Se il vous plaist. Si s'en ira
En son pays ; car mais n'aura
Ma suer, puis que il est tex hom
Qu'il a fait rain de trayson."
Dist Marcadigas : "Voirement
Est il en prison fortement.
Penduz, ou ars, ou escorchiez
PageV01P129
Fust tout vraiement, le sachiez,
Se tost no fussiez revenus ;
De ce ne le destournast nus.
De la prison sera getez,
Puis k'ainsi est que le voulez.
Mais à ma fille a il failli ;
Car il l'a par droit desservi.
J à faus hom ma fille n'aura
Quant sa faussetez prouvé l'a."
Et quant Cléomadès entent
Ce mot, moult li vint à talent.
# |
Li rois I serjant apela,
De prison geter li rouva
Crompart, et cil le fist ainsi
C'onques n'i mist point de detri.
Lors dist Cléomadès au roi :
"Par amours, sire, dites moi
Qu'est devenus Melocandis
Et Baldigans?" "Par foi, biau fis,
Vers leur pays s'en sont r'alé
Dolent de cuer et tormenté
De ce que perdu vous avoient.
Le roi Crompart moult en haoient;
Mais chascuns m'a en couvenant
Que il revenront à mon mant."
# |
Quant Cléomadès oye ot
Ceste raison, forment li plot
Que chascuns des rois revenroit
Quant ses peres les manderoit.
Après, sans longue demorée,
A s'aventure parcontée :
Comment sus la tour s'arresta
Et comment à mengier trouva,
PageV01P130
Et comment il trouva dormant
La bele fille au roi Carmant;
Et tout ainsi qu'il l'esveilla,
Et comment il s'en acointa,
Et comment li rois le fist prendre,
Et comment fu jugiez à pendre,
Et comment leur fist entendant
Que fées l'aloient portant,
Et comment il les amusa
Tant que par son sens eschapa.
# |
Sachiez que il n'oublia mie
Clarmondine, ains leur a prisie
Seur toute rien souvrainement
De tout en tout entierement.
"Sire", fait il, "cele pucele
Dont je vous di par est tant bele
K'à paine dire vous porroie,
Jà s'i pener ne m'en saroie,
La centisme de sa biauté ;
Et encore y a plus bonté.
Sachiez quant je de li parti
Mes cuers demora avoec li ;
En tel maniere i demora
Que jamais ne s'en partira,
Ainçois le couvenroit partir
C'on le peüst de là partir.
Miex vorroie qu'il fust partis.
Folio17r
C'est passé jà n'en iert partis,
Et ce saurez vous bien par tans
Que il n'en puet estre partans.
Car maintenant vous vueil priier
Que il ne vous vueille anuiier
Se vers li revois temprement ;
Car je ne puis vivre autrement.
PageV01P131
Bien puis dire que mais n'aurai
Femme nule, se cele n'ai.
Car sachiez ne vorroie pas
Que tous li mons et haus et bas,
Terres, aigues douces et mer,
Et kan c'on i porroit trouver,
Fust mien à faire mon vouloir,
Et ne deüsse reveöir
Cele à cui j'ai mon cuer donné.
Car Clarmondine au cuer sené
Jamais de cuer liez ne serai
Dusqu'à tant que la reverrai ;
Car, se mais veöir nel cuidoie,
Jamais nul jour joie n'auroie."
# |
Marcadigas a bien oy
Comment amours avoit saisi
Son fill. Lors l'a reconforté
Et dist que bien a assené
Quant s'amour a en tel lieu mise ;
Car en moult haut lieu l'a assise,
Car moult a enz ou roi Carmant
Gentill roi, et sage, et poissant,
Et preudome, et de grant lignage.
Bien s'assent à ce mariage.
# |
"Biaus fiex", fait il, "tout maintenant
Envoierai au roi Carmant
Messagiers sages et senés.
Sachiez que la pucele aurés,
Qu'el monde n'a prince ne roi,
Tant soit poissans, si com je croi,
Qui ne fust moult joians et liez
Se vous sa fille avoir vouliez.
Or, en soiez asseürez ;
PageV01P132
Car, se je puis, jà n'i faurrez.
Par amours la pucele aurons
Ou par force la conquerrons."
# |
Quant Cléomadès entendi
Son pere qui parole ainsi,
Bon gré l'en sot, ce fu raison.
"Sire", fait il, "donnés me I don
Tel que je croi qu'il vous plaira."
Et Marcadigas li donna.
"Sire", fait il, "n'envoiez point
À Carmant, qu'il y a I point
K'encore ne vous ni pas dit,
Qui n'est pas à nostre pourfit."
# |
Lors li dist que li rois d'Arcage
A pourchacié ce mariage
De Clarmondine et de son fill.
"Et, pour ce, y auroit perill
Tel que, se nous i envoions,
J'espoir que pour ce i faurrons ;
Et, pour ce, m'avez otriié
Que la voise par vo congié.
Seur mon cheval tost i serai.
La pucele, espeir, amenrai.
Car sachiez je ne me tenroie,
Si me doinst amours de li joie,
De li veöir, ce vous afi,
Tant c'on fust là alé de ci
Ne d'ilueques revenus ça.
Pour kan qu'a entre ci et là,
Dui entiers jour mouvoir vorrai;
N'en doutez jà, tost revenrai.
Sire, plaise vous ensement;
Car mors sui s'il est autrement,
PageV01P133
Et, se vous voulez que mors soie,
Si me destornés ceste voie."
# |
Li rois voit bien, comment qu'il aille,
Ira Cléomadès sans faille.
"Biaus fiex", fait il, "vous i irés
Par si que en couvent m'arés,
Moi et vo mere la royne,
Que, dedens bien prochain termine,
Ferez trestout vostre povoir
De nous temprement reveöir;
Car, se tost ne vous reveöie,
Moult grant meschief de cuer aroie."
Et Cléomadès dit li a
K'à son povoir tost revenra.
N'a garde d'avoir nul anui
Tant qu'il ait son cheval o lui.
# |
Ainsi que il iluec parloient
De leur besoigne, et devisoient,
Atant [est fols] le roi Crompart
Qui s'en vint tout droit cele part
Où li rois parole à son fil.
"Ha! rois Marcadigas", fait il,
"À grant tort anui fait m'avez ;
Et, puis que vostre fill r'avez,
Dont est raison que Marine aie.
Car, pour nul meschief que je traie,
Ne serai vers vous corrouciez,
Se vous Marine me bailliez.
Et vous le m'avez en couvent,
Ce savez vous bien vraiement.
Et je la doi par droit avoir ;
Car vous avez trouvé en voir
PageV01P134
Dou cheval que je vous donnai
Tout ce que de lui devisai.
Tous li mons vous tient à loial.
Ne jà pour moi ne ferés mal;
Ains croi bien que vous me tenrés
Ce que vous en couvent m'avés."
# |
Lors dist Marcadigas à lui :
"Certes", fait il, "vous ne autrui,
À mon povoir, ne mentiroie ;
Car bon fait aler droite voie.
Mais la droite voie eschivastes
Quant la chevillete tornastes
Dou cheval, quant sus fu montés
Mes fiex que vous ici véés,
Qui tout m'a dit son convenant
Et comment arriere et avant
Va li chevaus par les chevilles.
L'amour de moi et de mes filles
Et de mon fill perdu avez,
Ne jamais Marine n'aurés.
Pour ce k'avez fait trayson
Vous retoil je de li le don.
Sachiez que à l'amour de li
Avez vous à tous jours failli;
Car droit vous devroit on honnir,
Car vous me cuidastes trayr.
Folio17v
Ce fu pour ce qu'il vous sambla
Que à mon fill pas n'agréa
Que vous eüssiez sa serour ;
Ce vous fist faire ce faus tour.
Je vous puis bien pour voir jurer,
Ce ne vous quier je pas celer,
K'escorchiez fussiez ou pendus,
Se tost ne fust ça revenus
PageV01P135
Cléomadès, qui moult me prie
Que ne vous face vilonnie.
Par lui estes, bien le sachiez,
Si tost de la prison lachiez.
Il vous est venus à bon port.
Pour lui n'aurez garde de mort.
Près fustes de mauvais marchié,
K'à mort vous avoient jugié
Tout li baron de mon pays.
En ma terre avez pou d'amis ;
Vers vostre pays en r'alés,
C'est dou miex que faire povés ;
Li demorers vous vanrroit pou
Et pour ce l'aler vous en lo."
# |
Et dist Crompars : "Ne m'en irai
Dusqu'à tant que Marine arai.
Pour tant serois je depeciez !
Envers moi estes corrouciez ;
Mais, quant serés bien avisés,
J'espoir que couvent me tenrés."
# |
Dist Cléomadès : "Voirement,
Vous tenra mes peres couvent;
Jà de couvent ne vous faurra
Que orendroit vous devisa,
Que vous garde de mort n'aurés
Et k'à ma suer failli avés,
Non pas pour ce que ne soiez
Riches et bien enlignagiez,
Mai pour vo taille merveilleuse
Dont ma suer est si peüreuse ;
PageV01P136
Et, quant vers moi faus tour quéistes,
Sachiez bien que pour ce perdistes
Ce que vous avoit en couvent
Mes peres de premierement.
Car pour moi nel vouloit laissier,
Tant l'en seüsse bel priier,
Que vous n'eüssiez entresait
Marine, cui fust biau ne lait.
Cele vous avoit otroiie.
Perdue l'avez par folie.
Laidement vous est mescheü ;
Fausseté vous a deceü.
N'est nus qui fausseté maintiengne,
Que il à mauvais chief n'en viengne.
Sachiez que trayr me cuidastes,
Mais vous meïsmes enpirastes.
Mainte fois a petit aidié
À maint fol ce qu'il ont cuidié.
Mes peres mais ne vous croira,
Ne à vous amisté n'aura;
Car, puis que il auroit trouvé
Aucune gent en fausseté,
Mais à s'amour ne revenroit
Cil qui fausseté fait aroit;
Car tous jours a loial esté
Mes pères, yver et esté,
Et loiaus sera tout adès."
# |
Crompars ot que Cléomadès
Li dist, s'en fu tous abaubis ;
Sans congié s'est de là partis.
Mas et dolans fu, et honteus
Tout aussi comme li pris leus
Qui n'ose nului regarder.
Se parti d'iluec sans parler.
PageV01P137
En la vile s'en vint tout droit
Où plenté de sa gent avoit
Qui là l'avoient atendu,
Dolant de cuer et irascu,
Pour ce que leur seigneur savoient
Enprisonné, et bien véoient
Que il avoit fait fausseté ;
Ne pourquant l'orent agardé.
# |
À sa gent vint moult aïrés
Crompars, et de cuer tormentés ;
Car en tel point ert sa besoigne
K'au cuer avoit ire et vergoigne.
À aus a dit qu'il s'en alassent
Et que là plus ne demorassent.
Et cil dient qu'il le feroient;
Car la coustume bien savoient
Que on maintenoit en leur terre.
Pour leur pays garder de guerre,
Ert establi d'ancisserie
Ens ou roiaume de Bougie
Une moult grant diverseté,
Que, se nus faisoit fausseté
Qui tornast à desiretance
Ne à point de deshonnorance
Envers le seignour dou païs,
Tantost estoit pris et saisis.
Cil avoit la teste coupée
Seur cui tel chose estoit prouvée;
Sans rachat convenoit morir
Qui le seigneur vouloit trayr.
Celui point avoient usé
De moult grant ancienneté.
# |
Et, se leur sires refust tés
PageV01P138
Qu'il fust en nul pays restés
De fausseté que fait eüst,
Trestout certainement seüst
Que, se si home le savoient,
Par droit ocirre le povoient
Se dedens VII ans revenoit
En la terre qui sienne estoit.
N'avoit que VII ans de respit
C'on ne li fesist tel despit
Que il fust à la mort jugiez,
Se dou mesfait n'ert rapaisiez
Que par son mesfait fait avoit.
Tel loi en Bougie couroit.
# |
Au chief de VII ans, s'il vousist,
Dedenz son pays revenist,
Par si que, dedenz ce termine,
Pourchaçast lettre bonne et fine
Que cil vers cui avoit faussé
Eüssent ou pays mandé
Que bien apaié se tenoient
De lui, et qu'il li pardonnoient
Quan qu'il avoit vers aus mespris,
Et bien avoit son los r'aquis.
Jamais n'i remeïst le pié
Se ainsi n'eüst besoignié.
# |
Pour cette raison s'avisa
Crompars que il demorra là.
Folio18r
Onques ne laissa avoec lui
Là endroit demorer nului ;
Car, se ainsi ne le faisoit,
Autrement revenir n'osoit
Pour la coustume qu'il douta.
À Sebile seus demora.
PageV01P139
Souciex fu et malicieus ;
Et pour ce demora tous seus,
Pour ce qu'il ne vouloit que nus
Seüst son afaire et son us,
Que ne se fioit en nului,
Tant avoit de malice en lui.
Malades prist à visiter;
Car de fisique sot ouvrer.
Pour ce k'amer se cuidoit faire,
En prenoit il si fait afaire
Que les malades à garir ;
Car bien en sot à chief venir.
De fisique ert si souverains
Que pou en ert de si certains.
De là jusques en Salenique
N'ot nul plus seür de fisique.
# |
De lui vous lairai ore ester.
De Cléomadès vueil parler,
Qui là endroit ne demora
Mais que trois jours. Lors s'arréa.
Droit au quart jour, au matinet,
Fu montés seur son chevalet.
Nus hom sa voie ne savoit
Fors ses peres, cui dit l'avoit,
Et sa mere done Ynabele,
Cui moult desplaisoit la nouvele ;
Et ses sereurs aussi le sorent
Qui moult très grant duel au cuer orent
De ce que telement s'en va
Ne ne sevent quant revenra.
# |
Forment demorerent plorant
Et leur blanches mains destordant,
PageV01P140
Et Cléomadès s'en ala,
Cui la voie moult agréa.
N'enporta o lui que s'espée
Qui ert trenchant et acerée,
Dont maint hauberc ot depané,
Et maint fort hiaume descerclé,
Et maint home mort abatu,
Et depecié maint fort escu.
# |
L'espée avoit non Ressoignie ;
Mieudre de li ne fu forgie.
Cléomadès, sans nul detri,
S'en ala ainsi que vous di.
# |
Marcadigas, li gentiex rois,
Vint à ses filles toutes trois
Et la royne ensamble o lui ;
Ne moustrerent pas tout l'anui
Que il orent, ce povez croire.
Comme gent de bonne memoire,
Ont leur filles reconfortées
Et moult les ont asseürées
Et dit que eles se rapaient
Ne pour leur frere ne s'esmaient ;
Car il revenra temprement,
Ce leur a il bien en couvent.
Ainsi Marcadigas disoit;
Lui et ses filles confortoit.
# |
Cléomadès tant esploita,
Et ses chevaus si le porta,
Que il a le chastel veü
Où dou dart d'amours navré fu,
Si k'encore ou cuer l'en esteche
De ce dart li fers o la fleche.
PageV01P141
Quant il a veüe la tour
Seur quoi s'arresta l'autre jour,
Lors sot il bien seürement
Que c'ert li chastiaus vraiement
Où ses cuers li donna congié
Le jour c'on l'ot à mort jugié.
Pour Clarmondine se laissa
Ses cuers, quant Carmant eschapa.
# |
Cléomadès grant joie eüst
S'en sa conpaignie seüst
Le cuer la bele Clarmondine
Qui onques jour ne nuit ne fine
De penser à lui loiaument.
Adès estudie conment
Ele le puist jamais veöir.
Souvent li fait le cuer doloir
Ce que ne set quel part ala
Le jour qu'il se parti de là;
Car ses cuers adès li disoit
Que de bon lieu venus estoit.
# |
Cléomadès s'est avisés
Que, tant que li jours soit passés,
Ne se traira vers le chastel.
En I bois, desouz I ormel
Qui estoit fueillis et ramez,
S'est Cléomadès avalez.
# |
Desouz cel arbre descendi ;
Pluseurs chans d'oisiaus i oy.
Là s'est Cléomadès assis.
Son cheval a delez lui mis.
Là demora jusqu'à la nuit.
Penser estoient si deduit.
PageV01P142
Cléomadès ot grant pensée
Comment il eüst achevée
La besoigne que il chaçoit,
Et en moult grant paour estoit
Que Clarmondine ne fust mie
Ou lieu où il l'avoit laissie ;
Et encore ot plus grant esmai
D'une chose que vous dirai,
Que ne li eüst fait anui
Ses peres pour l'amour de lui,
Et puis l'eüst de là sevrée
Et, pour paour de lui, menée
En autre lieu que là manoir,
Ou en chastel ou en manoir.
# |
Ainsi souz l'arbre aloit pensant
Cléomadès et souspirant
Tant que li jours fu tous passez.
Lors s'est de là endroit levez ;
Seur son chevalet remonta,
Car poins en fu, ce li sambla ;
Moult très douz tans et bel faisoit
Et la lune claire luisoit.
# |
Quant son cheval ot apointié,
Vers le chastel l'a adrecié.
Si tost i vint comme lui plot
Au plus coiement que il pot.
En costé la grant tour passa ;
Droit enz ou praël s'en ala,
Où trouvez fu dou roi Carmant
Avoec les puceles séant
Folio18v
Delez Clarmondine la gente,
Qui ne seroit mie dolente
Se le savoit si près de li.
PageV01P143
Cléomadès lors descendi,
Et puis a mis son chevalet
En coste I mur en I anglet.
# |
Or, sachiez bien de vérité
C'on ne povoit de nul costé
Dedenz ce praëlet entrer
Que il ne couvenist passer
Par la chambre où cele gisoit
Qui dou mont la plus bele estoit.
Les puceles qui la servoient
L'uis dou praël laissié avoient
Cele nuit trestout entrouvert
Pour avoir l'air dou praël vert,
Et les fenestres tout entour
Pour avoir la très douce odour
Qui des fleurs dou praël venoit.
Et, quant Cléomadès perçoit
La chambre qui n'estoit pas close,
Ne fust si liez pour moult grant chose
Que del huis que ouvert trouva.
Moult coiement dedens entra.
# |
Le lit à la pucele voit.
Lors pensa bien qu'ele i estoit ;
Car li lit aussi i estoient
Où ses damoiseles gisoient.
Koi se tint, et si escouta
Tant que vraiement li sambla
Que tout dormoient par léens.
# |
Au lit, qui ert nobles et gens
Où gist la fille au roi Carmant
S'en vint tout coiement passant.
D'un douz baisier l'a esveillie.
PageV01P144
Durement fu espaourie
Quant ele les iex entrouvri.
En souspirant a dit : "Ainmi
Que fu ce ore qui m'adesa ?"
Quant Clarmondine veü a
Celui k'autrefois ot veü,
Tout tantost l'a reconneü.
# |
En la chambre faisoit si cler
Qu'ele le puet bien aviser ;
Car II chandeles i ardoient
Qui assez grant clarté getoient.
Lors ne sot ele lequel faire
Ou de haut parler ou de taire.
Un pou fu ses cuers effréés
Pour ce que s'en estoit alés
À l'autre fois si faitement
Cil hom, et si diversement ;
Et, se ses puceles l'ooient,
Bien set que tel noise feroient
C'on les orroit de toutes pars,
Et cil seroit pendus ou ars
Se on le povoit ratraper ;
De ce ne porroit eschaper.
Et ce vousist ele à envis ;
Car encor tenoit son cuer pris
Amours, si que pas ne vousist
Que on celui nul mal fesist ;
Et moult très volentiers sauroit
Qui il est ne que il chaçoit.
# |
Ains que la noise fust levée
Sauroit volentiers la pensée
De lui, se savoir le povoit.
PageV01P145
Et de ce avoit ele droit
S'ele desiroit à savoir
Se cil la vouloit decevoir,
Ne qui il ert, ne de quel terre,
Ne quel chose il venoit là querre.
Et, pour le savoir, s'apensa
Que très bon semblant li fera,
Pour ce que plus seürement
Li die tout son errement.
Lors li dit, ne n'atendi plus,
Que C. mile fois bien venus
Soit il, et qu'il ne s'esmait mie;
Car de sa venue est moult lie.
Quant Cléomadès l'entendi,
"Bele", fait il, "vostre merci
Que reconnoistre me daigniez.
Onques mes cuers ne fu si liez
Que je sui de ce que vous voi.
Dou tout à vous servir m'otroi."
"Biau sire, et je vous en merci.
Mais l'autre jour, quant fustes ci,
Ne trouvai pas, en verité,
Que vous fiex le roi Balcabé
Fussiez ; s'en fu mes cuers irez
K'en mençonge fustes trouvez.
Or n'est raisons que mais vous croie,
S'en vous ne truis plus droite voie
Que je ne fis à l'autre fois."
"Bele", dit il, "certes, c'est drois;
Et, se je mais de riens vous ment,
Jà n'aie je amendement."
# |
"Dont me dites, biaus amis dous,
Par fine amour, qui estes vous?
Je vous pri que nel me celés."
PageV01P146
"Cléomadès sui apelez,
Damoisele, n'en doutés pas.
Fiex le roi sui Marcadigas
Qui moult est rois de grant valour.
D'Espaigne tient toute l'onnour
Et la terre et la seignorie."
Lors fu Clarmondine si lie
Quant Cléomadès ot nommer,
K'à paine pot ele parler ;
Car par oïr dire l'amoit,
Pour ce que chascun dire ooit
Que de bonté et de valour,
De sens, de largece et d'onnour,
Et de prouece et de biauté
Avoit tout le monde passé.
# |
Et lors a Clarmondine enquis
A lui, pourquoi Bleopatris
Dist l'autre jour qu'il ert nommés,
Et pourquoi ses nons fu celés,
Que dès adonc ne se nomma.
Tout enquist et tout demanda
— Ce que raisons ert de savoir ;
Car moult ot en li de savoir
Et de très bon entendement.
Et cil si aviséement
Li respondi à chascun mot
Que nus hom miex faire ne pot.
De tout li rendi si raison
Qu'ele n'i entent se bien non.
Et que il Cléomadès soit
C'est ce qu'ele vraiement croit.
Folio19r
Car il ne li a rien celé ;
De tout li a dit verité.
# |
Lors li dist Clarmondine lues :
PageV01P147
"Se g'ere tele k'à vostre ues,
Sire, moult très lie en seroie
Se je certainement savoie
Que vous Cléomadès fussiez.
Onques mes cuers ne fu si liez
Que ce que je peüsse faire
Par quoi je vous peüsse plaire.
Sauve m'onnour, pour vous feroie
Trestout ce que faire porroie."
# |
"Damoisele, vostre merci."
"Et comment venistes vous ci?"
Fait la pucele. "Biaus amis,
Je vous pri que voirs m'en soit dis."
"Damoisele, jel vous dirai,
Ne riens ne vous en celerai,
Ne je ne quier ne je ne doi;
Car plus vous aim que ne faz moi."
# |
Et lors li a dou tout conté
Cléomadès la verité.
Comment ert alez et venus
Sor le chevalet de benus,
Au plus basset qu'il onques pot
Li dist, pour ce que pas ne vot
Que les damoiseles l'oïssent.
Miex li plot que eles dormissent.
# |
Cléomadès tout ensement
Li recorde que li present
Furent son pere presenté.
Tout l'afaire li a conté
Des trois rois, et qui il estoient
PageV01P148
Qui ses trois sereurs demandoient.
Ne vous ferai lonc parlement
De ce. Car, sachiez vraiement,
Tout li recorda là endroit
La chose ainsi comme ele aloit,
Et li dist que tout li laissa
Son cuer quant se parti de là.
# |
Tant dist que ele entendi bien
Que cil l'amoit sor toute rien ;
Et ele ne l'amoit pas mains.
Cléomadès à jointes mains
Li dist que tout se donne à li.
— "Sire", fait ele, "et je aussi
M'otroi à vostre volenté,
Sauve honnour et virginité ;
Car miex vorroie estre tuée
Qu'estre dou cors deshonnerée.
Bien sai se mes peres savoit
Que vous fussiez ici endroit,
Qu'il vous vorroit moult honnorer.
Car souvent a oy parler
Dou roi d'Espaigne vostre pere
Et de vostre très bonne mere ;
Parler a oy moult souvent
De leur noble contenement
Et de la vostre grant vaillance.
Mais je sui I pou en doutance
Que ne nous deüst destorber
Ce que il me veut marier
En un lieu divers et sauvage
A l'ainsné fill le roi d'Arcage.
Et, puisqu'il m'i a otroiie,
Sachiez qu'il ne fausseroit mie
Sa couvenance pour nul fuer ;
PageV01P149
Car loiaus est et de franc cuer,
Et c'est ce qui me fait cremir.
Avoec vous vueil vivre et morir.
Or visez, selonc cest afaire,
Quel chose nous pooumes faire."
# |
"Bele", fait il, "tous avisez
Sui de ce, mais que soit vos grez
Que avoec moi venir veuilliez."
"De ce est moult bien conseilliez
Mes cuers, fait ele, se seüsse
Comment o vous aler peüsse."
Dist Cléomadès : "N'en doutés ;
Car, s'o moi venir en voulés,
Moult très bien vous enporterai ;
C'est la chose dont mains m’esmai."
# |
La raison li a devisée
Comment ele en seroit portée
Avoecques lui, seur son cheval,
Sanz nul perill et sanz nul mal
Qui avenir puist en la voie.
Et Clarmondine ot moult grant joie
De ce que porter l'en porroit ;
Car amours ainsi le vouloit,
Et bien lor avoit fait commant
Amours qu'il fussent vrai amant,
Et cis commans fu si tenus
Que n'i porroit amender nus.
D'unes et d'autres dit li a
Tant que la pucele otria
A lui que o lui s'en iroit
Et dou tout à lui se donnoit.
# |
"Biau sire", fait ele, "or alez
Pagev01P150
En ce praël, et m'atendez
Tant que je vous rapelerai.
Mes puceles esveillerai ;
Sans vous vueil à eles parler.
Moult vous ai oy regreter
A eles, et forment prisier.
Mais ne savoient que cuidier
De vous, mais forment vous looient
De tant que veü vous avoient.
Mais moult de leur grace perdistes
Quant vous entendant nous feïstes
Chose qui n'ert pas verités.
S'en fustes moult d'eles blasmés,
Et à ce avoit bien raison ;
Car n'i povoient se mal non
Ne entendre ne percevoir,
Et ce povez vous bien savoir.
Biau sire, pour m'onneur sauver,
Lor cuit ceste chose moustrer
Si à point, ce sachiez pour voir,
Que vous le porrez bien vouloir.
Bien sai que, quant eles sauront
Vostre non, grant joie aueront ;
Car de vous, sachiez vraiement,
Ont oï parler moult souvent,
Et souhaidié ont maintes fois,
N'i a nule de toutes trois,
Que je fusse à vous mariée.
Plus ne porroie estre honnerée,
Ce me disoient tout adès,
K'estre femme Cléomadès ;
Car moult forment est renommée
Vo prouece en mainte contrée."
Folio19v
Dist Cléomadès : "Douce amie,
PageV01P151
Ce est tout par leur courtoisie
Que eles dient que sui tés
Que vous ici me recordés.
Mais, se tous seus valoie autant
Que tout li bon qui sont vivant,
Et eüsse quanques il ont
Et quanqu'il a en tout le mont,
Et fusse sire deseur tous
De paradis de çà desous,
Et de plus, se estre povoit,
Sachiez que sambler me devroit
Que je fusse bien emploiez
En vous, se avoir me daigniez.
Or, vueille Diex que à plaisir
Puisse vous et amours servir !
Car tous jours tant com viverai
Et amours et vous servirai.
De ce sui je certains et fis
K'ainsi sera que je devis ;
Car amours le m'a commandé
Ainsi, dont moult li sai bon gré."
Et Clarmondine l’en mercie
Et li dist qu'ele moult est lie
K'amours li a ce commant fait
Tel qu'ele l'a à ce atrait ;
En son cuer en a moult loé
Amours, quant à ce l'a mené.
# |
Dist Cléomadès : "Je irai
En ce praël et i serai
Sanz plus tant que il vous plaira ;
Car point ne m'i anuiera
Puisque il vous plaist que là soie.
Par loisir faites, ce vous proie.
Seur toute autre riens ai desir
PageV01P152
Que faire puisse vo plaisir,
Ce sachiez vous bien. Entresait
Faites belement et à trait,
Sans effroi et sans esmaiance ;
De riens ne soiez en doutance,
Car ains que il doie ajourner
Porroit on moult très loing aler."
# |
Atant rentra enz ou praël,
Où faisoit moult noble et moult bel,
Liez et joians ; car moult li plot
Que Clarmondine trouvée ot
Lie, ainsi comme li sambla,
De ce que revenus ert là.
Moult en fu ses cuers aaisiez.
A genous en a graciié
Ses Diex, et menu et souvent.
Et Clarmondine apertement
A ses puceles esveillies
Qui moult se sont esmerveillies
Que ele lor veut à tele heure.
Levées sans longue demeure
Se sont, et devant li venues ;
Et, quant ele les a veües,
Si leur dist moult très sagement,
Et à point et courtoisement,
Comment Cléomadès estoit
Là venus, et que il queroit.
# |
"Sachiez, fait ele, c'est cil là
Qui si doucement s'acointa
L'autrier à nous en ce praël.
Plus courtois de lui ne plus bel
Ne quiere nus ; car, c'est passé,
On ne l'auroit jamais trouvé."
PageV01P153
Lors leur a tout ce recordé
Que dit li avoit et conté
Cléomadès, et l'ochoison
Dou chevalet, et la raison
Pour quoi ainsi s'en ert alez
Et pour quoi là ert retornez.
De point en point tout leur conta
La chose ainsi comme ele va.
Tant leur dist qu'eles le créirent
Et k'à son vouloir s'assentirent,
Et des nouveles sont si lies
Que toutes en sont esbaudies.
# |
"Ha ! ma dame, dist Liadès,
Dites vous que Cléomadès,
Li biaus, li preus, li alosés,
Qui tous les autres a passés
De prouece et de hardement
Et de tous biens entierement,
Est cil qui l'autre jour fu ci?"
"Oïl, par verté, le vous di,
Car tout certainement le sai,
Car moult sagement enquis l'ai,
Ne de ce jà ne vous doutés."
"Douce dame, dont vous hastés
De vous lever. A lui irons.
A no povoir joie en ferons,
C'on ne se porroit trop pener
De tel home bien honnorer.
Sachiez c'on n'en porroit trop faire
Tant est preus et de bon afaire.
Bien estes d'eur comblé et drue
Quant de vous veut faire sa drue
Cléomadès. Moult est plaisans
Cis mariages, et séans.
PageV01P154
Moult miex à lui nous assentons
K'à Bleopatris ne faisons,
Et qui autre chose en diroit
Certes pas ne vous ameroit."
# |
Trestoutes trois li ont loé.
Ce vint moult Clarmondine à gré.
De joie un petitet souzrist
De ce que chascune li dist,
Car la parole li agrée.
# |
Moult tost s'est de son lit levée.
Assez tost fu apareillie,
Et lors n'est gaires detriie.
Ses puceles prist maintenant.
Vers le praël vinrent errant
Là où Cléomadès estoit,
Qui adès à amour pensoit.
De chascune fu saluez,
Et il, comme bien avisez,
Respont chascune si à droit
Com cil où toute honnours manoit.
# |
Sage et avisé le trouverent.
Dedenz la chambre l'en menerent.
Plus k'à l'autre fois l’ont trouvé
Courtois et à point enparlé.
Tant leur dist que chascune croit
Pour voir que Cléomadès soit.
Que vous feroie je lonc plait?
Chascune tout son povoir fait
De lui servir et aaisier.
Un petit le firent mengier
Folio20r
Et Clarmondine delez lui.
Ce fu uns mengiers sans anui,
PageV01P155
Et les trois puceles sorvoient
Qui moult liement le faisoient.
# |
Quant par loisir l'ont aaisié
Et il ot beü et mengié,
Lors commencierent à parler
Comment il porront achever
La besoigne k'empris avoient
Et comment en esploiteroient.
Quant ensamble assez parlé orent
Tant com leur plot et com il vorrent,
Leur parlemens à ce tourna
Que Clarmondine s'otria
A ce que en sa conpaignie
S'en iroit, et moult en ert lie.
# |
Ses puceles s'i assentoient.
Car tout certainement savoient
Que, se rois Carmans le savoit,
Que Cléomadès pas n'auroit
Sa fille. Car aillours donnée
L'avoit li rois et créantée,
Non pas pour ce que liez ne fust
S'ailleurs otroiie n'eüst
Sa fille ; car ce qu'il disoit
Outréement tenir vouloit,
Et, pour ce point, s'i assentirent
Pour le peril qu'en ce point virent.
# |
A Cléomadès ont requis
Que, quant venra en son pays,
Qu'eles bien tost mandées soient
Toutes trois. Forment l'en prioient
Que il ce n'oublie noient
Et il leur a eu couvenent,
Qu'eles bien tost mandées soient
Toutes trois. Forment l'en prioient
Que il ce n'oublie noient.
Et il leur a en couvenent,
PageV01P156
Et dist que ainsi le feroit
Et k'à envis le laisseroit.
Et Clarmondine moult li prie,
S'il li plaist, qu'il ne l'en maint mie
Qu'ele n'ait son pere veü,
Ainçois qu'il soient esmeü,
Et sa mere, se il veïst
Que ainsi faire le pouist.
Car si durement redoutoit
Le duel que chascuns d'aus menroit
S'il cuidoient que fust perdue,
Que toute en estoit esperdue.
# |
Tout en lermoiant l'en pria.
Car moult près dou cuer li toucha
Ce qu'eles devoit esloignier,
Car moult avoit chascun d'aus chier.
Et esloignier li couvenoit,
Car fine amours li commandoit;
Et encontre commandement
D'amours, n'a nul desfendement.
Ne ele talent n'en avoit.
Ses cuers pas à ce ne pensoit ;
Mais bien pensa que, s'il seüssent
Qui cil ert, et veü l'eüssent,
Avoec cui ele s'en aloit,
Que moult grans confors leur seroit.
# |
Et Cléomadès erranment
Li dist moult debonairement
Que son pere li moustrera
Ainçois qu'il se parte de là,
Et sa mere, ainsi puet il estre
S'ele est enz ou chastel n'en l'estre,
De léens veöir la porra ;
PageV01P157
Car à tous savoir le fera ;
A aus bel et bien et à point
Parlera ; or ne s'esmait point
Si que chascuns savoir porroit
Que Cléomadès l'enportoit
Pour li faire à tous jours honnour,
Car n'ert pas pour sa deshonnour,
Et que tantost l'espousera
Que dedens son païs venra.
Quant Clarmondine l'entendi,
Moult durement li abeli
Que si estoit obéissans
Cléomadès à ses commans.
# |
Les puceles n'atargent mie,
Ains ont la besoigne avancie
De ce que il i couvenoit.
Bien et bel et tost et adroit
L'ont pourveüe et arréée.
Jà estoit près de la jornée.
Les puceles, tout lermiant,
Vinrent Cléomadès devant
Et li dirent qu'il s'arréast
Et que gaires ne demourast ;
Car leur sires li rois Carmans,
Ot acoustumé de lonc tans
K'à la jornée se levoit
Et dedenz I jardin aloit,
Près de là, moult bel et moult gent,
Et o lui de sa plus grant gent.
Chascun jour ainsi le faisoit,
Se pour mal tans ne le laissoit.
# |
"Et s'avons bien veü aussi
Que il venoit moult matin ci
PageV01P158
Pour jouer à ma damoisele,
Car il n'aime riens tant com ele.
Et, pour ce, le haster loons
Que deceües ne soions.
Couvertement voulons ouvrer
Pour nous de tous perils geter.
Pour estre de peril getées
Sommes jà de ce avisées
Que, quant vous en verrons aler,
Trestout errant, sans arrester,
En nos lis nous recoucherons,
Trestoutes coies nous tairons,
Illuec ferommes la dormeille.
Samblant ferons d'avoir merveille,
Quant la noise sera levée.
Chascune fera la dervée
Et moult durement l'esmarie
Et la dolente et l'esbahie,
Aussi que riens n'en seüssiens.
Autrement, honnies seriens;
Car, s'on savoit que par nos grés
Fust cis afaires arréés,
N'est riens qui nous sauvast les vies :
Arses seriens ou enfouies.
De ce couvenir nous laissiez.
Jà de nous ne vous esmaiez;
Car bien nous en deliverrons.
Mais encor vous resemonnons
Que, quant en vo pays venrez,
Que vous pas ne nous oubliez,
Que tost mandées ne soions ;
Car dusqu'à tant joie n'aurons
Folio20v
Que nous reverronmes celi
Cui chascune aime plus que li.
N'est pas merveille se l'amons ;
PageV01P159
Car amer la doit tous li mons
Pour le sens et pour la biauté
Dont en li a si grant plenté."
# |
Cléomadès moult doucement
Leur dist que tout certainement
Sachent que il les mandera
Tantost k'en Espaigne venra,
Et fera roi Carmant savoir
Que il ne doit pas duel avoir
Pour sa fille ; car maint ami
Aura en pluseurs lieus pour li,
Qui volentiers le serviroient
Se son plaisir faire cuidoient.
"Car, sachiez, quant là vous aurai,
Hautement vous marierai;
A chascune donrai baron
Duc ou conte ou très haut baron."
# |
Chascune l'en a merciié.
A ce mot n'ont plus detriié.
Viande et vin apareillierent,
Entour le cheval la lierent.
# |
Jà estoit li jours ajornés,
Et li rois Carmans ert levés
Qui jà ert ou jardin venus
A tout grant plenté de ses drus
Et Clarmonde sa femme o lui.
A coustume orent andui
Que chascun matin là venoient
Se pour lait tans ne le laissoient.
# |
Lors s'est avisée Florete
Qu'ele iroit seur une tourete
Qui estoit au cor dou praël.
PageV01P160
Là s'en vint moult tost et isnel
Pour veöir dedenz le jardin.
Le roi Carmant vit souz I pin,
Et sa femme Clarmonde. I fu
Moult [très] grant plenté jà veü
De dames et de chevaliers,
De damoisiaus et d'escuiers.
# |
Quant ce vit, moult fu effréée.
De la tour est jus devalée.
Lors s'en revient arrier corant,
Sa dame le dist en plorant
Pour ce que vraiement savoit
Que plus demeurer ne povoit,
S'en ot I pou le cuer dolent
Pour le prochain département.
Lors li dist au jardin estoit
Ses peres ; illuec se séoit,
Et sa mere i ert ensement.
Et, quant Clarmondine l'entent,
Trestout erranmant s'est levée.
Un petit estoit esplorée.
Ses trois damoiseles ploroient
Et lor blanches mains detordoient.
Dist Cléomadès : "Ne plorés;
Car temprement nous reverrés,
Assez plus tost que ne cuidiez :
Jà de ce ne vous soussiiez."
# |
Et lors a Clarmondine prise
PageV01P161
Moult doucement, et l'a assise
Sor le chevalet tout errant.
Cléomadès sist par devant.
Pour faire le cheval aler
Le couvenoit devant ester.
Car, se amender le pouist,
La pucele devant meïst ;
Mais, pour le cheval adrecier,
Le couvint devant chevauchier.
De touaille très deliie
Fu la damoisele liie
Sor le cheval, si très adroit
Que ele verser ne povoit.
Se ele bien vousist cheöir,
N'en eüst ele le povoir.
# |
Quant Cléomadès fu montez
Et de mouvoir soi aprestez,
Jà estoit li jours esclarcis
Et li tans plaisans et jolis.
Quant sa chose ot si apointie
Que adroit fu apareillie,
Lors a la cheville tastée ;
Et, si tost que il l'ot trouvée,
As Diex de sa loi commanda
Les puceles, lors s'en ala.
# |
Moult doucement au commencier
Se commença à adrecier
Tout droit en costé la grant tour.
Lors regarda trestout entour
Tant qu'il choisi le roi Carmant,
Qui par le jardin va jouant
Et o lui de sa gent plenté
Des grans seigneurs de son regné.
PageV01P162
La royne i estoit aussi
Et plenté de dames o li.
De legier veöir les povoit;
Car li solaus jà se levoit.
A Clarmondine l'a moustré.
Tout droit cele part sont torné.
Tout cil dou jardin les povoient
Veöir tout à plain s'il vouloient.
# |
Et lors Cléomadès parla.
Au roi dist : "Sire, entendés ça,
Vostre fille point ne querez
Clarmondine, où tant a biautez,
Là où vous li aviez laissie ;
Car vous ne l'i trouveriez mie.
Vez la ci moult très près de moi.
Fiex sui de royne et de roi
Qui sont estrait de gentillece.
N'a riens en aus qui honnor blece
Ne par quoi honnours soit blecie ;
Car gentill sont d'ancisserie.
Et autressi est Clarmondine
Fille de roi et de royne
Et d'aussi gentill lieu venue
C'on sache point de souz la nue ;
Car de vous en mainte contrée
Est la grans valours renommée
De la gentillece et des biens
De quoi en vous ne defaut riens.
Pour ce, me sui donnez à li,
Et ele à moi s'otroie aussi.
D'Espaigne sui norris et nés ;
Cléomadès sui apelés,
Fiex le roi Marcadigas sui.
N'aiez de riens au cuer anui ;
PageV01P163
Cur vostre fille espouserai
Tantost k'en Espaigne venrai."
Folio21r
La royne haut regarda
Tant que le cheval veü a
Et sa fille qui siet desus.
Forment fu ses cuers esperdus.
L'oume vit qui devant li fu.
Lors cuida tout avoir perdu,
Quant sa fille est à ce menée
Qu'ele li ert ainsi emblée.
# |
Lors commença fort à crier :
"Ha! ma fille, où veus tu aler?
Lasse ! que nous est avenu?
Malement sommes deceü!"
Si par fut de duel acorée
K'à la terre cheï pasmée.
Cléomadès de là partis
S'est ; et li rois si esbahis
Remaint, qu'il ne sot que penser.
Entour lui prist à regarder
Sa gent, qui moult s'esmerveilloient
De ce que il veü avoient.
# |
Dist li rois : "K'avons nous oy?
Ainc mais tel merveille ne vi.
Que est ce que m'a on noncié?
Est ce à certes, ou j'ai songié
C'on en ait ma fille portée?
Ce seroit dure destinée."
# |
Dient sa gent : "Sire, sachiez,
Et trestout asseür soiez,
Que cil qui ore à vous parla,
PageV01P164
C'est cil qui l'autrier eschapa,
Que avoec vo fille trouvastes,
Dont à destruire le jujastes.
Bien reconnoistre le puet on
Au cheval et à la raison.
Moult durement nous desconforte
Ce qu'il nous dist que il enporte
Nostre damoisele avoec lui.
De ce avons si grant anui
Au cuer, et si très grant contraire,
Que ne savons que puissons faire.
Cléomadès dist qu'il a non ;
Ne savons s'il dist voir ou non.
Moult desirommes à savoir
Se il ment, ou s'il nous dist voir.
Car, se Cléomadès estoit,
La besoigne miex en vaurroit.
S'ainsi estoit que ce fust il,
Mains en douteriens le peril ;
Car ains par lui ne vint nul jour
Fors que tout bien et toute honnour."
# |
Ainsi à roi Carmant parloient
Dou meilleur confort qu'il savoient.
Mais cil confors sambloit petis
Au roi. Lors s'est de là partis;
Car il n'ert pas asseürez
Que cil confors fust veritez ;
Car, se il vraiement seüst
Que cil là Cléomadès fust,
Il ne fust pas si esbahis
Ne si souples ne si pensis.
Ne sot que avenu li fu.
PageV01P165
Ens ou chastel sont revenu.
Clarmonde enportent sa maisnie
En su chambre, triste et irie ;
Car la riens qu'ele plus amoit
Avoit perdu, si com cuidoit.
# |
Dusk'à la chambre Clarmondine
Li rois Carmans d'aler ne fine.
Droit à l'entrée par devant
Trouverent le vilain gisant
Qui l'uis de la chambre gardoit.
Encore esveilliez ne s'estoit;
Mais pour la noise s'esveilla,
Si très tost que li rois vint là.
# |
Lors est li vilains sus saillis.
Le roi vit, qui fu abaubis.
Bien vit que il n'estoit pas liez ;
Lors cuida qu'il fust deshaitiez.
"Qu'est ce, Sire", fait il, "k'avez?
Vous me samblez tous effréez.
Ainc mais en tel point ne vous vi ;
Moult en ai le cuer esmari."
# |
Dist li rois : "Mal avez gardée
Clarmondine. Mar la vi née ;
Car pour l'amour de li morrai
Puis ce di que perdue l'ai.
Cil qui ci fu l'autrier l'enporte,
Dont mes cuers moult se desconforte,
Qui le cheval de fust avoit.
Ma gent l'ont veü orendroit
En mon jardin, et je aussi,
Dont forment ai le cuer mari.
Seur le cheval s'en vont andui.
PageV01P166
Ainc mais de riens n'oi tel anui.
Par desus mon jardin s'en vont.
Moult de ma gent veü les ont.
Le cheval et aus veü ai.
Jamais ma fille ne verrai,
Ce est ce que je le miex croi.
Ainc tex meschiez n'avint à moi."
# |
Quant li vilains l'a entendu,
Ainc de riens si dolans ne fu.
Pou s'en faut que il ne marvie.
La chambre a lues desverroillie.
Communaument dedenz entrerent.
Les trois damoiseles trouverent
Qui dormoient, ce leur sambloit;
Et, quant le lit sa fille voit
Li rois, et pas ne l'i trouva,
Seur le lit de duel se pasma.
# |
Quant les damoiseles ce virent,
En plorant moult tost se vestirent.
Quant [on] leur ot dit le pourquoi,
Chascuns ert en si grant esmoi,
Lors commencierent à crier
Et leur cheveus à detirer.
Chascune sambloit miex dervée
Qu'ele ne feïst avisée.
Mal sambloit que du couvenant
Seüssent ne petit ne grant.
Au lit leur dame vinrent droit
Où li rois Carmans demenoit
Grant duel ; mais moult le confortoient
PageV01P167
Sa gent qui entour lui estoient.
# |
Lors prennent à crier : "Harou !
Moult par nous aiment li Dieu pou
Quant si fort endormies fumes
Que nous ne nous aperceümes
De ce k'ainsi nous est ravie
Dou monde la miex ensaignie
Et la meilleur et la plus bele."
À ce mot lor duel renouvele ;
Folio21v
Aussi qu'eles fussent dervées,
Se sont seur le lit adentées.
# |
Li une saisi l'oreillier
Et le prent fort à embracier,
Et l'autre le cuevrechief prent
Et le baise piteusement;
La tierce aërt le couvertour.
Là demenoient tel dolour,
C'on les porte fors de léens
Aussi comme pour fors dou sens.
# |
Illuec ot maint cheveil tiré
Et maint piteus souzpir geté.
Si ot mainte paume batue.
Chascuns de duel s'afole et tue.
Li rois Carmans tel duel avoit
C'un seul mot dire ne povoit.
Lors primes li ont devisé
Sa gent qu'il avoit mal ouvré
De ce k'avisez ne s'estoit
K'aussi bien revenir povoit
PageV01P168
Cil au cheval en ce lieu là
K'à l'autre fois quant eschapa ;
Et qu'il deüst avoir ostée
De là sa fille, et recelée,
Et que nus hom ne le seüst
Se il de son conseil ne fust.
# |
Dist li rois: "Tart le m'avez dit;
Cis consaus m'a pou de pourfit.
Et, ne pourquant, mais ne cuidasse,
Ne ne creïsse, ne pensasse,
Qu'il deüst ceste part retraire.
Las ! or ne sai que puisse faire,
Tant ai au cuer ire et tristour.
Or m'en conseilliez le meillour."
# |
Lors li loerent si baron
Et li moustrerent que raison
Seroit qu'il feïst arréer
Messagiers, et tantost aler
À Marcadigas, pour savoir
De ceste besoigne le voir.
Et li rois dist bon li sambloit
Et k'errant i envoieroit.
# |
Lors y a messagiers tramis
Qui furent sage et bien apris ;
Mais, ains que il arréé fussent,
Ne que il de là se meüssent,
Fu Cléomadès, ce sachiez,
De là endroit moult esloigniez.
Ne pourquant pas moult tost n'aloit;
Car la pucele deportoit
PageV01P169
Que ne la vouloit traveillier.
À la foiz la faisoit mengier
Ou seur riviere ou seur fontaine.
De li servir forment se paine ;
Car son cuer avoit atorné
À faire à son povoir son gré.
# |
Ainsi alèrent que vous di
Tant que il vinrent, I mardi,
Tout droit à Sebile la Grant
Aussi com à soleil levant.
Dist Cléomadès : "Douce amie,
Or soiez et joians et lie ;
Car à la vile estes venue
Où liement serez veüe.
Ici endroit laissai mon pere
Et done Ynabele, ma mere,
Et mes sereurs, qui vous feront
Moult grant joie quant vous verront,
Ce sachiez, pour l'amour de moi."
# |
"Sire", fait ele, "bien le croi.
Mais volentiers vous prieroie,
Se je prier vous en osoie,
Que, se nul biau lieu seüssiez
Ci-près, que vous m'i menissiez,
Tant que fusse desvolepée
Et un petitet reposée;
Car trestous li cors me tressue
Dou vent qui si m'a debatue."
# |
Et lors Cléomadès li dist
Qu'el plus biau lieu k'ains nus veïst
PageV01P170
La menra, assez près de là.
Et cele moult l'en mercia.
Lors s'avala en I jardin
Où ot maint lorier et maint pin,
Joignant des murs de la cité.
De tous fruiz i avoit plenté.
Sous I olivier descendi
Cléomadès, et ele aussi.
# |
Seur la verde herbe s'est couchie
Clarmondine, moult traveillie.
Quant un petit ot la geü
Et que reposée se fu,
Lors dist qu'ele vouloit mengier.
Et Cléomadès, sans targier,
L'en donna ; car à grant plenté
En avoient là aporté.
Assez leur en avoit chargié
Liadès au prendre congié.
Li chevaus en ert si troussez
Que il en y avoit assez ;
Car, pour r'aler là dont venoient,
Viande et vin assez avoient.
# |
Cléomadès lors souhaida
Que ses peres le seüst là
Et sa mere et ses trois serours.
"À nous venroient le grant cours.
Pleüst à Dieu que ainsi fust
Que chascuns d'aus ci nous seüst !
Et, s'anuier ne vous devoit,
Léenz iroie à aus tout droit
Et si les amenroie ci."
"Sire", fait ele, "et je vous pri
Que vous les ailliez amener,
PageV01P171
Et me laissiez ci reposer;
Car à envis remonteroie
Sor ce cheval, se je povoie ;
Car li menbre me duelent mout,
Et pour ce forment le redout,
Ne ne seroit pas chose bele
K'ainsi alast une pucele
Devant bonne gent atornée,
Loiïe aussi comme dervée."
# |
Et quant Cléomadès entent
Que il li plaist si faitement,
Si li dist : "Bele, or vous cluingniez.
Maintenant serai repairiez,
Ne devroit anuier nului
En si biau lieu, vous ne autrui.
Escoutez le chant des oisiaus
Qui chantent seur ces arbrissiaus
Entour vous, de chascune part."
# |
Atant Cléomadès s'en part.
Folio22r
Vers le chastel s'en vait corant.
Moult ot le cuer lie et joiant
De ce k'à souhait li venoit
Sa besoigne, ce li sambloit.
Clarmondine est là demorée.
Mais, conbien qu'ele fust lassée,
Une chançonnete trouva
Tele que je vous dirai jà ;
Car amours de chanter li proie,
Et lors dist à cuer plain de joie :
# |
"Diex! Trop demeure mes amis.
Tart m'est que le revoie,
Li biaus, li courtois, li jolis.
PageV01P172
Diex ! Trop demeure mes amis.
Puis k'en lui sont tout bien assis,
Pourquoi ne l'ameroie?
Diex! Trop demeure mes amis.
Tart m'est que le revoie."
# |
La bele ainsi s'esjoïssoit.
Ceste chançonnete chantoit
Pour Cléomadès, son ami,
Qu'ele amoit assez plus que li.
Et, quant bien cele chançon sot,
Une autre, au plus tost qu'ele pot,
En retrouva, moult joliete,
De chant et de dit moult gaiete :
# |
"Tant que j'aie amours avoec moi,
Ne sui je pas seulete.
De li forment loër me doi,
Tant que j'aie amours avoec moi.
Quant il li plaist k'avoeques soi
M'a mise si joenete,
Tant que j'aie amours avoec moi,
 Ne sui je pas seulete."
# |
À tés chançonnetes pensoit
Clarmondine, et se deduisoit
En Cléomadès attendant.
Trois en fist tout en I tenant.
La tierce n'ai pas oubliée
D'ainsi qu'ele me fut moustrée
Des dames par cui soi le conte,
Cui Diex gart de mal et de honte.
À maniere de vireli
La fist, car il li plot ainsi.
De li fu tost li chans trouvez,
PageV01P173
Et li dis tés que jà l'orrez :
# |
"Revenez, revenez ;
Dous amis, trop demorez,
Trop longuement m'oubliez.
Revenez, revenez.
Fine amour, car le hastez,
Priez li ou commandez.
Revenez, revenez ;
Douz amis, trop demourez."
# |
Tout ainsi s'aloit deduisant
La bele, et adès regardant
Cele part où s'en ert alez
Cil à cui ses cuers s'ert donnez.
# |
Crompars avoit acoustumé,
Entrues k'à Sebile ot esté,
Que tous jours se levoit matin
Et s'en aloit en ce jardin
Çà et là, pour herbes cueillir
Pour ses malades agarir ;
Car herbes i avoit plenté
Où il avoit moult grant bonté.
# |
La damoisele oï chanter
Très plaisaument et haut et cler.
Cele part, au plus tost qu'il pot,
S'en vint où chanter oy l'ot.
Tant ala amont et aval
Que il a veü le cheval
Que maintes fois avoit veü ;
Pour ce l'ot tost reconneü.
Durement s'en esmerveilla.
Tout droit cele part s'adreça.
PageV01P174
Sous l'olivier la bele voit
Qui lez le chevalet séoit.
Quant Clarmondine l'a veü,
Moult grant paour en a eü.
Grant merveille ot qu'estre povoit,
Ne dont si très lais hom venoit.
Tout maintenant laissa son chant
Quant le roi Compart vit venant.
# |
Lors vousist moult bien estre aillours;
Car il li prist si grans paours
Que cel home vi si hideus,
Et qu'ele ert seule et il ert seus,
Que ele moult haut s'escria :
"Harou ! Qu'est ce que je voi là?
Je crois que ce soit anemis.
Cléomadès, biaus dous amis,
Com à dure heure m'assenti
À ce que me laissastes ci
Pour aler querre plus de gent !
Je l'amasse miex autrement.
Encor n'estes vous gaires loing,
Or auroie de vous besoing.
Lasse ! que m'est-il avenu?"
# |
Par ces moz a bien entendu
Li rois Crompars le couvenant.
Le cuer en ot lie et joiant.
# |
Lors pensa que il l'en menroit
Quant Marine avoir ne povoit,
Et feroit de celi s'amie
Kains ne vit si bele en sa vie.
Liez est quant il se puet vengier
Et avoir si biau restorier.
PageV01P175
Folio22v
La pucele ot qui regreta
Cléomadès. Lors s'avisa
Que il l'avoit là amenée.
"Ne soiez, fait il, esfréée;
Car point de mal ne vous ferai."
"Ha, Sire! si grant paour ai
De vous et de vostre samblant,
Que tous li cuers me va faillant.
Alez vous en, je le vous pri.
Tout maintenant revenra ci
Cléomadès, à cui je sui.
Vos demorers me fait anui."
# |
Dist Crompars : "Or, ne vous doutez.
Encor soie jou desguisez,
Et de merveilleuse façon,
Je ne ving ci se pour bien non ;
Car tout certainement sachiez
Que je suis à vous envoiez
De par Cléomadès sans doute.
Maintenant li prist une goute
Droit ainsi que je l'encontrai
Quant dedenz ce jardin entrai.
Séant le laissai sous une ente.
Mais n'en soiez pas trop dolente ;
N'aura mal, seüre en soiez.
Il vous mande k'à lui viengniez.
Seur le cheval o vous irai,
À Cléomadès vous menrai.
La maniere me devisa
Comment à lui nous portera
Li chevaus. Là porrez savoir
Se je vous dis mençonge ou voir.
PageV01P176
Il me dist k'enz ou front séoit
Une cheville c'on tornoit.
Pour faire le cheval aler."
Clarmondine prist à plorer
Pour la goute dont cil li dist.
Tous li cors li tramble et fremist.
# |
Bien cuida que l'eüst mandée
Cléomadès, lors s'est levée.
Pour les ensaignes le cuida
Que li rois Crompars devisa.
Par celui point fu deceüe.
Et lors est maintenant venue
Tout droit vers le cheval de fust ;
Car moult desiroit qu'ele fust
Là où Cléomadès estoit,
Com cele qui de cuer l'amoit.
# |
Lors l'a li rois Crompars assise
Sor le cheval et à point mise.
Seürement l'a reloiie ;
Car bien en savoit la maistrie.
Le vin et la viande prent,
En costé le cheval la pent,
Et lors monta tout maintenant.
La cheville torna errant ;
Et, si très tost qu'il la tourna,
Li chevaus moult tost s'en ala.
# |
Jà avoit trompé longuement
Li tromperes d'or hautement,
Si que moult s'en esmerveilloit
Roi Marcadigas qui l'ooit.
Et aussi s'en esmerveilloient
Trestout cil qui tromper l'ooient.
PageV01P177
Crompars l'avoit moult bien oï,
Et, pour ce, se hastoit-il si.
# |
Cléomadès vint tout droit là,
Ou point que li hom d'or trompa.
Mais à son tromper n'entendirent
De riens, quant Cléomadès virent ;
Car de toutes pars acoru
Sont contre lui quant l'ont veü.
Quant la nouvele en entendirent
Ses serours, gaires n'atendirent,
Ains vinrent contre lui corant,
Et li firent joie si grant
Que eles faire li povoient,
Car plus que eles lui amoient.
# |
En la chambre le roi l'en mainent.
De toutes pars joie demainent.
Tout sont lié de sa revenue.
Sa mere est contre lui corue
Qui l'a baisié et acolé.
Cléomadès a salué
Le roi Marcadigas son pere
Qui onques n'ot pensée avere,
Et il li fist joie si grant
Com peres doit faire à enfant.
De savoir avoit desirrier
Comment ses fiex revint arrier
Et comment il a esploitié
De Clarmondine, et besoignié.
# |
Cléomadès lors leur conta
La besoigne com ele va,
Comment Clarmondine ot laissie
Ou jardin, sous l'ente flourie,
# |
PageV01P178
Forment traveillie et lassée.
"Car de son pays amenée
L'ai, fait-il, moult tost ceste part.
Vers li r'alons ; car moult m'est tart
Que ele fust venue ci.
Por quoi l'ai là laissie ainsi
Vous dirai-je, se vous voulés.
Par li fu li consaus donnés
Qu'ele là se reposeroit
I poi, et si m'atenderoit
Jusqu'à tant que je revenroie ;
Car je li dis que j'amenroie
Contre li plenté de tel gent
Qui la verroient liement.
Vous, et ma dame, et mes serours,
Pour ce vous pri que le grant cours
Faites envoier de tous lés ;
Chevaliers et dames mandés,
Et damoiseles et puceles.
Par tout voisent tost ces nouveles,
Et faites commander aussi
De toutes pars que contre li
Voist chascuns au plus noblement
Qu'il porra, et hastéement.
Car bien afiert c'on face honnour
À fille à roi de tel valour
Com est li riches rois Carmans,
Et à pucele si sachans
Et si bele qu'il n'i faut riens,
Ne de biauté, ne de tous biens.
Tout ce que je di, trouverés
En voir, quant la connoisterez."
# |
Dist li rois : "Et nous le ferons,
Biaus fiex, et moult grant joie avons
PageV01P179
Qu'amenée avez ici
Tel pucele, Dieu en merci."
Folio23r
Lors fist Marcadigas savoir
De cele besoigne le voir
De toutes pars, et commander
Fist li rois que sans arrester
Fussent les rues atornées
Très netement et arréées
Encontre la venue cele
Qui grant joie nous renouvele.
Et on le fist tout ensement
Partout de cuer et liement.
Mais durement s'esmerveilloient
Partout de ce que il ooient
Le trompeëur d'or haut tromper
Sanz nesun seul point arrester.
# |
Grant merveille avoient la gent
Pourquoi trompoit si longuement,
Et à ce bien raison avoit.
Done Ynahele se hastoit
Moult forment de li arréer
Pour tost devers le lieu aler
Là où Clarmondine cuidoit,
Si com ses fiex dit li avoit.
# |
En la place estoit amenés
Uns palefrois si arréés
Com à royne apartenoit.
Et uns siens escuiers tenoit
Un autre palefroi delés
Blanc, et si estoit enselés
D’une sele à arçons d'ivoire,
Richement ouvrée à trifoire.
PageV01P180
Et i ot sambue vermeille
Dont la royne ot la pareille.
Et li frains ert d'or bien ouvrés.
Et li palefrois estoit tés
Que nus plus biaus ne miex alans
Ne fust trouvés, ne miex séans.
Arréer l'ot fait la royne
Pour sus amener Clarmondine.
# |
Ses trois filles toutes montées
Vinrent iluec ; car plus hastées
S'estoient qu'eles onques porent,
Pour le desirrier qu'eles orent
De tost venir là où cuidoient
Cele dont forment convoitoient
K'à li peüssent tost venir
Pour li baisier et conjoïr.
Bien sembloient filles de roi;
Car si riche erent h conroi
Et li atours de toutes trois,
De sambues, de palefrois
Et de tout l'autre remanant,
Que c'estoit merveille très grant
De veöir la très grant richour
Qui estoit en leur noble atour.
# |
Plenté de dames assamblées
Estoient iluec ; car mandées
Les ot la royne Ynabele
Si tost qu'ele sot la nouvele
Que ses fiex li avoit contée.
Lors est la royne montée,
Quant les dames furent venues.
Palefrois et muls et sambues
PageV01P181
Et mules vëoir peüssiez
De maintes pars, se là fussiez,
Et plenté de dames parées
Et très noblement acesmées.
# |
Lors se sont de là esmeües
Les dames, et s'en sont venues
Là où Clarmondine cuidoient.
Li rois et ses fiex atendoient
Les chevaliers de la cité
Dont il i avoit grant plenté,
Qui moult estoient esjoï
De la nouvele c'ont oï.
# |
À Cléomadès fu bailliez
Uns palefrois apareilliez
Si com à lui apartenoit.
Son pere et les autres prioit
Moult très durement de haster.
Et les dames, sans arrester,
Erent vers le jardin alées.
# |
Quant ou jardin furent entrées,
À ses trois filles a rouvé
Done Ynabele, et commandé,
Que chascune une chançon die,
La meilleur et la plus jolie
Que ele porra aviser ;
Car tans est de joie mener.
Et lors dist chascune erranment
Qu'ele le feroit liement
# |
PageV01P182
Ne ne s'en feront pas priier.
"Dont doit l'ainsnée commencier,
Dist done Ynabele, premiers."
"Madame, moult très volentiers,
Dist Elyador, le ferai ;
Car moult très grant desirrier ai
De liement veöir celi
Que mes chiers freres aime si,
Qui tant est biaus et bons et preus.
Bien est séans l'amour d'aus II
Car moult est bonne et bele et sage.
Ci ara plaisant mariage."
# |
Après ce mot, prist à chanter
Joliement et haut et cler :
# |
"Diex nous doinst temprement trouver
Celi cui tant devons amer.
Bien sot amours à droit ouvrer.
Diex nous doinst temprement trouver
Quant tés II gens fist assambler
C'on ne les porroit trop loer.
Diex nous doinst temprement trouver
Celi cui tant devons amer."
# |
À cele chançon respondirent
Les dames, et moult s'esjoïrent
De ce que si à point chantoit
Elyador. Moult leur plaisoit
La chançon qu'ele avoit chantée.
Bien lor sambloit faite et ditée.
"Feniadisse, or tient à vous"
Dist la royne. "Dame, et nous
Le ferons." Et lors commença
À chanter, plus ne s'en targa :
PageV01P183
Folio23v
"Joie ait qui joie demenra ;
K'en joie faire raison a,
Pour ce que nous verronmes jà.
Joie ait qui joie demenra,
La plus bele k'ainc Diex forma
Ne que il jamais fourmera.
Joie ait qui joie demenra;
K'en joie faire raison a."
# |
Les dames qui iluec estoient
De respondre à point se penoient ;
Car moult leur samblent envoisies
Les chançons qu'eles ont oiies,
Et à point dites et chantées.
Parmi le jardin sont alées,
D'une part et d'autre esgardant.
Moult s'aloient esmerveillant
Auquel lez estoit Clarmondine.
Et lors prist à chanter Marine
Une chançon k'ot avisée.
Selonc ce avoit compassée
La chançon, que il li estoit
Grief de ce que tant demoroit
Que Clarmondine ne trouvoient
Ne que nouvele n'en ooient ;
S'en ert moult de cuer adolée.
Lors chanta selonc sa pensée :
# |
"Ne serai très lie de cuer
S'aurai cele trouvée
Qui sera ma dame et ma suer.
Ne serai très lie de cuer.
Avoir ne vorroie, à nul fuer,
M'amour de li ostée.
Ne serai très lie de cuer
PageV01P184
S'aurai cele trouvée."
# |
Parmi le jardin, en chantant,
Aloient ainsi, requerant
Clarmondine, que je vous di.
S'avint droit en ce point ainsi
Que li rois Marcadigas vint ;
O lui chevaliers cent et vint
Ot, ou plus, ainsi com j'entent.
Moult sambloient bien noble gent ;
Car d'aus tous li pis acesmez
Estoit richement arréés.
# |
Cléomadès devant venoit
Pour ce que mener les devoit
Là où Clarmondine laissa.
Li rois ses peres li rouva
Que il chantast une chançon ;
Car de chanter avoit raison
Puisque il tel pucele amoit
Qui si bonne et si bele estoit,
Et fille de roi si vaillant
Comme la fille au roi Carmant.
"Et certes, fait il, se j'estoie
En vostre point, ne me porroie
Tenir de chanter." "C'est passé,
Sire, et j'en ferai vostre gré.
Puisqu'il vous plaist, je chanterai ;
Vostre commandement ferai."
Li rois dist qu'il respondera,
Et il et tout cil qui sont là.
Et lors a commencié son chant
Cléomadès, trestout errant,
En alant parmi la praële,
Une chançonnete nouvele :
PageV01P185
"On doit bien aler liement
Encontre tel pucele
Com est Clarmondine au cors gent.
On doit bien aler liement,
Qu'el monde, tant com il s'estent,
N'a meillour ne plus bele.
On doit bien aler liement
Encontre tel pucele."
# |
À ceste chançon respondi
Li rois, et tout li autre aussi ;
Car tout erent en desirrier
De Clarmondine festiier
Si tost que trouvée l'aront.
Lors à primes joie feront.
De ce orent grant volenté.
Tant ont par le jardin alé,
Que les dames ont encontrées,
Dont moult i ot de tormentées
De ce que trouvée n'avoient
Cele k'à veöir desiroient.
Mais de li nouvele ne sorent
Nesune, et ne pourquant orent
II fois le jardin traversé,
L'une dou lonc, l'autre dou lé.
# |
Lors vint li rois à la royne.
Demanda li de Clarmondine
Se ele veüe l'avoit.
"Naie, Sire, se Diex m'avoit,
Dont courroucie sui forment."
Et Cléomadès erranment
PageV01P186
Leur dist que tout droit les menra
Au lieu là où il la laissa.
À ce mot d'ilueques s'esmurent
Cil et celes qui iluec furent.
# |
Cléomadès aloit devant,
Et tout li autre après sivant ;
Car au heu mener les cuidoit
Là où il laissie l'avoit.
Cléomadès tant les mena
Que il droit au heu assena
Où il s'estoit de li partis.
Lors fu malement esbahis
Quant il ne l'i a retrouvée.
L'erbe trouverent defoulée
Folio24r
Là où Clarmondine ot laissie,
Qui de cuer ert joians et lie
À l'eure que de li parti.
Et Cléomadès descendi
Tout erranment, si esbahis
Que il sambloit miex mors que vis.
Près que ses cuers ne li partoit ;
Car ce que le cheval ne voit
Li fait meschéance esperer.
De Clarmondine retrouver
Ne pot riens que I tout seul gant
Et Cléomadès maintenant
L'en leva, car bien le connu.
Lors ot le cuer si esperdu
Que à paines pot il parler.
Dist li rois : "Povez rassener
Au lieu là où vous la laissastes
Quant en ce jardin l'amenastes ?
Ce me samble diversetez
PageV01P187
Que vous n'i estes rassenez
Ne ne savez quel part ce fu."
# |
Et quant ses fiex l'a entendu,
Si dist : "Sire, ci la laissai ;
Si certainement riens ne sai
Que ce que je la laissai ci
Orendroit que de li parti ;
Mais or ne sai que ce puet estre."
# |
Li un la queroient à destre,
Et li autre au senestre lés.
Moult ert li jardins Ions et lés ;
Mais n'i ont laissié arbrissel,
Vergié, ne haie, ne praël,
Que il n'aient quise et cerchie
Clarmondine, que n'i ert mie.
# |
Et, quant assez requise l'orent,
Si que tout certainement sorent
Que ele ou jardin pas n'estoit,
Lors furent irié et destroit.
Toute la gent qui iluec erent
Tout droit au lieu se rassamblerent
Là où Cléomadès trouva
Le gant, quant là les amena.
Cléomadès tel duel faisoit
Que nus confors riens n'i valoit.
Ses serours erent descendues.
Cheveus tirez, paumes batues
I ot pour le duel qu'il menoit ;
Car, pour poi qu'il ne s'ocioit,
Ses serours les mains li tenoient.
En plorant le reconfortoient
Au miex que le povoient faire ;
PageV01P188
Joie leur estoit moult contraire.
# |
Li rois et la royne estoient
Descendu. Moult grant duel faisoient.
De ce'que il ert ensement
Au cuer orent ire et torment.
Vers Cléomadès sont venu
Qui à si très grant meschief fu
Que on porroit plus deviser.
Qui veïst ses serours plorer
Et lui, tout en plorant, baisier,
La maniere deüst prisier
De leur douz reconfortement,
Tant le faisoient doucement.
Se confors i peüst valoir,
Bien en faisoient leur povoir.
Mais confors n'i valoit noient ;
Car entre leur bras si souvent
Se pasmoit, que c'estoit pitiez.
Et, quant il estoit repairiez
Et revenus de pasmoison,
Lors regardoit tout environ.
Clarmondine moult regretoit,
Et souvent après li huchoit ;
# |
"Ha ! Clarmondine, douce amie,
Flour de lis et rose espanie,
Esmeraude, rubis, toupace,
K'atent la mors que ne me passe
Sous la gorge, et que ne me tue,
Amie, quant vous ai perdue?
Ains tel meschéance n'avint."
# |
Le gant encontre son cuer tint.
Emprès sa char bouté l'avoit ;
PageV01P189
Mais nus fors il ne le savoit.
Moult volentiers le gant baisast,
Ce sachiez, se baisier l'osast ;
Mais bien savoit c'on li torroit,
Se devant la gent le baisoit.
Souz sa chemise l'ot bouté.
Estroit le tenoit acolé.
Perdre nel vorroit à nul fuer,
Pour ce l'ot mis contre son cuer.
# |
Sa mere li tenoit le chief,
Qui estoit à si grant meschief
De la mesaise qu'il avoit
K'a pou que ele ne moroit.
Et li rois ses peres aussi
Ot le cuer si très esmari
Que il ne savoit que penser.
Cléomadès en fist porter
Enz ou chastel. Moult fu iriez
Pour son fill, et moult esmaiez.
# |
Couchier le firent sor I lit
Où il ot petit de délit ;
Car de duel fu si esperduz
Qu'il ne sot qu'il fu devenus,
Ains fu aussi com marvoiés.
N'estoit ce pas trop grant meschiés
Quant hom de tel adrecement
Qu'il ert, estoit à tel torment
K'à paines povoit il parler?
Qui veïst grant duel demener
Pere et mere, serours, amis,
Uns et autres, grans et petis,
N'est nus qui n'en eüst pité,
Tant eüst en son cuer durté.
PageV01P190
Par la cité fu espandue
Cele nouvele, et tost seüe.
Pour Cléomadès grant duel firent.
Clarmondine partout requirent,
Par chans, par bois, par vaus, par plains;
Mais adès en savoient mains
L'un jour que l'autre ne faisoient.
Ne pourquant tous jours la queroient,
L'un jour arriere, l'autre avant,
Tant que la gent le roi Carmant
Firent tant qu'à Sebile vinrent.
Savoir poez que il se tinrent
Com gent dolente et abaubie
Quant la nouvele orent oïe
Que leur damoisele ert perdue.
Ains nule gent si esperdue	.
Folio24v
Ne furent mais comme il estoient.
À pou que de duel ne moroient.
# |
Devant Marcadigas alerent.
Tout en plorant le saluerent
(Car ne s'en porent consurer,)
Et lors li prirent à moustrer
Que li rois Carmans les avoit
Envoyez à lui trestout droit.
Toute la raison li moustrerent
Pourquoi là endroit venu erent.
Et li rois leur a recordée
Comment la chose estoit alée,
Et dist que bien cuide estre fis
Que mais Cléomadès, ses fis,
De son lit ne se levera,
Si grant duel pour Clarmondine a.
PageV01P191
"Bien croi que rien nel puet garir,
Nel conviengne de duel morir.
S'en ai tel duel et tel anui,
Que, s'il muert, bien sai que mors sui,
Qu'après lui vivre ne querroie,
Ainçois meïsme m'ocirroie,
Que jamais ne seroie liez
S'il m'avenoit si grant meschiez
Que de perdre chevalier tel
Qu'il est as chans et à l'ostel.
Se je ne li apartenoie,
Sor ma loi jurer oseroie
C'on ne porroit nului trouver
Où mains eüst à amender
Qu'il a en lui, si com je croi,
Et selonc ce que en lui voi.
S'en sui si dolans, que bien sai,
S'il muert, que je pour lui morrai.
De vostre seigneur moult souvent
Ai oï parler bonement.
Par quoi moult forment me plaisoit
Ce que Cléomadès devoit
À sa fille avoir mariage;
Car tant ert bele et bonne et sage
Que chascuns de li tesmoignoit
Que toutes les autres passoit
Et de biauté et de tous biens,
Si que en li ne failloit riens.
Souvent ai oï tesmoignier
C'on ne la porroit esprisier
Tant ert bele et bonne et courtoise.
De vostre seigneur moult me poise,
Qui si très grant chose a perdue
Com fille de si grant value ;
Mais or est ainsi avenu
PageV01P192
Que moi et lui est mescheü.
Je vous pri que, quand le véez,
Que de par moi le saluez."
# |
Et cil dient qu'il le feront.
Congié prendent. Atant s'en vont ;
Car n'ert pas poins, ce lor sambla,
De plus longuement estre là.
# |
Entre aus communaument disoient
Que onques [mais] veü n'avoient
Roi ne prince, en tout leur vivant,
Si courtois ne si biau parlant.
Li rois les fist moult honnorer
Et chevaus et joiaus donner.
Mais pas prendre ne les vouloient.
Les presens le roi refusoient ;
Mais tant ne se sorent deffendre
Que il ne leur convenist prendre.
Sachiez, ou vousissent ou non,
Ot chascuns dou roi riche don.
# |
À Sebille ne demorerent
Mais que trois jours. Lors s'en alerent.
En leur pays revindrent droit
Là où li rois Carmans estoit.
De par Marcadigas li font
Salus, et puis conté li ont
La chose si qu'il l'ont trouvée.
Ne l'en ont nule riens celée.
Dou roi Marcadigas disoient
Moult de bien, et moult s'en looient.
# |
Quant Carmans a ce entendu,
Nesun seul mot n'a respondu ;
PageV01P193
Ains commença à lermoiier
Et durement à souploiier.
Vers terre prist à regarder
Et moult souvent à souzpirer.
Tant par fut plain de duel et d'ire
K'en grant piece ne pot mot dire ;
Et, si tost com il pot parler,
Lors commença à regreter
Clarmondine piteusemant.
# |
La nouvele tantost s'espant
Que d'Espaigne venu estoient
Li message, et si raportoient
Que Clarmondine estoit perdue.
Sachiez mainte paume batue
Y ot, et maint cuer très dolent.
Partout faisoient duel trop grant.
# |
Liadès, Gaiete et Florete,
Se chascune d'une sajete
Fust férue enz ou cuer dedenz,
Ne cuit pas que plus grans tormens
Fust en eles que eles orent
Quant eles ces nouveles sorent.
Pitiez seroit à recorder
Li duels c'on leur veïst mener.
Tant par orent grant desconfort
K'adès souhaidoient la mort.
# |
Iluec ot maint cheveil tiré.
Si furent par tout tormenté
Que en aus nesun confort n'ot.
Et, quant done Clarmonde sot
Comment sa fille estoit perdue,
À ses mains s'esgratine et tue.
PageV01P194
Je croi que ele se tuast
Se on couvenir la laissast.
Mais ses puceles acorues
I sont. Les mains li ont tenues.
De leur dame pitié avoient.
À leur povoir la confortoient.
Mais petit i valoit confors.
Car li cuers qui ert en son cors
Ne pot le meschief soustenir,
Ains le couvint à ce venir
Que de duel morir se laissa,
K'ains puis ne but ne ne menga
Clarmonde ; car mengier ne pot
Puis que la nouvele oïe ot
Que sa fille perdue estoit.
Lors ot Carmans le cuer destroit
Quant perdu ot et fille et mere ;
Moult li fu cele chose amere,
Folio25r 
Car onques puis ne fu veüe
Fille et mere de tel value
Que eles erent, c'est passé,
D'onneur, de bien et de biauté.
# |
Tant estoient triste [et] dolant
Partout la gent le roi Carmant
K'à paines le vous diroit nus.
De ce ne vous parlerai plus
À ceste foiz, ains vous dirai
La verité si com la sai,
Quel part li rois Crompars torna
Le jour que Clarmondine embla,
Et quel voie et quel chemin tinrent,
Ne où alerent, ne où vinrent.
# |
Bien avez entendu comment
PageV01P195
Crompars malicieusement
Clarmondine o lui enporta,
Qui maint grant cri le jour geta
Quant ele fu aperceüe
Qu'ele ert traye et deceüe.
Lors commença à regreter
Cléomadès, et à plorer.
Derriers li regardoit souvent
Et huchoit moult piteusement :
"Cléomadès ! Cléomadès !
Amis douz et courtois et nés,
Sages et preus et entendans,
Et plus k'autres biaus et plaisans !
Amis, pourquoi fui onques née,
Quant si tost fui de vous sevrée?
Sevrée en sui je voirement,
Car morir me couvient briement.
Si fine amour, qui si pou dure,
Naist de destinée trop dure.
Onques amour si afinée
Ne fu qui si tost fust finée.
Hé ! las ! com ci a dure fin,
Quant je l'aim tant de très cuer fin.
Lasse ! dolente que m'avint,
Quant cis dyables sor moi vint
Qui mon seigneur et mon ami
A ainsi faitement tray
Et moi morte, sans eschaper !"
# |
À ce mot la couvint pasmer.
De duel plus ne s'en pot tenir.
S'ele eüst povoir de cheïr,
Sachiez k'à terre fust versée ;
Mais si ert loiie et bendée
Qu'ele n'ot povoir de verser.
PageV01P196
Crompars la prist à regarder.
Se li sambla que morte fust.
Lors lasche le cheval de fust ;
Tout belement l'a avalé
Sous I arbre, en I très biau pré.
# |
Crompars a la pucele ostée
Jus dou cheval, et esventée
L'a dou coron de son mantel.
De l'aigue prist en I ruissel
Qui là ert corans seur gravele.
Lors en geta à la pucele
Parmi son très plaisant viaire.
Clarmondine la debonaire
Revint à li. Lors souzpira.
Tantost Cléomadès hucha
Qu'ele revint de pasmoison.
De travail ot si grant foison
Que à paines se soustenoit ;
Mais de ce ne li souvenoit.
# |
Elle n'acontoit pas I ail
Ne à paine ne à travail
Que ele eüst ce jour soufert
Pour Cléomadès qu'ele pert,
De quoi ele est si esloignie.
Moult het et despite sa vie
Que mais veöir ne le cuidoit ;
C'estoit ce qui plus li touchoit.
Car à Cléomadès tous jours
Estoit ses cuers et ses retours.
Ne li touchoit point d'autre anui.
Adès li souvenoit de lui.
# |
Crompars la confortoit forment
PageV01P197
Et li prametoit que briement
La menroit en I tel pays
Où moult auroit de son devis,
Et la feroit d'or coronner ;
Mais qu'ele se vueille acorder
À ce que ele soit s'amie,
Royne sera de Bougie
Et la prendra à moillier.
"Bele, ne vous doit anuier
Se je sui petis et boçus ;
Car ne doit estre de refus
Li dons que je vous offre ci."
"Ha ! Sire, fait ele, merci.
Sui je dont en la conpaignie
Crompart, qui est roi de Bougie ?" 
"Oïl, fait il, foi que vous doi."
"Certes, Sire, ce poise moi ;
Et, se amender le povoie,
Pas longuement n'i remanroie.
Cléomadès m'a tant conté
Comment vers lui avez ouvré,
Et le forfait par quoi perdistes
Sa suer, quant vers lui mesfeïstes,
Et comment pour lui fustes pris,
Et eüssiez esté honnis
Se il ne fust tost repairiez.
De tous estiez à mort jugiez.
Il vous fist geter de prison ;
Mal l'en rendez le guerredon.
Quant emblée m'avez à lui,
Je croi fait li avez anui.
Mais, se vous que courtois faisiez,
Droit au lieu me reporteriez
PageV01P198
Où vous me trouvastes séant ;
Si auriez fait aumosne grant."
# |
Dist Crompars : "De ce ne parlez.
Sachiez que ma femme serez."
"Sire, fait ele, non serai;
Car tant ne vail ne tant ne sai
Par quoi il aferist à moi
Que je fusse femme de roi.
Je sui une povre meschine,
De pere et de mere orpheline,
Et sui, n'en mentirai noient
Venue de moult povre gent."
# |
Dist Crompars ; "Et de quel païs
Estes vous? Or m'en soit voir dis,
Je vous en pri, ma douce amie."
"Certes, Sire, de Lombardie ;
À envis vous en mentiroie.
Fille d'une ouvrière de soie
Folio25v
Sui, et si fui née à Melan.
Pere et mere perdi ouan.
Despuis ce di norrie m'a
Une dame, qui me donna
Ceste robe que j'ai vestue ;
Car moult estoie povre et nue.
Grant bien li croisse et grant honnour !
Moult me fist de bien et d'amour ;
Car, se ele n'eüst esté,
Morte fusse de povreté.
Cléomadès passa par là.
De ses trois serours me parla,
Pour ce que ouvrer je savoie,
PageV01P199
Me dist k'avoec eles seroie
Et que jamais no me faurroit.
Et, pour ce que pas ne vouloit
Que nus i peüst mal penser,
Me fist ou jardin demorer
Le jour que là m'ot aportée
Sor ce cheval. À recelée
M'en ving o lui, k'ains ne le di
Ne à parent ne [à] ami.
Ainsi sui à lui otroiie.
Pechié faites et vilonnie
Que ainsi de lui m'esloigniez
Et telement me traveilliez."
# |
Dist Crompars : "Jà ce ne pensez;
Car jamais vers lui ne r'irez.
Cui fille soiez, ne cui non,	
Sachiez moi aurez à baron.
Tout certainement le vous di ;
Car vostre biauté m'a saisi. 
De vous amer sui si espris
Que tant vous aim et tant vous pris,
Que il couvient, comment qu'il aille,
Que ma femme soiez sans faille.
Vostre lignage franchirai
Et de vous royne ferai ;
Pour vous les vorrai porveöir
Si que bien le porront vouloir.
Vous dites que povre gent sont,
Mais sachiez que riche seront."
# |
Quant Clarmondine l'entendi,
D'angoisse et de paour fremi
De ce k'en tel point se véoit ;
Li et sa vie despisoit.
PageV01P200
Souvent retornoit sa veüe
Au lez dont ele estoit venue ;
Pour l'amour de Cléomadès
Regardoit cele part adès.
Lors s'est Crompars devers li trais.
"Bele, fait il, soiez en pais
Ne ne vous esmaiez de riens.
Mes cuers est vos, li vos iert miens.
Tout serai à vostre vouloir
De cuer et de cors et d'avoir,
Mais que vous faites mon plaisir."
Et lors commença à fremir
Clarmondine moult durement
Et à penser com faitement
Ele li porroit eschaper.
Lors se commence à aviser
Que se ele venir peüst
Là où plenté de gent eüst,
Qu'ele querroit bien tour comment
Eschaper porroit soutilment.
# |
"Sire, fait ele, je vous pri,
Puiscedi que il est ainsi
Que il vous plaist que vostre soie,
Bien me plaist et bien m'i otroie.
Grans honnours m'avient, Dieu merci.
Je m'i assent bien par I si
Que vous me faciez tant d'onnour
Que ne me querez deshonnour,
Ne ne me faites felonnie
Ne riens qui tourt à vilonnie,
Et, pour l'onneur de mariage,
Me garderez mon pucelage
Tant que espousée m'aiez ;
PageV01P201
Je vous pri que le m'otriiez."
# |
Dist Crompars : "Je l'otrierai
Par I si que je vous dirai,
Qu'el premier lieu que nous venrons
Que là endroit espouserons,
Ne jà ne le contredirez."
"Sire, fait ele, c'est mes grez ;
Ainsi en couvent le vous ai.
Mais, quant en vo pays venrai,
Je vous pri, se vous tant m'amés,
Que vous nostre afaire celez
D'ainsi que vous m'avez trouvée,
Ne comment m'avez aportée;
Ne de ma povre estracion
Ne ferez vous jà mencion,
Car j'en seroie mains prisie
S'on savoit la povre lignie
Dont je sui estraite et venue;
Pis en seroie receüe."
Et li rois Crompars dit li a
Que jà mencion n'en fera.
# |
Il pensoit bien k'en son pays
Se retraïroit à envis ;
Car bien sot que forfait avoit
À l'usage qui i estoit,
Que moult auroit ainçois à faire
K'en son pays osast retraire.
Mais moult à envis le diroit
À cele que il enportoit.
En son cuer ot en proposé
Que, quant il auroit espousé,
K'en I pays divers iroit
Là où nus ne le connoistroit,
PageV01P202
Et manderoit privéement
En son pays or et argent.
Ainsi lairoit le tans passer.
# |
Tout si que m'oez deviser
Ot cele chose en proposée.
Clarmondine a moult regardée ;
Son non li demande et enquiert.
Cele dist celer ne li quiert.
"Sare, fait ele, sui nommée."
"Ce soit à bonne destinée !"
Fait il. "Ma douce baisselete,
C’est moult plaisans nons que Sarete."
# |
Li rois Crompars lors s'avisa
C'un petit mengier la fera.
Lors a de la viande prise,
Devant Clarmondine l'a mise
Qui moult ert traveillie et vaine.
Une soupelete en fontaine
Menja, que plus ne pot mengier.
Et li rois Crompars, sanz targier,
Folio26r 
La fist tout errant remonter ;
Car là ne volt plus arrester.
# |
Ambedui remontent ensamble.
Clarmondine de paour tramble;
Car moult estoit espoëntée
Et triste et dolente et irée.
En son cuer prist à regreter
Son pere, et moult à souspirer,
Et sa mere ; car bien cuidoit
Que jamais nul d'aus ne verroit,
Et Cléomadès autressi :
Ce ne povoit metre en oubli.
PageV01P203
Que vous iroie je contant?
Seur le cheval allèrent tant,
Ainsi que j'ai oï conter,
C'une vile qui sie sus mer
Virent, en une grant valée,
Qui ore est Salerne apelée.
Maint val virent et maint grant mont.
C'estoit uns roiaumes adont
Qui de grant seignorie estoit;
Car moult grant terre i apendoit.
Moult par fu sages et courtois
Cil qui de la terre estoit rois,
Et avoit non Meniadus.
Biaus et gens fu et par creüs.
Soie ert la terre de Labour
Et autres grans terres entour.
# |
Moult avoit en lui roi poissant.
À lui estoient apendant	
Maint pays que ne sai nommer.
Mais souvent ai oy parler
D'une coustume qu'il avoit.
La coustume quele ele estoit
Vous vueil maintenant deviser;
C'est que nus ne povoit passer
Par son pays, ne couvenist
Que ainçois devant lui venist.
Jà si grans sires n'i passast
Qui, sans ce, passer i osast 
K'aincois ne venist devant lui,
Ou avoir en peüst anui.
Mais, qu'il fussent gent trespassant,
Chevalier, clerc, ne marcheänt,
N'i paioient lors nul paiage
Fors que maintenir cest usage.
PageV01P204
La raison pour quoi le faisoit,
C'est pour ce que savoir vouloit
Nouveles des estranges terres,
Des tournoiemens et des guerres.
Car, pieça que tornoiement
Furent trouvé premierement,
À premiers fu-uns esbanois
Pour porter armes et conrois.
Le trouverent li chevalier
Pour plus estre en armes manié,
Et que miex aidier s'en seüst
Chascuns, se mestier en eüst.
Pour ce furent li tornoi fait.
Mais il sont ore contrefait,
Car au jour d'ui est moult crueus 
Si fais geus, et moult perilleus.
# |
Nouveles d'estranges manieres
Avoit cis rois durement chieres.
Ainsi l'avoit acoustumé
Rois Meniadus et usé.
Nouveles volentiers oöit, 
Et dou sien à tous ceuls donnoit
Qui nouveles li aportoient,
Selonc ce qu'eles li plaisoient
Et qu'eles li estoient beles.
Moult amoit diverses nouveles.
# |
Meïsmes à la soie gent
Donnoit une somme d'argent
Le premerain qui li disoit
Nouveles k'oïes n'avoit.
Toute sa vie le maintint.
PageV01P205
Quant Crompars vers la cité vint, Quant en si divers lieu la voit,
Lors pensa que là se trairoit, Et k'assez i a divers lieu
Pour manoir gent qui sont eskieu; Lors li sambla bien que trouvé
Ot lieu tout à sa volenté.
En coste I bois, lez I pendant,
Se va doucement avalant.
Iluec avoit riviere et prés.
Là s'est rois Crompars avalés
Assez près d'une fontenele
Qui clere et sourdans seur gravele
Estoit. Iluec sont arrestu ;
Jus dou cheval sont descendu.
# |
Li rois Crompars ot enpensé
Qu'il ne trairoit vers la cité
Jusqu’à tant qu'il seroit tous nuis ;
Car moult redoutoit les anuis
De plenté de gent encontrer.
Pour ce li plot à demorer.
Et moult bien enpensé avoit
Que seur son cheval pas n'iroit,
Mais à pié le passet soué ;
Car trop seroient regardé
Se seur le cheval i entroit.
En tel maniere fais estoit
Li chevaus que m'orrez conter ;
Car on ne doit riens trespasser
En nule estoire veritable,
Si c'on puet faire en une fable
PageV01P206
Ou en antroignes, ou en songes,
Ou en trufes, ou en mençonges.
Mais d'estoires d'autorité
Doit on dire la verité.
# |
Sachiez que li chevaus ert tés
Que de cui que il fust portés
Ne sambloit nule riens pesans,
Mais I petit ert encombrans
Pour la grandeur qui ert en lui ;
K'à porter ne grevoit nului,
Mais que les chevilletes fussent
Tornées si qu'eles deüssent,
Uns petis enfes le portast
S'adroit les chevilles tornast.
# |
Crompars lez la fontaine sist,
Qui moult très volentiers veïst
Que aprochie fust la nuis ;
Car ne li estoit pas deduis
D'iluec longuement demorer
Pour sa volenté achever.
Moult très durement souspiroit
Clarmondine, et moult s'esmaioit
Pour ce k'ert seule avoec celui
Qu'ele doutoit plus que nului ;
Folio26v 
Car ne savoit que cil pensoit
Ne où il mener la vouloit.
Mais de tant moult bien li cheï
Que droit à ce point escheï
Que Crompars fu si deshaitiez
K'à paines pot ester sor piez ;
Car, quant on mains garde s'en prent,
Vient maladie à plusour gent.
# |
À Clarmondine le dist lors.
PageV01P207
"Bele, fait il, trestous li cors
M'est esmeüs si durement
Que malades sui vraiement.
Un petit me reposerai,
Seur vo giron me coucherai ;
Espoir tost rassouageroie
S'un petitet dormi avoie."
Clarmondine li otria,
K'escondire ne li osa.
Droit en son giron s'est couchiez
Crompars. Moult li douloit li chiés ;
Car maladie de chalour
Li estoit prise celui jour
# |
Entrues que Crompars là gisoit,
Clarmondine tous jours ploroit,
Et si regretoit tout adès
Pere et mere et Cléomadès.
Ses Diex moult souvent reclamoit
Selonc la loi qui lors estoit.
De lermes estoit si moillie
La robe qu'ele avoit vestie,
Que pitiez ert à regarder.
Au lés, par de devers la mer,
Vit gens venir qui reclamoient
Oisiaus, et lor loirres getoient
D'une part et d'autre souvent.
S'avint adont si faitement
C'uns de lor faucons abati
Une corneille près d'iki
Où Clarmondine ert et Crompars.
Parmi mares, parmi essars,
Venoient cele part corant
Fauconnier durement huiant.
PageV01P208
Cil fauconnier qui là venoient
Au roi Meniadus estoient,
Qui en riviere esbanier
Estoit venus après mengier.
Lor faucons maintenant reprirent;
Droit si que au retour se mirent.
II des fauconniers se sevrerent
Des autres, s'avint qu'il trouverent
Devant aus, souz une aube espine
Séant, la bele Clarmondine.
# |
Chascuns d'aus moult se merveilla
Dont si bele riens venoit là.
Courtoisement l'ont saluée,
Et ele, com bien avisée,
Les respont moult très doucement ;
Et li rois Crompars erranment
S'esveilla. Et lors s'est levez.
Dou mal qu'il ot fu enbrasez.
# |
Li fauconnier moult s'esbahirent
De cel home que si lait virent
Delez si très bele pucele
K'ainc mais n'orent veü si bele.
Au roi Crompart assez parlerent,
De son estre li demanderent,
Et Crompars, qui assez savoit,
Vers aus sagement se couvroit.
# |
Li uns d'aus à l'autre conseille,
Et dient : "Vez ci grant merveille
C'une femme avons ci trouvée,
La plus bele qui ainc fu née
Ne qui naistre puisse jamais ;
Et cis hom lez li est si lais !
PageV01P209
Dont puet venir tele assamblée?
Je croi miex que il l'ait emblée,
Que ce qu'ele sa femme soit."
Ainsi l'uns à l'autre disoit.
# |
Lors di li uns : "Je m'en irai
À mon seigneur, et li dirai
Bien hastéement ces nouveles,
Qu'eles sont diverses et beles."
Li autre dist que part ara
En ce que li rois li donra,
Et pour aus garder remanroit
Dusqu'à tant qüe il renvenroit.
Et cis son gaaing li otroie.
Lors se mist tantost à la voie.
# |
Montez fu sus I chaceöur.
Assez tost fu à son seignour.
"Sire, fait il, nouveles sai
Par quoi de vous biau don aurai."
"Or, dites donc," ce dist li rois.
"Sire, fait il, delez ce bois
Avons trouvé une pucele
Assez plus que nule autre bele,
Et le plus lait home avoec li
C'onques en mon eäge vi.
Une chose trop desguisée
Ont là avoec aus aportée.
Ne sai pas quel chose c'estoit;
Mais, ainsi com il me sambloit,
Faite est à guise de cheval.
Iluec ai laissié Robual,
Vostre fauconnier, pour garder,
PageV01P210
Et je vous sui venus conter
Ceste aventure, par I si
Que de mon gaaing part a mi.
Dou trouver fumes conpaignon,
Et li gaains iert à parçon ;
Car ainsi li ai en couvent."
Et li rois li dist erranment
Qu'il li donra, n'en soit doutiex,
Tel don dont chascun sera miex.
Et cil l'en a moult mercié.
Après ce n'a point detrié.
# |
Le roi Meniadus mena
Là où son conpaignon laissa.
Mais, entrues qu'il ont demoré,
Avoit Robual tout conté
À Crompart l'estre dou pays,
Qu'il ot demandé et enquis
Comment a non cele cité,
Et qui ert sires dou regné
De la terre où il ert venus.
Et cil li dist : "Meniadus
En ert rois et sires clamez.
Ez vous le roi parmi les prez."
# |
[R]obual vit le roi venant ;
Contre lui vint esperonnant.
"Sire, fait il, par verité,
Bien ont nostre faucon volé
Folio27r 
C'une pucele avons trouvée
Plus bele riens ne fu ains née.
Sage et courtoise et bien parlant
La trouverez, ce vous créant.
PageV01P211
De tant com de li ai apris,
La lo moult en mon cuer et pris,
Mais I home a à conpaignon,
Ne croi que plus lait veïst on."
# |
Quant Meniadus oï l'ot,
Cele part, au plus tost qu'il pot,
S'en vint, et lors est descendus.
Droit vers Clarmondine est venus.
Courtoisement la salua,
Et Clarmondine se leva
Contre lui, son salu li rent.
À Meniadus erranment
Sambla que de bon lieu venoit.
Mais durement se merveilloit
Où cil lais hom l'avoit trouvée,
Ne pourquoi l'ot là amenée.
Lors fist de sa gent en sus traire
K'enquerre veut de lor afaire.
# |
Quant sa gent furent en sus trait,
À Crompart moult bel et atrait
Enquist trestout premierement
Dont vient, ne où va, ne comment
Là est venus, n'en quel contrée
Fu si bele femme trouvée.
Crompars dou tout li respondi
Selonc ce qu'il i aferi.
De son afaire à point couvrir
Sot moult très bien à chief venir.
# |
Meniadus li demanda
De la pucele qui ert là
S'il l'avoit tolue ou robée,
Ne s'ele ert sa femme espousée.
PageV01P212
Et cil dist que sa femme estoit
Et que espousée l'avoit ;
Et dist qu'il ert fisiciens
Et si estoit bons surgïens,
Et k'à Salerne aloit manoir,
Et que là vorroit remanoir ;
Car moult ert Salerne loée
Et prisie en mainte contrée.
"Pour ce i vorrai demorer."
# |	
Lors prist Clarmondine à plorer,
Qu'ele ne sot le meilleur faire
Ou de li nommer, ou de taire.
Meniadus l'a regardée.
Moult la vit souple et esplorée.
"Bele, fait il, entendez çà ;
Dites moi de cel home là
Se vous le tenez à baron."
— "Par mon chief, biau Sire, je non ;
Jà nel sera n'ainc ne le fu."
Quant Crompars a ce entendu,
Si durement fu esbahis
Et desconfortés et marris,
K'à paines vous porroit nus dire
Le grant corrous qu'il ot, ne l'ire.
# |
Bien voit k'en mençonge iert trouvez
De ce dont il fu oposez ;
PageV01P213
Bien voit que il est deceüs.
Malades fu et esmeüs;
Car forment li touche et anoie
Que la bele pucele noie
Que ele sa femme n'est point.
C'est la chose qui plus li point.
# |
Bien voit que n'a cure de lui.
Moult li tournoit à grant anui
De ce qu'ele l'ot detriié 	
Par paroles et pourloignié ;
De tout à deceü se tient.
Rois Meniadus avant vient ;
À Crompart dist qu'il enveuroit
En son chastel, là connoistroit
Qui il ert ne de quel contrée,
Ne dont la pucele estoit née.
Car iluec plus n'en enquerroit
Dusqu'à tant c'u chastel seroit.
# |
Meniadus ainsi parla
Que en son chastel l'enmenra.
Là sara tout à tans adont
Que il quierent ne quel gent sont
Ne quel merveille ce puet estre.
Iluec ot palefrois en destre
C'on ot fait pour lui amener.
La damoisele fist monter
Li rois, tout errant, à sa gent
Qui le firent moult liement ;
Car pour la grant biauté de li
Estoient trestout esjoï.
PageV01P214
Que vous iroie je contant?
Crompart firent monter errant
Sor I des chaceöurs le roi.
Son chevalet prist delez soi,
Car en lui grant fiance avoit
D'eschaper quant il li plairoit.
Mais de ce n'avoit nul talent;
Ains pensoit en son cuer comment
Clarmondine mise r'eüst
Arrier sus son cheval de fust,
Car moult tost eschapez seroit
Se de li resaisis estoit,
Et pense que, quant la r'aura,
Que mais ne la deportera
Qu'il n'en face tout son plaisir,
Quoi k'après en puist avenir,
Ne comment qu'il li viengne en gré,
Il en fera sa volenté ;
Et pense que mais à nul jour
N'aura vers lui pais ne amour
Pour ce que ele avoit dedite
La parole k'au roi ot dite
Quant pour sa femme la clama
Et ele dou tout le noia.
Tart en venra à repentir
Se seul à seul la puet tenir.
Mar l'a deceü n'engingnié :
Ele en aura mauvais marchié.
Tout ainsi com je vous le di,
Sont ensamble de là parti.
À Salerne s'en retornerent.
Clarmondine moult regarderent
Ainsi com il s'en repairoient ;
L'uns à l'autre moult en parloient ;
PageV01P215
Chascuns forment s'esmerveilloit
De la grant biauté qu'ele avoit.
# |# |
Li rois vint dedens son chastel.
Mais, cui que il soit, lait ne bel,
Clarmondine ne desplot point,
Que sa chose fu en tel point
Folio27v 
Selonc ce qu'il ert avenu.
Fu lie que ainsi li fu.
Fors des mains Crompart se véoit,
C'ert tous li confors qu'ele avoit.
# |
Quant ou chastel furent entré,
Clarmondine, moult très soué,
Jus dou palefroi descendirent.
À chascun plot ce k'en li virent.
Liez ert qui servir la povoit,
Pour ce que si très bele estoit.
Quant la nouvele a entendue
La mere au roi, que là venue
Ert une pucele si gente,
Entre li et sa fille Argente
Issirent fors, pour li veöir.
Moult desiroient à savoir
S'ele ert si bele qu'il disoient,
Car nului croire n'en vouloient.
# |
À Clarmondine vinrent droit ;
Et, quant Clarmondine les voit,
Li cuers moult li rassouaga
Que avoec femmes se trouva.
Comme sage et bien avisée,
A la mere au roi saluée,
Et sa suer, qui tantost la prist
Par la main, delez li la mist.
PageV01P216
Moult près de li l'a acostée ;
Car moult ert sage et avisée.
Plus que on dit ne lor avoit
Estoit bele, ce lor sambloit.
En lor chambre l'en ont menée ;
Sage et courtoise l'ont trouvée
Et de bonne maniere plaine.
De li servir chascuns se paine ;
Pour sa douce gentill manière
L'ot chascuns d'aus erranment chiere.
# |
Crompars et li chevaus estoient
Eu la sale. Là s'assambloient
Cil dou chastel communaument.
Moult se merveilloient forment
Et dou cheval et de celui
Qui avoit au cuer grant anui ;
Car bien véoit qu'il ert honnis.
Miex vousist estre mors que vis ;
Car bien vit que perdue avoit
Clarmondine ; mais ne l'auroit.
Cela li touche au cuer et cuist,
Et sa maladie li nuist.
# |
Savez qui l'assailloit forment?
Ce qu'il ne véoit tour comment
Sa chose en mauvais point ne soit.
Car, se Meniadus savoit
Comment sa besoigne est alée
Et comment il avoit trouvée
La pucele qui estoit là,
Et com faitement il l'embla
Par son malice et par sa guile
Dedenz le jardin de Sebile,
Il i porroit tel chose entendre
PageV01P217
Qu'il le feroit ardoir ou pendre ;
Et, se il est en prison mis,
Si rest il aussi bien honnis.
Car, se Cléomadès savoit
Qu'il fust là, tantost i venroit;
Et, se de lui estoit trouvez,
C'est passé, il seroit alez ;
Car par lui seroit tost prouvé
Ses mesfais et sa fausseté.
# |
De Clarmondine repensoit
Que ele tout à plain diroit
Kan c'on li vorroit demander,
Ne feroit force dou celer.
Ne set qu'il puist dire ne faire.
En mauvais point voit son afaire
Entre tourment et maladie ;
Ont sus sa santé grant envie
K'entre aus II l'assaillirent si
Que en frenesie cheï.
Car anuis le fist trebuchier
Si k'ains puis ne pot redrecier.
Le cuer maté, le cors vaincu
Ot, si qu'il ne sot où il fu.
# |
Lors est li rois Meniadus
Là endroit à Crompart venus;
Car il li vorra demander
Dont il vient ne où doit aler,
Et qui la damoisele estoit
Que avoec lui ainsi menoit.
Li rois moult près de lui s'est trais.
Moult très à point et moult en pais
Li a demandé et enquis
Dont il ert ne de quel pays,
PageV01P218
Et comment il avoit à non.
Mais cil ne dit ne o ne non.
Moult longuement à lui parla
K'ains Crompars I mot ne sonna
Qui ressamblast ne tant ne quant
Ce dont il l'aloit araisnant ;
Car d'anui et de maladie
Estoit cheüs en frenesie.
Et Meniadus entendoit
Que cil là le contralioit
Et que respondre ne li daigne ;
S'en ot grant ire et grant engaigne.
Lors jura sa loi erranment
Que, se tost et apertement
Ne dit ce que il li demande,
Que soufrir angoisse très grande
Li fera, et enprisonner,
Et telement enchaienner,
Que à tart s'en repentiroit
Se il de lui plus se mokoit.
Et cil assez plus que devant
Aloit erluises respondant,
Com cil qui n'ot point d'escient
Ne avis ne apensement.
Ne plus ne mains parloit com cis
Cui entendemens est faillis.
# |
Et lors le commanda à prendre
Meniadus, sans plus atendre.
Et, quant sa gent l'ont entendu,
Après ce n'ont point atendu,
Ains l'ont en la prison mené	
Et fortement enprisonné.
Iluec [il] demora tous seus.
PageV01P219
Tant fu destrois et angoisseus
D'anui, de mal et de prison,
Que pas ne peüst par raison
En tel point longuement durer.
Morir le convint et finer.
# |
Ainsi diversement fina ;
Folio28r  
Car ses malices l'engingna.
On dist pieça en reprouvier
Que tex cuide autrui engingnier
Et faire damage et anui
Qui le fait meïsmes à lui.
Aussi dou roi Crompart avint.
Par malice à male fin vint.
Qui malice veut maintenir 
Bien doit à male fin venir.
# |
Ses gardes vinrent léens lors
Droit après ce que il fu mors.
Quant voient que li cors se gist,
Bien cuidierent qu'il se dormist.
Entre aus forment le maneçoient
Pour ce k'esmaier le vouloient.
# |
Li un dient c'on l'arderoit,
Li autre c'on l'ecorcheroit.
De chascun estoit dejugiez.
"Dormez vous, font il, ou veilliez?
Sires vilains, nel celez mie,
Dont vous vint si très bele amie
Que ici avez amenée ?
Bien savons que l'avez emblée ;
Malement estes arrivez,
Se longuement le nous celez."
# |
Lors sont tout entour lui venu.
PageV01P220
Dist l'uns : "Trop i avez geü,
Ne faites pas ci le truant."
Lors le drecent en son séant.
Et cil tint la teste baissie
Qui n'avoit en lui point de vie.
Li uns le chief li relevoit,
Et li autres le soustenoit ;
Li tiers disoit que mal ert fait
Que on li faisoit tant de lait.
# |
Tantost virent que mors estoit
Quant soustenir ne se povoit.
Chascuns tous esbahis en fu.
À Meniadus sont venu.
Avoec sa mere la royne
Ert pour parler à Clarmondine.
À merveille la regardoient
Tout cil qui là endroit estoient
Pour la très grant biauté de li.
En la chambre, trestout enmi,
S'en vinrent cil qui ont conté
Que le lait home ont mort trouvé.
Si haut l'ont dit k'oyr le porent
Tout cil qui là oyr le vorrent.
De ceaus qui en la chambre furent
Plusour cele part s'en corurent.
Mort le truevent, merveille en ont.
Tout errant enterrer le font.
# |
Clarmondine, quant l'entendi,
Durement en fist l'esmari.
En faisant samblant de plorer,
Prist en son cuer à aviser
Que se vers aus se descouvroit
Jamais eschaper ne porroit.
PageV01P221
Pour ce de li nommer n'ot cure,
Qu'ele en redoutoit l'aventure,
N'ele ne revéoit comment
Peüst revenir nulement
Au lieu dont ele estoit venue.
Esbahie ert et esperdue.
Volentiets aucun tour trouvast
Comment sauvement eschapast.
# |
Se dolente ert, ne m'en merveil ;
Car seule ert et sans nul conseil
En païs divers et lointain.
Argente la prist par la main,
Qui de li avoit grant pitié ;
Lors li a doucement priié
Par amour, qu'ele ne s'esmait,
Car bien sache ele entresait
Que en sa chambre o li gerra
Ne que nul mal sans li n'ara.
# |
Clarmondine moult en fu lie.
À mains jointes moult l'en mercie,
À genous l'en a enclinée ;
Mais tost l'en a sus relevée
Argente, qui moult fu courtoise.
De Clarmondine moult li poise
Que si voit de cuer à meschief;
Moult li touchoit, moult li ert grief.
Se bien la seüst conseillier,
Ne s'en fesist gaires priier.
# |
Meniadus lors s'avisa
Que de son estre n'enquerra
Dusqu'à tant que miex reposée
Sera; car moult sambloit lassée.
Et, pour ce que cil mors estoit
PageV01P222
Qui là amenée l'avoit,
Ne la vouloit pas trop coitier,
Ne si tost son estre encerchier.
Mais sachiez bien certainement
Que tout son cuer entierement
Li ot Meniadus donné;
Et bien avoit jà enpensé
Que il à femme la prendroit,
Ne pour nului ne le lairoit,
Quel qu'ele fust, ou povre ou riche.
Ses cuers à ce faire s'afiche ;
Car son cuer avoit jà tout pris
Amours, et en sa prison mis.
Cele prison moult li plaisoit,
Car ses cuers ainsi le vouloit.
# |
Car adont tel coustume avoient
Li grant seignor, qu'il ne chaçoient
Terre ne tresor ne avoir,
Mais que il peüssent avoir
Bele pucele et bien taillie,
Estraite de bonne lignie;
Mais, que pour bonne fust tenue,
Ainçois fust prise toute nue,
Que ne fust une empereris
Laide et lourde en fais et en dis.
Mais or n'en veut on nule avoir
Bele ne bonne à pou d'avoir.
À grant honnour atournoit on
Roi ou conte, duc ou baron,
Quant en tel point se marioit ;
Tous li mondes l'en gracioit.
Mais au jour d'ui passe richece
PageV01P223
Bonté, biauté et gentillece,
Si que en maint lieu est parant :
Mais de ce me tairai atant.
# |
Meniadus, qui espris fu
Dedenz le cuer d'amoreus fu,
Clarmondine a sa suer baillie
Qui moult de cuer l'a aaisie.
Congié prist. Lors s'en est tornés
D'amours estoit si atornés
Folio28v
Qu'ele le tenoit en ses las ;
Ce li ert deduis et soulas.
Mais onques mais seü n'avoit
Comment amours les siens menoit.
Ses cuers ne pensoit k'à amours ;
N'avoit nule pensée aillours.
# |
La mere au roi moult honnora
Clarmondine, et moult enpensa.
Dame estoit de moult bon afaire,
Et avoit à non Bien-doit-plaire :
C'est des nons de çà en arrier.
Moult fist cele dame à prisier.
Entr'ele et Àrgente honnorerent
Clarmondine, et moult enpenserent;
Assez plus que je ne vous di
Furent très soigneuses de li.
N'est nus cui ele n'agréast
Qui par loisir la regardast.
# |
Dusqu'à lendemain demora
Meniadus. Lors revint là.
N'ot pas toute la nuit dormie;
PageV01P224
Tenu li orent conpaignie
Penser amoreus, qui souvent
Ont fait veillier à mainte gent.
Amours vers li saisi le tint.
Vers la chambre sa mère vint;
Car moult très volentiers sauroit
Qui cele damoisele estoit
Oui il avoit si enamée.
Il et sa mère l'ont mandée.
# |
Argente, sa suer, l'amena.
Li rois contre ele se leva.
Tout IIII en la chambre s'assirent.
À Clarmondine moult enquirent 
De son estre et de son afaire.
Mais ains ne la porent atraire
À ce que ele leur deïst
Oui ele ert : envis le feïst.
Meniadus li demanda
Dont ele ert, et dont venoit là,
Et qui estoit cil lais vilains
Qui l'avoit eüe entre mains ;
Et dou cheval, qu'il senefie,
Li pria moult qu'ele li die,
# |
Clarmondine la debonaire
Li dist : "Sire, n'avez que faire
De savoir si faite besoigne.
Avoir devroie grant vergoigne
Se je le voir vous en disoie,
Et à envis vous mentiroie.
Puisque vous plaist que je le die,
Je le dirai, mais c'iert folie;
Car moult petit me priserez
Quant la verité en sarez."
PageV01P225
Li rois dist que savoir le veut.
# |
"Sire, puisque faire l'estuet,"
Fait ele, "et je le vous dirai,
Jà pour honte ne le lairai."
# |
Lors li a dit moult doucement :
"Biau Sire, sachiez vraiement,
Vers les mons de Mongieu fui née:
Ou pays m'apele on Trouvée.
Trouvée fui je voirement,
Et, pour ce, ai non ensement.
Ains ne connui pere ne mere
Ne parent ne serour ne frere.
Ne sai cui je sui, ce sachiez.
Si m'est avenu grans meschiez
Quant mes sires qui m'a nourrie
Est mors, s'en sui moult esmarie.
Povre meschine me trouva.
Trois ans a que il m'espousa.
À grant honnour m'a puis tenue,
Et bien chaucié et bien vestue.
Encor pert à mon vestement
K'assez me tenoit netement
Mes sires, selonc son povoir.
Si m'en doit moult li cuers doloir
Quant j'ai perdu mon bon seignor
Qui me portoit foi et honnor.
Dou cheval de fust qu'il menoit
Vous dirai, que il en faisoit.
Sachiez k'ains mieudres menestrés
De lui ne fu ainc nul jour nés.
Tant fu soutiex et de bon sens
PageV01P226
Qu'il savoit de tous instrumens
Quan que nus en povoit savoir.
Assez nous gaaignoit d'avoir
Dou cheval de fust qu'il avoit ;
Car si bien jouer en savoit
Que c'ert merveille à esgarder.
Le cheval faites bien garder,
K'encore porroit tex venir
Qui en saroit à chief venir.
Je croi bien que moult vous plairoit
Li jeus de lui qui en saroit.
À Rome ert mes sire arrestans.
Là estoit riches et manans.
Assez avoit et un et el
Si comme afiert à menestrel.
Là sont trestout si estrument
Qui valent I granment d'argent:
Harpes, rotes, gigues, violes,
Leuüs, quitaires et citoles,
Et tinpanes et micanons,
Rubebes et salterions.
Tabours et muses et flaios
Y a assez, grelles et gros;
Flahutes d'argent traversaines,
Estives, cornes et douçaines,
Et d'autres instrumens assés
Que ne vous ai pas tous nommés.
Se j'ere là, j'es venderoie
Et de l'argent me cheviroie
Car de nul instrument ne sai.
Si sui en moult très grant esmai
Conment en mon pays resoie.
Un petit sai ouvrer de soie,
Par quoi bien ma chevance eüsse
Se je en mon pays refusse.
PageV01P227
Or vous ai dit la verité
De ce que m'avez demandé.
Seule sui et desconseillie,
S'eu sui dolente et esmaïe,
Car je me doi bien esmaier."
# |
Lors commença à lermoiier.
Li rois l'a moult bien regardée
Entrues que la chose a contée,
Et que plus li rois la véoit,
Plus l'amoit et plus la prisoit.
# |
Dist li rois : "Bele douce amie,
Ceste parole ne siut mie
Folio29r 
Cele que me deïstes ier ;
Car je vous oy bien noier
Que cil pas vos barons n'estoit,
Ne jà nul jour ne le seroit.
Or en dites vous le contraire
De ce k'ier vous oy retraire ;
Car vous dites certainement
Que sa fenme estes vraiement.
Or ne sai pas bien de ce croire
Laquele parole est plus voire,
Ou cele d'ui, ou cele d'ier."
# |
"Mais qu'il ne vous d[o]ie anuier,"
Fait Clarmondine, "je dirai
Pour quel raison ier le noiai.
Sachiez qu'il m'avoit laidengie
Et detirée et desachie,
Et m'avoit durement ferue ;
Et, pour ce que il m'ot batue,
PageV01P228
Li dis que jel courrouceroie
Si tost que faire le porroie.
Ma revenjance à point me vint,
Quant à cele heure m'en souvint
De lui en tel point renoier :
Plus nel peüsse courroucier.
Sachiez que mauvais gré me sai
K'ains mon bon seignor renoiai
Qui si souef m'avoit norrie;
Moult en sui dolente et irie.
Plus m'amoit que lui ne autrui,
Mal l'ai guerredonné à lui ;
Ce me fist sotie et enfance.
Moult en sui en grant repentance.
Ier toute jour fu deshaitiez ;
Chaus ert, si li douloit li chiés.
Bien m'en deüsse estre gardée,
Se je fusse bien avisée,
Puis que malade le seüsse,
Que je courroucié ne l'eüsse ;
Car je croi bien que li corrous
Qu'il en ot, le mist au desous,
Par quoi mors est soudainement."
# |
Et quant Meniadus entent
Ce que Clarmondine ot conté,
Tout le retint en verité.
Ne fist force à la mort celui.
Plus en avoit joie k'anui ;
Car à Clarmondine la gente
Avoit mise toute s'entente.
# |
Lors pensa k'a li parleroit
Et que son pensé li diroit.
Meniadus plus ne detrie.
PageV01P229
Par la main blanche l'a saisie;
En sus des autres un petit
Le mena seöir sus I lit ;
Vousist ou non, la fist seöir
Li roi lez lui par estouvoir.
# |
Quant longuement orent parlé
Et assez li ot demandé
De son afaire et de son estre
Pour savoir que ce porroit estre,
Pensa que il li requerroit
S'amour, savoir qu'ele diroit.
À li parla moult longuement,
Et ele debonairement
Et sagement li respondoit,
Selonc ce qu'il li demandoit.
# |
Sage et courtoise la trouva.
S'avint que la chose torna
À ce qu'il li requist s'amour.
Lors ot Clarmondine paour,
Et durement fu esfréée.
De delez le roi s'est levée,
Et li rois la r'assist lez lui.
# |
"Bele, fait il, n'aiez anui,
Ne ne soiez point esperdue
Pour ce se je à vous me jue ;
Ne vous devez si esfréer,
PageV01P230
Car je ne me faz fors jouer.
À envis vous courrouceroie;
Car plus aim vo pais que la moie.
Si m'a seurpris vostre biauté
Et vostre debonaireté,
Et la maniere k'en vous voi,
Que mon cuer et mon cors otroi
Et mon roiaume entierement
Tout à vostre commandement.
Ne sai se distes voir ou non
Que vous Trouvée aiez à non ;
Mais, de quel lieu que vous soiez,
Trestout certainement sachiez
Que ma fenme espouse serés
Et coronne d'or porterés.
Cui que il soit, ne biau ne lait,
Estre le couvient entresait.
Sachiez pour nului nel lairoie
Ne soie vostre et vous moie.
Ce ne vous quier je plus celer,
Et, pour vous miex asseürer
De ce que en couvent vous ai,
Maintenant vous espouserai.
Car mes cuers e m'a commandé,
Et j'en ferai tout a son gré;
Nainc mais riens ne me commanda
Si à certes com ce fait a.
Moult me tient court que vostre soie
Et je dou tout à vous m'otroie.
J'ai bien fait son commandement;
Car si ai ge amendement
Que, se g'ere sires dou monde
Tant com il dure à la roonde,
Se m'a mes cuers fait tel commant
Que j'en feroie tout autant.
PageV01P231
À ma dame ma mere irai ;
Ici endroit vous laisserai."
# |
Quant Clarmondine l'entendi,
Moult durement s'en asoupli.
Or ne set qu'ele faire puist.
Cele parole au cuer li cuist
Que Meniadus li ot dite ;
De cuer fu forment desconfite.
Meniadus sa mere apele
Et sa suer Argente la bele,
Lors les atrait à une part.
"Moult me samble de bone part
Geste demoiselle," fait il.
"Je sui mors et mis à essill
Se je ne l'ai. Tant vous en di
K'ains si bele de li ne vi.
Il n'est nus qui ne l'eüst chiere,
Tant a gracieuse maniere.
Onques si aie je santé
Ne vi fenme si à mon gré.
Folio29v
Or vueilliez dont qu'ele soit moie,
S'il vous plaist que mariés soie ;
Dont vous i vueilliez acorder,
Ou mais ne me quier marier.
Puis que Diex la m'a envoiie,
Par moi iert amée et chierie.
Or, alez, s'en parlez à li,
Vous et ma suer, je vous en pri.
Ma fenme sera, c'est passé,
Vueilliez que ce soit par vo gré.
Car qui tout le mont me donroit
Mes cuers de li ne s'osteroit;
Ne place Dieu que soie tés
Que mes cuers soit de li ostés,
PageV01P232
Et cil qui le me loëroit
Ma vie et ma santé harroit."
# |
Dist la mere : "Estes vous dervez,
Qui tel fenme prendre voulez
Que nus ne set dont ele vient?"
# |
"Ma dame, à estre le couvient :
Amours le veut, et je aussi.
Or vueillez dont qu'il soit ainsi ;
Car ainsi à estre l'estuet,
Puis ce di que amours le veut.
Jà ne croirai jour de ma vie
Que ne soit de gentill lignie
Fenme en cui a tant de bonté
Et de sens plain d'umilité.
Quoi qu'ele nous face entendant,
De bon lieu vient, mon esciant."
# |
Meniadus dit tant leur a
Que chascune s'i acorda.
Devers Clarmondine erranment
Revinrent tout troi liement.
# |
La mere au roi lès li assist
Clarmondine, et puis si li dist
Que ele sa fille seroit;
Car li rois ses fiex le vouloit,
Et ele aussi bien s'i assent.
Et, quant Clarmondine l'entent,
Moult li anuie et moult li cuist,
Que ne set comment ele puist
Trouver voie pour eschaper.
Ains se lairoit le chief couper
Que ce mariage preïst.
PageV01P233
Tous li cors li tramble et fremist ;
Volentiers querist aucun tour
Par quoi ele sauvast s'onnour.
# |
Clarmondine lors s'avisa
Qu'ele le hors dou sens fera.
C'est dou miex qu'ele faire puet,
Puis que cis rois avoir la vuet.
Car bien pense, s'il la véoit
Dervée, pas ne la prendroit.
En ce a mis tout son assens
Qu'ele fera le hors dou sens ;
Mais ce ne sera jusqu'à tant
Qu’ele ne porra en avant.
Ainsi pensa qu’ele feroit,
Car nul si bon tour ne véoit,
Et bien se prist à aviser
Que trop se porroit bien haster;
Car, se en sorsaut le faisoit,
Espoir c'on s'en apercevroit.
# |
À la mere au roi respondi.
"Dame, fait ele, Dieu merci
Que je fui à tele heure née
Que j'ai si bonne destinée,
Que je vieng celui à plaisir
Dont tant de bien me puet venir.
Se je tele honnour refusoie,
Bien sai que folie feroie.
Quant Diex m'a donné tel chéance
Si tost après ma meschéance,
Je ne le quier pas refuser,
Et je vous vorrai honnorer."
# |
Fait la royne : "Bele fille,
PageV01P234
Car dont tenroie je pour vill,
Mon fill, se sa femme n'amoie.
Je vous amerai com la moie."
# |
Et Clarmondine l'en mercie,
Comme sage et bien ensaignie.
Moult près de Clarmondine estoit
Argente, et moult la conpaignoit,
Et li disoit tout autre tel.
Mais Clarmondine pense à el.
Pour aus decevoir soutilment
Parloit dou tout à leur talent.
Moult très sagement s'otria
À faire kan c'on li rouva ;
Mais tout adès estudioit
Conment miex eschaper porroit.
# |
Au roi Meniadus parla.
"Sire, fait ele, entendez çà ;
Puis k'ainsi est que me voulez,
Li grans Diex en soit aorez.
Ce doi je bien prier de cuer.
Mais je ne vorroie, à nul fuer,
Que vous feïssiez pour m'amour
Riens qui tornast à deshonnour,
Sire, ne à vous ne à moi.
Or, vous dirai raison pourquoi
Je ai ceste parole emprise.
Sachiez [que], se vous m'aviez prise
Si tost après la mort celui
Qui m'amena ci avoec lui,
Et cui g'ere fenme espousée,
PageV01P235
Tantost courroit la renommée
Que vous fait ocirre l'auriez
Pour ce que avoir me vouliez.
S'en parleroit on sor nous II,
Et mauvaise haste n'est preus.
Laissiez ceste nouvele aprendre
Et par tout vo pays eslendre,
Si que tout sachent la venue
Conment sui en vos mains venue,
Et conment mes barons moru
Si tost k'en la prison mis fu.
Et ci en dedenz mousterrez
À vo conseil, se vous voulez,
Que vous tel chose voulez faire.
Espoir n'en seront pas contraire ;
Car d'aus ne font pas mariage
Volentiers sans conseil li sage.
Maintes fois en a on repris
Ceaus qui sans conseil s'i sont mis."
# |
Savez pourquoi ele disoit
Ces poins que ele ainsi moustroit?
Pour ce que volentiers quéist
Aucun tour, se ele pouist,
Tant que la chose detriast,
Par quoi cele nouvele alast
Tant que Cléomadès seüst
En quel pays venue fust.
Car bien pensoit k'autel anui
Avoit pour li, qu'ele pour lui,
En tant comme cuers puet doloir
Pour grieté ne pour duel avoir,
Et que il cele part venroit 
Je ne vous tenrai pas pour ville
Puisque serez fenme mon fill;
PageV01P236
Se de li nouveles savoit.
Tant les tint là à parlement,
Que la mere au roi s'i assent.
Et aussi fist sa fille Argente.
N'i a nule ne s'i assente.
Et li rois bien s'i acorda
Et dist que bien raison y a.
# |
Li rois pria à la pucele
Que plus Trouvée ne s'apele ;
Car si fais nons n'est pas plaisans,
Ne gracieus ne avenans ;
Ne ne vourroit pas que seüst
Tous li mons que trouvée fust,
Ne jà de ce ne parleroit
À son conseil quant il venroit.
# |
"Sire, fait ele, autre non n'ai ;
Ne pourquant vo plaisir ferai.
Trouvée ainsi m'apele on.
Or vueil avoir Perdue à non ;
Car moult diversement se mue
Li nons de Trouvée et Perdue.
Ce non vueil avoir dusqu'adont
Que vostre baron vous auront
Conseillié de ceste besoigne ;
Car moult auroie grant vergoigne
S'il ne vous vouloient loër
Ce que je doi tant desirrer.
Mais, quant ce aura pris termine,
Dont aurai je à non Royne.
Cis nons bien plaire me devroit
Se ainsi avenir povoit
Que Royne fusse nommée :
Ce seroit bonne destinée."
PageV01P237
Meniadus dist ce sera
Au plus tost qu'il onques porra.
Mais à ce non sornon couvient;
Car biaus sornons moult bien avient.
"Bele Perdue non aurez,
Puis qu'il vous plaist." — "C'est bien mes grez,"
Fait Clarmondine, et lors li prie
Que sans plus trois mois le detrie.
Tant li dist et tant li pria,
Que Meniadus l'otria.
# |
Ainsi le firent que vous di.
De la endroit se departi
Meniadus. Lors a mandé
Les grands barons de son regné.
Et la mere au roi enmena
Clarmondine. Moult l'onnora.
Entre li et Argente estoient ,
Adès ensamble. Moult s'amoient.
De jour en jour monteplioit
La grace que de tous avoit.
À tous se fist la bele amer.
# |
Sa gent ot fait li rois mander.
Quant à Salerne venu furent
Li baron, ainsi com il durent,
Devant le roi Meniadus
Est chascuns des barons venus.
Lors lor a li rois devisé
Ce pour quoi chascun ot mandé
De point en point, bel et adroit
La chose ainsi qu'il la vouloit;
Et fist à tous moustrer celi
Pour cui amours le destraint; si
Que, plus la pucele véoient,
PageV01P238
Plus lor plaisoit, plus la prisoient,
Et disoient que droit avoit
Li rois qui prendre la vouloit,
# |
Que vous feroie je lonc plait?
À chascun a tant dit et fait,
Que tout li ont dit et graé
Que il face sa volenté.
Chascuns dist que, se il avoit
X roiaumes, qu'il prenderoit
La fenme que il veut avoir,
Où tant a biauté et savoir
C'on n'en porroit plus souhaidier ;
Ne souhais n'i auroit mestier,
Car souhais, à tout regarder,
N'i porroit de riens amender.
Ainsi chascuns li loe et dist;
Et li rois de joie en sozrist.
Cis consaus li fu bien séans
Et en son cuer douz et plaisans.
# |
Ainsi la chose demora
Tant que li termes aprocha
K'acompli furent li troi mois.
Lors vint Meniadus li rois
Tantost parler à Clarmondine,
Et li dist que ele iert royne
De Salerne ains tiers jour passé.
Lors a la bele souzpiré ;
Car n'ot nouvele qui li plaise.
Moult fut dolente et à mesaise.
# |
Bien set, se ele se nonmoit,
PageV01P239
Que cis à force la prendroit ;
Et, se à son pere la rent,
Ele set bien certainement
K'a Bleopatris la donra,
Et Cléomadès perdu a.
Car ses peres n'en mentiroit
Pour riens, se vers lui la r'avoit :
En couvent l'a à Balcabé.
Moult avoit le cuer trespensé
Qu'ele ne voit en son afaire
Riens nule qui li puisse plaire.
# |
Pour ce en son cuer s'assentoit
Qu'ele le hors dou sens feroit ;
Car or n'i voit ele autre tour
Que celui à sauver s'onnour,
En espoir d'estre retrouvée
De celui a eui s'est donnée.
Se maintenra dervéement ;
C'est ce à quoi ele s'assent,
Qu'ele ne vorroit autre avoir,
Pour nul or ne pour nul avoir,
Que Cléomadès, c'est passé :
À celui a son cuer donné.
# |
Lors commença à regarder
Diversement, et à parler
Paroles ce devant derriere.
Tost ot muée sa maniere.
Folio30v
Aussi k'en sorsaut s'est levée,
Par deseure I lit s'est getée.
Lors a saisi I oreillier ;
As dens le prist à depecier.
Moult diversement se maintient.
Tout descire quan qu'ele tient.
PageV01P240
Cil qui la furent sus saillirent
Tantost k'en si fait point la virent.
Bien cuidierent certainement
K'ele eüst perdu l'escient.
À Clarmondine sont venu ;
Et, quant ele a le roi veü,
Par la chevece le saisi,
Si que ele li derrompi.
Et li rois, qui moult fu courtois,
Li osta ses mains et ses dois
Au plus doucement que il pot,
Car nul mal faire ne li vot.
# |
Lors acoururent sans targier
Chambellenc, vallet et huissier
Pour la noise que il oyrent.
Dedenz la chambre s'enbatirent.
Quant Clarmondine en tel point voient
Que entre leur bras la tenoient
Li rois et sa suer et sa mere,
Moult lor fu la nouvele amere.
Quant il sorent le couvenant
Pour quoi il l'aloient tenant,
Mainte lerme ot iluec plorée ;
Car tout l'orent jà enamée.
Moult très doucement l'ont loiie
Pour li garder d'estre blecie.
Quant Clarmondine loiie ont,
Li plusour pour li grant duel font ;
Car chascuns cuidoit qu'ele fust
En tel point que ele n'eüst
En li sens ne discrecion
Ne entendement ne raison.
Car, entrues que loiie estoit,
PageV01P241
De mordre grant samblant faisoit
Après ceaus qui lez li estoient
Et qui pour son bien la tenoient.
# |
Moult fu li rois Meniadus
Pour li dolenz et irascus.
De duel mainte lerine plora
Et pour li maint souzpir geta.
Pour li fu ses cuers si iriez,
Si dolens et si corrouciez,
Qu'il ne set qu'il puist devenir.
Plus het sa vie que morir.
# |
Se li oïssiez regreter
Son non, et par raison prouver
Qu'ele avoit ore non adroit,
Car Bele ert et Perdue estoit.
"Hé ! las ! pourquoi l'ai je perdue?
Las! pourquoi est dou sens issue?
Las ! dolans, pourquoi la vi je onques?
Comme il me mescheï adonques
Que je la vi premierement,
Quant je la pert si faitement!
Vrais Diex ! se c'est par mon pechié,
Je vous pri que aiez pitié
De li, et si la secorés
Et son meschief sur moi metés.
Si m'aït Diex, je le vorroie :
Son mal miex de li porteroie."
# |
Ainsi Meniadus disoit.
La pucele moult regretoit.
Sachiez que moult avoit cil rois
Fin cuer et gentill et courtois.
Quant vit qu'il estoit ensement,
PageV01P242
Et qu'il ne seroit autrement,
Et k'amender ne le porroit
Jusqu'à, tant que à Dieu plairoit,
D'un moult courtois point s'avisa.
X damoiseles arréa
Qui entour Clarmondine iront
Et nuit et jour la garderont.
Car ses cuers point ne se desvoie
De li amer, pour riens qu'il voie;
Ains pense bien que il l'auroit
À fenme, s'ele garissoit.
# |
Moult fu de cuer triste et irie
Argente, la bien ensaignie,
Pour Clarmondine, et moult forment
Li anuie de ce tourment
Que il li samble que ele a.
Sa mere et li moult en pesa,
Et encore plus à son frere
Que ne fi li ne à sa mere.
Chascun jour souvent la véoient,
Mais près de li aler n'osoient;
Car tout adès li enforçoit
Sa maladie, ce sambloit,
Ne ne reconnoissoit nului
Par samblant, eles ne autrui.
# |
Les X femmes qui la gardoient
Grant paine en li garder metoient.
Car bien lor ot fait commander
De li soigneusement garder
Li rois ; ne pas ne l'oubliassent,
Et que chascune nuit veillassent
Devant li III ou IIII au mains.
Ainsi le firent. C'est dou mains,
PageV01P243
Puisque li rois l'ot commandé;
Car il sera guerredonné
Chascune d'eles largement :
Ce leur a il bien en couvent.
# |
Une maison faire li firent
Forte et faitice, et enz la mirent,
Droit en costé la chambre Argente,
Qui forment fu triste et dolente
De ce que aidier ne li pot.
Droit devant lor II chambres ot
Un petit faitis jardinet
Et un trop noble praëlet
Enclos de mur fait à crestiaus :
Li lieus estoit riches et biaus.
# |
Iluec fu mise Clarmondine,
Qui onques nuit ne jour ne fine
De li couvrir, à son povoir,
Que on ne peüst percevoir
Qu'ele eüst point d'entendement.
Moult l'aloient veöir souvent
Li rois et sa mere et sa suer,
Qui moult erent dolent de cuer
Dou grant meschief que il véoient
Que ele avoit, si qu'il cuidoient.
# |
Moult fu soigneusement gardée.
Mais moult ert de tous redoutée ;
Car, quan qu'ele povoit baillier,
Vouloit tout rompre et depecier.
folio31r 
Argente i estoit soir et main;
Car volentiers meïst la main
À li aidier, s'ele pouist.
Pour ce c'on miex garde preïst
PageV01P244
De li, i estoit tous les jours.
À paine pensoit ele aillours
Que à li garder et servir ;
Car gentiex cuers ne puet mentir.
# |
Les X femmes moult se penoient
De li servir ; car bien véoient
Que on à certes le vouloit.
Pour ce chascune s'en penoit,
Et tant de bien orent veü
En celi qui en tel point fu,
Que trestout, sans commandement,
La servoient moult doucement.
# |
En tel point que je vous devise
Fu Clarmondine, et en tel guise
Lonc tans. Mais de li or lairai.
De Cléomadès parlerai,
Qui à Sebile en tel point fu
K'avoir le cuidoient perdu
Cil et celes qui lui amoient.
Ainsi à grant meschief estoient
Li dui amant que je devis.
Cléomadès ert mors et vis,
Et Clarmondine morte et vive.
Ainsi fortune à aus estrive
Que il lor vies despitoient
Et andui la mort souhaidoient.
Dont n'ai je pas jugié à tort
Si je di qu'il erent vif mort,
Quant chascuns sa vie haoit
Si que la mort en convoitoit.
Un pou après ce que ravie
Fu Clarmondine, et esloignie
PageV01P245
De Cléomadès son ami,
Avint droit en ce point ainsi,
Que, quant Clarmondine assez orent
Requise au miex qu'il onques porent
Parmi la terre de Sebile,
Par maint chastel, par mainte vile,
L'orent cil dou pays requise,
Mais n'en orent nouvele aprise,
Ne porent rien savoir de li,
Dont moult furent triste et mari.
Lors se prirent à aviser
Cil de Sebile, et à penser
Que estre povoit devenus
Crompars, k'ainc puis ne fu veüs
Que Clarmondine fu perdue,
N'en place n'en maison n'en rue.
S'en parloient entre aus souvent
Et disoient communaument
K'enz ou jardin l'avoit trouvée
Crompars, et l'en avoit portée.
Car tous jours à coustume avoit
K'en cel jardin souvent aloit
Au matin, pour herbes trouver
Pour ses malades acurer ;
Car plus i ot de bonnes herbes
Qu'il n'a entre la et Viterbes.
# |
Lors firent requerre Crompart
Et demander de mainte part
As lieus où repairier souloit.
Mais nus nouveles n'en savoit
Fors tant que puis ne fu veüs
Que cil meschiez fu avenus.
# |
Tost fu la nouvele espandue
PageV01P246
Que par Crompart estoit perdue
Clarmondine, et tant qu'il avint
Que à Cléomadès en vint
Nouveles, là où se gisoit.
Car ainc puis levez ne s'estoit
Que il ot perdue s'amie.
Mais, quand la nouvele ot oye,
Ses cuers tantost li tesmoigna
Que c'estoit voirs. Lors se leva,
Et pense que en mainte terre
Ira Clarmondine requerre,
Et par yver et par esté,
Ains qu'il n'en sache verité.
# |
Lors s'est Cléomadès levez,
Moult maigres et moult descharnez.
Mais espoirs k'encore revoie
Clarmondine, l'ot mis en voie
De garison et de santé.
Cis espoirs l'a moult conforté.
Par cel espoir que je devis
Fu Cléomadès tost garis.
Pour lui furent lie et joiant
En Espaigne petit et grant
De ce que il garis estoit ;	
Car chascuns moult le desiroit.
De sa garison firent joie
Trop plus que dire ne saroie.
# |
Quant vit que il pot chevauchier,
Lors n'ot cure de plus targier
Que l'arréance ne pourvoie
Comment tost soit mis à la voie
De retrouver, s'il puet, celi
Pour cui amours le destraint si
PageV01P247
Qu'il n'a povoir d'aillours penser.
Devant son porc vint ester,
Qui tant ert liez de son respas,
Que dire nel saroie pas.
À lui parla moult longuement,
Et li dist que tout plainement
Disoit chascuns par la contrée
Que rois Crompars avoit emblée
S'amie dedenz le jardin
Où la laissa par mal destin.
# |
"Sire, fait-il, savez pourquoi
Ceste chose vraiement croi?
Pour ce que nus, se il ne fust,
Le cheval mener ne seüst,
Et pour ce le croi vraiement.
Tous jours acoutuméement
Aloit là querre ses herbées
Crompars, toutes les matinées.
Ainsi le tesmoigne chascuns
Que ne s'en descorde nesuns.
Par Crompart sui trays et mors.
Ne sai où soit pris mes confors,
Quant par lui ai perdu celi
Qui mon cuer enporte avoec li.
Moult très volentiers requerroie
Li et mon cuer, se je savoie
Où les peüsse retrouver.
N'a lieu deçà ne delà mer,
Tant soit ne divers ne lointains,
Que n'i alasse ; c'est dou mains,
Folio31v
Se je retrouver les cuidoie;
Et, quoi que avenir m'en doie,
Clarmondine requerre irai.
Tout le mont avant cercherai
PageV01P248
Que n'en sache aucune nouvele."
# |
Ceste raison ne fu pas bele
Au roi Marcadigas son pere,
Ne à ses suers ne à sa mere.
Quant tel nouvele ont entendue,
Chascune i est errant venue ;
Car la voie li destorroient
Moult volentiers, s'eles povoient.
# |
En la chambre le roi entrerent.
Cléomadès iluec trouverent
Qui au roi son pere parloit.
Quand done Ynabele le voit,
Ne se pot tenir de plorer ;
Baisier l'ala et acoler,
Et li dist bien que, s'il s'en va,
Qu'ele de duel pour lui morra.
Devant lui sont agenoillies
Ses serours, tristes et iries.
# |
"Biau frere," font eles, "merci!
Ne nous ociez pas ainsi.
Mortes sonmes se en alez"
# |
Dist Cléomadès : "N'en parlez ;
Se vous tant amez mon respas
Ne ma santé, n'en parlez pas.
N'i metez debat ne estrif
Se ne m'amez miex mort que vif ;
Car tous mes deduis et ma joie
Gist en l'espoir k'encor revoie
Celi où maint toute bonté,
Qui la toupace est de biauté.
Et, pour ce, pri à mon chier pere
PageV01P249
Et à ma douce chiere mere,
Que ma joie ne lor anuit
K'en la voie sont mi deduit
Et mi soulas et mi delit.
Encor geüsse sus mon lit
Malades, se ne fust la voie
De quoi li detris me guerroie."
# |
À ce mot furent tout si mu
Que nus n'i a mot respondu,
Fors que sans plus Marcadigas.
"Biaus fiex," fait il, "ne doutez pas,
Car la pucele r'auerez
S'on set que ce soit veritez
Que Crompars l'ait ainsi emblée.
Ains ne vit si male jornée
Comme le jour que il l'embla;
Car, se je vis, il en morra,
Et en sera toute essillie
Sa terre, et toute sa lignie.
De ce bien couvent vous tenrai.
Tout maintenant envoierai
En Bougie, pour miex savoir
De ceste besoigne le voir ;
Et, se c'est voirs k'emblée l'ait,
Nous la r'auerons entresait,
Et comparra sa trayson
Rois Crompars plus k'ains ne fist hom."
# |
Cléomadès li respondi
En souzpirant. "N'est pas ainsi,
Sire," fait-il. "Com vous savés,
La coustume dou regne est tés
De la terre le roi Crompart,
Que il ne r'iroit cele part
PageV01P250
Pour tout plain d'or ceste maison,
Pour ce qu'il a fait trayson.
De sa gent seroit lapidés,
Se de trayson ert prouvés.
Et est li jeus ainsi partis
De li à ceaus de son pays,
Que qui vers lui fait trayson,
Il a perdu sans raënçon
Entirement cors et avoir,
Et la terre perdent li hoir.
Et, pour ce qu'il a vers nous fait
Trayson et vilain mesfait,
Croi je que pour ce n'i soit point.
Et si a il encore I point
De quoi il auroit trop à faire
Ains k'à bon chief le peüst traire,
C'est que pais li couvient avoir
Vers nous, ou par fin estouvoir ;
Mais de sa terre sires n'iert
Se dedenz VII ans pais n'aquiert
Vers ceaus cui il mesfait aura.
Car je fusse alez tout droit là
Si tost comme de ci meüsse,
Se ceste chose ne seüsse."
# |
Marcadigas moult bien savoit
La coustume; mais il cuidoit
Son fill cele voie esloignier
Par paroles, et detriier.
Bien voit qu'il n'en venroit à chief.
Ne moustra pas tout le meschief
Que il a ou cuer ensenti ;
Ains vous dirai qu'il respondi.
PageV01P251
Bien aperçoit et bien entent
Que ses fiex à la voie tent,
Si qu'il ne lairoit pour riens née
Que sa voie ne fust hastée.
# |
Lors se commence à aviser
Que, puisque il s'en veut aler
Ne ne le porroit retenir,
S'en la voie devoit morir,
Que miex vaut, à son escient,
Qu'il li doinst esclatierement
Le congié, que en retraiant.
folio32r 
"Biaus fiex," fait il, "venez avant.
Très bien me samble, à mon avis,
Que vous lairiiez à envis
Le voiage k'empris avez ;
Et, puisque faire le voulez,
Je vueil qu'il soit à vo talent,
Par si que m'aiez en couvent
Que dedenz cest an revenrez,
Se loial essoigne n'avez
De maladie ou de prison ;
Et je vous met à abandon
Tout mon or et tout mon argent,
Et de toute la meillor gent
K'en mon pays prendre vorrez.
C. chevaliers i eslirez
Trestous les plus sages de guerre
K'eslire porrez en ma terre.
Cil iront en vo compaignie
Pour faire vostre commandie ;
Et vous pri, se vous tant m'amez,
Que, se vous chevaliers trouvez
Qui soient preu et de bon non,
PageV01P252
Que de vous ne partent sans don,
Tel qu'il afiert à fill de roi.
Sagement et sans nul desroi,
Alez par estrange pays,
Et largement donnez tous dis.
Que plus est on preus et vaillans,
Plus doit on estre desirans
De donner as bons. Car largece
Siet bien avoec haute prouece ;
Car grans princes qui preu se sent
Se mesfait moult très durement
S'il entrelaist à faire honnour
Sor fiance de la valour
Qu'il cuide en lui ; car li cuidier
En ont maint rebouté arrier
Qui à grant bien fussent venu ;
Mais par cuidier sont deceü.
Grant seigneur large, sage et preu,
Ne pueent miex faire lor preu
Que metre en bonne gent le leur :
C'est li sauvement del honneur.
Nel di pas pour ce ne soiez
Tex que bien en doi estre liez;
Pour ce le di que souvenans
Soiez que ne soiez perdans
Par fol cuidier ce que cil perdent
Qui à l'outrecuidier s'aërdent.
Bon fait humilité chierir
Et outrecuidance hayr ;
Car humilitez fait haucier,
Et outrecuidance abaissier.
Que plus vaus, et plus t'umelies,
Biaus filz, cestui point pas n'oublies."
# |
Quant Cléomadès entendi
PageV01P253
Son pere qui parole ainsi,
Sachiez moult li plot durement
Que si très debonairement
Li donne del aler congié.
À genous l'en a merciié,
Et li a bien en couvenant
Que il fera tout son commant ;
À son povoir s'en penera
Par tous les lieus où il venra ;
À honnour faire iert ententiex,
De ce ne soit de riens doutiex ;
Et li promet qu'il revenra
Dedenz l'an, se essoigne n'a
De prison ou de maladie.
Et Marcadigas li otrie,
Et dist, oiant tous : "Je vous gré
La voie à mouvoir à vo gré."
Et Cléomadès, sans targier,
Fist son afaire apareillier.
# |
Ainsi fu la chose arréée
Que li rois l'avoit devisée.
C. chevaliers fist li rois prendre
Qui n'estoient pas à aprendre,
Ains furent chevaliers de pris,
Sage et courtois et bien apris.
Arréé furent telement
K'en l'arroi ne failli noient.
Tout kan qu'il i apartenoit
Fu pourveü bien et adroit.
Que vaurroit que plus vous diroie?
Si tost se mirent à la voie
Que leur chose fu aprestée. 
PageV01P254
Là ot mainte lerme plorée,
Le jour qu'il se durent mouvoir;
Ce povez vraiement savoir.
# |
Cléomadès, sans plus atendre,
Vint à son pere congié prendre.
Et puis prist congié à sa mere
Cui la voie fu moult amere;
Congié prist à ses trois serours,
Qui, en grans cris et en grans plours
Remesent. Et lors s'en torna
Cléomadès ; plus n'arresta.
Il et sa gent errant monterent.
Parmi Sebile trespasserent.
À grant merveille vous venroit
Qui le duel vous deviseroit
Que cil de Sebile menoient
De ce que aler l'en véoient.
# |
"Hé! las!" font il, "que nous avient
K'après tel joie tex duels vient?
Chascuns de nous estoit si liez
De ce que reveiens sus piez
Celui qui, par sa grant valour,
Nous a tous montez en honnour !
Kan k'avons eüssons perdu,
Se ne fust par lui retenu.
Ne nous fust demoré riens née.
Toute fust Espaigne gastée,
Ou toute fust en mains d'autrui,
Se ne fust la valour de lui.
Sa grant valour nous a sauvé
Terre et honnour et herité,
PageV01P255
Après Dieu, qui le nous donna.
Hé ! las! jamais ne revenra,
Si aura cele retrouvée
Qui mar fu ains à nostre oes née;
Car, s'il ne la puet retrouver,
C'est noiens de son retourner.
Selonc le cuer que en lui a,
Jamais sans li ne retorra.
Hé ! las ! que nous est avenu !"
# |
Maint cheveil tiré et rompu
Y ot, le jour qu'il s'en parti,
Et geté maint dolereus cri.
Là veïssiez paumes batues
Et poins tordre, par maintes rues.
Son demorer chier achetassent
Se il seüssent ne cuidassent
Que ce lor peüst riens aidier.
Mais ce ne lor auroit mestier.
De lor grant meschief me tairai,
Et de lor voie parlerai.
De pays en pays aloient.
De la chose que il queroient
Demandoient à plusour gent.
Ainsi alerent longuement.
En mains lieus assez en enquirent;
Mais ains nouveles n'en aprirent
Qu'il prisassent une chastaigne,
Tant que il vinrent en Bretaigne.
# |
À Nantes II jours demorerent,
Et droit au tiers jour s'en alerent.
Anjou passerent et le Maine ;
Et si costoierent Touraine,
Tant qu'il vinrent en Normendie,
PageV01P256
Une terre moult aaisie.
Folio32v
Je ne sai pas comment nommées
Estoient adont les contrées
Dont je vous faz ci mencion ;
Mais ore a chascun tel non
Que j'ai dit et que je dirai
Des autres que je nommerai.
# |
Quant de Normendie sevrerent,
Outre en Engleterre passerent,
Et de là droit en Gales vinrent.
Et lors le plus droit chemin tinrent
D'Escoce, qu'il porent trouver.
Tant i furent, que retorner
Lor plot ; si le firent ainsi.
Droit à Douvre sont reverti ;
Car n'orent pas conseil d'aler
Plus avant en pays de mer.
N'arresterent ne tant ne quant.
Lendemain vinrent à Wissant.
# |
Vers France ont leur voie tornée
Qui adont ert Gaule nommée.
Grant guerre avoit en ce pays.
Cele part se traioit tous dis
Cléomadès où guerre avoit,
Pour ce que vraiement savoit
Que là où les guerres estoient
Gens de plusours pays venoient.
Pour ce cele part se traioit,
Que moult très volentiers sauroit
Chose dont fust resleeciez ;
Car moult estoit despaaisiez. 
PageV01P257
En France fu moult bien venuz.
De plusours fu recouneüz ;
Car enz ou pays avoit mez.
De toutes les gens fu amez
Entour cui repairie ot onques.
Mais c'estoit merveilles adonques
Comment chascuns le regardoit
Pour le non qui de lui couroit ;
Car chascuns disoit que à lui
Ne devoit on metre nului
De haute prouece à son tans,
K'en lui n'en eüst bien trois tans
Qu'il n'eüst en tout le meillour
Que on trouvast à celui jour.
# |
À merveilles ert regardés
De tous, pour ce qu'il estoit tés.
Et encor feroit on demain
S'on savoit Tristan, ou Gavain,
Ou Lancelot, ou Percheval,
Qui en l'enqueste dou Graal
Firent plusours proueces grans.
Car chascuns d'aus fu moult vaillans.
Se ne furent il pas dou conte
Cléomadès, dont je vous conte;
Car Cléomadès fu li tiers
De tous les meilleurs chevaliers
Qui ains furent de mere né ;
Ce set on bien par verité.
Or vous dirai que il faisoit
PageV01P258
Par les pays où il aloit.
S'il avoit enz ou pays guerre,
Tantost se penoit de l'enquerre
Liquels avoit ou tort ou droit.
Et, quant le voir de ce savoit,
Lors se penoit de la pais faire ;
Et, se il ne povoit atraire
Les parties que pais en fust,
Koi que avenir l'en deüst,
Adès vers celui se traioit
Là où le plus grant droit cuidoit.
Ainsi se maintenoit partout.
Sachiez si le doutoient mout
Cil contre cui il se metoit;
Et cil vers cui il se metoit
Cuidoit tous estre asseürez
Que ses contens estoit alez.
# |
Mainte guerre en fist apaisier,
Et maint outrage detriier,
Et relaissier mainte folie
Qui ert emprise par envie ;
Car par envie a on empris
Mainte emprise, pour tolir pris
À aucun bon quant ert prisiez.
Encor dure, dont c'est pitiez,
Cis poins, et lonc tans a duré:
Ce pert il bien à maint regné.
# |
Ainsi ala par mainte terre
Cléomadès celi requerre
Que il vousist miex retrouver
K'en paradis sans li aler,
Se il i cuidast, après Dieu,
Avoir devant trestous son lieu.
PageV01P259
En celui voiage portoit
Cléomadès, quant il s'armoit,
Armes aussi noires com meure,
À I blanc gant les dois deseure.
# |
Or vous dirai pourquoi avoit
Tés armes. Ce senefioit
Que il n'avoit de remanant
De s'amie que le seul gant
Que il enz ou jardin trouva
Là où li rois Crompars l'embla.
Or vous dirai là où metoit
Ce gant, et que il en faisoit.
Contre son cuer l'avoit liié
D'un drap linge blans deliié.
Adès nuit et jour i estoit,
Mais nus, fors il, ne le savoit;
Ne ne vouloit que le seüst
Nus hom, jà tant ses privez fust.
Pluseurs fois, quant il ert couchiés,
Fu li gans de lui desliiés ;
Pit, quant il desliié l'avoit,
Maintes fois la nuit le baisoit
Et le tenoit entre ses bras.
C'estoit sa vie et ses soulas.
# |
Se tout vous vouloie retraire
L'anui de cuer et le contraire
Qu'il avoit nuit et jour tous dis,
Cis livres, qui est moult petis,
Seroit plus que la Bible grans.
Se de tout estoit recordans
Les plaintes et les dolousers,
Les souzpirs et les regreters,
Qu'il faisoit les jours et les nuis,
PageV01P260
Ce seroit riote et anuis ;
Car jà del ne vous parleroie,
Se tous ses meschiez vous disoie.
Ses cuers nule fois ne dormoit,
Se à Clarmondine pensoit,
Qu'il n'avoit loisir de dormir,
Tant le destraignoient souzpir.
folio33r 
Moult estoit ses cors traveilliez
De ce que si ert esveilliez
Li cuers de lui, qui nuit et jour
I pensoit adès sans sejour.
Et de ses meschiez se couvroit
Devant la gent, ce qu'il povoit.
# |
En si fait point le tans passa.
Maint divers pays trespassa,
France cercha et Alemaigne,
Duringes, Baiviere, Bahaigne;
Mais en Westfale ot esté
Partout, et dou lonc et dou lé,
Et parmi Sassoigne et en Frise.
Ains que sa voie fust emprise
Au lez par de devers Baiviere,
Tant ala avant et arriere
Que par Osteriche revint.
En cele terre tant se tint,
Que li sambla que raisons fu.
Lors se sont de là esmeü
Et s'en vinrent droit en Hongrie,
Et de là vindrent en Prussie,
PageV01P261
Quant Poulane orent trespassée,
Une terre riche et pueplée.
Partout estoit moult honnorez ;
Car sages estoit et senez.
Moult savoit mener sagement
Et en pais et lui et sa gent;
Car bien lor avoit commandé
Que il n'i eüst si osé
Qui mesfeïst rien à autrui,
Se sa gent amoient tant lui,
Courtoisement se maintenissent
Ne à nului riens ne tolissent.
Et cil ne l'oublierent mie;
Car bons sires bonne maisnie
Fait par son bon ensaignement,
Et s'en servent plus liement.
# |
Tant alèrent, qu'il trespasserent
Le Bras Saint-Jorge. Lors viserent
Quel part il vorroient torner.
Ne vous sai pas bien deviser
Comment cil bras de mer ot non
Adont; mais ainsi le claime on
Or endroit que je dit vous ai.
Ne je la centime part n'ai
Devisé, si me doinst Diex joie,
De ce qu'il avint en la voie
Cléomadès, lui et sa gent :
Trop i metroie longuement.
Car moult souvent se combatirent,
N'ainc à bataille ne faillirent,
Qu'il seüssent, ne loing ne près,
K'adès ne fust Cléomadès
PageV01P262
Contre celui cui ert li tors,
Ou gent à gent, ou cors à cors.
# |
Se d'orphelins oïst nouvele,
Ou de dame, ou de damoisele
À cui on vousist nul tort faire,
Tantost vouloit cele part traire,
Et s'aloit tantost pour offrir,
Pour la droiture soustenir.
Savez quel gent se combatoient
À lui? Cil qui nel connoissoient ;
Car contre lui mis ne se fust
Nus hom qui bien le conneüst.
Souventes fois se combatoit.
Ainsi par le pays aloit.
De ce pour quoi ert esmeüs
Ne sot encor ne mains ne plus
Que il en savoit au mouvoir :
Ce li faisoit le cuer doloir.
# |
Quant le Braz Saint-Jorge ot passé,
Iluec ont trois jors sejorné,
Et ont demandé et enquis
La maniere et l'us dou pays
Là où il béent à aler.
Ainsi com m'oëz deviser,
Alerent tant k'en Grece vinrent.
Sachiez que li Griiois se tinrent
Bien apaié, quant veü ont
Cléomadès. Grant joie en font ;
Car de sa valour bien avoient
Oy parler, et bien savoient
Que c'estoit li plus preus de tous.
Chascuns ert dou veöir jalous.
Miex en amoient lor pays
PageV01P263
Pour ce que il i fu norris.
Grant guerre avoient lors li Grieu
À I trop poissant roi caldieu 
Qui avoit à non Primonus.
Moult avoit Griiois court tenus
Et guerroié très aigrement.
Maint grant anui et maint torment
Lor fist, et maint très grant damage,
Pour ce que il vouloit treuage
Avoir sor aus, k'ains à nul jour
N'orent eü si ancissour.
# |
Metre les vouloit desouz soi ;
Car Grieu estoient lors sans roi,
Et ert chascuns sires de lui,
Et ne tenoient riens d'autrui.
Faire leur vouloit desraison ;
Tour quéroit, par fausse ochoison,
Par quoi il fussent si sougi.
S'en erent irié et marri
Li Grieu, et moult s'en esmaioient;
Car vers cel roi povoir n'avoient.
Tant estoit riches et poissans,
Malicieus et sorquerans
À ceaus qui à lui marchissoient,
Que tout si voisin le doutoient.
Li Griiois forment honnorerent
Cléomadès. Moult se penerent
PageV01P264
D'onnorer et lui et sa gent.
À lui vinrent moult humblement
Li plus grant seignour de la terre,
Pour aïde et conseil requerre
Encontre le roi de Caldée
Qui lor terre a [toute] gastée 
Et a envers aus guerre emprise
Par sa mauvaise convoitise,
Que il pas faire ne deüst
Se il preudons et loiaus fust.
"Jà nous a malement grevé; 
Mais bien avons en proposé
K'ains i laira chascuns la vie
K'à no tans soit Grece asservie."
# |
Quant Cléomadès l'entendi,
Pitié l'en prist. Lors respondi.
— "Seignour," fait il, "ci sui venus,
Mais ne sui pas si pourveüs
Folio33v	
Que je fusse, se je seüsse
K'en tel point trouver vous deüsse.
Mais, tant com valoir vous porrai,
À ce tant pou de gent que j'ai,
Vous aiderai à mon povoir
De cuer et de cors et d'avoir ;
Car la terre où je fui norris
Devroie je moult à envis
Veöir honnir ne abaissier,
Se de riens li povoie aidier.
Ne sai que je plus vous en die;
Car en moi ne remanra mie
Que Grece, où fui norri soué,
PageV01P265
Perde la grant honnesteté
Qu'ele a, et la haute noblece.
Mais or couvient que sans perece
Soit emprise ceste besoigne,
Et que chascuns nuit et jour soigne
Par quoi très bien soit pourveüs,
Si que tost soit seure corus
Cis rois qui vous cuide honnir
Et vostre pays asservir;
Car li hom qui pert sa franchise
À moult s'onnour arriere mise."
# |
Et quant Griiois ont entendu
Comment il leur a respondu,
Bien virent qu'il ert chevaliers
Fins, faitis, parfais et entiers
Et de très haute enprision.
Moult l'en mercient li baron
De ce que si entierement
Et si très esclatierement
Met lui et sa gent abandon
Pour aus aidier de lor raison.
Durement l'en ont mercié
Et encliné et gracié.
# |
Lors li ont dit c'un parlement
A Primonus pris à lor gent,
À ce premier mardi prochain,
Es prez, desouz Mont Arestain.
Et Cléomadès respondi
K'au parlement ira aussi,
Et loe que pas refusée
Ne soit raison, mais demandée.
PageV01P266
Car souvent mescheöir voit on
À ceus qui refusent raison ;
Car li hom qui veut refuser
Raison, doit par droit meserrer :
Car qui raison refuse et droit,
Sachiez que il pas bien ne croit
Enz el souverain Créatour 
Qui nous pourvoit et nuit et jour.
Qui son Créatour douteroit
À nului nul tort ne feroit.
Diex de plusours est pou doutez
Et creüs, dont c'est grans pitez.
Pour ce raison lor loe aprendre
Se Primonus i veut entendre.
# |
Quant li jours dou parlement vint,
Chascuns, si k'a lui apartint,
I vint d'ambes II les parties.
Moult avoit beles praëries
Et boschelés vers fuëillis
Là où cil parlemens fu pris.
Assemblé sont. Premiers parla
Primonus, et as Griex moustra 
Se il ce que il demandoit
Li connoistroient là endroit
Ou il le vorroient deffendre.
Et li Griiois, sans plus atendre,
Dirent qu'il s'en conseilleroient 
Et tantost l'en responderoient.
# |
Lors se sont à une part trait.
Cléomadès dist que lonc plait
N'afiert pas à cele requeste.
PageV01P267
La responce doit estre preste :
"Ou vous deffendez vo pays,
Ou faites ce, qu'il a requis.
Mais, se vos honnours ne gardés,
Jamais les cors de vous n'amés.
Car cors sans honnour rien ne vaut,
Jà tant n'iert venus de lieu haut ;
Car garder se doit assez plus
Cil qui de haut lieu est venus
Que cil de petite lignie ;
Et Griiois sont d'ancisserie,
Ainsi que partout tesmoigne on,
De moult très noble extracion.
À mon avis n'i a c'un tour :
Ou morir ou sauver honnour.
Vie sans honnour soit honnie,
K'assez vaut miex honnour sans vie."
# |
Quant Cléomadès entendu
Ont Griiois, à lui sont venu
Et li prient communaument
Qu'il face et die à son talent
Et commande sa volenté,
Et il feront tout à son gré ;
Et jurent que jà ne donront
Treuage, ainçois i morront.
Cléomadès dist qu'il dira
La parole et la mousterra,
De par Griiois, roi Primonus.
Tout l'otroient, Levé sont sus.
# |
Devant roi Primonus revinrent
Les parties. Coies se tinrent
Et en pais; car moult desiroient
À savoir à quel chief torroient
PageV01P268
Les besoignes de cele emprise
De quoi Primonus s'aime et prise
De ce que il onques l'enprist.
Chascuns se taist, nus mot ne dist ;
Et Cléomadès encommence
À parler com de grant science.
# |
"Sire rois," fait il, "a Primonus,
Dont vous est cis consaus venus
Qui Griiois voulez asservir ?
De honteus entremés servir
Les voulez, quant par vo haussage
Voulez avoir d'aus treüage
K'ains vos ancestres ne requist.
Qui ce vous loa il mesfist.
Maint damage lor avez fait
À tort, dont vous avez mesfait.
Mais, s'à ce vouliiez entendre
Que vous as Griex vousissiez rendre
Leur damages entierement,
Et puis feïssiez serement
Que mais ne lor demanderiez
Nule riens, ains lor aideriez
De tout vo povoir contre autrui
Qui faire leur vorroit anui,
folio34r
Je croi que il conseil aroient
Que ce mesfait vous pardonroient ;
Ou la bataille à aus aurés.
Prenez lequel que vous voulés
De ces II poins, et choisissiez,
De par Griiois, et bien sachiez 
K'autre chose n'enporterez."
# |
Griiois dient c'est veritez.
Quant li rois Primonus entent
PageV01P269
Que Cléomadès telement
Li a, pour Griiois, respondu,
Moult en ot le cuer irascu.
Si fu tormentez et iriez
K'à paines pot ester sor piez.
Cléomadès moult regardoit ;
Mais ne sot pas qui il estoit.
# |
"Vassal," fait il, "or m'escoutez,
Vous qui pour les Griiois parlez.
Ne sai se estes chevaliers,
Ou avocas ou amparliers ;
Mais de par Griiois m'avez dit
Et grant outrage et grant despit.
Je cuidoie, kant je ving ci,
K'envers moi deüssent merci
Requerre, mais moult en sont loing.
De ce ne sont pas en grant soing,
Quant de bataille m'ont semons.
Mais, par les Diex que nous créons,
Jamais jour n'auront pais à moi,
Si m'auront tenu pour lor roi
Et seront tout à moi sougi.
Ice lor créant et afi,
Ou j'en remaindrai mors ou pris.
D'aus sui de bataille aatis,
Mais à moi la bataille auront
En quel marche que il vorront."
# |
Ne sai que plus vous en diroie,
Ne que la chose aloigneroie.
La bataille fu devisée
En I plain, moult près de la prée
Où cil parlement ot esté.
À quinzaine l'ont créanté
PageV01P270
Qu'il i seront d'ambes II pars.
Lors est li parlemens espars.
# |
Quant de là furent departi
En si fait point com je vous di,
Chascuns en son lieu s'en ala
Et se pourvit et arréa
Si qu'à tel chose apartenoit.
Li Grieu Cléomadès à droit
Honnorerent, si com il durent.
# |
Au jour de la bataille, furent
Venu sor la piece de terre,
Arréé comme gent de guerre,
Et li Caldieu et li Griiois.
Sachiez que Primonus li rois
Avoit tant de gens amenées,
Que plaines erent les valées
Et tout li plain et les montaignes,
Que de sa gent, que des estraignes ;
Car partout avoit gent mandées
Par prieres, et ensodées.
# |
Près estoient II tans de gent
Que n'erent Grieu, si com j'entent.
Quels armes ot rois Primonus
Vous deviserai. Ses escus
Ert d'or à I noir olifant,
À I ourle moult bien séant
De gueules, qui ert endentée;
Et li ourle estoit besentée
De petis besentiaus d'argent
Qui moult i erent bel et gent.
# |
Li Grieu IIII batailles orent, 
PageV01P271
Si estofées que miex porent ;
Et Primonus en avoit VI
De gent qui erent de grant pris.
Savez que Cléomadès fist?
En chascune bataille mist
XX de ceus k'o lui amena;
Et lors as Griiois commanda
Qu'il facent ce que cil diront,
Et cil dient qu'il le feront.
Rien ne lor vorront commander
Que il jà lor doient véer
Tant com piece d'aus durera.
# |
Cléomadès moult agréa
Li samblans que chascuns faisoit;
En bon couvenant les trouvoit.
Les batailles a devisées
Cléomadès, et arréées
Comment l'une après l’autre ira.
La premiere bataille ara
Il meïsmes, k'aler vouloit,
Ainsi com devisé l'avoit,
Au roi Primonus assambler,
Pour le miex que il set viser.
# |
Moult chevauchoient noblement
Les batailles et sagement,
K'à paines la longueur d'un doit
Li uns d'aus l'autre ne passoit.
Li uns l'autre trop n'enpressoient,
Mais si très à point chevauchoient,
C'on peüst prendre hardement
En leur noble contenement.
PageV01P272
Maint chevalier très bien monté
Et très gentement acesmé
Y ot, que d'une part, que d'autre,
Escuz as cols, lance sor fautre,
Et les hiaumes plantez es chiés ;
Et sor les estriers afichiés
Chevauchierent en conroi tant,
Que si s'alerent aprochant
Que les batailles s'entrevirent :
Sachiez que d'ambes pars fremirent.
folio34v
Quant d'ambes pars veü se sont,
Au roi Primonus vint adont
Uns chevaliers qui li conta
Que Cléomadès estoit là ;
Et s'ert cil, trestout vraiement,
Qui l'autre jour, au parlement,
La parole des Griex moustra.
"Qui la nouvele en aporta
En vostre ost, ne vous amoit mie;
Car toute vostre ost esbahie
Est de ce que ci est venus.
Moult en est chascuns esmeüs.
C'est li aigles des chevaliers.
Puis ne volera volentiers
Faucons, le jour k'aigle ait veüe.
Ainsi est il de sa venue
Com del aigle que veü ont
Oisel, car puis ne voleront
Hardiement cele journée.
Pour ce est l'aigle comparée
À lui, car sa très grant value
Est par tout le monde seüe.
Sachiez par lui sont esbaudi
Li Grieu, et Caldieu abaubi.
PageV01P273
Et ce n'est mie grant merveille,
Car sa prouece n'est pareille
À nule autre; ce croi, et cuit
Ce sauront li vostre ains la nuit.
Sachiez, se pas ne l'i seüssent
Vostre gent, plus asseür fussent.
Mal est fait quant le sevent ci."
# |
Quant li rois l'ot, tous en rougi.
Ne li furent plaisans ne beles
À oyr si faites nouveles ;
Car de Cléomadès avoit
Oy parler, et bien savoit
Que c'estoit de tous li plus preus,
Et ce n'estoit mie ses preus.
N'est merveille s'en fu dolans.
Les Griiois voit parmi les chans
Venir, qui moult les aprochoient.
En IIII batailles venoient.
Une en voit qui vers lui se trait,
Et lors pensa il entresait
Que Cléomadès i estoit
Et k'a lui vient assambler droit.
# |
Bien vit, ce est chose passée
K'avoir lor couvient la mellée.
Lors veïssiez espiex brandir
Et sor hiaumes des mains ferir,
Pour plus fortement enformer
Le hiaume, ou pour veöir plus cler.
Bien sambloient d'armes manier.
Quant Grieu prennent à aprochier
PageV01P274
Lors ferirent des esperons.
Devant tous, plus joins c'uns faucons,
S'en vint Cléomadès brochant
En son point I espiel trenchant
Dont le premerain qu'il ferit
À la terre mort abati[t].
# |
Ce que il premiers assambla,
Ce fu pour ce que il pensa
Que li Grieu plus hardiement
Iroient envers leur content.
Sachiez que maint à terre en mist
Ains que ses espiex fin preïst ;
Car adonc chascuns tant gardoit
Son espiel com durer povoit,
Ou fust son glaive, ou fust ses dars,
K'adonc ert tenus pour couars
Ou pour nices, qui ne s'aidoit
De l'un des trois tant com duroit.
# |
Les batailles sont assamblées
De toutes pars, et ajoustées.
Or sachiez bien que celui jour
N'ot pas Cléomadès sejour;
Car moult fu la bataille fiere
Et de despiteuse maniere.
Caldieu en grant despit tenoient
Que li Griiois enpris avoient
Vers aus bataille à jour nommé.
Moult sont aigre et entalenté
D'ambes II pars de bien ferir
Et de deffendre et d'assaillir.
# |
Cléomadès au bran d'acier
Fist cel jour maint arçon widier.
PageV01P275
Jà cele part ne se tornast
Puis que il "Castele!" escriast,
Que tous ne feïst remuer
Les rens, et fremir et branler.
Nus hom n'osoit ses coups atendre
Ne encontre lui estal rendre.
Caldieu moult forment le doutoient.
Ses coups malement ressoignoient.
# |
Cele bataille longuement
Dura, et moult i ot de gent
Gisant par les chans estraiés,
Que mors, que navrez, que bleciés.
Primouus Griiois assailloit
Forment, et "Caldée !" escrioit;
Car dou cors fust preus et vassaus.
Se dou cuer fust vrais et loiaus!
Plus k'autres couvoiteus estoit,
N'à nului couvent ne tenoit.
# |
Moult estoient Caldieu doutant,
Et moult s'aloient enpressant,
Ne mais les cors n'abandonnoient
Si durement comme il soloient ;
Car moult les avoit mal menez
Cléomadès, et desviez 
De toutes lor batailles VI.
N'en y ot nule, au mien avis,
Où il ne fust II fois ou trois.
Ne tenoit pas en I lieu kois.
De bataille en bataille aloit.
Chascune bataille cuidoit
Que en la lour fust tout adès.
PageV01P276
Tant les mena Cléomadès,
Qu'il et Grieu apertement voient
Que Caldieu se desconfisoient.
# |
Cléomadès lors se pensa
Que vers Primonus se traira ;
Car bien pense, se pris l'avoit,
Que mais deffense n'i auroit.
Miex le vorroit prendre k'ocire.
La teste de son cheval vire.
Lors regarda parmi l'estour,
À guise de fier poigneöur ;
Cele part prist droit à aler
Où plus tost le cuide trouver.
# |
En la bataille Primonus
S'est Cléomadès embatus.
Toute la bataille branla
Au lez là où il i entra.
Ses coups savoit si departir,
Que cil qui se povoit partir
De lui, quant près de lui estoit,
Ses Diex durement en looit.
Griiois le sivoient de près,
Qui moult erent aigre et engrès
Que Caldieu fussent desconfit.
Cléomadès fist tant qu'il vit
Primonus, qui moult enpressez
Ert des siens et avironnez.
Quant Cléomadès veü l'a,
Trestout droit vers lui s'adreça ;
Car li chevaus sus koi séoit
Grans et fors et rades estoit. 
PageV01P277
Maugré tous est à lui venus.
Là fu mains ruistes coups ferus,
folio35r
Et mainte broigne derrompue,
Et mainte cervele espandue,
Et mains fors hiaumes descerclés,
Et mains fors escus decoupés,
Et mains chevaliers abatus
À la terre tous estendus.
Et maint cheval a vuide sele,
Et trayner mainte bouele
Peüst on en maint lieu veöir.
Caldieu virent que nul povoir
As Griiois celui jour n'auront.
Les dos tornent : desconfit sont.
# |
Cléomadès tint enbracié
Primonus, et l'ot enbronchié
Devant lui ; et il li tendi
S'espée, et li pria merci.
"Frans hom," fait il, "ne m'ociez.
Pour Dieu, la vie me sauvez.
Tant en aurez argent et or
Com vous vorrez, et plus encor."
Et Cléomadès erranment
Mist Primonus devers sa gent
Et lor commande moult et prie
Que ne li facent vilonnie ;
Et cil dient qu'il le feront.
Pris et loiié mené l'en ont.
Lors veïssiez gens enchaucier,
Uns fuïr et autres chacier.
# |
Moult fu grans li enchauceïs,
PageV01P278
Moult i avoit de gens maumis
Et de navrez et de bleciez.
Sor Caldieus torna li meschiés ;
Car de mors tant en y avoit
Et de pris, que merveille estoit.
Liez fu qui eschaper en pot ;
Car n'en eschapa pas qui vot.
Li desconfit le champ vuidierent
Et li vainqueöur enchaucierent
Tant qu'il lor sambla que bon fu ;
Lors sont arriere revenu.
# |
Au lieu où l'estour ot esté
Sont li vainqueöur retorné.
De cuer erent lie et joiant ;
De Cléomadès vont parlant,
Et dient c'onques mais ne fu
Chevaliers de plus grant vertu,
Ne qui tant peüst endurer
De coups, ne tant de coups donner.
"Diex le nous envoia," font il,
"Pour nous geter dou grant peril
De servage, où mis nous eüst
Rois Primonus, se il ne fust.
Par son fait va nostre honnor droit,
Qui jà dou destre lez clochoit;
D'ambes II lez fust afolée,
Se ne fust ses cors et s'espée.
Que Diex, qui si poissant le fist,
Soit loez, quant le nous tramist
À si bon point pour nous monter
En honnour, et de blasme oster."
PageV01P279
Ainsi li plusour d'aus disoient.
Cléomadès partout prisoient.
Lui et sa gent moult honnorerent.
Cele nuit iluec demorerent,
Et lendemain s'en departirent.
Si très tost que il le jour virent,
S'en commencierent à aler.
Lor prisons en firent mener.
Roi Primonus en ont mené ;
En I chastel enprisonné
L'ont Griiois bien et fortement.
# |
Mais or vous dirai je briement
Comment cele guerre prist chief.
Au roi Primonus ert moult grief
K'ainsi li ert pris de la guerre.
Vers les Griiois fist pais requerre.
Sor ce, ce dist, se meteroit
Que Cléomadès en diroit ;
Car tant de lui entendu a
Que tout son plain dit en tenra.
Et Grieu l'otroient ensement.
Et Cléomadès entreprent
Cele besogne, et dit leur a
Que courtement son dit dira.
Jusk'à lendemain atendi ;
Onques n'i mist plus lonc detri.
Lors a tous les barons mandez,
Et fu prise la seürtez
De Primonus, que il tenroit
Ce que Cléomadès plairoit.
# |
Cléomadès en son dit dist,
Pour ce que Primonus mesprist
Vers les Griiois premierement,
PageV01P280
K'à tous jours iretablement
Sera vers Griiois redevables
Et lor jurez et lor féables ;
Que, se nus vers aus mesfaisoit,
À son povoir lor aideroit,
Et rendroit trestout le damage
Que fait leur avoit par outrage,
Et à touz jours mais lor donroit
Tel treü qu'il deviseroit.
Et lors devisa le treü ;
Mais ne sai pas com grans il fu,
Ne je n'en vorroie mentir.
Ainsi lor plot à assentir.
Partant, de la prison issi,
Et li autre prison aussi.
# |
Par convoitise fu cil rois
Sougis à ce tans as Griiois.
Sachiez nus ne doit convoitier,
Pour autrui grever, lui haucier ;
Et tex se cuide haucier haut
Cui à la fi[n]e li piez faut ,
Si que, quant il cuide estre el mont,
Si se trueve il el val parfont.
Et, pour ce, se doit bien garder
Chascuns del autrui goulouser ;
Car qui l'autrui convoite à tort,
De s'ame convoite la mort.
Et cil qui pert l'ame, tout pert,
Ce doit on savoir en apert ;
Et qui autrement i entent
Il n'a pas vrai entendement.
PageV01P281
Ainsi fu la pais estorée
Que je la vous ai devisée.
En Caldée Caldieu s'en vont.
De la pais lie et joiant sont ;
Selonc ce que leur ert cheü
Furent lie que ainsi lor fu.
# |
Cléomadès lors s'avisa
K'en Grece plus ne remaindra;
folio35v
Car de la chose qu'il queroit
Nule nouvele n'entendoit
N'à estranges ne à privés,
Dont moult de cuer ert tormentés.
As Griex dist k'aler s'en vouloit
Et que à Dieu les commandoit.
Moult en furent Griiois dolant.
Lor firent venir tout errant
Chevaus, joiaus, or et argent,
Pour donner et lui et sa gent;
Mais onques ne volt recevoir
Joiel ne tresor ne avoir.
# |
Or vous dirai que Griiois firent.
Tout communement s'assentirent
K'à Cléomadès offerroient
K'à ses besoins le serviroient
Pour garder son cors et s'onnour.
Devant lui et grant et menour
Sont venu, et offert li ont
K'à son vouloir le serviront,
Et quant li plaist que il les mant,
Car il sont tout à son commant.
Cors et avoir entirement
Offrent à son commandement,
Et dient bien que commander
PageV01P282
Lor puet, et que tout sans mander
Iront vers lui s'il a besoigne :
Ce ne lairoit pour nule essoigne.
# |
De lui obéir se penoient
De cuer, car faire le devoient.
Et Cléomadès sagement
Les respont, et moult doucement ;
Et dist que il n'escondit mie
Leur service, ains les en mercie,
Comme cil qui tout bien savoit
Et en cui toute honnours manoit.
# |
Ainsi la chose demora,
Et Cléomadès s'en ala.
Le tiers de la gent n'avoit pas
Que li charcha Marcadigas
Ses peres, au partir d'Espaigne.
N'avoit pas o lui grant compaigne.
Moult en ot de mors demorez
En l'estour dont oy avez,
Et sor le chemin au venir
En couvint il assez morir
Ou de leur mort ou en estour ;
Car faire leur couvint maint tour
Et passer maint divers pays,
Ains k'en Grece se fussent mis.
PageV02P001
De là endroit se departirent,
Et li Griiois les conduisirent
Tant que Cléomadès les fist
Retorner, et puis il se mist
Au chemin, selonc la marine.
Souvent regretoit Clarmondine
En lermes plaines de desirs
Et en pensers plains de souzpirs.
C'estoit sa vie et jour et nuit ;
Onques n'avoit autre deduit.
Longuement se tint sor la mer,
Et faisoit partout demander
À mariniers, à marcheâns,
De ce dont plus ert desirans ;
Mais nouvelles n’en aprendoit,
Dont moult dolans de cuer estoit.
Tant sus la marine se tint
Cléomadès, k'à I port vint
Qui ert droit encontre Sezile.
Lors se pensa que droit en l'isle
De Sezile vorroit aler.
En Sezile se fist passer.
PageV02P002
Par toute Sezile requist
S'amie, mais riens n'en aprist
Qui li sesist. En mer rentra.
En mer fu tant qu'il arriva
En une moult bonne cité
Et de moult grant nobilité.
Icele citez siet en mer:
Venice l'ai oï nommer.
# |
Cléomadès là arriva.
De sa gent o lui demora
Tant com lui plot. Lors fist aler
Les autres à Mestre arriver
Pour leur chevaus faire aaisier
Qui bien en avoient mestier;
Car moult les orent traveilliez.
Ne en Venisse, ce sachiez,
Ne met on pas chevaus souvent;
Mais à Mestre communaument
Font leur chevaus metre et garder
Cil qui ont talent d'arrester
En la cité que je vous di.
Cléomadès le fist ainsi.
# |
De jour en jour amenrissoit
Sa route, ainsi com il aloit.
Car moult pou de repos avoient
La gent qui avoec lui aloient.
Quant venu furent en Venise,
De cele besoigne ont enquise
Pour quoi il estoient venu;
Mais il n'en ont riens entendu
PageV02P003
Quant iluec orent tant esté
Que il lor plot, lors sont entré
En batiaus, et passer se font
À Mestre, là où leur gent sont.
Cis passages ne dure mie
Plus de II milles et demie;
Se plus y a, n'est pas granment.
# |
Ne moustrait pas tout le torment
Cléomadès que il avoit,
Mais à son povoir le couvroit
Pour sa gent, à cui fust trop grief
S'il seüssent tout son meschief.
# |
Une nuit en son lit gisoit
Cléomadès, et regretoit
Clarmondine moult durement.
"Hé! las!" fait il, "la mors k'atent
Que ne me prent, quant retrouver
Ne puis cele, tant sache aler,
Où tant a de bien et d'onnour,
Et de biauté et de valour,
C'on n'en porroit plus souhaidier?
Hé! las! quant je plus la requier
Et je mains nouvelles en oi,
Mes mieudres, à ce que je voi,
Certes, est ce que je me tue;
Car, c'est passé, je l'ai perdue;
Jamais nul jour ne la verrai.
Pour l'amour de li m'ocirai.
Ne pourquant miex vaut que languisse
Que je à un coup m’oceïsse.
Folio36r
Trop legierement passeroie
Mon forfait, se je m'ocioie:
Trop tost seroie delivrez
PageV02P004
Dou meschief dont je sui comblez.
Et comment ai je forfait donques?
Oïl, quant je la laissai onques
Ou jardin seule, moult forfis;
Là me failli sens et avis.
De toute joie me sevrai
Le jour que ou jardin laissai
Clarmondine seule séant:
Moult oi cuer nice et non sachant.
Miex vorroie I souhait avoir
Par quoi la peüsse veöir
Et r'avoir en ma compaignie,
Que mil souhais et n'i fust mie;
Car nus souhais ne me porroit
Tant valoir com cil seus feroit.
Cis me rendroit joie et leece,
Dont je n'ai fors duel et tristece.
Tons les jours et toutes les nuis
Croist en moi tristece et anuis.
Hé! las! com je sui mescheäns!
Et s'iert par tans passé li ans
Que j'oi en couvent à mon pere
Et à ma douce chiere mere
Que je arriere revenroie,
Sans faille, se je mors n'estoie,
Ou se je n'avoie ochoison
De maladie ou de prison.
Par tans iert eis termes passez,
Et je suis tous asseürez
Que, puis k'adont ne me r'auront,
Que de duel et d'anui morront.
Las! malement m'est mescheü
Quant, par mon fol sens, ai perdu
La souveraine de bonté
PageV02P005
Et la toupace de biauté,
Et pere, et mere, et moi aussi.
Comme à dure heure je nasqui,
Quant, par ma foie niceté,
Ai pere et mere et moi tué!
Mes cuers malement me traï,
Quant onques à ce s'assenti
Que la laissai seule ou jardin."
En tés pensers, jusk'au matin,
Fu Cléomadès cele nuit.
Se meschief de cuer sont deduit,
Dont ot il des deduis assez.
Lors s'est en son cuer avisez
Que il de sa gent s'emblera,
Et seuls par le pays ira
Et Clarmondine requerroit
Tant que u cors la vie auroit;
Car nul ne le pouist oster
Del espoir de li retrouver.
De là en Toscane n'avoit
Que trois jornées trestout droit.
Trois citez y a à passer
Qui le droit chemin veut aler:
Pave et Ferraire, et puis Bouloigne.
C'est li chemins. Mais n'ot pas soigne
Cléomadès d'aler par là.
Plus sauvage chemin tenra
Que celui, s'il le puet trouver;
Par les forez vorra aler,
Que retrouver ne le pouissent
Sa gent, se il le requeïssent.
Ainsi pensa qu'il le fer oit.
PageV02P006
Si tost que il le jour perçoit,
Trestout erranment se leva.
I sien chambellene esveilla;
Quant esveillié l'ot, si li dist
Que tout erranment li meïst
Une sele sor I destrier;
Celui que il avoit plus chier
À arréer li commanda.
Et cil le fist, lors revint là.
Lors li a Cléomadès dit
Que il li aport, sans detrit,
Ses armes, car armer se veut;
En I lieu aler li estuet
Que chascun ne veut pas noncier,
Et cil, qui ne l'ose laissier,
Le fist tout ainsi faitement.
Et Cléomadès erranment
S'arma si tost qu'il onques pot
Et li chambellens jà li ot
Iluec son cheval amené.
# |
Lors monta. N'a pas demoré
Sa targe et son espier a pris.
Mais, ains que de là fust partis,
A au chambellene commandé
Que il n'ait le cuer si osé
Que il de lui nouvele die.
Et li chambellens li otrie,
K'escondire ne li osa,
Et Cléomadès s'en ala.
Sitost qu'il pot de la vile ist.
Si très tost as plains chans se mis
Que il des chemins pot issir ;
Car il avoit moult grant desir
PageV02P007
Qu'il eüst trouvée forest.
Et, quant voit que as plains chans est,
Lors regarda de tous costez,
Et lors se torna à ce lez
Où il li sambla que par droit
Forest plus tost trouver povoit.
# |
Son cheval tant esperonna,
C'une grant forest veüe a.
Droit cele part s'est adreciez.
De la forest trouver fu liez
Pour ce que, se nus le sivoit,
Que pas si tost nel trouveroit
Dedenz la forest que as chans.
En la forest, qui estoit grans,
S'en est Cléomadès entrez;
Et li chambellens est remez
Moult pensis, car il ne savoit
Où Cléomadès s'en aloit,
Ne il ne li dist au partir
Nule riens de son revenir,
Ne il riens ne l’en demanda,
Car demander ne li osa:
Moult avoit le cuer trespensé.
Lors sont tout par leenz levé
Chevalier, escuier, garçon,
Keu, bouteillier et escançon.
En son lit n'ont pas retrouvé
Cléomadès. S'en sont iré;
Ne sorent qu'il fu devenus,
S'en fu chascuns moult esperdus.
Folio36v
Mais, en la fin, li chambellens
Dist tout en apert à leur gens
PageV02P008
Comment il s'en estoit alez.
Lors fu chascuns si effréez
Qu'il ne sevent qu'il puissent faire
Ne de quel part il puissent traire.
Li uns d'aus l'autre regardoit.
Chascuns forment s'esmerveilloit
Pour quel raison ainsi emblez
S'ert lor sires d'aus et sevrez.
Quant il se furent avisé,
Lor conseil ont à ce torné
Que la moitié d'aus le querront
Et li autre là remanront.
Lors monterent sor leur chevaus.
Par chans, par bois, par mons, par vaus
Le vont requerre et demander;
Mais il n'en pueent point trouver.
Par tout le pays le requirent
VIII jours; mais ains riens n'en aprirent,
Droit à Mestre se rassamblerent;
Lors primes tel duel demenerent
Quant n'en orent nouvele eüe,
K'à pou que chascuns ne se tue.
Lors penserent que desperez
Se fust ou noiez ou tuez,
Pour ce que nouveles n'ooit
De la riens que il plus amoit
K'autrement alez ne s'en fust.
Que il aucun d'aus dit n'eüst
Aucune riens de son propos.
Chascuns d'aus se tenoit pour sos
PageV02P009
Et pour malement avuglé.
Souvent se sont chaitif clamé.
Ils ne savoient que cuidier.
Lors se prirent à conseillier
De quel part traire se porront;
En la fin, assenti se sont
À ce k'en lor pays r'iroient,
Car là endroit riens ne faisoient.
De Mestre se sont departi.
À pou que ne furent parti
Leur cuer de duel quant s'en partirent.
Quant sans Cléomadès se virent:
"Hé! las! que nous est avenu,"
Font il, "quant nous avons perdu
Cléomadès, no bon seignour,
Qui tant de bien et tant d’onnour
Faisoit à nous, et nous donnoit
Plus que chascuns prendre n'osoit!
Se, pour les cors aventurer,
Certes, le poviens trouver,
Tost i seroient assenti
Li cuer, s'estre povoit ainsi."
Ainsi entre aus se gaimentoient;
À cuers dolans s'en repairoient,
Tant k'en Espaigne vinrent droit
Là où Marcadigas estoit.
Tout li ont dit et recordé
Comment sont venu et alé
Parmi mainte estrange contrée.
La véritè li ont contée
Des terres, des pays, des lieus,
PageV02P010
Et de la bataille des Grieus;
Comment Primonus desconfirent,
Et après comment il perdirent
Cléomadès. Quant li rois l'ot,
Pasmez s'est; tenir ne s'en pot.
Seur son lit chéöir se laissa;
Là endroit II foiz se pasma.
Et, quant revint de pasmoison,
Lors regarda tout environ
Sa gent, qui erent repairié
Sans son fill, dont le cuer irié
Ot si, k'à paines pot mot dire,
Tant par ot grant duel et grant ire.
Quant parler pot, si dist "Hé! las!
Meschiez me tient pris en ses las;
Bien puis dire trop ai vescu,
Quant j'ai Cléomadès perdu,
Mon chier fill, que je tant amoie.
En lui amer raison avoie,
Car en lui nule riens n'avoit
Fors que bonté; cele i manoit.
Pour lui estoie redoutez
Et obéis de tous costez;
N'erent vivant prince ne roi
Qui osassent faire desroi
Moi, ne rien k'à moi amontast.
N'est hom mortex ne redoutast
Moi à mesfaire à son vivant.
Hé! las! d'une chose me vant,
C'est que jamais joie n'arai,
Ains morrai de duel, bien le sai.
PageV02P011
Mais ce n'iert pas quant je vorroie,
Car mon vuel maintenant morroie."
Lors se repasme de rechief,
Et sa gent li tienent le ehief,
Qui si grant duel de cuer avoient
K'à pou que il ne s'ocioient.
Moult fu la cours desconfortée.
À ce point est leens entrée
La royne done Ynabele,
Qui tel duel ot pour la nouvele
Que de son fill ot entendue,
K'à pou que de duel ne se tue.
Ses filles après li venoient
Qui lor blanches mains detordoient
Et tiroient leur cheveus blons
Dont chascune ot plenté et Ions.
"Las!" font eles, "perdues sonmes
Quant no frere perdu avonmes,
Le bel, le bon, le preu, le sage,
En cui la flours de vasselage
Et de tous biens estoit creüe."
Quant Marcadigas a veüe
La royne, lors se leva,
Et la royne regarda
Le roy. Bien vit à son samblant
K'ains ne l'ot veü si dolant.
Par la main l'a li rois saisie:
"Hà!" fait-il, "ma trés douce amie,
Or nous convendra départir,
Car bien sai que de duel morir
PageV02P012
Me convient; n'en puis eschaper,
Quant j'ai perdu celui sans per
De tous les biens c'en puet savoir.
N’avoit nul per, au dire voir,
Cléomadès. Or l'ai perdu!"
Et quant la royne a veü
Le roi qui estoit en tel point,
Double mesaise au cuer li point
Folio37r
Pour son fill et pour son seignour.
Ne povoit avoir duel greignour
Qu'ele avoit; mais, comme sachant,
Va son seignour reconfortant.
Mais confors nule riens n'i vaut;
Car meschiés de cuer si l'assaut
Qu'il ne set qu'il puist devenir.
Plus het sa vie que morir.
Que vous iroie je contant?
Tant ot le cuer triste et dolant,
C'une maladie li vint
Tele que morir l'en couvint,
Dont ce fu pitiez et dolours.
Plains et regretez de plusours
Fu si, que dire nel saroie.
Savoir povez que pou de joie
Ot en Espaigne à celui jour
C'on i perdi si bon seignour
Comme le roi Marcadigas;
Li pays fu souples et mas.
De trestoutes pars regretoient
Marcadigas, car moult l'amoient.
Tost fu la nouvele espandue
Partout que la vie ot perdue
PageV02P013
Marcadigas, et que ses fis
Est mors. De ce cuide estre fis
Chascuns qui la nouvele en ot.
Sachiez s'aine femme grant duel ot,
Dont l'avoit grant done Ynabele.
Souvent se pasmoit, comme cele
Qui miex vousist la mort avoir
Qu'ele ue feïst nul avoir.
Et ses trois filles demenoient
Tel duel, qu'eles se deseiroient
Nés et visages et mentons.
"Lasses!" font eles, "tout avons
Perdu, et pourquoi remanonmes
Vives, quant nous perdu avonmes
Pere et frere de tel afaire
Com Diex les pot andeus miex faire?"
Marine souvent maudisoit
La vie qui la soustenoit
Et l'eitre qu'ele onques nasqui:
"Ha! lasse!" fait ele, "par mi
Est tous cis meschiés avenus.
Las! ne sait nus qu'est devenus
Cléomadès, li miens chiers freres,
Pour cui de duel est mors mes peres
Li bons rois; et tout muet pour moi.
Bien y a dont haïr me doi,
Et si faz je plus que riens née!"
Après ce mot, eheï pasmée.
Sa gent l'enlievent et l'enportent;
Au miex qu'il pueent la confortent.
PageV02P014
Sachiez que confors n'estoit point
En celui lieu, à celui point
Où les puceles et leur mere
Erent en tristece l'amere.
Se par grant duel mener peüssent
Recouvrer, assez tost eüssent
Ce dont pourquoi tel duel avoient.
Partout si grant duel demenoient,
Que nus nel sauroit recorder.
De ce vous lairai ore ester.
De ceaus d’Espaigne fu requis
Cléomadès en maint pays.
Car le certain pas ne savoient
De sa mort, et lui tant amoient
K'à envis eüssent laissé
Que maint pays ainçois cerchié
N'eüssent dou lonc et dou lé
Qu'il n'en seüssent verité;
Car moult le devoient amer.
Mais d'aus vous lairai ore ester;
À Cléomadès revendrai.
Assez briement vous conterai
Que il fist ne quel part ala
Le jour que de sa gent s'embla.
Quant fors de Mestre fu issus
Et en la forest embatus,
Les grans galos, par la forest,
Ala toute jour, sans arrest.
Pou furent ses resnes tirées
Celui jour; car trois grans jornées
Esloigna le lieu vraiement
Où il ot laissié sa gent.
PageV02P015
Ainsi celui jour chevaucha
Par la forest k'ains ne trouva
Maison ne lieu pour osteler.
Tant ala, qu'il vit esconser
Le soleil, et la nuit venir.
Lors ne sot il que devenir.
Volentiers cele part alast
Se il seüst où il trouvast
Où cele nuit fust herbergiez.
Ains que jours fust paranuitiez,
Vit I chastel en I pendant,
Fort et bel, et très bien séant.
Li chastiaus ot non Mont Estrais.
Droit devers ce chastel s'est trais
Cléomadès, quant l'ot veü.
Et cil dou chastel sont venu
Vers la porte, quant le choisirent.
La porte contre lui ouvrirent.
Tost fu d'aus li pons avalez,
Et Cléomadès est entrez
Ou chastel; lors est descendus,
Tost fu ses chevaus receüs.
Comme courtois et avisez,
A ceaus dou chastel saluez;
Et cil son salu li rendirent.
À lui et à ses atours virent
Qu'il estoit hom de grant afaire.
Lors se penerent moult de faire
Chose qu'il li venist en gré.
Dedenz une chambre mené
L'en ont, et si le desarmerent,
Et, après ce, li demanderent
PageV02P016
Quele aventure l'amenoit
Iluec, et quel chose il queroit.
# |
Et il leur dist : "Chevaliers sui.
Mains ai de joie que d'anui
Eü, plus a d'un an passé.
Liement m'avez ostelé
Et receü. Vostre merci.
Dedenz ceste forest ici
Sui embatuz. Ne quier celer
Quel chose m'i fait converser,
Ains le vous dirai maintenant :
Je vois aventures querant,
Dont me peüsse esleecier,
Car de joie auroie mestier."
# |
Dist li uns d'aus : "Ne sai quel joie
Vous avenra de ceste voie ;
Car aventure avez trouvée,
Quele ele vous sera contée
Tout maintenant, se vous voulez."
# |
Et Cléomadès s'est tornez
Vers lui, et durement li prie
Que, de l'aventure li die
Qu'il dit que il doit trouver là.
# |
Et cil maintenant dit li a :
"K'en ce chastel est establi
Que, quant chevaliers par iki
Passoit, puis qu'il estoit armez
Et en ce chastel ert entrez
Pour herbergier, que par droiture
Perdoit cheval et armeüre,
Ou il, cors à cors, trestous seus,
PageV02P017
Devoit combatre contre aus II,
Dont li sires de ce chastel
Qui a à non Durbans Dabel
lert li uns des II que je di ;
L'autre vous nommerai aussi :
Il a à non Sartans de Satre.
À ces II vous convient combatre,
Puis k'embatus estes céens.
Pour ce vous ouvrirent les gens
De ce chastel si tost la porte,
Que bien est venus qui aporte ;
Car bien cuident estre certain
Que lor soit cheü en la main
Vostre armeüre et vos destriers.
Pour ceste raison volentiers
Vous laissierent céens entrer ;
Car il i cuident conquester.
Mains chevaliers s'est embatus
En ce chastel, qui combatus
S'est à ces II que je vous di ;
Mais ains nus ne s'i combati
Cui ne couvenist, sans douter,
Morir ou recréant clamer.
Mais trois jours de respit aurés
De combatre, se vous voulés."
# |
Dist Cléomadès : "Le respit
Ne doit on tenir en despit,
Ains en doit on estre moult liez
Se on puet estre respitiez
De combatre pour tel raison
Dont vous me faites mencion.
Mais, selone ce que j'ai à faire,
Trop me torneroit à contraire
Se trois jours ici demoroie.
PageV02P018
À trop perilleuse monnoie
Couvient acheter cest ostage,
Se il i couvient metre gage D'aventurer honnour et vie :
C'est chier tans de herbergerie.
Et, puis que la coustume est tés,
Demain en vueil estre aquités ;
Puissedi que faire l'estuet,
S'en aviengne k'avenir puet.
Mais, dites moi, où sont li doi
À cui je combatre me doi?"
# |
Et cil dist que esbaniier
S'erent alé, et soulacier
À I leur chastel près de là,
Mais c'une grant liue n'i a.
# |
"Dès ier matin là s'en alerent ;
Mais leur femmes ci demorerent,
Qui moult grant honnor vous feront
Et moult bien vous aaiseront,
Si com de boivre et de mengier
Et d'aaisiement couchier,
Au miex qu'eles le porront faire.
Car dames sont de bon afaire,
Et demain la bataille aurez
À aus, puis k'avoir la voulez.
Demain matin venu seront
En la place, devant ce pont,
Apareillié de vous atendre ;
Mestier aurez de vous deffendre,
K'aigrement serez assaillis."
# |
Dist Cléomadès : "Biaus amis, 
Sachiez que j'ai moult grant fiance
PageV02P019
Que Diex en sera en m'aidance;
Car ce me samble desraison
Et que moult font grant mesprison
D'à moi combatre estre mon gré,
Dont je n'avoie volonté,
Ne n'ai encor, s'estre povoit.
De combatre à moi n'ont nul droit ;
Car ne croi k'ains lor mesfeïsse
Riens que seüsse ne veïsse,
Ne n'ai talent d'aus riens mesfaire ;  
J'ai assez autre chose à faire.
Vous dites k'à mengier aurai
Et que moult aaise serai ;
Or, faites donc que je le soie,
Car volentiers aise seroie,
Et demain Diex nous aidera."
# |
Et cil tout errant s'en tourna.
En la chambre où les dames erent S'en vint, qui s'acesment et perent
Et arréent d'aler souper.
Bien avoient veü entrer
Léenz l'estrange chevalier,
Et cil lor est venu noncier
Ce que il a en lui trouvé.
Moult leur a prisié et loé
Et dist bien que, à son avis,
K'ains hom qui miex samblast gentis De lui en ce chastel n'entra,
N'ainc plus bel de lui n'esgarda,
Ne plus à raison emparlé.
# |
Lors furent li cuer adolé
Des dames, quant ce entendirent,
Pour le peril que eles virent
PageV02P020
En ce que combatre devoit.
Et cil là s'en revint là droit
Où Cléomadès ot laissié.
Arréé et apareillié
L'ont d'une cote et d'un mantel
D'un vert samis fres et nouvel.
# |
À ce tans à coustume estoit
Que en plusours chastiaus avoit
À vestir pour les trespassans.
Tele ert la coustume à ce tans
Pour ceaus qui armé trespassoient. Adès vesteüres avoient
Pour chevaliers, ou pour autrui ; Selonc ce c'on véoit en lui,
Prestoit on chascun vesteüre,
Et li gardoit on s'armeüre
Folio38r
Jusqu'à tant k'aler s'en devoit ;
Et, si tost que armés r'estoit, Reportoit cele robe arriere
Ou chambellens ou chamberiere.
# |
Quant Cléomadès ainsi ont
Arréé, de là parti sont.
Ses armeüres li garderent
Et de son cheval bien penserent.
En la sale l'en ont mené.
À merveilles l'ont regardé
Les dames. Quant si bel le virent, Plusours d'eles moult en souzpirent Pour le grant peril qu'il avoit
En ce que combatre se doit
Encontre II, tous seus sans plus.
Et Cléomadès est venus
Vers eles, si les salua.
PageV02P021
Et lors delez li assis l'a
La femme au seignour dou chastel.
Servi furent et bien et bel.
# |
Après ce qu'il orent soupé, Cléomadès a demandé
À la dame de la maison
Qu'ele li die la raison,
S'il li plaist, pour quoi li couvient 
Combatre à II, ne dont ce vient.
Et la dame li a conté
De ce la pure verité.
# |
Lors li dist que jadis avint
Que uns hons armés léenz vint
Qui par la forest trespassoit,
Et dist que chevaliers estoit.
L'ostel demanda, et il l'ot.
Aaisiez fu au miex c'on pot.
À la mienuit se leva,
De ses armeüres s'arma.
"La chose vous acourcerai,
Car, ainsi que entendu l'ai,
Le seigneur dou chastel murdri,
Et sa femme, et trois fis aussi
Que il avoient, biaus et gens.
Tant murdri par céens de gens,
Que ne fu se merveille non?
Onques puis ne sot on quels hon
Ce fu, ne que il se devint.
K'ommes que femmes plùs de XX Ocist bien, ç'ai oï conter ;
N'onques le vaillant d'un soller
N'enporta, que nus hom seüst,
De chose qui par céens fust.
PageV02P022
À issir de céens tua
Le portier, ainsi s'en ala.
N'est hom qui ains savoir peüst Pourquoi tel chose emprise eüst.
Cent ans et plus a jà passé
Que ce avint, par verité.
Et pour le mesfait de celui,
En a on fait maint autre anui.
Souvent comperent mainte gent
Ce que il n'ont forfait néent.
K'ainc puis hom d'armes adoubés
Ne fu çà dedenz ostelés
Cui il ne couvenist laissier
Et armeüres et destrier,
Ou tous seus contre II combatre,
De ce ne puet nus riens abatre,
Chevalier contre chevaliers,
Escuier encontre escuiers.
Et qui combatre ne se vuet,
Se il li plaist aler s'en puet ;
Laist armeüres et cheval,
Voist s'en ; on ne li fera mal.
Se combatre ne vous voulez,
Demain aler vous en poez,
Ne jà ne trouverez nului
Qui vous face nul point d'anui.
Et se vous estes conseilliez
Que la bataille avoir vueilfiez,
Eu trop grant peril vous metez.
Je lo que vous vous en alez.
Se autrement fussiez venus
Ne vous demandast jà riens nus ;
Se ne fussiez venus armez,
PageV02P023
De tous fussiez quites clamez.
La bataille si senefie
Que ce n'est, mie roberie ;
Ains est un establissemens
Qui a esté despuis céens
Que vous m'oez ramentevoir.
Or vous dirai de ce le voir,
Pour quel raison fu establi
De II homes combatre ainsi
Encontre I seul que dit vous ai ;
La verité vous en dirai :
Pour ce k'uns seus hom n'empreïst
Bataille à II, et miex vousist
Laissier cheval et tout arriere
Que lui combatre en tel maniere
Que tous seuls contre II ensamble.
Moult fait que sages, ce me samble,
Qui de II mauvais poins se tient
Au mains mauvais : de sens li vient.  
Ains k'à aus II vous combatés
Lo que vos armes leur donnés.
Maint s'en sont sans combatre alé,
Pour ce que vous ai devisé,
Qui volentiers combatu fussent,
S'à I seul la bataille eüssent, ;
Et se s'en sont maint combatu,
Mais adès ont été vaincu
Jusk'au jour d'ui li combatant.
De ce me tairai ore atant ;
Mais, tant vous dise, m'en créés,
Que pas ne vous combaterés."
# |
Quant Cléomadès l'entendi,
Moult courtoisement respondi :
"Dame, de vostre loement
PageV02P024
Et dou courtois ensaignement
Que m'avez fait, moult vous merci ;
Et, se je puis partir de ci,
Vostre chevaliers à tous jours Devieng, et ici et aillours.
Bien voi que vous pitié avez
De moi, et que vous me loez
Pour bien tout ce que vous me dites.
Mais, puisque ne puis estre quites 
De la bataille en autre guise
K'ainsi k'en faites la devise,
J'aim miex à faire la bataille
Que je m'armeüre lor baille
Ne mon cheval. Pas ne l'auront
Jusqu'à tant que conquis m'auront ;
Folio38v
Car moult honteusement iroie
Se à pié de céens partoie.
Ne n'est pas chose aferissant
De chevalier à pié alant."
# |
Dist la dame : "Je vous donrai
I très biau palefroi que j'ai,
Que je meïsme chevauchoie
Adès quant en deduit aloie.
Bien vous ferai apareillier.
Or vous vueilliez dont relaissier,
Biau sire, de ceste folie.
Certes et j'en serai moult lie ;
Car grants damages, ce m'est vis,
Seroit si [vous] estiez ocis.
Pour ce vous pri que le prenez."
# |
"Madame, tant d'onnour m'offrez,"
Dist Cléomadès, "que ne sai
Comment desservir le porrai.
PageV02P025
Se mais desservir le povoie,
Sachiez volentiers le feroie.
De tous ne sui pas bien amez ;
Pour ce aloie ainsi armez."
# |
Dist la dame : "Se je osoie,
Volentiers vous demanderoie
Vostre non, se il vous plaisoit."
# |
"Dame, quels que li miens nons soit,
Moult volentiers le vous dirai.
Mon non pas ne vous celerai ;
Mais mes nons n'est mie plaisans.
J'ai à non : 'D’amours meschéans.'
Or vous dirai, se vous voulez,
Pour quoi sui ainsi apelez.
Li nons vient de mes ancissours,
Pour ce l'arai non à toujours.
Moult volentiers, se je peüsse,
Ce non changié à autre eüsse ;
Mais si longuement ai eü
Ce non, k'en maint lieu est seü,
Si que n'ai povoir de partir
Dou non, ains m' i couvient tenir.
Nepourquant volentiers auroie
Plus plaisant non, se je povoie ;
Mais fort seroit mais à muer
De moi autrement apeler."
# |
La dame moult se merveilla
De ce que il si fait non a.
Lors dist Cléomadès à li :
"Dame, puisque il est ainsi
Que la coustume est céens tés
Que vous ici me devisés,
PageV02P026
Cheval et armes sauverai,
Ou je la vie i laisserai :
Je n'en ferai el, c'est la fin."
# |
Et lors a demandé le vin
La dame ; car bien aperçoit
Que Cléomadès ne feroit
Riens de ce que requis li ot.
Moult l'en anuia et desplot ;
Mais plus ne l'en volt araisnier.
Lors corurent apareillier
Vallet le vin, si l'aporterent.
Quant beü ont, lors se leverent,
Et Cléomadès prist congié
À la dame, et moult merciié
L'a de ce qu'ele dit li a.
Les dames à Dieu commanda.
# |
Cléomadès lors s'en depart,
Et cil dou chastel cele part
L'enmainent où gesir devoit.
Aaisiez fu bien et adroit
Si que il n'i failli néent.
Ne vous ferai lone parlement.
Si tost k'ens ou chastel entra
Uns de ceaus dou chastel ala
Au lieu tout droit où cil estoient
Qui à lui combatre devoient;
Si qu'il vindrent tout arréé
Lendemain, ains soleil levé,
Devant le chastel là tout droit
Où la bataille estre devoit.
# |
Sachiez que pas ne s'oublia
Cléomadès, ains se leva
PageV02P027
Assez tost après l'ajorner.
Ses armeüres raporter
Li fist on, quant il fu levez ;
Et Cléomaclès s'est armez.
En dementres que il s'arma,
À ceaus dou chastel enquis a
Com faites armes cil portoient
Qui à lui combatre devoient.
Et on li dist c'un escu noir
À I esch[i]keté sautoir
De blanc et de gueules portoit
Cil qui dou chastel sire estoit ;
Et li autres le portoit bleu
À trois testes blanches de leu.
# |
Cléomadès le demandoit
Pour ce que enpensé avoit
Qu'il deporteroit le seignour,
S'au desus venoit del estour,
Pour l'amour de sa bonne ostesse ;
Car pas trouvée felenesse
Ne l'ot, mais très bien ensaignie.
Pour ce moult à envis la vie
Torroit, s'amender le povoit,
Celui qui ses barons estoit.
# |
Moult très apertement s'arma
Cléomadès, ne detria.
Quant armez fu, lor[s] ceint s'espée
Qui ert trenchans et acerée,
"Ressoignie," qu'il moult amoit,
Qu'esprouvée en maint lieu l'avoit.
Ramenez li fu ses destriers,
Et il, qui d'armes ert maniers,
I monta moult isnelement.
PageV02P028
Son escu et sa lance prent.
Quant il ot son hiaume lacié,
Qui lors le veïst afichié
Noblement desus les estriers,
Bien deïst : "Cis est chevaliers."
# |
Uns escuiers lors dit li a
Que cil sont venu grant pieçà
Qui à lui combatre se doient,
Et durement se merveilloient
De ce qu'il ne [se] hastoit plus
Ains que li chaurres fust venus.
"Longuement atendu vous ont."
Dist Cléomadès : "Jà m'auront."
# |
Cléomadès lors s'en torna ;
La porte et le pont trespassa.
À merveilles fu regardez
De tous, et prisiez et loez.
Folio39r
Tous prisierent communement
Lui et son bel contenement.
De lui moult grant pitié avoient
Les dames qui as murs estoient,
Et vousissent, s'estre peüst,
Que la bataille pas ne fust.
# |
Droit devant les fossez avoit
Un parc de palis, qui estoit
Haus et grans et faiz et faitis.
Léenz combatoient tous dis
Cil qui combatre se devoient.
À l'un cor de cel parc estoient
PageV02P029
Durbans et Sartans tout monté
Et de la bataille apresté.
Pour ce fu cil pars arréés
Si faitement com vous oez,
Que nus fouir ne s'en pouist
Qui as II combatre vousist.
Et Cléomadès est entré
Ou parc, et lors s'est aprestez
Chascuns de faire son devoir.
Dedenz le parc, sachiez de voir,
Mais k'entre aus trois ne demorerent.
Et cil de defors refermerent
Le parc, si k'entrer n'i pouist
Nus hom, de quel part qu'il venist ;
Et aussi issir n'en povoient
Cil qui dedenz le parc estoient,
Jusqu'à tant k'ert à fin menée
Cele bataille, et achevée.
Ainsi à coustume l'avoient.
# |
Et quant li doi chevalier voient
Venir Cléomadès le pas,
Lance sor fautre, par compas,
Vers aus si apenséement,
Lors embracierent fierement
Les escus, les lances brandirent,
Chevaus des esperons ferirent.
# |
Et quant Cléomadès les voit
Vers lui venir, tantost perçoit
Les armes que chascuns porta.
Droit devers Sartan s'adreça.
Cléomadès moult fierement
Celui ferra premierement
S'il puet. Ainsi l'a enpensé.
PageV02P030
L doi sont à lui assanblé
Moult fierement, et il à eus.
Lor glaives brisierent andeus
Li chevalier desor l'escu
Cléomadès, mais abatu
A Sartan dou coup premerain.
Lui et le cheval tout de plain
Abati droit en son venir.
Bien dut Sartan ressouvenir
De cel coup qui là ot eü
K'ains mais n'ot si grant receü.
Mais si finement fu armez,
Que dou coup ne fu pas navrez.
Ses chevaus tost se releva,
Et il là endroit demora
À la terre tous estordis,
C'on ne sot s'il fu mors ou vis.
# |
Cil dou chastel moult s'esbahirent
De celui coup, quant il le virent.
La femme Sartan se pasma
Quant vit que ses sires jut là.
Ne mouvoit bras, ne pié, ne cors,
Pour ce cuida que il fust mors.
Tout troi ont lor lances brisies.
Lors ont les espée sachies
Cléomadès il et Durbans.
Chascuns d'aus l'ot bonne et trenchans.
# |
Durbans ne fu pas esbahis.
Vers Cléomadès vint com cis
Qui chevaliers estoit vaillans.
Et Cléomadès redoutans
Estoit forment de lui blecier.
Envers lui prist à aprochier :
PageV02P031
Car à bras volontiers venist
À lui, se faire le pouist,
Car paour a, se il l'ataint,
Que il ne l'ocie ou mehaint
S'à plain coup le fiert de s'espée.
Pour sa bonne ostesse senée,
Où tant de biens trouvé avoit,
Celui à envis mal feroit,
Pour ce que il ert ses maris.
Lors est tout belement guenchis
Vers Durbant, et cil l'a feru
Grant coup deseur son hiaume agu ;
Dou brant qui durement trencha
Le hiaume de riens n'empira.
# |
Li coups sor l'escu descendi
Et le coupa si et fendi,
Que par deseur le pré herbu
En a I chantel abatu.
Sachiez que pas ne se fainsist
De lui ocirre, s'il pouist.
À cel coup plus conquis n'i a.
Et lors Cléomadès hauça
L'espée, à loi de chevalier.
Des esperons point le destrier.
# |
Dou bran, par devers le pommel,
Feri si enmi le musel
Durbant, qu'il li a deseerclé
Son hiaume, et lui si reversé
Parmi la crupe dou cheval,
Qu'il eheï à la terre aval,
Tous estenduz enmi la place.
Moult ot defroissie la face
Dou coup que receü avoit.
PageV02P032
Et si tost que il se perchoit
Qu'il ert cheüs, tout erranment
Sailli sus moult apertement,
Com cil en cui valours manoit.
Et quant Cléomadès le voit
Relevé, tantost le saisi
Par le hiaume, et l'en desrompi
Les las, si qu'il li erracha
Le hiaume, et aval le geta.
# |
Quant Durbans se vit en tel point,
Sachiez ne li agréa point.
Bien voit que se il ne se rent
Que il est mors outréement ;
Ne deffense riens n'i vaudroit,
Puisk'à pié et sans hiaume estoit.
Par la pointe a prise s'espée ;
Cléomadès l'a presentée ;
À lui se rent, merci li crie,
Que il ne li toille la vie.
Et Cléomadès dit li a
Que il entresait l'ocirra
Folio39v
Se il ne li a en couvent
Que la coustume entierement
Que il en ce chastel maintienent
De combatre à ceaus qui là vienent,
Que jamais ne la maintenra,
Et que dou tout l'abatera ;
Que il l'ocirra, c'est passé,
Se il de ce ne fait son gré.
Ce li jure bien et afie.
Et cil qui doute à perdre vie
Li dist k'à tous jours iert ostée
PageV02P033
La coustume, et à nient alée.
Ainsi en convenant li a
Durbans, et si l'en fiança
Sa foi que ainsi le feroit
Et que bien couvent l'en tenroit.
Et Cléomadès la fiance
En a prise sans arrestance.
# |
Lors apela Durbans sa gent,
Et il i vindrent erranment ;
Car moult desirent à savoir
Quel couvenant il puet avoir
Entre lui et le chevalier
À cui l'ont veü fiancer.
De leur II seigneurs merveille ont
Quant par I home conquis sont,
Si comme aparissant estoit.
À Durbant sont venu tout droit
Li un, et li autre à Sartant ;
Car moult estoient desirant
De savoir se mors ert ou vis
Sartans, qui là gist estordis.
Trouvé l'ont si k'en pasmoison.
De sane ot geté grant foison ;
Par bouche, par nés, par oreilles,
Ot tant sainnié, que c'ert merveilles.
# |
En son séant l'ont relevé
Sa gent, et si li ont osté
Son hiaume, et errant deslacié.
Pou remouvoit jambe ne pié
K'encor n'ert pas si revenus
À lui, qu'il ait reconneüs
Sa gent qui entour lui estoient.
Quant sa gent en tel point le voient,
PageV02P034
Dolant en furent et irié.
Deseur son escu l'ont couchié.
Dedenz le chastel l'emporterent.
# |
Et cil qui vers Durban tornerent
Erent entour lui assamblé.
Et il lor a dou tout conté
De chief en chief, riens n'en cela,
Ce que il en couvenant a
Celui à cui s'ert combatus,
Que mais ne seroit maintenus
Li usages de la bataille.
"Ce li ai en couvent, sans faille.
La cousturne iert si abatue
Que mais ne sera maintenue ;
Ainsi le vueil."
Et quant cil l'oent
Moult durement celui en loent
Que tel chose arréé avoit ;
Car la coustume laide estoit
Et perilleuse et pou courtoise.
Il n'i a nului cui il poise
De ce que il iert ensement.
# |
Durbans a bien dit à sa gent
C'onques mais ne vit chevalier
Si aspre, si fort, si legier,
Com cil à cui combatus s'ert.
"À moi et à Sartan bien pert,"
Fait il, "se je di verité."
Lors li ont sa gent ramené
Son cheval, et il i monta.
Quant montez fu, lors s'en torna
Vers Cléomadès, qui s'estoit
Trais d'une part, et regardoit
PageV02P035
Lor couvenant moult sagement.
Et Durbans par le frain le prent.
En son chastel l'en a mené.
Ensamble sont dedenz entré.
# |
À merveilles le regarderent
De toutes pars cil qui là erent,
Chevalier, dames et puceles,
Dont moult en y avoit de beles.
Droit devant la sale descendent.
Le cheval Cléomadès prendent
Les gens Durbant. Si bien penser
En font, qu'il n'i ot k'amender.
# |
Cléomadès enmainent droit
En la chambre où geü avoit
La nuit que il venus ert là.
Durbans meïsmes l'i mena,
Et li dist qu'il se desarmast
Et ilueques se reposast ;
Car tout erranment revenroit
Si tost que desarmez seroit.
# |
À Cléomadès plaisoit mout
La maniere Durbant, de tout,
De hardement, de seürté,
Et de sens et d'umilité,
Et d'onnour et de courtoisie.
Vis li est que bien emploiie
Seroit en lui très haute honnour ;
Car chevaliers est de valour.
De tant que il veü l'avoit,
En son cuer forment le prisoit.
# |
Durbans, ainsi com je vous di,
PageV02P036
De là endroit se departi,
Et la gent Durbant desarmerent
Cléomadès, et l'arréerent
Ainsi eom il li apartint.
Et Durbans en la chambre vint
Où Sartans, ses conpains, gisoit.
Et quant Sartans Durbant perçoit,
Tost fu de lui reconneüs ;
Car tous ert à lui revenus
Ses sens et ses entendemens.
Mais bleciez fu ou cors dedens ;
Car si dur à terre portés
Fu, kà pou qu'il ne fu crevés,
Si que lone tans à garir mist.
Durbans en costé lui s'assist.
Iluee l'ont sa gent desarmé.
# |
Sartans a Durbant regardé.
Andoi sont mu et esbahi
Que avenu lor est ainsi
Que par I homme conquis sont.
N'est merveille se duel en ont ;
Car en tout le pays n'avoit
Si preu com li mains preus estoit
D'aus II ; ce tesmoigne chascuns,
Grant et moien, et li communs.
Folio40r
Durbans à Sartan recorda
La convenance que il a
À celui qui les a conquis.
PageV02P037
"Miex vorroie estre mors que vis,"
Fait Sartans. "Ainsi m'aït Diex.
Mais ne muet pas de ce mes diex
Que la coustume est abatue :
Autre chose y a qui me tue
Et me destraint le cuer si fort,
Que de duel croi recevoir mort.
Bien savez k'en couvent avoie
Que je combatre me devoie,
Pour Lyadès, d'ier en quinzaine,
Dont iert la tierce karantaine,
C'on ne puet plus avant aler
De combatre pour li sauver.
Avoie gage receü.
Or est moi et li mescheü ;
Arse iert, et je deshonnorez.
Dolans sui quant je sui menez
À ce que aidier ne li puis ;
Car tout mon cors en tel point truis
Que ne cuit que je jamais soie
En point que armes porter doie.
Plus sui dolans, foi que Dieu doi,
Pour li, que ne soie pour moi,
De ce que je sui en tel point."
# |
Dist Durbans : "Or ne pensez point
À ce, que au miex que porrai
Pour vous la bataille ferai.
Mais, se dou faire en point fussiez,
Miex vausist que la feïssiez
Que je ; car plus estes vaillans
Que ne soie, C. mile tans.
Et nepourquant tout mon povoir
PageV02P038
Ferai, et de cors et d'avoir,
Que sauvée i soit vostre honnour.
En lieu de vous, serai au jour
Que vous combatre vous devez,
Se je tant vif, or n'en doutez.
Tout soit mes viaires froissiez,
Li cors est tous sains et haitiez.
Ne di pas k'ocis ne m'eüst
Li chevaliers, se lui pleüst ;
Car mon hiaume perdu avoie.
Moult tost m'eüst mis à la voie ;
Mais, par sa franche courtoisie,
Ne li plot que perdisse vie."
# |
Quant Sartans entendi Durbant,
Forment s'en va reconfortant
En son cuer, et moult l'en mercie.
D'onnorer durement li prie
Celui à cui combatu sont.
Et Durbans se leva adont
Et dist que ainsi le fera.
Droit en la chambre s'en ala.
Sa femme a là endroit trouvée,
Qui moult estoit espoentée
Pour la bataille k'ot veüe.
Ert esplorée et esperdue.
Et Durbans la reconforta ;
Et li a dit que il mal n'a,
Fors c'un pou est bleciez ou vis :
Moult tost sera de ce garis.
# |
Durbans sa maisnie commande
C'on face haster la viande ;
Car errant veut aler mengier.
PageV02P039
Et cil le firent, sans targier,
Noblement et bel arréer.
# |
Un pou ains le tans de laver,
Vint Durbans en la chambre droit
Là où Cléomadès estoit.
Une piecete à lui parla ;
Mais de quan qu'il li demanda
Le trouva si très apensé,
Si courtois et si avisé,
Que Durbans de lui esperoit
Que de gentil lieu venus soit.
# |
Quant tans en fu, lors se leva
Durbans, et par la main pris a
Cléomadès ; car moult le vuet
Honnorer, se il onques puet.
En la sale l'en a mené ;
Jà avoient tout apresté
Li serjant kan qu'il couvenoit,
Si que on bien mengier povoit.
Les dames venues estoient
Et cil qui là mengier devoient.
# |
À merveilles fu regardez
Cléomadès de tous costez,
Et dient tout que bien assise
Est prouece en lui et bien mise ;
Car moult est biaus et avenans
Et très gracieus et plaisans.
# |
L'aigue demandent, lavé ont,
Et lors au mengier assis sont.
Entre la dame et le seignour
PageV02P040
Sist Cléomadès celui jour.
Assez orent kan qu'il couvint.
Entrues qu'il menjoient, avint
Que Cléomadès demanda
À Durbant où estoit cil là
Qui avoec lui s'ert combatus.
# |
Dist Durbans : "Biau sire, abatus
Fu si dou coup que de vous ot,
C'onques puis aidier ne se pot,
Et cuit que mais ne s'aidera ;
Car tout le cors defroissié a."
# |
Dist Cléomadès erranment :
"Certes, moult m'en poise forment :
Se je le peüsse amender.
Or li doinst Diex bon respasser."
# |
Dist Durbans : "Se le connoissiez,
Son afaire moult priseriez ;
Car moult est courtois et loiaus,
Et chevaliers preus et vassaus.
Une bataille avoit emprise,
De quoi il se het et desprise
De ce que faire nel porra,
Pour le meschief dou cors qu'il a."
# |
Dist Cléomadès : "L'ochoison
De la bataille, et la raison,
Moult volentiers de vous sauroie,
Se je prier vous en osoie."
# |
Dist Durbans : "Je le vous dirai ;
Car verité toute en sai.
Si tost que de ci leverons,
Je et vous à Sartan irons.
PageV02P041
Là endroit en saurez le voir.
Aussi vous veut Sartans veöir ;
Et si a trop à deviser.
Pour ce le lairai ore ester,
Folio40v
Dusques après mengier, ainsi."
# |
Dist Cléomadès : "Je l'otri."
# |
Cléomadès moult honnorerent,
La maniere de lui loerent
Cil de léens communement.
Son estre et son contenement
Prisent forment cil qui là sont.
Quant mengié orent, lavé ont.
Après mengier, uns menestrés,
Qui Pinçonnés ert apelés ,
Joua I pou de la kitaire.
Ne couvint pas prier de taire.
Ceaus qui là erent assamblé,
Moult volentiers l'ont escouté.
Son mestier fist bel et à point.
Lors s'en parti ; et à cel point
Se sont de toutes pars levé,
Et Durbans en a lues mené
Cléomadès dedens sa chambre,
Dont li piler furent de l'ambre,
Et en estoient les parois
Ouvrées de marbre liois.
Noblement estoit atornée
Icele chambre et arréée.
PageV02P042
Le vin et le fruit demanda
Durbans, et on li aporta.
Après ce qu'il orent beü,
Cléomadès ramenteü
A Durbant que il le devoit
Mener là où Sartans estoit.
Et Durbans dist qu'il l'i menra
Tout maintenant, lors se leva.
# |
Un sien vallet devant envoie,
Et cil se mist tost à la voie.
À Sartan dist que là venoit
Durbans, et o lui amenoit
L'estrange chevalier, sans plus.
Lors y ot tapis estendus
Et fait ce qu'il i apartint.
# |
Et Durbans en la chambre vint
Où Sartans gist. Salué l'a
Cléomadès, et dit li a
Que Diex garison li envoit
"Sire," fait il, "Diex vous en oit,
Et vous croisse honnour et bonté !
Vostre prouece m'a mené
À ce que lever ne me puis
Encontre vous." - "Et je nel ruis,"
Dist Cléomadès, "ains vous proi
Que vous ne vous mouvez pour moi."
# |
"Biau sire, dont vous sées jus.
Que très bien soiez vous venus,
Encor nous aiez vous outrés
D'armes ; car ne fu pas vos grés
Que vous à nous vous combatistes.
En vous deffendanf le feïstes.
PageV02P043
Pour ce ne vous quier pas haïr,
Ainçois vous vorroie servir,
À mon povoir, toute ma vie."
Et Cléomadès l'en mercie.
La courtoisie moult li plot
Que Sartans de Satre dit ot.
En son cuer plaint moult durement
Ce qu'il est bleciez telement ;
Sachiez que moult en ert dolans.
Lors sont assis il et Durbans.
# |
En la chambre ne demora
Fors k'entre aus trois. Lors lor moustra
Cléomadès que plus ne puet
Demorer. Aler l'en estuet ;
Car il a à faire besoigne
Qu'il tient à moult loial essoigne.
"Durbans," fait il, "ains que m'en aille,
L'ochoison de cele bataille
De quoi vous me parlastes hui,
S'il ne vous tornoit à anui,
Vorroie volentiers savoir."
# |
Quant Sartans l'ot, lors sot pour voir
Que Durbans contée li a
La bataille que enprise a.
Lors le prient de demorer
Tant que il le font acorder
À ce que la nuit remanroit
Et le matinet s'en iroit.
# |
Dist Durbans : "Sartan, or contés
L'ochoison pourquoi vous avés
En Toscane emprise bataille.
Dès la premiere commençaille
PageV02P044
Dont l'ochoison vint de premiers,
Nous dites, sire." "Volentiers,
Puisqu'il vous plaist, le vous dirons,
Mais moult en est li contes Ions.
Dou plus preus c'on sache vivant
Muet li contes, de ce me vant ;
C'est de Cléomadès d'Espaigne,
Qui toute mauvaistie desdaigne
Et en cui toute bontez maint :
Ce tesmoignent maintes et maint.
C'est la toupace de prouece
Et li drois rubis de largece.
Près a de II ans qu'il avint
Que droit à Chastel Noble vint
Cléomadès, sor la grant tour,
Arréé de divers atour ;
Car uns chevaus l'i aporta
Qui ert de fust, ce dit on l'a.
Sachiez que ce fu chose voire.
Mais c'est trop grant merveille à croire
De la chose que vous orrez,
Et si fu ce tout veritez."
# |
Quant Cléomadès s'ot nommer,
Colour et maniere muer
Li couvint, ou vousist ou non.
Si tost qu'il ot oy le non
Dou chastel où enz il trouva
Clarmondine, que perdue a,
Près que ses cuers ne fu partis.
Sa main estraint contre son pis,
Souz son mantel, tout belement,
C'on ne s'en perçoive noient ;
Car grant paour a que ne parte
PageV02P045
Ses cuers, ains que de là departe.
# |
Ainsi que la chose fu faite
L'a Sartans mot à mot retraite,
Puis que Cléomadès vint là,
Dusqu'à l'eure qu'il eschapa,
Et com à l'autre fois revint.
De tout si très bien li souvint
Que nule riens ne trespassa ;
Et tout ainsi qu'il enporta
Clarmondine, les iex voiant
Clarmonde, sa mère, et Carmant.
Folio41r
Et li a conté tout ainsi
Que Clarmondine reperdi.
# |
"Sire," fait il, "or la requiert
Cléomadès ; car bien afiert
À requerre tele pucele
K'en tout le mont n'avoit si bele ;
Et, se en li avoit biauté,
Encor i avoit plus bonté.
Trois damoiseles qu'ele avoit
Sont à grant meschief orendroit
K'en la court Carmant apelées
Sont de trayson et restées,
Pour ce que, par le leur assent,
Avint la chose telement
Que Cléomadès tout ainsi
Enporta Clarmondine o li
Que je vous ai dit et conté,
Par lor seü et par lor gré.
Mais ainc trayson n'i penserent
Quant lor damoisele loerent
Qu'ele Cléomadès preïst.
Nule d'eles ne le feïst,
PageV02P046
Ainçois se laissast escorchier
Toute vive, ou le chief trenchier ;
Car de moult bone estracion
Sont toutes trois, bien le set on
De moult grant ancienneté.
Mais, pour la très grande bonté
De Cléomadès, qui tant vaut
Que en lui nule riens ne faut
K'en bon chevalier avoir doit,
S'i assentirent. S'orent droit ;
Car en tout le mont son per n'a
Et croi que jamais n'i sera.
Pour sa valor s'i assentirent
Toutes trois, et le consentirent.
Or vous dirai comment seü
Lor couvenans primerains fu.
Maintes femmes sont qui celer
Ne pueent riens, ne qui garder
Ne se pueent de ce retraire
Qui puis lor retorne à contraire.
Et s'en sont maintes qui soufrir
Ne pueent aises ne joïr ;
Maintes qui ne connissent l'aise,
Sont pour ce mises à mesaise ;
Que s'eles l'aise conneüssent,
En l'aise demorées fussent.
Je ne di pas que toutes soient
Teles, mais sor ce gage acroient ;
Un gramment de teles y a.
Lyadès deceües a
Ses conpaignes et li aussi
Par la raison que je vous di ;
Car, se ele se fust teüe,
La chose ne fust mais seüe.
S'est ele moult sage et courtoise,
PageV02P047
De sa mescheance me poise.
C'ert la maistresse Clarmondine,
Qui tant ert bone et bele et fine,
Cele Lyadès que je di.
Plus courtoise riens ne nasqui.
Elle est ma niece de II lez.
Or vous dirai, se vous voulez,
Quel chose deceüe l'a.
En une femme se fia
Qui femme son cousin estoit.
Li une l'autre moult amoit.
Ensamble orent esté norries,
Conpaignes erent et amies.
Dist li merveilles li diroit,
Par si k'en couvent li aroit
Qu'ele n'en parleroit avant.
Et cele li jura errant
Que ce li seroit bien celé,
Ne jà ne fust de ce douté ;
Car miex vorroit c'on li ostast
Les iex, que ce qu'ele en parlast.
Et lors Liadès li conta,
De chief en chief, riens n'en cela,
Coment la chose estoit alée
Que je vous ai ci recordée.
Et cele le dist I sien frere,
Et cil le redist à sa mere,
Et cele le dist son baron,
Et cil à un sien conpaignon
Le redist ; tant k'ainsi avint
Que la nouvele fors en vint,
Et tant ala de mi à ti,
Qu'il vint dusqu'à Bleopatri,
Qui est fiex Balcabé d'Arcage.
C'est uns rois c'on tient moult à sage.
PageV02P048
Bleopatris avoir devoit
Clarmondine. Otroiez estoit
Li mariages de pieça.
Mais, moi est vis, failli y a ;
Car on dist que ele est perdue
Ne mais ne sera reveüe
Ne de lui ne d'ami qu'ele ait.
Ce dist bien chascuns entresait
K'ains puis nouvele n'en oïrent
Cil d'Espaigne qu'il la perdirent.
Or la requiert Cléomadès
Par tous pays, et loin et près ;
Mais je ne sai en quel partie
La requiert, n'en mentirai mie.
De ce ne vous sai le voir dire.
Mais Bleopatris ot tele ire
De ce que il perdu avoit
La pucele k'avoir devoit
En tel maniere que j'ai dite,
K'en sa terre prist à eslite
Trois chevaliers les plus vaillans
Et les plus fors et les plus grans
Que il onques eslire i pot.
Si tost que la nouvele sot
Des trois puceles qui ainsi
Orent esploité que je di,
À Chastel Noble en vint tout droit
Là où li rois Carmans estoit.
Les puceles apeler fist
Toutes trois, et seure leur mist
Que fait avoient trayson,
Et que par fausse entencion
Le roi Carmant tray avoient,
PageV02P049
Et que devant le coup savoient
Que Cléomadès venroit là,
Et qu'eles l'orent de pieça
Arréé. Et le prouveront
Qui encontre dire verront.
À Chastel Noble lors estoie ;
Pour besoigne que g'i avoie
Folio41v
À faire, i estoie venus.
Mais je ne vi onques que nus
Enpresist nesune à deffendre
Des puceles. Lors les fist prendre
Li rois, et en prison mener.
À Lyadès alai parler.
Toute la chose me gehi ;
Et, quant je fausseté n'i vi,
Pour li de vilains blasme oster
Alai mon gage presenter.
Bataille enpris à l'un des trois,
Qui est moult grans et lez et drois ;
Et aussi sont li autre doi.
Cil à cui combatre me doi,
Dont povrement aaisiez sui,
A à non Gados de Monbrui.
Les autres II vous nommerai,
Puisque cestui nommé vous ai :
Li uns a non, si comme on dist,
Rodruars Qui-onques-ne-rist.
Tant par est fel, que onques rire
Ne le vit nus, c'ai oï dire ;
Pour ce li fu cis sornons mis.
Li tiers a non Bruns li Hardis.
Cil n'ot ainc paour, ce dist on,
Et pour ce a si fait sornon.
À Lyadès est bien cheü
De ce que si m'est avenu ;
PageV02P050
Car plus vaillans que je ne soie
Se combatra, se Diex me voie,
Pour Liadès, en lieu de moi.
Ce est Durbans, que je ci voi,
Qui, sans requeste, s'oblija
À ce que pour moi combatra.
Mis m'a en voie de santé,
Car honnour m'a fait et bonté ;
Car bien sai que de duel morusse,
Se de lui ce confort n'eüsse ;
Car rniex aim ce confort de lui,
Si m'aït Diex, que de nului,
Fors de vous, sans plus, k'ainc nul jour
Ne vi home de vo valour.
Nel di pas pour vous losengier ;
Car bien le poons tesmoignier,
Je et Durbans, par verité,
Car nous l'avons bien esprouvé."
# |
Dist Cléomadès : "Diex le vot
K'ainsi avint, et, quant lui plot,
Ce fu legiere chose à faire,
Puisque il à Dieu vouloit plaire.
Et croi que à Dieu desplaisoit
La coustume qui contre droit
Ert en ce chastel maintenue :
Et, se la chose est avenue
Ainsi, ce ne fu pas par moi :
Diex le fist ainsi, com je croi.
Mais dites moi des trois puceles
S'onques puis oïstes nouveles
C'on lor mist sus la trayson :
Se nus de lor estracion
PageV02P051
Ou de lor amistié venist
Qui pour eles se pouroffrist,
Fors vous, sans plus." -"Sire, nenil,"
Fait Sartans. "Mais en grant peril
Sont les II, car de mainte gent
Sont hayes. Nes lor parent
Les héent, pour ce que il croient
Que fausses et mauvaises soient,
Et que la trayson fait aient.
Tout en sus d'eles si se traient,
Que nus aaidier n'es enprent.
Arses seront par jugement,
S'il n'est qui pour eles enprende
Qui de ce lait kas les deffendre.
Nouvele certaine en oy
Hui a V jours, ce fu mardi.
Mais encor ert à entreprendre
Eles aaidier à deffendre.
Ne voi qu'eles aient confort.
Arses seront, mais c'iert à tort.
K'ainsi me fasse Diex pardon,
N'i entendirent se bien non
De ce dont on les ochoisonne ;
Car chascune ert et sage et bonne."
# |
Quant Cléomadès entendu
Ot Sartan, si très esmeü
Ot le cuer de dolour et d'ire,
K'à paines le saroie dire ;
Car de ce a oy parler
Dont il ne se set conforter
En riens qu'il puist penser ne faire.
Lors pensa qu'il se vorroit traire
Vers Chastel Noble trestout droit,
Et pour les puceles metroit
PageV02P052
Son cors pour eles delivrer.
Lors se commence à aviser
Que Sartan et Durban diroit
K'à Chastel Noble aler vouloit,
Et pense qu'il lor mousterra
Ce pour quoi aler vouloit là.
# |
"Sartan," fait-il, "vous et Durbant,
Un petit de mon couvenant
Vous dirai, et de ma pensée.
Le jour que reçui l'acolée
Pour estre chevaliers nouviaus,
Vouai I veu, qui moult fu biaus,
Se je le povoie fournir ;
Mais bien sai que dusk'au morir
Tout mon vivant le maintenrai.
Le veu, quels il est vous dirai :
C'est que ne sarai damoisele,
Ne dame nule, ne pucele,
Qui ait de m'ayde mestier,
K'à son besoing ne voise aidier
De son droit aidier à deffendre
K'autrement n'i vorroie entendre.
Et, pour ce que vous tesmoigniez
Que les puceles, ce cuidiez,
Soient à tort ochoisonnées
Et de vilain blasme restées,
À Chastel Noble m'en irai.
Pour l'une mon gage donrai.
Et la tierce puist Diex aidier,
Car cele ne sai conseillier ;
Car, se conseillier la povoie,
Certes à envis li faurroie ;
Et, s'ainsi avient k'adrecier
Li puisse, faillir ne li quier.
PageV02P053
Car ambedeus les aideroie,
Se povoir de ce faire avoie."
# |
Et, quant cil orent ce oyt
Que Cléomadès avoit dit,
Folio42r
Sachiez que moult lor fu plaisans
Cele parole, et bien séans.
Cléomadès en mercierent.
Moult plus que devant le prisierent.
Sartans si grant joie en avoit,
Que il de joie en Iarmioit.
Et Cléomadès dit lor a
Que le matin mouvoir vorra ;
Car bon feroit tempre venir
À Chastel Noble, pour oyr
Comment les besoignes iroient
Et, selonc ce, se maintenroient.
# |
Cléomadès ot enpensé
En son cuer, et en volenté,
Que les puceles deffendroit
Ou il la vie i laisseroit.
En son cuer Dieu moult engracie
Qu'il en a la nouvele oye
Et k'à tans venir i porra :
C'est tous li bons confors qu'il a.
# |
Durbans dist que il mouveroit
Si matin que il li plairoit,
Et dist que il a grant desir
De faire dou tout son plaisir.
À son povoir, entirement,
Veut faire son commandement.
Mouvoir veut ains l'aube esclarcie.
Et Cléomadès l'en mercie.
PageV02P054
Durbans son non li demanda,
Et il tout ainsi se nomma
Que à sa femme s'ert nommez.
Si com devant oy avez,
"Et de quel pays estes vous,"
Dist Durbans, "biaus chiers sires dous?"
Et il li dist : "De France sui :
Mais j'ai eü I pou d'anui,
Par quoi je n'i os converser."
"Diex vous vueille d'anui garder!"
Fait Durbans, "car je le vorroie:
Et, se je riens faire povoie
Qui vous peüst esleecier,
Ne m'en feroie pas priier."
"Sire, la vostre grant merci,
Quant il vous plaist à dire ainsi,"
Fait Cléomadès. Lors se sont
Levé, quant assez parlé ont.
À Dieu commanderent Sartant.
De là se sont parti à tant.
# |
Durbans Cléomadès enmaine
En sa chambre, et forment se paine
De lui servir et honnorer.
Il ne couvient pas demander
Se, cele nuit, fu festiiez
Et honnorez et aaisiez
Cléomadès ; car de servir
Lui, avoit chascuns grant desir.
# |
Tost fu la nouvele seüe
Par le chastel, et espandue,
Que lor sires se combatroit
Pour Sartan qui bleciez estoit,
PageV02P055
Et que cil qui s'ert combatus
À leur seigneur, s'ert embatus
Avoec lui en sa conpaignie
Pour les puceles faire aye.
S'en fu moult loez durement
Cléomadès de mainte gent.
N'i a daine qui ne l'en prise ;
Car fait a moult courtoise enprise
Et très gracieuse et plaisans.
Dieu prient qu'il li soit aidans,
Et li doinst, et là et aillours,
Honnour et grant joie à tous jours.
# |
La chose vous acourcerai
Et briement la deviserai.
Après souper tost se leverent.
Quant poins en fu, couchier alerent
De Cléomadès ont pensé
Si qu'il n'i ont riens oublié.
Après ce qu'il se fu couchiez,
Durbans, qui moult sot, ce sachiez,
De ce c'on doit laissier et faire.
Devisa si tout son afaire,
Que, pour mouvoir si temprement.
Que il ne faille de couvent.
Trestoute l'armeüre prist
Cléomadès, et si la fist
Metre en ses coffres bien et bel.
Un palefroi amblant morel
Fist pourveöir, et commandé
A c'on l'amaint tout, arréé
Le chevalier, à son lever,
Si tost qu'il iert poins de monter,
Et cil le firent tout ainsi,
Ne le mirent pas en oubli.
PageV02P056
Si le fist Durbans pourveöir
De tout, qu'il ne tint k'au mouvoir.
Tout son afaire apareillier
Fist, ains qu'il se vousist couchier.
Lors se coucha, quant poins en fu,
Quant son afaire ot pourveü.
# |
Lendemain matin, se leva
Durbans, et à Sartan ala
Prendre congié. Lors s'en parti.
Mais près que li cuers ne parti
Sartan, quant il l'en vit aler.
À paines pot il tant parler
Qu'il l'eüst à Dieu commandé :
Si avoit le cuer abosmé.
# |
Quant Durbans fu de là sevrez.
Jà ert Cléomadès montez.
Moult avoit priié I serjant
Que il li saluast Sartant
Et les dames, quant les verroit :
Et cil dist k'ainsi le feroit.
# |
Apresté de mouvoir estoient
Tout cil qui aler s'en devoient.
Le cheval Cléomadès orent
Apareillié au miex qu'il porent.
En destre le font amener ;
Soigneusement le font garder.
Cléomadès moult mercia
Durban k'ainsi arréé l'a,
Et Durbans à point l'en respont.
# |
De là endroit parti se sont.
Tant ont esploitié et erré
Que en Toscane sont entré.
PageV02P057
À Chastel Noble vinrent droit.
Li rois Carmans lors i estoit.
Le quart jour après ce qu'il murent,
À Chastel Noble venu furent.
En la vile, sous le chastel,
Prirent ostel et bon et bel.
Folio42v
La gent Durbant plus honnoroient
Cléomadès, qu'il ne faisoient
Lor droit seignour ; car commandé
Lor avoit Durbans et rouvé.
Et il durement s'en penoient ;
Car de jour en jour plus l'amoient ;
Car tant estoit courtois et dous,
Qu'il se faisoit amer à tous.
# |
Del ostel où il trait s'estoient
Trestout à plain veöir povoient
Le chastel et la maistre tour ;
Povoient veöir tout entour ;
Car la vile plus haut séoit
Un petitet, que ne faisoit
Li chastiaus, ç'ai oy conter.
# |
Cléomadès, sans arrester,
S'en ala vers une fenestre :
Le chastel regarda et l'estre
Où autre fois avoit esté.
Lors a de parfont souzpiré.
# |
"Hé ! las !" fait il, "ne voi je là
Le lieu où cele m'otria
S'amour, où tant avoit biauté
Et de tous biens si grant plenté
Qu'il n'en i peüst plus avoir ?
Hé ! las ! comment puis je veöir
Le lieu là où je conquestai
PageV02P058
Si grant chose, quant perdu l'ai
Par niceté et par folie ?
Hé ! las ! comment sui je en vie !
Que ne morui je celui jour
Que je perdi si haute honnour ?
Grant merveille ai comment ne fent
Mes cuers d'anui et de torment.
Je croi que nus ne muert d'anui,
Puiscedi que je mors n'en sui ;
Car, se nus morir en peüst,
Pieça que mes cuers partis fust,
Car onques cuers tant d'anui n'ot
Comme li miens n'avoir ne pot."
# |
Ainsi iluec se gaimentoit
Cléomadès, et regretoit
Clarmondine piteusement.
De parfont souzpiroit souvent.
Et Pinchonnès, li menestrés,
Est à ce point vers lui alés.
À la fenestre vint tout droit
Où Cléomadès s'apuioit.
Et lors Pinchonnès le regarde,
Qui tantost se donna bien garde
Que de cuer estoit tormentez
"Ha ! dous sire," fait il, "k'avez ?
Vous ne samblez pas en bon point."
Cléomadès I tout seul point
Ne li respont. Lors s'en torna,
À son seigneur dire l'ala.
# |
Lors i est Durbans acorus,
À lui est maintenant venus.
Doucement le reconforta.
Bien voit que meschief de cuer a,
PageV02P059
Mais ne volt pas enquerre à lui
Pour quoi il avoit cel anui ;
Car ne sot s'il li desplairoit
Se de ce enquerre vouloit
Dont ses anuis li naist et muet.
Pour ce enquerre ne li vuet,
Ains l'a entre ses II bras pris :
"Séés vous," fait il, "dous amis :
Laissiez nous I pou reposer."
Cléomadès à regarder
Le prist, I pou se hontoia
Que en si fait point trouvé l'a.
# |
Moult se blasme de cuer et het
Que son meschief couvrir ne set.
"Durbant," fait il, "de mal n'ai point ;
Mais une goute au cuer me point
À la fois qui moult me destraint.
Durement me palist et taint
La goute, quant ele me prent.
Si me prent ele plus souvent
Assez que mestier ne me soit ;
Et, se il ne vous desplaisoit,
Un don vous vorroie rouver.
Sachiez n'ai povoir de durer
En lieu où la goute me praingne.
Sauvage et diverse et estraingne
Est la goute, plus que ne di ;
Et, pour ce, par amours vous pri
Que vous de ci me remuez
Et en autre lieu me menez ;
Car de ma goute ne porroie
Garir, se je ci remanoie."
# |
Et Durbans dist moult volentiers
PageV02P060
Le fera, puisqu'il est mestiers,
Et k'à I chastel le menroit
Qui assez près de là séoit
Et avoit à non Verde Coste.
"Là trouverons," fait il, "bon oste :
Car c'est li pères Lyadès."
Ce plot moult à Cléomadès.
# |
Dist Durbans : "Je et vous irons
El chastel. Au roi mousterrons
Pourquoi nous sommes venu ci."
Dist Cléomadès : "Je vous pri,
S'il vous plaist, qu'i ailliez sans moi,
Et je dou tout à ce m'otroi
Que vous i vorrez arréer."
"Je ne vous puis plus demander."
Dist Durbans, "et je le ferai,
Et reposer vous laisserai."
# |
Durbans sa gent commande et prie
Que il li tiengnent conpaignie
Et que seul ne le laissent pas.
Lors s'en parti isnel le pas.
De sa gent avoec lui mena
Tant com li plot, et vint droit là
Où estoit li bons rois Carmans.
Qui aine puis ne fu fors dolans
Qu'il ot perdue Clarmondine.
Adès en son cuer enracine
Li anuis que pour li avoit.
Quant li rois Carmans venir voit
Durbant, contre lui s'est levés,
Pour ce que Durbans estoit tés
Et de prouece et de valour,
C'on li devoit bien faire honnour.
PageV02P061
Durbans a le roi salué
Et, après ce, li a moustré
Pour quoi il estoit esmeüs
De son pays, et là venus.
Dist li que loial essoigne a
Sartans, ne venir ne porra
Folio43r
Au jour que combatre se doit ;
Et, pour ce, là venus estoit
Que pour lui feroit la bataille :
N'est drois k'amis au besoing faille.
"Loial essoigne a vraiement,
Près sui k'en face serement
Si avant que faire le doi."
# |
Et dist li rois : "Bien vous en croi
Sans serement, et bien le vueill.
Mais dou mal Sartan moult me dueill ;
De son mal et de son meschief
Sachiez me seroit mal et grief."
# |
À ce tans, se essoigne avoit
Cil qui combatre se devoit,
Qui fust de loial ochoison,
De maladie ou de prison,
Mais que l'essoigne fust seüe
Par gent dont par droit fust creüe,
Metre i povoit en lieu de lui
Par droit, en toutes cours, autrui,
Mais k'au seignour dou lieu pleüst :
K'autrement faire nel peüst.
Tele ert la coustume à ce tans.
# |
"Sire rois," ce a dit Durbans,
PageV02P062
"La nostre aversaire partie
Faites mander, je vous en prie :
Car venus est, si com j'entent,
Bleopatris, il et sa gent.
Un chevalier ai amené
Qui dist que il a volenté
Des III puceles aaidier
L'une ; veut s'onnour desrainier
Et deffendre, ou il i morra.
De ce ne sai k'en avenra."
# |
Et li rois tantost i envoie,
Et cil vinrent, qui moult grant joie
Orent, quant il la nouvele oient
Pour quoi à court mandé estoient ;
Car des trois tous li mains cuidans
Cuidoit bien estre si poissans
Que nus hom ne peüst durer
Vers lui, ne ses coups endurer.
# |
Devant le roi Carmant s'en vinrent.
Salué l'ont, et lors se tinrent
Tout quoi, pour savoir qu'il diroit.
Bleopatris avoec estoit
K'ainc puis ne parti dou pays
Que il ot cel afaire empris,
Et si troi chevalier avoient
Tous troi voué k'arses seroient
Les puceles, ou enfouies,
Ou il i lairoient les vies.
# |
Lors parla li rois pour Durbant.
"Gadot," fait il, "venez avant.
Sartans combatre se devoit
À vous, mais ne puet orendroit.
PageV02P063
De loial essoigne li muet
Par quoi relaissier l'en estuet  ;
Et je l'en vueill bien deporter,
Puisqu'il ne le puet amender.
Vez ci Durban, qui prouvera,
Pour Sartan, qu'en Lyadès n'a
Coupes en ce c'on li mot seure ;
Et de ce là veut il reskeurre
Encontre vous, se vous voulez."
# |
Dist Gados : "Ce est bien mes grez.
J'aim autant la bataille à lui
K'à Sartan, je n'ai cure à cui.
Mais que je fusse ou champ entrés,
Livrez me cui que vous vorrés,
Sachiez que je nul n'en refus,
Se il n'a II testes ou plus."
Et li rois dist que bien li plaist :
Et, Gados, à ce mot, se taist.
# |
Dist Durbans : "Sire, or m'entendez.
Encor ne s'est nus presentez
Pour les autres II damoiseles ;
Or, puet chascuns veöir que eles
Ont pou d'amis, k'anc au besoing
N'en truevent nul, ne près ne loing.
Un chevalier amené ai
À cui l'autre jour m'acointai.
De ce ot la nouvele oïe
Que mestier avoient d'aye
Les II puceles que je di,
Et pour ce est venus ici.
S'en a tel pitié à son cuer
Que il dit bien que à nul fuer
Ne lairoit qu'il ne les aidast
PageV02P064
À son povoir, et confortast,
Et que il l'une deffendroit
Et que pour li se combatroit.
Mon gage pour lui vous present."
Et, quant Bleopatris l'entent,
À Rodruart Qui-ainc-ne-rist
Le rouva prendre, et cil le fist.
# |
Fait fu ce qu'il i apartint
Tant com adont. Et lors revint
Durbans à son ostel errant.
Cléomadès trouva pensant.
Or vous dirai en quel pensé
Cléomadès avoit esté.
Bien vit que, se Durbans estoit
Conquis, que Lyadès seroit,
Arse : ce ne porroit faillir ;
Et s'on ne li devoit tenir
Et à outrage et à bobant,
La bataille en lieu de Durbant
Durement à avoir amast,
N'il ne revoit c'on n'en blamast
Durbant, se à ce s'otrioit ;
Et lui, qui ce requis aroit,
On li atorroit à folage
Et à orgueill et à outrage.
Ainsi seroit chascuns blasmez.
# |
Pour ce s'est d'un point avisez,
Que entre aus II, à une fois,
Pour les puceles toutes trois
Combatront as trois chevaliers,
N'il ne reveöit où li tiers
Fust pris pour la tierce à deffendre ;
C'est le miex qu'il i puet entendre
PageV02P065
Pour les damoiseles aidier
Qui bien ont d'aïde mestier.
Ne set se s'i assentira
Durbans ; mais il l'en requerra.
Venir le voit moult liement,
Contre lui se liève erranment.
# |
Dist Durbans : "La bataille avez ;
De ce soiez asseürez.
Or n'i a mais que dou bien faire ;
Car ce sont gent de grant afaire
Folio43v
À cui combatre nous devons,
Biau sire, et nous i penserons,
Se Dieu plaist, en lieu et en tans,
Qui nous soit, vous et moi, aidans."
# |
Lors l'a mené à une part
Cléomadès. Moult li est tart
Que dit li eüst et conté
Ce que il avoit enpensé.
Moult courtoisement, mot à mot,
Li dist ce que il pensé ot
Entrues k'à la court ot esté.
Et, quant Durbans l'ot escouté,
En son cuer forment l'en prisa.
Mais la bataille ressoigna,
Et ce n'estoit pas grant merveille ;
Car ce n'est pas chose pareille
De II à trois, mais moult hideuse
À enprendre, et moult perilleuse.
# |
Nepourquant, se morir cuidoit,
Pensa que il ne l'en faurroit
Que conpaignie ne l'en tiengne.
"Sire," fait il, "koi qu'en aviengne,
Ne vous faurrai de conpaignie,
PageV02P066
Se metre i devoie la vie.
Mais sachiez bien certainement,
Et ne m'en mescréez nient,
Que, se je ne vous conneüsse,
Et que je esprouvé n'eüsse
Le grant povoir que vous avez,
Pour riens ne m'i fusse acordez.
J'el ferai, soit sens ou folour,
Tant me fi en vostre valour."
# |
Et quant Cléomadès entent
K'en lui se fie si forment,
Bien pense qu'il l'en souvenroit,
Se mestiers fust et il povoit.
Moult durement le mercia
De ce que il li otria
Ce dont il li avoit priié.
Lors n'a Durbans plus detriié.
Au roi s'en veut errant aler
Pour cele besoigne arréer.
Et Cléomadès au partir
Li pria de tost revenir.
Et il dist k'errant revenra.
En la court vint et retrouva
Toute la gent Bleopatris
K'encor ne s'en ert nus partis.
# |
Devant le roi s'en vint ester.
Moult très bel li prist à moustrer :
"Sire," fait il, "pitiez seroit
Qui ces puceles destruiroit.
Pour Lyadès combatre doi,
Et li chevaliers k'ai o moi
Veut enprendre, ce dist, tous seus
Bataille pour les autres II,
En maniere que vous dirons.
PageV02P067
Tout V enz ou champ entrerons,
Puis s'en ait qui avoir en puet.
La bataille ainsi avoir vuet
Mes conpains, et j'el vueill aussi."
Lors dist li rois : "Et je l'otri,
Se il plaist à l'autre partie."
"Sire, ce ne refus je mie,"
Dist Bleopatris, "ains le gré."
D'ambes pars se sont acordé.
# |
"Sire, n'el tenez à outrage,"
Dist Durbans, "se cest avantage
Lor faisons ; car droite pitiez
L'a fait enprendre, ce sachiez.
Au chevalier k'ai amené,
Si me doinst Diex joie et santé,
Pour ce qu'il ne véoit enprendre
Nului aaidier à deffendre
La tierce pucele s'onnour ;
Au cuer l'en prist si grant tenrour,
Que pour ce a fait cele emprise."
Et li rois dist que moult l'en prise.
"Et vous n'en doit on pas blasmer,"
Fait li rois, "mais tous jours amer
Et honnorer vous et vostre hoir,
Ch'ose je bien dire pour voir,
À tous jours mais, jusqu'à M. ans"
Lors se leva li rois Carmans ;
Et chascuns de là se depart,
Et la nouvele tost s'espart
En quel maniere ert arréée
Cele bataille, et créantée.
PageV02P068
Li un le tienent à folage,
Et li autre à grant vasselage,
Et li tiers à grant hardement :
Chascuns en disoit son talent.
# |
Durbans à son ostel revint.
Sachiez que très bien li souvint
K'à Cléomadès desplaisoit
La demorée là endroit.
À Cléomadès tout conta,
Comment la chose arréé a ;
Et, quant Cléomadès l'oy,
Lors le tesmoigne à fin hardi
Ses cuers qui bien s'i connoissoit.
Durbans jà envoié avoit
À Verde Coste grant pieça.
Lors se parti Durbans de là.
Regardé furent durement
De toutes pars de mainte gent.
# |
De Chastel Noble sont parti
Entre vespres et miedi.
À Verde Coste sont venu.
Liement furent receü,
Et aaisié et honnoré.
Là endroit ont tant demoré
Que li jours vint qu'estre devoit
La bataille k'emprise estoit.
À son lignage ot fait savoir
Durbans que il devoit avoir
La bataille en lieu de Sartant,
Et que cil qui l'amoient tant
Fussent là droit à celui jour
S'il amoient lui et s'onnour.
# |
Li rois Carmans fist faire I parc
PageV02P069
Qui duroit près le trait d'un arc
De lonc, mais n'estoit pas si lés.
Moult fu li pars bien atornés
De grans mairiens fors et tenans,
# |
Cléomadès, il et Durbans,
À Verde Coste s'arréerent
Dedenz le chastel, et armerent.
Quant armé furent, monté sont.
De là se partent. Lors s'en vont
Au lieu où combatre devoient.
Quant il i vindrent, jà estoient
Folio44r
Lor aversaire ou parc entré
Et de la bataille apresté.
Et les III puceles venues,
Qui estoient jà desvestues.
En leur cotes erent sans plus :
Tout le sorplus orent mis jus.
Leur II champions venir voient.
À jointes mains à Dieu prioient,
À genous, moult piteusement,
Qu'il les ayt si vraiement
Que enz ou mesfait coupes n'ont
De quoi ochoisonnées sont,
N'aine vers Clarmondine nul jour
Ne pourchacierent fors honnour,
Ne à li ne au roi son pere,
N'à Clarmonde, sa bonne mere,
Et lor avantage vousissent
Autant comme le lor feïssent.
# |
En un anglet dou parc estoient
Les puceles, où les gardoient
Cil qui les devoient garder.
N'i avoit que d'el alumer
Le feu ; car trestout prest estoit
PageV02P070
Kan que pour le feu couvenoit.
Estrain et espines et fu,
Tout prest et apareillié fu.
# |
Li doi conpaignon sont entré
Ou parc, et à Dieu commandé
Se sont ambedoi sagement.
Moult les esgardoient la gent
De toutes pars, et si disoient
Que onques mais veü n'avoient
Nul chevalier si bien séant
En armes, ne si avenant
Com li conpains Durbans estoit.
Li rois meïsmes tesmoignoit
C'onques mais chevalier armé
Ne vit miex séant à son gré,
Ne miex samblast d'armes maniers.
Moult fu regardez li destriers
Et prisiez sor quoi il séoit.
# |
Devant le roi s'en vinrent droit.
En tel point pour offert se sont
Com il estoit coustume adont.
Lors fist on les seremens faire
Et toute gent arriere traire.
Quant fait furent li serement,
Li bans fu criés erranment
Que il nus si hardis ne fust
Qu'il parlast ne qu'il se meüst
De chose k'avenir veïst,
Ne qui main ne pié i meïst
Pour grever l'un, ne l'autre aidier.
À ce mot se trairent arrier
De tous lez et de toutes pars.
Vuis et descombrez fu li pars,
Fors de ceus qui s'entremetoient
PageV02P071
Dou champ garder : cil i estoient.
Cléomadès et Durbans furent
Au lez là où il estre durent,
Ainsi com il ert establi ;
Et li autre estoient aussi
Au lez là où estre devoient.
# |
Les armes que li troi portoient
Ne vous ai encor pas nommées.
Tost vous les arai devisées.
Rodruars portoit l'escu d'or
Et ot en milieu I butor
Plus vert que n'est herbe de pré,
À nature fait et ouvré.
Bruns li Hardis I escu porte
Vermeill, à une blanche porte.
Gados portoit l'escu d'ermine
À une vermeille geline,
À un ourle de witecos.
Teles armes portoit Gados,
Et li witecoc erent noir.
# |
Or sachiez bien trestout de voir
Que noblement erent monté
PageV02P072
Li troi chevalier, et armé.
Brachieres avoient samblans
Tout troi, riches et bien séans.
Et hiaumes d'un samblant aussi
Paint des armes Bleopatri,
Qui erent d'or à trois corneilles
Noires ; s'orent testes vermeilles
Les corneilles, ç'ai entendu.
Et s'estoient lor hiaume agu.
# |
Lors fu à chascun commandé,
Si tost c'om lor ot demandé
Se il lor droitures avoient
Et quan que il avoir devoient,
Que il feïssent lor devoir.
Lors veïssiez chascun mouvoir
Le pas sor frain, si noblement
Et si très apenséement,
Que c'ert bele chose à veöir,
Ce puet on bien dire pour voir.
# |
Hiaumes laciez, lances sor fautre,
Venoient li uns contre l'autre,
Com gent duite de tel mestier ;
Et, quant ce vint à l'aprochier,
Lors ferirent des esperons.
Fiers et aigres comme lions
Estoit d'aus tous li mains hardis,
Et plus que je ne vous devis.
S'avint ainsi k'à l'assambler
Convint à la terre verser
Durban ; car li doi s'adrecierent
Vers lui, en l'escu l'aderchierent
Si qu'il li ont frait et troé.
PageV02P073
Mais le hauberc qu'ot endossé
N'ont ne desmaillié ne rompu.
Et Durbans a si referu
L'un d'aus, qu'il le porta aval
Parmi la crupe dou cheval ;
À la terre tout estendu
Moult roidement l'a abatu.
De ces trois li doi encheïrent.
# |
Quant les trois damoiseles virent
Durbant cheü, tel duel en ont
Que les II pasmées s'en sont ;
Car en Durban plus se fioient
K'en l'autre, car n'el connoissoient.
Et la tierce n'avoit pas mains
De duel ; souvent joignoit ses mains
Vers Dieu, et merci li prioit.
# |
Cléomadès, en cel point droit,
Il et Gados s'entr'encontrerent
Si dur, que leur lances froerent
Folio44v
Et volerent en mains tronçons.
Outre plus joins que nus faucons
S'enpasserent ; plus ne forfirent,
Li uns sor l'autre ne conquirent,
À cel coup atant s'enpasserent.
# |
Gados et Rodruars tornerent
Les chevaus vers Cléomadès ;
Jà le vorront veöir de près.
Chascuns d'aus a traite l'espée
Qui ert trenchans et acerée,
Et Cléomadès a sachie
Sa bonne espée Ressoignie
Dont maint grant coup avoit donné.
Son cheval avoit recouvré
PageV02P074
Bruns li Hardis, montez estoit.
Durbans aussi li sien r'avoit.
Ambedoi remonté estoient.
Lor chevaus recouvrez avoient..
Comme vassal amanevit,
Quant Cléomadès venir vit
Vers lui Gadot et Rodruart,
Au plus droit qu'il pot cele part
S'adreça, l'espée en poignie,
Rodruart fiert si lés l'oïe
Que son hiaume li descercla
Et desrompi et depeça.
Tout enporta kan qu'il ataint.
À celui coup pas ne se faint.
Seur l'escu li coups descendi,
Tout le decoupa et fendi.
El braz telement le navra,
Que onques puis ne s'en aida.
Tout li defroissa et rompi
Le bras, et l'escu li cheï;
Car la guige coupée estoit
À quoi l'escu pendre devoit.
Cil coups forment abaubir fist
Rodruart Qui-onques-ne-rist.
On puet bien par verité dire
K'adont n'ot il talent de rire,
PageV02P075
Puisque il n'avoit onques ris.
# |
Gados sor l'escu avernis
A Cléomadès si feru
Qu'il li a coupé et fendu,
Et le haubert li desmailla ;
Mais l'espée au poing li torna,
Par quoi il ne l'a pas navré.
Et Cléomadès a levé
Le brant, s'en feri Gadot si
Que jusques ès dens le fendi.
Lors cheï en la place errant.
# |
Bruns li Hardis avoit Durbant
Son cheval desouz lui ocis
Et l'avoit navré et mal mis ;
Moult de sanc jà perdu avoit.
Et, quant Cléomadès perçoit
Que Durbans estoit en tel point,
Des esperons le cheval point.
Bruns li Hardis le voit venir ;
Bien voit qu'il li couvient guerpir
Durbant, et torner à celui.
Sachiez k'au cuer ot grant anui
Quant vit Gadot el champ gesir
Et Rodruart tout quoi tenir.
Bien voit que en tel point estoient
Que il aidier ne se povoient.
# |
Et Cléomadès lors li vint.
Le brant haucié en son poing tint.
Et Bruns li Hardis retorna
Vers lui, et le cheval brocha.
Fierement se sont encontré.
Des brans se sont tés coups donné,
Que de lor hiaumes feu sailli.
PageV02P076
S'avint en cele encontre ainsi,
Que si radement s'encontrerent
Des chevaus, k'à terre volerent
Cheval et chevalier ensamble ;
Mais navrez fu, si com moi samble,
Bruns li Hardis si en l'espaule
Que la chiere l'en devint pale.
Et à ce avoit bien raison ;
Car sans li issoit à foison
Par la plaie, qui moult fu grans,
Car moult estoit li brans trenchans
Dont le coup avoit reçeü,
Et cil fors qui l'avoit feru ;
Car de cel coup meïsme là
Que Cléomadès li donna,
Couvint à terre trebuchier
Dou hiaume Brun plus d'un quartier.
# |
Or ne vous ai pas devisé
Le coup que Bruns avoit donné
Cléomadàs à cele fois.
Non pourquant l'atainst Bruns ainçois
Que Cléomadès lui ne fist,
Ainsi que l'estoire le dist.
Dou bran si grant coup li donna.
Que son hiaume li descercla,
Et enbarra et derrompi.
Seur l'escu li coups descendi.
L'escu durement empira,
Car jusqu'en milieu le coupa.
Mais li haubers qu'il ot vesti
D'estre bleciez le garanti ;
Li haubers le coup arresta,
Si que en char ne le navra.
Ainsi avint que vous oez.
Cléomadès fu relevez ;
PageV02P077
Car, si tost que il fu cheüs,
Ses chevaus se releva sus
À tout lui trestout erranment,
Moult tost et moult très asprement,
Car moult ert li chevaus poissans.
# |
Bruns li Hardis ert desirans
De relever, mais ne povoit ;
Car ses chevaus sor lui gisoit.
Sa jambe ne povoit r'avoir.
Ne lui ne son cheval mouvoir.
Li chevaus ne il ne levast
Jamais, se on ne leur aidast.
# |
À Cléomadès fu moult grief
Quant il vit à si grant meschief
Chevalier de tel poësté,
Et si hardi et si osé,
Com il avoit trouvé celui.
Moult grant pitié avoit de lui.
Sachiez que aidié li eüst
Moult volentiers, se il deüst.
Mais nus ne doit son anemi
Aidier, ne grever son ami ;
Car li homs qui son ami grieve
Et qui son anemi alieve
Folio45r
Est fouls, ou il tel conseil croit
Qui l'engingne et qui le deçoit.
Pour ce, se doit chascuns garder
De son anemi alever
Et de son ami abaissier,
Et c'on n'el puist forconseillier ;
Car, par fol conseil, a on fait,
Par maintes fois, maint vilain trait.
PageV02P078
Rodruars, qui ert afolez
Dou bras senestre, estoit alez
Vers Durbant, et l'ot abatu,
Car de sanc avoit moult perdu ;
Dou pis dou cheval l'ot hurté,
Si que à terre l'ot porté.
Durbans tant de sanc perdu ot,
Que de lui aidier povoir n'ot ;
Et Rodruars, qui le vouloit
Ocire, descendus estoit ;
À Durban ot le pan levé
Dou hauberc, et l'eüst tué,
Quant Cléomadès le choisi,
Qui tost cele part se guenchi
Si tost que il ot perceü
Le mesehief à quoi Durbans fu.
# |
Vers Rodruart vint tost et droit
Le brant entesé. Quant le voit,
Rodruars moult grant paour ot.
Au plus tost que il onques pot
Son cheval encontre lui mist.
Dou cheval targe et escu fist ;
Mais, ainc ne se sot si targier
Que Cléomadès, sans targier,
Ne li donnast II coups de route
Tels que sa broigne en fu derroute
Et ses hiaumes tous depeciez,
Et il si malement bleciez
De ces II coups qu'il li donna,
C'onques puiscedi ne menja.
# |
À la terre chei errant,
Et la cervele li espant
Seur la terre, quant cheüs fu,
Assez tost après ce, moru.
PageV02P079
Et Cléomadès retourna
Vers Durbant. Séant le trouva ;
Car tant de sanc perdu avoit
Que soustenir ne se povoit.
Acoutez s'ert sor son escu.
En sa main tenoit son brant nu.
Bien sambloit traveilliez et vains.
"Comment vous est, biaus dous conpains,"
Fait Cléomadès, "dites moi ?"
"Sire," fait il, "bien, quant vous voi,
La merci Dieu, en si fait point.
Maintes fois m'est venue à point
Au jour d'ui, et ci et aillours,
Vostre prouece et vo valours.
S'à moi n'eüssiez garde pris,
Ne fusse pas eschapez vis.
Par vous sui de mort respitez.
La bataille seuls faite avez.
Par vous sonmes nous retenu
Et nostre aversaire vaincu."
# |
Dist Cléomadès : "Dieu l'a fait,
Ce sachiez vous, tout entresait
Pour la raison que tort avoient
Cil qui à nous se combatoient ;
Et, pour ce, nous a Diex aidié
Que le droit avons desrainié."
# |
Les trois puceles moult looient
Dieu de ce que eles véoient
Leur aversaires au bas mis 
Et par samblance desconfis.
# |
Cléomadès garde. Si voit
Brun le Hardi qui se penoit
Moult durement de relever ;
PageV02P080
Mais ne povoit nul tour trouver
Que sa jambe peüst r'avoir
Ne son cheval faire mouvoir.
Cléomadès vers lui torna.
De son meschief grant pitié a.
Lors li demanda s'entremetre
Se vorroit que en merci metre
Se vousist vers le roi Carmant.
Et Bruns li Hardis dist errant
Que, puis k'aidier ne se povoit,
Ke en sa merci se metroit,
Se il plaisoit au roi ainsi
Qu'il le vousist prendre à merci.
# |
Cléomadès lors acena
Les gardes qui estoient là,
Qui mis pour garder i estoient
Le champ. Et, quant les gardes oient
Que Bruns li Hardis requeroit
Merci, au roi en vinrent droit
Et li dirent tout ensement.
Et li rois à merci le prent ;
Car bien voit, c'est chose passée,
Que cele bataille est outrée.
# |
Loer oyssiez et prisier
De toutes pars le chevalier
Que Durbans avoit amené ;
Car par lui estoient outré
Li troi chevalier et conquis.
Ainc chevalier de si grant pris
N'orent ne près ne loing veü.
À Cléomadès sont venu
Les gardes, et li font savoir
Que il a bien fait son devoir ;
Aler s'en puet, quant lui plaira.
PageV02P081
Cléomadès Dieu en loa.
# |
Là erent venu à Durbant
De son lignage li plus grant.
Deseur son escu l'ont couchié,
Et il lor a pour Dieu priié
Que son conpaignon amenassent
À lui, et que il se penassent
De lui servir (car à meilleur
Ne porroient il faire honnour),
Et que cil qui tant l'ameroient
De lui servir se peneroient.
"Par lui sui de mort eschapez,"
Fait il, "et bien veü l'avez."
# |
Cléomadès par le frain prirent.
De toutes pars la main i mirent.
À Durbant l'amainent tout droit ;
Car, sans lui, mouvoir ne vouloit.
Quant venus fu, lors s'en tornerent.
Sor son escu en reporterent
Durbant, et parent et ami
Liement sont dou champ parti.
# |
Et quant les trois puceles voient
Venir celui par cui estoient
Fors de si grant perill ostées
Que d'estre arses ou lapidées,
À genoillons l'en mercierent,
En larmiant à Dieu prierent
Que Diex de tous maus le deffende
Et que le guerredon l'en rende
De ce qu'il les a delivrées
Et de vilain blasme getées.
S'entour lui tel presse n'eüst,
N'i eüst nule qui ne fust
PageV02P082
Venue à lui pour embracier
Sa jambe, pour son pié baisier ;
Mais tant de gent entour lui voient
Que vers lui aprochier n'osoient.
Des iex et dou cuer convoiié
L'ont, et souvent pour lui priié.
# |
Durbans devant portez estoit.
Cléomadès après aloit.
Par le frain son cheval tenoient
Cil qui Durbant apartenoient.
Ainsi sont fors dou champ issu.
La gent le roi erent venu
À Brun li Hardi. Levé l'orent
Et aidié si tost que il porent.
Par de devers le roi l'ont mis,
Et des II chevaliers ocis
Fu fait ainsi com ert usé
Au tans dont je vous ai parlé.
# |
Moult fu dolans Bleopatris
Et de cuer souples et pensis
Que ainsi li fu avenu.
# |
À Verde Coste sont venu
Cléomadès il et Durbans.
Faite lor fu joie si grans
Que on puet dire ne penser.
À Cléomadès desarmer
Mist la main qui metre l'i pot ;
Car l'amour d'aus si conquis ot,
Que chascuns moult grant joie avoit
Qui atouchier à, lui povoit.
De lui servir moult se penoient
Pour la bonté k'en lui savoient.
PageV02P083
Durbant aussi desarmé orent
Au plus doucement que il porent.
Ses plaies adroit atornerent
Et li lierent et benderent,
Ainsi qu'il i apartenoit.
Que vaurroit c'om plus vous diroit ?
# |
Les trois damoiseles delivres
Furent, ce tesmoigne li livres,
Ainsi com vous oy avez.
Aaisiez fu et honnorez
Cléomadès. Raison i ot,
Et on le fist au miex c'on pot.
# |
Gayete et Florete enmenerent
Lor ami, qui moult joiant erent
Que de blasme getées sont
Et que il devers aus les r'ont.
# |
Cele nuit vint à Verde Coste
Lyadès. Lez li, coste à coste,
Vint ses peres, qui liez estoit
De ce que sa fille r'avoit.
De sa mere fu conjoïe.
Souvent acolée et baisie
Fu de li, ce povez savoir ;
Car mais ne la cuidoit veöir.
# |
À sa mere prist à priier
Lyadès, que au chevalier
La maint, qui l'avoit delivrée ;
Et sa mere l'i a menée.
Et quant Lyadès veü l'a,
À ses piez cheöir se laissa.
De joie ne povoit parler.
Sachiez que de li relever
PageV02P084
N'atendi gaires longuement
Cléomadès ; car erranment
L'en releva en es le pas
Moult doucement entre ses bras ;
Car tant ert courtois que nus plus.
De li fu estrains et tenus,
Vousist ou non, moult durement.
Cléomadès doutoit forment
Qu'ele ne le reconneüst.
Ne vorroit pas qu'ele seüst
Que ce fust il, s'estre povoit.
De ce nule garde n'avoit ;
Car li hiaumes et li haubers
Orent tant fait qu'il en ot pers
Le viaire, et tout kamoissié ;
Et l'avoit I petit blecié
Bruns li Hardis cele jornée,
Si c'un pou ot la joe enflée.
# |
D'estre reconneüs n'ot garde.
Sachiez que durement li tarde
Que il n'est de là departis ;
Car bien voit qu'en celui pays
N'a riens de ce qu'il va querant.
Quant Lyadès demoré tant
Ot o lui que bon li sambla,
Congié prist, et lors s'en torna ;
Car ne le volt pas anuier.
Et Cléomadès sans targier
Vint à Durbant là où gisoit.
Quant Durbans Cléomadès voit
Li cuors de joie li hauça ;
Et Cléomadès dit li a
PageV02P085
Que moult très volentiers verroit,
Se on arréer le povoit,
C'on ne feïst Brun le Hardit
Ne vilonnie ne despit ;
Car chevaliers ert si vaillans,
Que ce seroit meschiés trop grans
S'on faisoit nule deshonnour
À chevalier de tel valour.
# |
Quant Durbans l'ot, moult l'en prisa
Et à grant bien l'i atorna ;
Quant de ce li est garde prise,
Moult, li vient de très grant franchise.
Lors dist Durbans que maintenant
Envoieroit au roi Carmant
Pour savoir qu'il en porroit faire.
II chevaliers de bon afaire
I fist Durbans tantost aler,
Qui au roi sorent bien moustrer
Cele besoigne, et sagement,
Et li moustrerent ensement
Que Cléomadès l'avoit dit.
Et quant li rois Carmans l'oyt,
Moult le tint à grant courtoisie ;
Debonairement lor otrie,
Et dist que, se gentis ne fust
Li chevaliers, jà n'en eüst
Folio46r
Priié, et pour l'amour de lui
Ne li fera il nul anui.
Et cil l'en mercient forment.
Arrier revinrent liement ;
Et, quant Cléomadès l'oy,
Sachiez que moult li abeli.
Le roi Carmant moult en prisa,
Et dist k'en lui gentil roi a.
PageV02P080ç6
Ainsi refu Bruns li Hardis
Rendus devers Bleopatris,
El le clama li rois tout quite
Pour la raison que vous ai dite.
Bruns li Hardis moult grant droit ot
Se Cléomadès gré en sot.
Moult en fu prisiez et loez
Cléomadès de tous costez.
Meïsmes li fiex Balçabé,
Bleopatris, l'en a loé,
Et tout cil de sa conpaignie :
Il n'est nus qui grant bien n'en die.
# |
La bataille fu achevée
Si com la vous ai devisée.
Dit vous en ai la verité ;
N'i cuit riens avoir oublié.
Cléomadès à pluseur gent
Demandoit moult couvertement
De la chose que il queroit ;
Mais nouvele n'en aprendoit
Nient plus là qu'il ot fait aillours,
Et s'en enqueroit il tous jours
Partout. À envis le laissast
Aussi que riens ne li touchast.
En demandoit par tous pays ;
Mais aussi en ert aprentis
Que il fu au commencement.
Nepourquant, et il et la gent
Qui avoec lui orent esté,
En orent partout demandé.
# |
À Verde Coste moult lié furent ;
Car par raison estre le durent.
Savoir poez k'au miex qu'il sorent
Li firent d'onnour kan qu'il porent.
PageV02P087
De cuer lie et joiant le virent.
Après souper couchier le firent.
Cele nuit se jut en son lit.
Là il ot moult pou de delit ;
Car en moult grant pensée estoit
En quel maniere miex porroit
De cele nouvele savoir
Qu'il amoit de cuer sans mouvoir.
# |
Lors s'est en son cuer avisez
Que plus n'iroit ainsi armez,
Ne com chevaliers plus n'iroit,
Mais pour marcheänt se tenroit
Une piecelete dou tans.
Car il estoit moult redoutans
D'estre retrouvez de sa gent
Se ainsi aloit longuement ;
Car bien sot qu'il seroit requis
Partout de ceus de son pays,
Et, se en tel point le trouvoient,
Tout tantost le reconnoistroient.
De ce est il certains et fis,
Et ce vorroit il à envis ;
Car il avoit enproposé
Que jamais, yver ne esté,
N'arresteroit jour de sa vie,
S'aroit retrouvée s'amie,
Ou oy nouveles au mains
Dont d'aucune riens fust certains
Ou de sa vie ou de sa mort.
En lui n'avoit aucun confort
Fors que il tous jours la requiere
Une fois avant, l'autre arriere.
En espoir de li retrouver
Vorroit ainsi sa vie user.
Ne jamais jour ne fineroit
PageV02P088
Tant que nouveles en saroit.
# |
Enpensé ot Cléomadés
Que li menestrés Pinchonnès,
Dont devant parlé vous avoie,
Iroit o lui en cele voie,
Et k'à Durbant en parleroit
Si tost com il levez seroit.
En ce proposement se tint
Cléomadès. Lendemain, vint
À Durbant là où se gisoit,
Et li dist k'aler s'en vouloit ;
Car, selonc ce qu'il a à faire,
Li sont moult li sejour contraire.
# |
Lors commença à lermoiier
Durbans, et li prist à priier
Pour Dieu, que il tant atendist
K'aler avoec lui s'en pouist ;
Car li maistre le confortoient
En ce que tost gari l'aroient,
Et, si tost k'aidier se porra,
Avoec lui partout s'en ira
Là où il le vorra mener.
Cléomadès dist k'arrester
Ne se puet plus, ce est passé ;
Mais il l'en savoit autel gré
Que ce k'avoec lui s'en alast.
Sa conpaignie moult amast ;
Mais aler veut en son afaire.
Car, selonc ce qu'il a à faire
N'a pas povoir de ce atendre :
Aillours le couvenra entendre.
# |
"Une chose vous prieroie,"
Fait Cléomadès, "se j'osoie,
PageV02P089
S'il ne vous devoit anuier."
"Moi ne couvient il pas priier,"
Fait Durbans, "mais commandez moi ;
Car, par la foi que à Dieu doi,
N'est riens, se le me commandez,
Que n'en soit fais tous vos plains grez,
Se je dou faire ai le povoir.
Pour ametre cors et avoir,
Ne riens dont je puisse finer,
II ne vous faut que commander ;
Mais commandez, et je ferai."
"Sire, moult grant gré vous en sai,"
Ce li a dit Cléomadès.
"Je vous requier que Pinchonnès
S'en viengne, par le vostre otroi,
Se il vous plaist, avoecques moi,
Et je le vous renvoierai
À plus tost que onques porrai.
Se la chose achevée avoie
Pour quoi me suis mis à la voie,
Tout tantost vers vous revenroit,
De moi nouveles vous diroit."
# |
Folio46v
Dist Durbans : "Sire, je l'otri :
Mais que ce sera par I si,
Que avoeques vous s'en iront
De ma gent qui vous serviront
Avoeques lui, ou trois ou deus."
Dist Cléomadès : "Trestous seus
M'en irai, se Pinchonnet n'ai.
Nului fors que lui n'enmenrai ;
Car là où je m'en vueil aler,
Ne vueil nului fors lui mener.
De lui moult bien me passerai
Et moult bon gré vous en sarai."
PageV02P090
Dist Durbans : "Sire, vous l'arez.
Or est il moult de moi amez
Plus que devant, sachiez de voir,
Puisque vous le voulez avoir."
Et Cléomadès l'en mercie
Et moult li prie qu'il ne die
À nului que aler s'en doie ;
Et Durbans trestout li otroie
Quan qu'il li plaist à commander.
Cléomadès dist k'arréer
Se veut, et lui metre au chemin,
En toutes fins, à ce matin.
# |
"Ha! sire," ce a dit Durbans,
"Ne sai où vous estes manans ;
Car, certes, se je le savoie,
Bien sai k'encor vous reverroie,
Se Diex en santé me tenoit,
Jà si loing de ci ne seroit.
No sai s'avez terres ne fiez,
Ne sai pas que vous chaciez,
Ne je enquerre ne le quier ;
Mais, se me vueille Diex aidier ;
Se il vous plaist, je vous donrai
La moitié de tout kan que j'ai,
À tous jours, pour vous et vostre hoir,
S'avoec moi voulez remanoir.
Non pas que vous à moi soiez :
Mais je à vous, bien le sachiez,
Vueil estre tout entirement :
Ainsi le vous ai en couvent."
# |
Cléomadès quant oy l'a,
Lors dist que pas ne prendera
Ce don jusques au revenir,
Dont l'en dira il son plaisir
PageV02P091
Ou dou don laissier ou dou prendre.
Dusqu' adont n'i porra entendre.
Le don ne refuse ne prent ;
Mais moult l'en mercie forment.
# |
Et lors a Pinchonnet mandé
Durbans, et li a commandé
Ce que Cléomadès li ot
Requis ; et, quant Pinchonnès l'ot,
Onques de riens ne fu si liez.
Tout tantost s'est agenoilliez
Devant Cléomadès, et dist
Que onques nule riens ne fist
Si liement com ce fera,
Et k'avoeques lui s'en ira
Partout où le vorra mener,
Tant que cors li porra durer.
# |
Dist Cléomadès : "Grans mercis,
Pinchonnet, biaus très douz amis.
Sachiez je le vous merirai,
Se je vif, et povoir en ai ;
De ce soiez asseürez.
Or faites, si vous arréez;
Car aler m'en vueil entresait."
"Tout maintenant, sire, c'est fait,"
Dist Pinchonnès. "Je vois monter ;
Ne tient fors, k'à vous d'el aler."
# |
Que vous iroie je contant,
Ne la besoigne pourloignant ?
Cléomadès tout devisa
À Durbant. Comment s'en ira
Bel et à point moustrer li sot
Au plus couvertement qu'il pot.
Dist li que, selonc son afaire,
PageV02P092
N'a or d'armeüre que faire,
K'en la voie où il veut aler
N'a pas mestier de lui armer,
Et, pour ce, li vorra laissier
Et armeüres et destrier
Dusqu'à tant que il reveura ;
Et ce sera quant il porra,
Non pas si tost com il vorroit.
Durbans entent bien et perçoit
Que il n'a talent d'arrester.
Pour ce ne l'en veut apresser ;
Car volentiers, se il povoit,
Tous jours avoeques lui seroit.
Tout son bon li grée et otroie,
Et de demorer moult li proie
Cel jour ; mais il n'en pot finer.
Que, sans plus, dusqu'après disuer.
# |
Or, sachiez bien trestout de voir
Que Durbans fist bien pourveöir
Cléomadès, ains qu'il meüst,
De ce qu'il sot que mestiers fust,
Et d'or et d'argent en monnoie.
Que vaurroit que plus vous diroie ?
Durbans à Pinchonnet charcha
Ce dont son seigneur chevira.
# |
Cléomadès bien percevoit
Tout ce que Durbans en faisoit.
Nonpourquant moult couvertement
Le faisoit, et moult sagement
Durbans; mais moult ert percevans
Cléomadès, et clervéans,
Mais il couvenir l'en laissoit ;
Car bien à merir li baoit.
PageV02P093
Cléomadès n'a detriié.
Après mengier a pris congié
À Durbant et non à autrui ;
Car ne veut c'on sache de lui
Le point que il se mouveroit,
Car moult durement redoutoit
Que prieres ne l'arrestassent
Contre son gré, et detriassent ;
Car à envis escondissoit
Riens, puisque dame l'en prioit,
Ne damoisele, ne pucele,
Jà ne fust de si grant querele,
Que il ne feïst son povoir 
D'acomplir trestout lor vouloir.
# |
Pour ce, de là partir vorroit
Moult volentiers, se il povoit
Que nus sa voie ne seüst
Ne le point que mouvoir deüist ;
Pour ce s'en vorroit estre alez.
Quant il fu tous pararréés,
Folio47r
Au departir Durbant pria
Qu'il li salut, quant la verra,
Sa femme, que pas ne l'oublie.
"L'onnour et la grant courtoisie
Qu'ele me fist desserviroie,
Ce sache, s'en lieu en venoie.
Et Sartan, et sa femme aussi.
Me saluez, je vous en pri."
# |
En lermoiant respondu a
Durbans que ainsi le fera.
À ce mot de là se depart,
Et Durbans gete cele part
PageV02P094
Ses iex moult très piteusement.
Par pou que li cuers ne li fent
Quant celui de lui partir voit
Qu'il tant par droit amer devoit.
# |
Durbans en lermiant hucha
Pinchonnet, et li commanda
Que il de cuer serve celui
Que il doit amer plus que lui,
Si qu'il se puist de lui loer.
"Sire, de ce n'estuet douter,"
Fait Pinchonnès, "car j'en ferai
Mon povoir, au miex que porrai."
Dist Durbans : "Et je vous créant.
Riche vous ferai et manant
Si tost que serez revenus ;
De ce ne me destourroit nus."
Dist Pinchonnès : "Biaus très douz sire,
Diex par sa pitié le vous mire.
À mon povoir vostre commant
Ferai, et à Dieu vous commant."
# |
À ce mot est de là sevrés
Pinchonnès, et lors est montés.
II et Cléomadès s'en vont
Ensamble, mais samblant ne font
Qu'il voisent fors k'esbaniier
Et aus deduire et soulacier.
Aucuns i ot qui demandoient
À Pinchonnet où il aloient
Entre lui et le chevalier
C'on doit tant amer et prisier;
Et Pinchonnès, qui moult savoit
De ce c'on faire et laissier doit.
Leur dist que tous seus veut aler
Avoeques lui as chans juer.
PageV02P095
"O lui ne veut mener nului
Fors moi, qui ci avoec lui sui."
# |
Tant dirent, que de toute gent
Se partirent si soutilment
Que nus ne sot le couvenant,
Fors que entre aus II et Durbant.
# |
Cele journée chevaucha
Cléomadès, et moult pensa
En quel pays traire porroit.
Mais de nesun costé ne voit
Chose qui le puist conforter.
Ne set quel part il puist torner.
# |
Pinchonnès souvent le getoit
De pensée, quant trop pensoit ;
Car moult estoit li menestrés
Très courtois et très avisés
Et plains de très bonne manière.
Tant vont, et avant et arriere,
K'en I chemin grant et batu
Se sont assez tost embatu.
Cil chemins aloit droit vers Romme.
# |
Mais, ains que vous die la sonme.
Que il lor avint en la voie,
Vous dirai je, se Diex me voie,
Que Durbans fist ne qu'il devint,
Ne comment en santé revint.
Ce vous arai je dit errant.
# |
Quant Cléomadès de Durbant
Se parti, moult li anuia
Ce que ne sot quel part ala,
N'il ne l'en osa demander.
PageV02P096
Ne se set en quoi conforter
De lui, fors tant que il fist prendre
Ses armeüres, et estendre
Les fist trestout entour son lit.
Ce li tornoit à grant delit
Que les armeüres véoit
De celui qui si li avoit
S'onnour et sa vie sauvée.
# |
À ce point est léenz entrée
Lyadès, et sa mere aussi.
II chevaliers vinrent o li.
De par le roi Carmant venoient.
Moult riches joiaus aportoient
Que li rois Carmans envéoit
Celui qui combatus s'estoit
En la conpagnie Durbant.
Car moult avoit ou roi Carmant
Très large roi et honorable
Et de son dit ferm et astable ;
Car ce que de bouche disoit
Chascuns de ce certains estoit
Que ce qu'il avoit en couvent
Seroit tenus certainement.
Seürs, avisez, sans desroi
Fu moult, et ç'afiert bien à roi.
# |
Li rois grans joiaus envéoit
Durbant meïsme. S'avoit droit ;
Car liez fu de la delivrance
Des puceles, car ainc cuidance
PageV02P097
N'ot k'envers lui eüssent fait,
Ne vers sa fille, vilain plait ;
Onques ne les en mescreï.
Li chevalier dont je vous di
En la chambre Durbant entrerent ;
De par le roi li presenterent
Les joiaus qu'il li envoioit,
Et Durbans les joiaus reçoit.
# |
Le roi Carmant moult en mercie ;
Car dou refuser fust folie,
Et encore demain feroit
Qui don de roi refuseroit,
Car n'est pas chose à refuser.
Mais qui à I bon bacheler
Le donne avant, il fait honnour
Et à lui et au prendeöur,
Et celui aussi de cui mains
Li dons issi de premerains.
# |
Ainsi d'onnour en honnour va
Tex dons, ce set on bien pieça ;
Car dons qui est à point donnez
Doit estre prisiez et loez.
Si est il et tous jours sera.
# |
L'uns des chevaliers demanda
Durbant où ses conpains estoit.
"Seignour," dist Durbans, "orendroit
Folio47v
S'en ala à ces chans jouer.
Espoir revenra au souper.
Sachiez, moult m'anuie forment
PageV02P098
Qu'il demeure si longuement.
N'a o lui sergant ne vallet,
Fors seulement que Pinchonnet."
# |
Et cil dient qu'il l'atendront,
Et de là ne se partiront
Tant qu'il aront à lui parlé,
Ainsi c'om lor a commandé.
Car li rois le vorra avoir,
Ce li mande et prie, pour voir.
En sa conpaignie, sans faille,
Ainçois que dou pays s'en aille ;
Quar, se ce ne fust, là laissassent
Les joiaus, et si s'en alassent.
Mais leur message parferont,
Ne de là ne se partiront
Dusqu'à tant que il revenra.
Durbans à ce mot demanda
Le vin, et on l'a aporté.
D'unes et d'autres ont parlé
Là endroit, tant qu'il anuita.
# |
As II chevaliers anuia
Que nule nouvele n'ooient
De celui k'atendu avoient.
Dens lieues en la nuit, ou plus.
Fu ilueques d'aus atendus ;
Et, quant li doi chevalier virent
Que ne venroit pas, Durbant dirent
Que il les joiaus retenist,
Et que la besoigne en feïst
Si com il i apartenoit.
Et Durbans dist qu'il le feroit,
Mais que ce seroit par maniere
Qu'il reporteroient arriere
Le don k'aporté li avoient,
PageV02P099
Ne pas iluec ne le lairoient ;
Car ne set s'il vorra entendre
À ce qu'il vueille le don prendre.
"De ce ne sai pas verité,
Pour ce ne me vient pas en gré
Que li dons devers moi demeure ;
Mais je vous ferai savoir l'eure
Qu'il sera revenus ici."
Et cil l'otrierent ainsi.
# |
Durbans moult courtoisement prie
Chascun d'aus que le roi mercie
De son bien fait et de s'onnour.
Et cil se metent au retour
Et dient k'ainsi le feront.
Au roi Carmant revenu sont
Et li ont tout ainsi contée
La besoigne qu'il l'ont trouvée.
Au roi Carmant en anuia.
# |
Durbans là endroit demora
Longuement, ains qu'il fust garis.
Quant garis fu, en son pays
Revint, où moult fu chier tenus ;
Car ne croi que li haïst nus.
Sa femme avoec lui revenoit,
Lie qu'ele le ramenoit,
K'après son seigneur ert alée.
Dès dont c'on li ot aportée
Nouvele que navrés estoit,
Tantost vint vers son seignor droit ;
Car son seigneur aimoit de cuer.
Perdre n'el vousist à nul fuer,
Et à ce avoit bien raison ;
Car vaillans estoit et preudon.
PageV02P100
À Sartan est Durbans venus
Si tost que il fu descendus.
De par celui l'a salué
En cui manoit toute bonté,
Lui et sa femme la courtoise.
N'i a celui cui moult ne poise
De ce que Durbans ne savoit
Quel part cil alez s'en estoit
Dont tant de bien tout cil disoient
Qui de cele part revenoient.
# |
Durbans à Sartan devisa
La besoigne com ele va.
D'orendroit où Cléomadès
S'en ert aies, et Pinchonnès,
Trestout ainsi que il s'emblerent
De Verde Coste, et s'en alerent,
Li a mot à mot recordé ;
Car ne li avoit pas mandé
Avoec le premier mandement,
Car ne vouloit pas k'à la gent
En feïst nouveles savoir ;
Mais de la bataille le voir
Li avoit mandé grant pieça,
Comment fu ne comment ala.
# |
Sartans moult très grant merveille ot
De la nouvele que il ot
Que cil homs en tel point s'en va,
Ne ne set nus k'enpensé a,
Ne quel chose il veut arréer.
Lors li prist grant talent d'aler
Après lui, se garis estoit ;
Et pense bien qu'il i iroit
PageV02P101
Si tost que porroit chevauchier.
Ce ne lairoit pour nul denier ;
Mais n'estoit pas en point dou faire.
# |
De lui me vorrai ore taire
Et de Durbant, et vous dirai,
Au plus briement que je porrai,
Que à Cléomadès avint.
Le grant chemin de Romme tint
Le jour qu'il parti de Durbant.
Que vous iroie je contant ?
Maint pays, dou lonc et dou lé,
Cerchierent, et mainte cité.
# |
Son seigneur servoit sagement
Pinchonnès, et soigneusement.
Mais durement s'esmerveilloit
Quel chose ses sires chaçoit,
Qui l'une fois le maine à destre
Et à l'autre fois à senestre,
L'une heure arriere, l'autre avant.
Et va tout adès si pensant
K'à paines le puet il geter
Onques nule fois de penser,
Pour nul povoir qu'il peüst faire.
Ce li tornoit à grant contraire ;
Car volentiers geté l'eüst
De trop penser, se il peüst.
# |
Lors pensa qu'il demanderoit
Son seignor pour quoi tant pensoit,
Quoi que avenir l'en deüst ;
Folio48r
Car moult très volentiers seüst
Pour quoi estoit si enpensez.
"Sire," fait il, "se c'ert vo grés,
Se courroucier ne vous cuidoie,
PageV02P102
Volentiers vous demanderoie
Quel chose enproposée avez.
Aussi com marvoiez alez.
Onques ne tenez I chemin,
Ne au vespre ne au matin.
Là où nuis vous prent demorez,
Quelque vile que vous trouvez.
Moult samblez de cuer à meschief,
Et ce m'est moult pesant et grief
Et moult me tome à grant contraire ;
Car, pour riens que je puisse faire,
Ne vous puis metre en autre voie.
Moult volentiers de vous sauroie
I tant sans plus de vostre afaire,
En quel pays vous voulez traire.
Se pieça dit le m'eüssiez,
Je croi k'orendroit i fussiez,
Se ce n'est trop loing malement ;
Car je vous di certainement
Que moult de voie alé avonmes,
Et moult petit esloignié sonmes
Le lieu dont meüns premerains ;
De ce soiez vous bien certains."
# |
Cléomadès entent et ot
Ce que Pinchonnès dit li ot.
Lors pensa que menestrel sont
Une gent qui en maint lieu vont.
Mainte nouvele souvent oient ;
Car plusours gens en maint lieu voient.
Et, pour ce, li vint à talent
C'un petit de son couvenant
Li diroit, pour savoir de lui
S'onques oy parler nului
PageV02P103
De la chose qu'il va querant.
Et lors li a dit tout errant
Que devers Espaigne venoit
Et à Cléomadès estoit,
Et est en une enqueste entrés,
Dont ne quiert estre retornés
Dusqu'à tant que de cele emprise
Ait aucune nouvele aprise ;
Car il l'a ainsi en couvent.
Lors li a dit couvertement
Grant partie de son vouloir.
# |
Dist Pinchonnès : "Sire, pour voir,
Puisque je sai que vous querés
Et que vous enpensé avés,
De ce vous dirai erranment
Le meillour, à mon escient.
Se nouveles savoir voulés
De tous pays, dont me créés
De ce dont avisez me sui.
Mais j'ai au cuer ire et anui
C'onques au roi Carmant ne dis
Ce dont me sui or garde pris ;
Sachiez que mauvais gré m'en sai
Que pieça ne m'en avisai.
Bien sai gaaignié i eüsse
Se je à lui moustré l'eüsse ;
Car Clarmondine a fait requerre
En maint pays, en mainte terre,
Li rois Carmans, sachiez de voir,
N'ainc ne pot nouveles avoir
De li, qui nient li vausissent.
Cil de son pays la quéissent
Si loing que nus porroit aler
S'il la cuidoient retrouver ;
Car cil dou pays tant l'amoient
PageV02P104
Que plus amer ne la povoient.
Or vous dirai que j'ai visé,
Selonc ce que m'avez conté,
Que vers le roi Meniadus
Soit tout droit nos chemins tenus,
Droit vers la terre de Salerne.
Sachiez que droite honnour gouverne
Li rois Meniadus tous jours.
Là sarez nouveles plusours ;
Car marcheänt et autre gent,
Qui par iluec passent souvent,
Sont quite de tolnieu payer
Pour, sans plus, nouveles noncier
À lui des estranges pays.
Ainsi l'a maintenu tous dis
Cis rois, qui est courtois et frans.
Nouveles veut oyr tous tans.
Nus hom n'i paie autre paiage.
Quite sont par cestui usage
Tout cil qui là sont trespassant,
Et chevalier et marcheänt.
Pour ceste raison loeroie
Que nous là, la plus droite voie
Alissiens que porriens aler,
Pour savoir se porriens trouver
Lui ne autrui qui nous deïst
Chose qui nous esjoiesist ;
Car de joie, ce m'est avis,
Estes vous povrement garnis.
Li cuers me dist, se là alons,
Aucunes nouveles orrons
De ce que vous alés querant."
# |
Et Cléomadès maintenant
PageV02P105
Li dist que mais n'arrestera
Dusqu'à tant que il venra là ;
Car maint pays ot trespassé,
Mais en celui n'ot pas esté.
La voie pour ce li plaisoit
Qu'el pays ainc esté n'avoit
Dont il li faisoit mention,
Et si avoit auques raison
En ce que Pinchonnès disoit,
Si com Cléomadès sambloit.
# |
Vers Salerne sont esmeü.
Tant ont le droit chemin tenu,
K'à Salerne vinrent, pour voir,
Tout droit, un samedi au soir.
En la vile sont descendu.
Mais, ains qu'il y fussent venu,
Lor avoit on dit grant pieça
Que Meniadus estoit là ;
Car il l'avoient demandé
À ceus qu'il orent encontré.
# |
Cléomadès, cui moult touchoit
Ce pour quoi là venus estoit,
A son hoste par la main pris.
Demandé li a et enquis
De ce que au cuer plus li point.
Moult sagement et moult à point
Folio48v
Enquist tant, que nouveles sot
Teles k'ainc si grant joie n'ot
De chose qu'il li avenist,
Que des nouveles que li dist
Ses ostes, quant il li conta
Comment Meniadus trouva
PageV02P106
La bele pucele ens ou val.
Et le lait home, et le cheval
Qui estoit de fust contrefais ;
Et li dist que tant par ert lais
Li hom qui l'avoit amenée,
K'ainc plus laide riens ne fu née.
# |
"Tant ert de diverse façon
K'ainc si lait home ne vit on ;
Et cele ert la plus bele riens
Et la plus plaine de tous biens
Que nus peüst onques veöir.
Souvent a fait le cuer doloir
Ce que ele est ainsi perdue ;
Car ele est de son sens issue.
Près a jà d'un an et demi
Que ele de son sens issi.
Ce li fu dure destinée ;
Car Meniadus enamée
L'avoit, si que prise l'eüst
À fenme, se en son sens fust.
Garder la fait moult gentement
Rois Meniadus à sa gent.
Une chambre li a fait faire
Li rois, qui est de bon afaire,
En costé la chambre sa mere,
Qui n'est pas envers li amere.
Ains li est douce et debonaire ;
Car si la garde de contraire,
Que cuer et cors met et pensée
En ce qu'ele soit bien gardée
Se sa fille fust proprement ;
Si enpense ele telement
Que nus n'i saroit amender.
À X femmes la font garder
Qui ne servent d'autre labour
PageV02P107
Nule fois, par nuit ne par jour,
Que de li garder et servir ;
Car li rois a moult grant desir
De ce que ele fust garie.
Sa garison moult li detrie ;
Car jamais fenme ne prendra,
Ce dist, jusqu'à tant qu'il verra
Se Diex donroit cesti santé ;
Car cesti a son cuer donné.
Par le conseil conmunaument
De trestoute sa meilleur gent
Li rois espousée l'eüst
Se ainsi mescheü ne fust
La pucele de maladie.
Tous jours a puis esté loiie ;
Car, s'ele desloiie estoit,
Tout kan qu'ele tenir porroit
Seroit desciré et rompu,
Tant a dou tout le sens perdu ;
Dont c'est grans dolours et pitiez,
K'ainc nus hom ne vit, ce sachiez,
Plus bele de li ne meillour,
Ne je ne croi que mais nul jour
Puist nus sa pareille veöir."
# |
Cléomadès entent, pour voir,
À ce que cil li a conté,
Que Diex l'a iluec amené ;
Car celi a là retrouvée
Pour cui tante voie ot alée.
# |
Ne demandez pas s'il fu liez.
Car, s'onques cuers fu aaisiez
D'entendre nouveles plaisans,
Dont fu li siens cuers si joians,
K'en la joie k'en lui manoit
PageV02P108
Point de comparison n'avoit ;
Car li cuers li dist tout errant
Qu'ele avoit tout à esciant
Fait le hors dou sens, de paour
K'avoir ne deüst à seignour
Cel roi qui prendre la vouloit ;
Ses cuers pour voir li tesmoignoit.
Pour ce l'amast et chieresist
Plus que devant, se il pouist ;
Mais, sans ce, si la peramoit,
Que plus amer ne la povoit.
N'est nus cuers qui peüst penser
Comment la peüst plus amer.
# |
Joie et duel bien couvrir savoit
En tous lieus, quant poins en estoit.
De la joie ne fist samblant
De quoi en son cuer avoit tant.
"Biaus ostes," fait il, "dites moi,
Quant porrai je parler au roi ?
À lui vorroie moult parler ;
Car n'ai talent de demorer
En cestui pays longuement,
Et on me dist certainement
Que devant lui m'estuet aler
Ains que de ci puisse torner,
Ainsi c'om entendre me fait ;
Et, se il n'i avoit mesfait,
Sans parler à lui m'en iroie."
# |
Dist li ostes : "Se Diex me voie,
S'en aliez sans parler à lui,
Avoir en porriiez anui ;
Car c'est la coustume et li us
Que maintient rois Meniadus,
Et l'ont de lonc tans maintenu
PageV02P109
Cil qui ce roiaume ont tenu,
Que cil qui ci trespassant sont
Voisent en ce chastel amont
Et doivent, par lor serement,
Au roi dire certainement
Nouveles de celui pays
Dont chascuns est nés et norris.
Bien sai, se li dites nouveles
Qui li soient plaisans ne beles,
Dou sien au departir arez ;
Car moult est courtois et senez,
Et larges et de bon afaire,
Plus que ne saroie retraire.
Se au matin venus fussiez,
À lui bien parlé eüssiez ;
Mais or n'i porrez vous parler
Dusqu'à demain à son lever.
En nuit vous couvient ou chastel
Gesir, soit vous lait ou vous bel ;
Et le matin à vous venra
Li rois, et vous demandera
Nouveles, et vous li dirés
Si faites que vous les savés.
Folio49r
Dedens la tour gerrés en nuit.
Et, pour ce qu'il ne vous anuit,
Vous di que vraiement sachiez
Que bien i serez aaisiez ;
Car sachiez bien que cele tour
Est faite de si noble atour,
Pour estranges gens honnorer,
Que nus n'i saroit amender.
Tout kan k'afiert à estre à aise
I trouverez, ne vous desplaise,
Si com de boire et de mengier
Et de aisiement couchier.
PageV02P110
La raison pour quoi là irez
Vous dirai je, se vous voulez,
Ne pour quoi ce fu establi
De gesir en la tour ainsi :
Pour ce que aler n'en puissiez,
Ne vous ne autres, tant k'ayés
Paié la droiture dou lieu,
Car nus n'i paie autre tolnieu,
Ce sachiez, ne autre paiage."
# |
"Certes ci a courtois usage,"
Dist Cléomadès, "ce me samble.
Biaus ostes, vous et je ensamble
Irons ou chastel, ce vous pri,
Puiscedi que il est ainsi
K'aler i doi. Et je irai
Maintenant; plus n'en atendrai.
Or me dites que devenra
Mes vallés, ne s'o moi ira,
Ou je ici le laisserai ?"
# |
Dist li ostes : "O vous irai,
Et il puet bien ci demorer ;
Vous et lui povez aquiter
Puisque il est en vo service.
Sachiez ne vous tieng pas à nice,
Quant ce que vous pas ne savez
Si courtoisement demandez ;
Car bon fait savoir et enquerre
Les usages de mainte terre.
On n'en puet se non miex valoir.
Or faites ici remanoir
Vostre vallet, et s'en alons,
Car poins en est." - "Nous le ferons,"
PageV02P111
Dist Cléomadès, "maintenant."
Pinchonnet apela avant,
En l'oreille li conseilla
Que il tel nouvele oy a
Dont de cuer est liez et joians.
Pinchonnès n'en fu pas dolans ;
Car sa joie tant desiroit,
Que il tant riens ne convoitoit
Que ce qu'il peüst trouver voie
Qu'il son seigneur meïst en joie.
# |
Cléomadès de là parti.
La chose moult li abeli.
Commandé ot sa volenté,
Et ses ostes l'en a mené
Ou chastel, vers la tour amont.
Cléomadès demandé ont
Cil dou chastel dont il estoit
Et de quel partie venoit.
Et Cléomadès sagement
Et à point et courtoisement
Leur dist k'en Gascoigne manoit
Et k'en Sezile aler vouloit,
Et estoit de Portingal nés.
# |
De chascun fu moult regardés ;
Car ainc n'orent nului veü
Si gracieus com cil lor fu,
Ne si bel, ne si avenant.
De lui s'aloient merveillant ;
Car marcheäns pas ne sambloit
À la maniere qu'il avoit.
Moult plaist chascun ce k'en lui voient.
Jusques en la tour le convoient,
Tant que el maistre estage fu.
Jà estoient léens venu
PageV02P112
Doi mareheäns qui trespassoient
Pour paier ce k'au roi devoient ;
Car la coustume qui ert là
Savoient de moult grant pieça.
Passé i orent autre fois.
Dist l'uns à l'autre : "Or sommes trois
À ce conpaignon qui ci vient."
# |
Cléomadès par la main tient
Son oste ; car moult li plaisoit
Li lieus là où il le menoit.
Tout li estoit plaisant et bel
Kan qu'il véoit par le chastel,
K'esperance li tesmoignoit
Que en ce chastel trouveroit
Ce c'onques en chastel ne vit
Puis que de Chastel Noble issit
Le jour qu'il enporta celi
Que son cuer avoit avoec li.
Puis ot en maint chastel esté
Et en mainte noble cité ;
Mais onques n'i pot trouver voie
Qui en esperance de joie
Le mesist si qu'il ert adont.
# |
Li marcheänt levé se sont
Contre lui moult courtoisement.
Ne vous ferai lonc parlement
De ce que entre aus deviserent,
Ne com faite vie menerent.
De tout kan que mestier lor fu
Furent bien et bel pourveü.
# |
Mais ains la nuit mengier ne pot
Cléomadès ; car si plain ot
Cuer et cors de joieus espoir,
PageV02P113
Qu'il n'avoit de mengier povoir ;
Car esperance et desirriers
Li ert et boivres et mengiers.
Sachiez moult li estoit plaisans
Cele viande, et soufisans,
Plus que riens c'on seüst penser
Ne souhaidier, ne deviser.
Ses ostes li tint conpaignie
Tant que la nuit fu anuitie.
# |
Cléomadès là demora,
Et ses ostes s'en retorna
Quant assez ot là demoré.
Lors a moult priié et rouvé
À ceaus de léenz qu'il pensassent
De son oste, et qu'il ensoignassent
Se il de nule riens l'amoient,
Et cil dient qu'il le feroient.
Li ostes à Dieu commanda
Cléomadès, lors s'en ala
Et li dist k'à lui revenroit
Lendemain ains que levez soit
Folio49v
Li solaus ; or ne li anuit,
Car tost iert passée la nuit,
Et li dist que, se conpaignie
N'eüst, il ne le laissast mie.
Cléomadès de son confort
Li sot bon gré, dont n'ot pas tort ;
Car vis li est que grant essoigne
Metoit à faire sa besoigne.
# |
Quant poins en fu, couchier les firent
Cil dou chastel. Lors s'en partirent
De la tour, quant cil couchié furent.
PageV02P114
Bien lor firent ce que il durent.
# |
Quant Cléomadès fu couchiés,
Uns pensers moult pesans et griés
Li vint devant, qui moult li grieve
K'à pou que li cuers ne li crieve,
Tant fu dou penser en esmai.
Le penser vous deviserai :
Li pensers fu de fine amour
Comfis en sausse de paour.
# |
Vous avez bien devant oy
Comment le cuer ot esjoy
De ce k'en ce chastel cuidoit
La riens ou mont que plus amoit,
Et voirement i estoit cele
Qu'il amoit ; et cuidoit que ele
Le hors dou sens con[tre]feïst
De paour que ne la preïst
Meniadus, qui l'ot trouvée.
Or ert sa pensée muée
En cuidier que fors dou sens soit
Des meschiez qu'ele eüs avoit
Au cuer, de ce k'ainsi l'embla
Rois Crompars, qui là l'amena,
Et de la laidour k'ert en lui.
Ot, espoir, au cuer tel anui
Et tel paour et tel torment
Qu'ele en ot perdu l'escient.
En tel penser cheüs estoit
Cléomadès : moult li touchoit.
# |
Joie qui en lui ert venue
Fu dou penser si esperdue,
Que plus que la moitié de li
De Cléomadès se parti ;
PageV02P115
La moitié pas de joie n'ot
Que il devant ce eü ot
Que cele pensée li vint.
Grans meschiez de cuer li avint
Quant ele onques li vint devant ;
Car ainc la nuit, ne tant ne quant,
Ne dormi ne ne reposa.
Maint grant souzpir la nuit geta,
De paour que dou tout perdu
N'ait ce que tant a pourseü.
# |
Paours s'estoit en lui logie
Ou lieu dont joie s'ert partie.
À grant paine en lui remanoit
Ce de joie qu'il i avoit,
Que paours ne la getoit fors ;
Car plus i ert grans li effors
De paour que de joie assés.
Or vous dirai, se vous voulés,
Quel joie en lui remese estoit.
Sachiez que plus n'en i avoit
Fors tant sans plus que lendemain
Cuidoit bien savoir le certain
De s'amie k'ot retrouvée,
S'ele ert en son sens ou dervée,
Et ce que retrouvée l'a
C'est ce de joie k'en lui a.
# |
Mais bien avoit enporposé
Que, s'il trouvoit en verité
Que ele fust fors de son sens,
À ce ot torné son assens
Que mais de là ne mouveroit
Tant que ele vivre porroit,
Se il devoit au sac porter
Ou d'uis en huis son pain rouver ;
PageV02P116
Et, se il plus de li vivoit,
Après li vivre ne vourroit,
Mais en celui meïsme jour
S'ocirroit pour la soue amour 
Qu'ele seroit à fin alée.
C'ert ses avis et sa pensée.
# |
C'ele nuit ainsi trespassa
Cléomadès, k'ainc ne pensa
Fors k'à ce que je vous devis.
Si tost com jours fu esclarcis,
Se leva ; car moult desiroit
Que Meniadus levez soit.
Et li autre aussi se leverent,
Et cil dou chastel deffermerent
La tour, et sont léenz entré.
Après ce, n'a pas demoré
Granment li rois Meniadus
Que il ne soit là droit venus ;
Car tous jours matin se levoit
Quant gens trespassans là savoit.
Pour ce, estoit matin levez.
Dedenz cele tour est entrez.
Li marcheänt contre lui vont,
Courtoisement salué l'ont,
Et aussi fist Cléomadès.
Li rois, qui fu courtois et nés,
A à chascun des trois rendu
Moult courtoisement son salu.
# |
Li marcheänt se delivrerent
Dou roi ; car premier venu erent.
Car cil qui premerain venoient
An roi premierement monstroient
PageV02P117
Ce qu'il li devoient moustrer
Tout kan qu'il i sorent viser ;
Que dire li durent par droit
Li recorderent là endroit.
# |
Et, quant chascuns lu delivrés,
Lors est Meniadus tornés
Vers Cléomadès erranment.
Et Cléomadès sagement
Dist au roi, se il li plaisoit,
K'à lui seul à seul parleroit
Moult volentiers, se c'ert ses grés.
Et li rois, qui moult fu senés,
Li dist que il bien le vouloit
Et que moult volentiers l'orroit.
# |
Lors le maine à une fenestre
Meniadus, droit à senestre,
Au lez par de devers la mer.
Lors li commença à moustrer
Cléomadès de son afaire.
Moult sagement le sot atraire
À ce que proposé avoit.
"Sire," fait il, "à vous tout droit
Folio50r
Sui venus de lointain pays.
Sachiez que longuement ai quis
Ce que j'ai ci endroit trouvé;
Car on m'a bien dit et conté
Que céens a une pucele,
Ce dist on, moult gente et moult bele,
Qui a une tel maladie
Que de son sens est marvoiie ;
Et je quier mon gaaing adès
En tous pays et loing et près.
Pour ce, di je que trouvé ai
Mon gaaing ; car je garira[i]
PageV02P118
La pucele, se vous voulez ;
Mais que li guerredons donnez
M'en soit quant je l'aurai garie.
Car jusqu'adont ne vueil je mie ;
Et, se je bien ne la gari,
Ne me soit jà de riens meri.
Ne paine, ne cous que j'en aie,
De li garir pas ne m'esmaie ;
Ains la garirai moult briement."
# |
Et, quant Meniadus l'entent,
Ainc en sa vie n'ot tel joie.
"Amis," fait il, "k'en mentiroie ?
Sachiez, se la povez garir,
Que je le vous vorrai merir
À [vo] voloir entirement ;
Ce vous ai je bien en couvent.
Et comment estes vous nommez ?"
# |
"J'ai à non maistres Desievez 
En mon pays, ce vous créant."
# |
"Ce soit à vostre joie grant,"
Dist li rois. "Or soiez hastiex
De garir la pucele au miex
Et au plus tost que vous porrez.
La desserte sor moi metez.
Dou merir ne vous esmaiez.
Car, se vous garir la poviez,
Riche home à tous jours vous feroie ;
Ne jamais jour ne vous faurroie
Nient plus que feroie mon cors."
# |
Et Cléomadès li dist lors
Que la pucele entreprendra
PageV02P119
À garir, sor ce que dit a,
N'autre marchié faire n'en vuet.
"Mais maintenant aler m'estuet,"
Fait il, "la pucele veöir ;
Car je vorroie moult savoir
La maniere de son malage
Et son maintien et son usage.
Selonc ce, si m'aviseroie
Comment tost garir la porroie."
# |
Et Meniadus l'otria,
Et dist que à li le menra
Si tost que levées seroient
Sa mere et sa suer, qui auroient
Grant joie se garie estoit ;
Car chascune de cuer l'amoit
Pour les biens et pour la biauté
Dont en li avoit tel plenté,
Aincois qu'ele malade fust,
Que ne croi que plus en eüst
Nule femme qui ainc fu née
Ne mais soit en nule contrée.
# |
Dist Cléomadès : "Bien le croi.
Mes hostes le dist ier à moi
Si tost que je fui descendus,
K'ainc plus bele riens ne vit nus ;
Et se li oy tesmoignier
C'on ne porroit pas souhaidier
Nule meillour de li trouver.
Sachiez moult me vorrai pener
De li garir hastéement.
Et me dist mes hostes conmen
Vous la trouvastes premerains,
Et me dist c'uns trop lais vilains
PageV02P120
Ert avoec li quant la trouvastes.
Li et le vilain amenastes
Et le cheval qui ert o lui.
Sachiez bien que trestout l'anui
Qu'ele a eüe, et tout le mal
Li est venus par le cheval
Que li vilains o lui avoit.
Li chevalès de fust estoit,
Ce m'a bien mes hostes conté.
Or, sachiez bien par verité
Que pas son sens perdu n'eüst
La pucele, se ce ne fust
Par le cheval ; mais la raison
Vous en dirai, et l'ochoison
Comment ce puet estre avenu
Qu'ele a ainsi son sens perdu.
Sachiez que li vilains estoit
Jalous, et cele femme amoit,
Et il la devoit moult amer
Selonc ce que j'oi recorder.
Pour ce qu'il ert bochus et lais
Et hideusement contrefais,
Doutoit que on ne li tolsist
Sa femme, ou c'on ne l'oceïst
Pour la biauté qui ert en li.
Un tel cheval une fois vi,
Qui estoit fais si soutilment
Que, quant on faisoit nul torment
Celui qui le cheval avoit,
Dedenz l'an de son sens issoit
Cil qui li avoit torment fait.
Tex fu li chevaus entresait.
Espoir que courroucié eüst
Le vilain au cheval de fust
La damoisele qu'il menoit ;
PageV02P121
Car, espoir, pas bien ne l'amoit
Pour ce k'ert lais et desguisez.
Et pour ce me sui avisez
De son cheval que il tex soit
Que cil autres chevaus estoit
Dont vous m'oez ici parler.
Ne sai se avez fait garder
Le cheval ; mais, se je l'avoie,
La damoisele gariroie
Plus tost que en autre maniere. "
# |
Lors dist li rois à lie chiere
Que il encor le cheval a,
N'onques puis nus au lieu n'ala
Là où l'avoit fait estiver.
Pour lui garder de debrisier,
L'avoit fait si bien enfermer
Que nus n'i povoit adeser.
Car la pucele li loa
Qu'il le gardast ; pour ce, fait l'a ;
Et li dist qu'il li bailleroit
Le cheval tantost qu'il vorroit.
# |
Folio50v
Sachiés que cis mos abeli
Cléomadès, quant l'entendi,
S'il seüst or la verité
Que Clarmondine eüst santé
Et que ele fust en tel point
Qu'ele ert, dont fust ses cuers apoint.
Hé ! las ! mais il n'el savoit mie ;
C'est li poins qui plus le guerrie
Et qui plus près dou cuer li va.
# |
Rois Meniadus envoia
À sa mere, qu'ele se lieve
Et qu'il ne li anuit ne grieve
PageV02P122
S'il la fait si matin lever ;
Car tel chose li veut conter
Qui moult durement li plaira
Si tost com il dit li aura.
# |
Lors se leva apertement
La royne tout erranment.
Jà estoit sa fille levée
Argente, et si ert jà alée
Savoir comment dormi avoit
Clarmondine, ne que faisoit ;
Car la mere et la fille aussi
Erent moult dolentes pour li.
# |
À Meniadus sont venues ;
Et, quant li rois les a veües,
Moult les salua liement ;
Et Cléomadès sagement
Vers la royne s'enclina,
Li et sa fille salua
Comme cil qui à droit savoit
Ce c'on faire et laissier devoit.
En tous lieus estoit avisez.
Un petit s'est trais à I lez.
Ma[is] là gaires ne demora ;
Car Meniadus l'apela.
Si tost com sa mere ot conté
Ce que en lui avoit trouvé ;
Fu tantost apelez avant,
Et la royne maintenant
Li dist que bien soit il venus.
"De mon fill roi Meniadus
Vueil que tous jours maistres soiez,"
Fait elle, "se vous garissez
La bele, la bien ensaignie,
Qui lonc tans a esté loiie
PageV02P123
Par defaute de sa santé.
Moult m'aueroit servi à gré
Qui en son sens la meteroit,
Et mes fiex me dist ci endroit
Que vous li avez en couvent
Que vous la garirez briement.
Et, se garie la véoie,
Sachiez si le vous meriroie
Que bien vous deveroit soufire,
Ce vous puis je bien pour voir dire."
# |
"Dame, la vostre grant merci,"
Fait Cléomadès. "Or vous pri
K'à la pucele me menés ;
Car bien voi que vous desirés
Que hastéement fust garie."
# |
Et la royne li afie
K'erranment à li le menra.
Argente, sa fille, apela
Et li dist qu'ele voist savoir
Se il la porroient veöir.
# |
"Dame," dist Argente, "orendroit
I fui, mais esveillie estoit.
Ne sai pas s'endormie r'est."
"Or i alez tost, sans arrest,"
Fait la royne, "fille gente."
# |
Et cele, qui n'estoit pas lente,
S'enkeurt, com cele en cui bontez
Manoit, et debonairetez.
Clarmondine en tel point trouva
PageV02P124
Que ele devant la laissa.
# |
Tous jours ert netement gardée
Cele chambre, et bien arréée,
Là où Clarmondine gisoit.
En cele chambre vinrent droit
Meniadus et la royne
Par devant le lit Clarmondine.
Cléomadès après venoit ;
Et, quant Clarmondine le voit,
Erranment l'a reconneü
Si tost que ele l'ot veü.
Lors ot ele si grant paour
De muer samblant et colour.
Qu'ele ne sot que devenir.
De joie commence à fremir
Et de paour prist à trambler ;
En son cuer prist Dieu à loer
De ce qu'ele voit devant li
Celui qu'ele peramoit si,
Que comparison ne sai metre :
Pour ce ne m'en quier entremetre.
# |
Lors vint Cléomadès avant ;
Et Clarmondine maintenant
Torna devers lui son viaire,
Qu'ele ot moult douz et debonaire,
Pour ce qu'il la reconneüst.
Mais si k'ainc veü ne l'eüst
À son povoir se maintenoit.
Et, quant Cléomadès perçoit
Que c'ert Clarmondine la bele,
À son samblant vit bien que ele
N'avoit pas perdu l'escient.
Lors revint joie habondanment
En son cuer où pou en avoit.
PageV02P125
Meniadus, qui là estoit,
Li a dit : "Maistres Desievez,
Venez avant ; si regardez
Comment nous porrez conseillier
De ceste damoisele aidier."
# |
Et Cléomadès l'aprocha.
"Bele," fait il, "entendez çà ;
Quels maus est ce que vous sentez ?"
"Biaus amis, estes vous dervez ?"
Fait ele. "Qu'alez vous disant ?
Faites moi raporter mon gant
Que perdi, plus a de quinsaine ;
Car vos chevaus n'a point d'avaine ;
Alez m'en poroec à Sebile,
Car miex l'aim que d'une autre vile."
# |
"Ha !" fait il, "ma très douce amie,
Dame Diex vous soit en aye !
Vous n'estes pas bien en vo sens."
"Or le demandez dont les gens,"
Fait ele, "se ne m'en créés,
K'à Chastel Noble trouverés."
# |
Et lors se dreça erranment
Cléomadès ; car bien entent
Folio51r
Ce qu'ele dist, sans plus parler.
Meniadus prist à moustrer
Qu'ele n'a d'entendement point
Et qu'ele est en perilleus point ;
Ne respont à riens c'on li die
Nient plus qu'ele ne l'oïst mie.
# |
"Sire rois," fait il, "se j'avoie
PageV02P126
Le cheval, maintenant sauroie
Se de riens l'en porroie aidier.
Ne vous estuet pas esmaier
Que je bien garir ne la doie.
Je querroie ainçois autre voie
Que temprement ne soit garie,
Ains tiers jour aurai acomplie
La garison, or n'en doutez."
# |
Dist li rois : "Le cheval aurez."
# |
Lors y a tantost envoiié,
Et cil furent apareillié
Qui le cheval de fust garderent ;
Droit en la chambre l'aporterent
Là où Meniadus estoit.
Et, quant Clarmondine perçoit
Que venus ert li chevalès,
Lors pensa que Cléomadès
Le cheval demandé avoit
Pour ce que porter l'en vouloit
Sor le cheval. Moult en fu lie ;
Mais vis li est que trop detrie,
Car jà en vorroit estre alée.
# |
Cléomadès, sans demorée,
Vers le cheval vient, si le prent ;
Devant Clarmondine erranment
L'amena droit devant son lit.
Lors a à Meniadus dit
Que par le cheval gariroit
La pucele, bien le savoit ;
De ce estoit il tous certains.
"Desloiier li faites les mains ;
Car je croi que mal ne fera
Celui qui la desloiera.
PageV02P127
Selonc ce k'en ce cheval voi,
C'est la chose que je miex croi."
# |
Dist li rois : "Puisque vous savez
Comment vous garir la devez,
Vous meïsmes la desliiez.
Drois est que premiers l'essaiez ;
Car, sachiez bien, se Diex me voie,
À envis la deslieroie,
Selonc le point où la laissai."
"Sire, et je la deslierai,
Pour vous moustrer apertement
Que tost iert en amendement
Et que sa chose bien ira."
# |
Cléomadès avant passa.
Sa main deseur son chief li mist ;
Et cele nul samblant ne fist
De rien nule que il li face.
Sa main metoit entour sa face
Et sor son pis moult doucement.
Quant Clarmondine la main sent
De celui qu'ele tant amoit,
Vis li est que Diex la tenoit
En paradis entre ses mains.
Cléomadès ne r'ot pas mains
De leèce que ele avoit.
Chascuns moult sagement couvroit
La très grant joie qu'il avoient,
Car sage et avisé estoient.
Cléomadès li deslia
Ses mains, dont moult se merveilla
Li rois de ce que ne se mut
Et qu'ele aussi coie se jut
PageV02P128
Qu'adont que ele fust liie.
Moult en fu la royne lie,
Et Argente sa fille aussi,
Et tout cil qui erent iki.
Le maistre partout en looient,
Lui et son sens forment prisoient.
# |
Cléomadès le cheval prist,
Devers les piés dou lit le mist,
La teste dou cheval torna
Vers Clarmondine. Lors ala
Tout entour le cheval III tours
Pour amuser les museöurs,
Le roi et ceaus qui là estoient,
Qui tout certainement cuidoient
Que il le feïst par maistire.
Cléomadès dist au roi : "Sire,
Se il vous plaist, or en alons ;
À ceste fois plus n'en ferons.
Sachiez que ne se mouvera
La pucele, ne ne fera
Nul mal, ce vous ai en couvent.
Mais commandez à vostre gent
Que tost soit vestue et levée ;
Car droit à ceste matinée
La convenra I pou mengier,
Et puis sor le cheval liier
De touailles moult fortement."
# |
Et li rois trestout erranment
Commanda que on le feïst,
Et que on detri n'i meïst,
Et que on la vestist errant.
PageV02P129
De ce orent paour moult grant
Les puceles qui la servoient,
Qui si desliie la voient.
# |
À Cléomadès sont venues.
"Ha ! maistre ! nous sommes perdues,"
Font eles, "se ne reliiés
Cele femme, bien le sachiés ;
Car kan k'ele tient, c'est passé,
Est tout rompu et desciré."
# |
Et Cléomadès leur respont
Qu'eles par li nul mal n'auront
Tant que li chevalès soit là ;
À nului nul mal ne fera,
Ce lor a en couvent, sans doute.
Clarmondine de cuer escoute
Ce que Cléomadès disoit.
Savoir povez, moult li plaisoit.
# |
Lors est li rois Meniadus
Liement de léens issus.
Cléomadès tint par la main.
"Maistre Desievé, moult vous ain,"
Fait il ; "car moult amer vous doi.
Jamais ne partirez de moi.
Onques mais ne vi si bon maistre,
Ne je ne cuit que mais puist naistre
Maistre qui vous puisse valoir."
"Sire, vous dites vo vouloir,"
Fait Cléomadès, "de ce dire.
Ne sui li mieudres ne le pire.
Folio51v
Je m'en tieng apaié assez.
De ce que sai soit Diex loez,
Et que kanques envoie m'a."
Lors dist au roi que il ira
PageV02P130
En la vile ; c'un pou à faire
Y a, pour pourvir son afaire
De ce que il entrepris a ;
Maintenant, ce dist, revenra.
# |
Dist li rois : "Se vous tant m'amés,
De tost revenir vous hastés."
"De ce ne vous esmaiez point ;
Car je revenrai bien a point,"
Fait Cléomadès, "n'en doutez."
# |
Et lors s'en est tantost tornez,
Et li rois convoier le fist
À sa maisnie, si lor dist
Que il errant le ramenassent,
Et que gaires ne detriassent ;
Et cil dient qu'il le feroient.
Droit à son ostel le convoient.
# |
Ses ostes fu matin levez ;
Car il estoit pieça alez
Ou chastel, et ert revenus,
C'on li dist que Meniadus
En avoit son oste mené.
Cléomadès a salué
Son oste si tost que le vit,
Et cil son salu li rendit.
Et lors vint Pinchonnès avant
Qui moult ot le cuer desirant
De savoir que trouvé avoit
Ses sires là dont il venoit,
Ne s'il avoit oy nouveles
Qui li fussent laides ou beles.
# |
Devant son seignor vint ester.
À ce que il i puet viser,
PageV02P131
À son samblant bien aperçoit
Que en assez bon point estoit.
"Sire," fait il, "dont venez vous?"
"Pinchonnet, je garira tous,"
Fait il, "dou mal que j'ai eü,
Selonc ce que je ai veü."
Pinchonnès entendi le mot
Si tost que ses sires dit l'ot.
Bien perçoit que il a trouvée.
Chose qui li plaist et agrée
Selonc ce qu'il aloit querant.
En son cuer en a joie grant
Assez plus que il ne moustra.
Et Cléomadès l'apela,
Et puis l'a d'une part mené.
Lors li a dit et devisé
En quel point la besoigne estoit
K'en tant de pays quise avoit.
# |
En Pinchonnet moult se fia,
Et pour ce riens ne li cela.
Tout son afaire entirement
Li dist tout descouvertement,
Et que il Clarmondine avoit
Retrouvée, bien le savoit,
Et que il ert Cléomadès.
Quant ce entendi Pinchonnès,
Lors s'est tout tantost avisez
Que bien puet estre veritez
Que Cléomadès soit, sans faille,
Qu'il li souvint de la bataille
Que il avoit fait à Sartan
Et à son bon seignor Durban.
Chascuns ert chevaliers de pris,
Ne pourquant les ot tous conquis.
Et de Chastel Noble ensement
PageV02P132
Li souvenoit com faitement
Cele jornée se maintint.
Pour ce en verité retint
Que il Cléomadès estoit :
Sa prouece li tesmoignoit.
# |
Basset a dit : "Moult sui joians
Quant Cléomadès sui servans.
Moult m'a Diex envoié d'onnour
Quant j'ai servi si bon seignour.
Plus longuement en viverai ;
Car tous jours mais liez en serai."
"Sire," fait il, "or commandés
Qu'il vous plaist et que vous voulés
Que je face et que je deviengne ;
Car, sachiez, quoi qu'il m'en aviengne,
Vostre commandement ferai,
À mon povoir, tant que vivrai."
# |
"Bien vous sera guerredonné,
Se je vif, or n'en soit douté,"
Dist Cléomadès, "ce sachiez.
Au partir de ci vous traiez
Droit devers le bon roi Carmant
Et li dites mon couvenant
Si que vous savez que il va."
Et cil dist k'ainsi le fera ;
Car il set toute la besoigne.
"Ne soiez jà de ce en soigne,"
Fait il ; "car maint lie[z] cueur ferai
Quant à Chastel Noble venrai.
Sor moi ceste chose metez
Et d'autre besoigne pensez,
Ne jà de cesti ne soigniez.
Seürement la me laissiez."
PageV02P133
Cléomadès li devisa
Tout ainsi que proposé a ;
Conment de là s'en cuide aler,
Par quoi miex sache recorder
Au roi Carmant et à autrui
Toute la verité de lui.
Ne vous puis pas tout deviser
Lor paroles, ne recorder.
Quant son point vit, de là se part
Cléomadès. Moult li fu tart
Que de Salerne partis fust
Et que Clarmondine r'eüst
Vers lui, et k'en fust resaisis.
C'ert ses desirs et ses avis.
# |
Atant s'est departis de là ;
Pinchonnet o lui enmena.
Tout en alant, li devisoit
Conment au roi Carmant diroit
Que Clarmondine a retrouvée
Cléomadès, et l'a menée
En Espaigne, où il li fera
Toute l'onnour que il porra,
De ce ne soit point en esmai.
# |
"Tantost k'en Espaigne venrai
Envoierai au roi Carmaut.
Vous me saluerez Durbant,
Et Sartan son bon conpaignon,
Et les dames de lor maison,
Folio52r
Et lor dites, s'il m'aiment tant,
Que il viengnent vers moi errant
Si tost que veü vous aront.
En Espaigne me trouveront.
Je vous pri que vous les hastés
PageV02P134
Et que tost me les amenés ;
Car, si tost com vous reverrai,
Riche home à tous jours vous ferai,
Et vous et ceaus que amerez,
De ce soiez asseürez."
Et Pinchonnès l'en mercia.
# |
Atant ens el chastel entra
Cléomadès. Contre lui vinrent
Cil qui à bien paié se tinrent
D'el oevre k'a enconmencie :
Chascuns prise moult sa maistrie.
# |
Li rois l'a avant apelé.
"Maistres," fait il, "on m'a conté
Que la damoisele garist ;
N'onques puis nul samblant ne fist
Qui tornast fors k'à garison
Que venistes en la maison,
Où ele a jut moult longuement
En grant paine et en grant torment.
Or est vestue et atornée.
Jà l'ont par la chambre menée
Les fenmes de léenz assez
De toutes pars et de tous lez."
# |
Dist Cléomadès : "Moult m'est lait
Qu'ele a tant alé, c'est mal fait,
Jusqu'à tant qu'ele eüst mengié :
Et, s'il estoit apareillié,
Maintenant mengier la feroie,
Se la viande preste avoie."
# |
Lors li ont dit que arréée
PageV02P135
Est ia viande et aprestée,
À ce ne tient ne tant ne quant.
Et Cléomadès maintenant
Est dedenz la chambre rentrez ;
Et lors fu li huis refermez
Que nus en la chambre n'entra
Fors Pinchonnet, k'o lui mena
Cléomadès, pour ce qu'il voie
Comment se metra à la voie,
Par quoi il puist, pour voir conter
Que Clarmondine en vit porter
Par desus le cheval de fust,
Par quoi il miex creüs en fust
Ens es lieus là où il venroit.
# |
Lors s'en vint Cléomadès droit
Vers Clarmondine, et li a dit
Que il li couvient I petit
Mengier à cele matinée.
Lors fu la viande aportée.
# |
Mengier la fist, et il aussi
Menga et but avoeques li ;
Car, le jour ne la nuit devant ;
N'avoit mengié ne tant ne quant,
Car n'en avoit povoir eü
Selonc le point où adont fu.
Cil mengiers li fu de plaisance,
Savorez de bone esperance ;
Car, entrues que il là menjoit,
En espoir de grant joie estoit
Si que il ert aparissant.
Menja et but à son talant,
Et ele aussi but et menja.
Cil mengiers moult lor agréa ;
Car pieça que mengié n'avoient
PageV02P136
En joie, mais lors i mengoient.
# |
En la chambre ne demora
À ce mengier qui fais fu là
Fors que li rois et la royne,
Et les femmes qui Clarmondine
Orent servie nuit et jour ;
Et Argente aussi, la serour
Au noble roi Meniadus,
I estoit. De gent n'i ot plus,
Fors Pinchonnès, cui moult plaisoit
Que la chose en tel point véoit.
# |
Clarmondine moult Ions sambla
Cil mengiers ; car moult desira
Qu'ele d'iluec soit eschapée,
Que dou desirrier saoulée
Fu si, que mengier ne povoit.
Et, quant Cléomadès ce voit,
Lors pense qu'ele a desirier
D'eschaper plus que de mengier.
# |
Au roi a dist : "Sire, sachiez
Et tout asseür en soiez,
Que mais, di cest jour en avant, 
Vous ne verrez, de ce me vant,
Malade ceste damoisele
De tel maladie que ele
A eü puis qu'ele vint ci."
"Maistres, la vostre grant merci,"
Fait li rois ; "car moult me sont beles
À oïr si faites nouveles.
Que l'eure beneöite soit
Que vous venistes ci endroit !
PageV02P137
Bien croi que mais ne fust garie
Se ne fust par vostre maistrie."
# |
Dist Cléomadès : "Or alons
En cel praël ; là parferons
Ce par quoi garie sera
La pucele." Et lors se leva
Cléomadès. Le cheval prent,
El praël le porte erranment,
Lors dist au roi : "Sire, venez
En cel praël ; car jà verrez
La pucele garie errant."
Lors ot li rois joie moult grant.
# |
Dedenz le praël sont entré.
Li huis estoient si fermé
Que dedenz le praël n'entra
Nus fors que cil qui erent là.
Sachiez bien que en cel praël
Faisoit et moult noble et moult bel ;
Arbres et flours i ot assez,
Et estoit de haus murs fermés.
# |
Tout droit enmi le praëlet
Cléomadès le cheval met.
Lors dist au roi : "Or m'amenez
La pucele, et puis vous séez.
Car vous verrez jà tel merveille
K'ainc ne veïstes sa pareille ;
Car nus ne deveroit cuidier,
À paines nès parsouhaidier
Que on si tost garir peüst
Fenme qui si grief mal eüst
Que ceste a eü longuement,
Com je la garirai briement."
PageV02P138
Folio52v
Et lors tous asseöir les fist
Entour le cheval, et les mist
Au plus loing dou cheval qu'il pot.
Son afaire pourveü ot
De tout kan que il couvenoit ;
Car tout kan que il commandoit
Estoit prest et apareillié,
Car par léenz erent si lié
De ce que il devoit garir
Clarmondine, que son plaisir
Et son commant partout faisoient.
Kan qu'il demandoit li bailloient
À son plaisir et à son gré.
Tout faisoient sa volenté.
# |
Touailles ot fait pourveöir
Et viandes à son vouloir.
Et tout, kan que mestier li fu,
Fu tout prest et tout pourveü.
Et lors a Clarmondine prise
Et l'a deseur le cheval mise.
Sor le cheval l'a bien loiie
De touailles. Lors fu si lie
Clarmondine, que ne povoit
Estre plus lie qu'ele estoit ;
Mais de sa joie tant ne quant
Ne faisoit chiere ne samblant.
# |
Lors dist à ceaus qui là estoient
Cléomadès, pour riens qu'il voient
Ne se lievent ; car ce seroit
Grans perilz se nus s'en levoit.
Bien en porroient arriérer
L'ouvrage dont il veut ouvrer.
# |
Dist li rois : "Maistres, n'en doutez ;
PageV02P139
Car, dusqu'à tant que vous donrez
Congié que de ci nous levons,
Sachiez que ne nous leverons."
Dist Cléomadès : "Ce gardés."
"Tous en soiez asseürés,"
Dist li rois ; "mais or soigniez d'el."
# |
Lors prist et pain et vin et sel
Et viande à sa volenté
C'on li avoit là aporté.
Tout ert prest kan qu'il demandoit,
Fors commander ne li failloit.
Li vins estoit en II bouteilles.
Tout regardoient à merveilles
Ces choses cil qui erent là.
Cléomadès bien arréa
Son afaire, et tost et à point
La viande ; et, quant vit son point,
Deseur le cheval est montez.
Et lors fu il bien remueblez
De joie, k'en grant povreté
En avoit longuement esté.
# |
"Sire rois," fait il, "je vous pri
Que, quant g'iere partis de ci,
Que de rien k'avenu vous soit
Ne vous effréés, s'aurez droit ;
Car n'i porriiez gaaingnier.
Pour ce, vous en vueil je priier.
Non soloie avoir Desieuez,
Mais mes nons est ore muez.
J'ai non Cléomadès li Liez ;
En tel forme est mes nons changiez.
Fiex sui Marcadigas le roi,
Et ceste pucele lez moi
Est fille au riche roi Carmant.
PageV02P140
À ce mot, à Dieu vous commant,
Et trestoute la conpaignie."
Jà avoit sa main adrecie
Au front dou cheval. Lors torna
La cheville, et si s'en ala
Tout tantost, sans nul point d'arrest,
Par desus une grant forest.
# |
Tout belement, au commencier,
Se commença à adrecier
Vers Espaigne, au plus droit qu'il pot ;
Car tant de pays cerchiez ot,
Que bien devoit savoir par droit
Auquel lez Espaigne séoit.
# |
De lui vous aparler lairai
I petit, tant que vous arai
Dit en com fait point demorerent
Cil qui dedenz le praël erent,
Quant en virent aler ainsi
Cléomadès que je vous di.
# |
De toutes pars se sont levé.
Li uns a l'autre regardé
Aussi com s'il fussent muel,
Regardoit l'uns l'autre ou praël.
Premiers parla Meniadus.
Droit vers Pinchonnet est venus ;
"Maistre," fait il, "vous me dirés,
Ains que vous de ci m'eschapés,
Qui cis est qui de ci s'en va,
Ne comment tel chose fait a."
# |
Dist Pinchonnès : "Sire, sachiez
Et tous asseürez soiez
Que par lui meïsme savez
PageV02P141
Qui il est, s'entendu l'avez ; 
Car au partir pas ne cela 
Son non. Oïant tous, se nomma 
Et vous dist bien qui cele estoit 
Qui seur le chevalet séoit, 
Si que bien oyr le pouistes 
Se vous entendre le vousistes. 
Sachiez que c'est Cléomadès, 
Li bons, li biaus, li preus, li nés, 
Li rubis de chevalerie, 
Qui r'a Clarrnondine s'amie 
Que requise a moult grant pieça. 
Tant l'a requise qu'il la r'a, 
Et ele lui ; tant a tendu 
Que ensamble sont revenu :
Ce sont il, sachiez vraiement."
Et, quant Meniadus l'entent 
S'esbahis fu n'el demandez. 
"Amis," fait il, "or me moustrez 
De cel cheval que estre en puet."
"Sire," fait il, "s'estre l'estuet 
Que j'en die ce que j'en sai,
Moult volentiers le vous dirai. 
N'a gaires que je n'en savoie 
La verité, se Diex me voie. 
Sachiez que je menestrex sui. 
Une piece ai servi celui 
Con tient au plus vaillant dou monde 
Tant com il dure la reönde; 
Mais, de tant com je l'ai serti, 
Si face Diex m'ame merci, 
Ne soi qui il fu. Mais hui main 
Me dist il primes le certain 
Folio53r
Que il Cléomadès estoit. 
Clarmondine requise avoit,  
PageV02P142
Ce me dist, en mainte contrée 
Et l'avoit ici retrouvée, 
Dont je croi que moult soit joians ; 
Car requise l'avoit lonc tans. 
Ne couvient pas que par la porte 
S'en voist li chevaus qui l'enporte 
Car bien puet autrement aler."
# |
Lors li commence à deviser 
Que à Cléomadès avint 
Le jour k'à Chastel Noble vint 
Seur le cheval premierement, 
Et li conte tout ensement 
Que dou roi Carmant eschapa 
Et tout ainsi qu'il revint là 
Dont il ne fist pas Ionc sejour ; 
Car tout droit au septime jour 
Revint à Chastel Noble arriere. 
"Ne sai se fu force ou priere," 
Fait il, "ne conment il ala ; 
Mais en son r'aler enporta 
Clarmondine, les iex voiant 
Clarmonde, sa mere, et Carmant 
Le roi son pere, qui n'el pot 
Amender, dont moult grant duel ot. 
Mais Cléomadès ains leur dist 
Que de là se departesist 
Que il Clarmondine enportoit 
Et k'à femme la prenderoit, 
De ce ne fussent en paour, 
Car bien li garderoit s'onnour ; 
Et que il ert Cléomadès 
Leur dist en haut et de si près, 
Que tout cil tout à plain l'oyrent 
Qui là erent, et bien le virent, 
Aussi com vous avez seü
PageV02P143
Son partir de ci, et veü. 
Cléomadès, bien le sachiez, 
Se fu tost de là esloigniez, 
Quant il dite ot sa volenté. 
Moult furent dolant et iré 
Li rois et cil qui là estoient ; 
Mais conseil metre n'i povoient. 
Lors envoia li rois Carmans 
En Espaigne gens soufisans 
À Marcadigas, pour savoir 
De cele besoignele voir. 
Ce trouverent en verité 
Que Cléomadès ot moustré 
Que il Cléomadès estoit, 
Et que de ce voir dit avoit. 
Mais trop grant meschéance avint 
Cléomadès, le jour qu'il vint 
À Sebile ; car il laissa 
Clarmondine seule, et ala 
Ou chastel pour querre son pere 
Et ses trois serours et sa mere, 
Pour faire venir contre li. 
Mais le cheval, ne li aussi, 
Ne porent ainc puis retrouver, 
Pour querre ne pour demander 
Que nule part seüssent faire. 
Cléomadès ire et contraire 
En ot, teles qu'il se coucha 
Malades, n'ainc puis n'en Ieva 
Jusqu'à tant c'on li ot conté 
Que li rois Crompars n'ot esté 
Puis ce di el pays veüs 
Que cil meschiés fu avenus. 
Cléomadès puis ne fina 
De li requerre et ça et là
C'on li ot de Crompart parlé
PageV02P144
En maint pays a puis esté. 
Li messagier le roi Carmant 
Revinrent irié et dolant 
Au roi Carmant, et li conterent 
Les nouveles, riens n'en celerent, 
Comment Clarmondine ert perdue. 
Dolente en fu et esperdue 
Clarmonde, la bone royne ; 
C'estoit la mere Clarmondine. 
Sachiez si en ot irascu 
Le cuer, que de duel en moru, 
Dont ce fu damages moult grans ; 
Car bone ert et bele et sachans."
# |
Pinchonnès apenséement 
Li a moustré, et sagement, 
La chose ainsi qu'il la savoit 
D'ainsi k'oy dire l'avoit ; 
Et de ce qu'il en ot veü 
Li a moult bel amenteü. 
Kan que de Clarmondine sot 
Li a recordé mot à mot ; 
Car moult fu de bon escient. 
Et li a dit com faitement 
Estoit à Mont Estrait venus , 
Et comment s'i ert combatus 
Tous seuls contre II chevaliers, 
Dont chascuns ert hardis et fiers 
Et de très grant vaillance plains.
"Durbans et Sartans ses conpains
Sont cil," fait il, "qui contre lui 
Se combatirent ambedui 
Cors à cors ; mais k'en mentiroie, 
Moult tost les ot mis la voie."
# |
Pinchonnès moult bel et à point 
PageV02P145
Li devisa de point en point 
Que il de là endroit devint, 
Et com à Chastel Noble vint, 
Et comment il se combati, 
Et comment de là se parti, 
Et com à Durban l'enprunta 
Cléomadès, quant s'en ala :
"Vers moi et vers tous se celoit. 
Ne savoie qui il estoit 
Quant nous venimes ci er soir ; 
Aussi me doinst Diex joie avoir. 
Mais hui, puis qu'il fu ajorné, 
M'a dit de lui la verité, 
Et m'a commandé et priié 
Que par moi soit dit et noncié 
Qui il est, et qu'il m'en souviengne 
Partout en quel lieu que je viengne, 
Et comment bien li est cheü 
Dou très grant meschief où il fu. 
Vous meïsme me rouva dire 
Que vous n'aiez corrous ne ire 
S'il a s'amie retrouvée.
De ce k'ainsi l'avez gardée 
Vous mande k'il vous set grant gré, 
Et vous seroit guerredonné 
Folio53v
S'il povoit jamais chose faire 
Qui vous ne les vos peüst plaire. 
Sachiez que par cel cheval là 
Seur quoi Cléomadès s'en va 
Est toute la chose avenue 
Qui ci vous est ramenteüe. 
Ce que je sai vous en ai dit 
Que je n'en ai de riens mentit."
# |
Meniadus a regardée
Sa mere, qui ert tormentée 
PageV02P146
Et sa suer, qui ert esbahie. 
Bien ont entendue et oye 
La parole que Pinchonnès 
Ot dite de Cléomadès.
# |
"Dame," ce dist Meniadus, 
"Soutieument nous a deceüs 
Cele femme, qui se faisoit 
Fors dou sens, mais pas ne l'estoit ; 
Ains nous le faisoit entendant 
Pour ce qu'ele n'avoit talant 
K'autres l'eüst que cil qui l'a. 
Très loiaument ouvré en a 
Et sagement, ce m'est avis. 
Meniadus li Rois Chaitis 
Aurai à non tout mon vivant. 
C'est mes drois nons, de ce me vant ;
Car je l'ai par droit desservi 
C'onques si chaitif roi ne vi 
Com je sui, se Diex me consaut. 
Et cil a sailli noble saut 
Qui enporte ce dont j'estoie 
Saisis, et que je tant amoie. 
Or saije bien certainement 
Que ce fu Crompars vraiement 
Qui en ce pays l'amena 
Selonc ce que cis dit nous a. 
Dame, ihit il, bien vous disoie, 
Mais estre creüs n'en povoie, 
Que cele ert de bon lieu venue 
Dont faire vouloie ma drue ; 
Ne ce ne porroit jamais estre 
Que pucele de si bel estre 
Que cele damoisele estoit,
Venist fors de bon lieu par droit. 
Moult me merveille durement
PageV02P147
Que mareheänt ou autre gent 
Qui par ici sont trespassant, 
Dont par an en i passe tant, 
Ne m'en dirent onques riens née. 
C'est par ma dure destinée 
C'onques nouveles n'en oy 
De nului qui passast par ci. 
Jamais ne quier oïr nouveles 
En mon vivant, laides ne beles , 
Et j'en quit dès ore en avant 
Ceaus qui par ci seront passant ; 
Car jamais oïr ne porroie 
Nouvele dont j'eüsse joie 
Ne je n'en quier mais nule oïr ; 
Mais, se la mors vouloit venir 
Et me preïst tout maintenant, 
N'est riens que je vousisse tant.
Ma vie et moi tous jours harrai ; 
Car par raison desservi ai 
Que jamais ne me doie amer. 
Noiez vorroie estre en la mer. 
À pou s'en faut que ne me noie, 
Ou que je ma loi ne renoie, 
Quant fui à si dure heure nés."
#|
Pinchonnès vit que tormentés 
Fu li rois et cil qui là sont. 
Les nouveles partout s'en vont 
Que la damoisele est garie 
Qui de son sens ert marvoiie, 
Et li maistres l'en ot portée, 
Qui de son mal l'ot delivrée, 
Avoeques lui seur le cheval. 
Grant merveille amont et aval
PageV02P148
Orent partout quant ont seü 
Qui cele damoisele fu 
Et comment esploitié avoit. 
Chascuns partout s'esmerveilloit 
Et de li et de son afaire. 
Se tout vous vouloie retraire 
Kan que chaseuns disoit partout. 
Sachiez que g'i metroie moult 
Ains que le vous eüsse dit. 
# |
Si trestost que Pinchonnès vit 
Son point, au roi vint congié prendre ; 
Car il n'estoit pas à aprendre 
De savoir ce c'on devoit faire. 
Meniadus ot grant contraire 
cuer, et nepourquant li dist 
Que il maishui là remansist 
Et le matinet s'en iroit. 
Pinchonnès dist qu'il le feroit 
Puis qu'il plaisoit au roi ainsi.
# |
La royne et sa fille aussi 
Erent abaubies et mues. 
À Meniadus sont venues. 
Que vous iroie je contant? 
Eles le vont reconfortant 
Au plus bel qu'eles onques porent 
Et au miex que faire le sorent ; 
Car sens est de laissier ester 
Ce que on ne puet amender, 
Et folie de chose enprendre 
Dont on puist blasmer et reprendre 
Celui qui l'enprent ; car on prise 
Pou celui qui fait fole enprise. 
Maintes fois en ont perdu pris 
Cil qui folement ont enpris. 
PageV02P149
Grant sens a en euprendre à point. 
Chascuns i doit garder son point, 
Et viel et joene, et povre et riche. 
Cil qui ne le font font que niche. 
Tex set bien conseillier autrui 
Qui pas ne set conseillier lui. 
#|
La royne et sa fille estoient 
En desconfort, et confortoient 
Celui qui ert desconfortez ; 
Et s'estoit lors desconfors tez 
Que pou i avoit de confort. 
Tant les destraint li anuis fort 
Que pour Clarmondine eü ont, 
Que moult esbahies en sont. 
Nonpourquant, moult parla au roi 
Argente sa suer, sans desroi. 
# |
"Sire," fait elle, "ne pensez. 
Mais savez vous que vous ferez? 
Pensez à ce qui puet valoir, 
Et metez ce en non chaloir 
Folio54r
De quoi ne vous puet bien venir. 
À fenme ne povez faillir. 
N'a roi ou mont ne vous donnast 
Sa fille, jà tant ne l'amast, 
Se vous requerre la faisiez."
"Argente," dist li rois, "taisiez. 
N'ai talent de moi marier. 
Jamais nul jour n'i quier penser. 
Ne parlez plus, ce vous requier , 
Fors de moi ou pendre ou noier ; 
Car je l'ai desservi si bien 
K'en la desserte ne faut rien. 
Se rois doit mais estre pendus, 
Ce soit li rois Meniadus."
PageV02P150
Quant Argente le roi entent, 
Le cuer en ot triste et dolent, 
Et sa mere moult s'en gaimente ; 
Car moult en ert au cuer dolente. 
Tout celui jour là demora 
Pinchonnès. Moult li anuia 
Que il n'estoit de là partis. 
Ains que jours fust paravespris, 
Prist congié ; car talent avoit 
De mouvoir matin, s'il povoit. 
Mais, comment que Meniadus 
Fust courrouciez ne esmeüs, 
Ne mist pas pour ce en oubli 
Que don tel k'à roi aferi 
Ne feïst Pinconnet donner. 
Le don ne vous sai pas nommer ;
Mais don ot bel et soufisant 
Et au donneur et au prendant. 
Et Pinchonnès l'en mereia. 
# |
Lendemain matin se leva, 
Si tost k'à son oste ot baillié 
Le palefroi qu'ot chevauchié 
Cléomadès, qui commandé 
Li ot, et il li a donné. 
Quant de là departis se fu, 
Son droit chemin a tant tenu 
De vile en vile, d'oste en hoste, 
Que il vint droit à Verde Coste, 
Oil reeeüs fu liement. 
Lyadès a conté comment 
Toute la besoigne est alée. 
Quant la nouvele ot escoutée 
Lyadès, nesun mot ne dist 
Nient plus qu'ele ne l'entendist ; 
Car nesun mot parler ne pot 
PageV02P151
Pour la très joie qu'ele ot. 
S'on peiist de joie morir, 
Ele deiist par droit fenir.
# |
Pinchonnet estroit embraça ; 
Voiant tous, souvent le baisa, 
Qu'ele tenir ne s'en povoit 
la grant joie qu'ele avoit. 
Tost fu la nouvele espandue 
Parmi le chastel et seüe 
Que Pinchonnès a aportée, 
Que Clarmondine ert retrouvée, 
Et que cil ert Cléomadès 
Qui combatus pour Lyadès 
S'estoit entre lui et Durbant. 
Lors ot léenz joie si grant 
Que nus ne peüst penser plus. 
Savoir povez que bien venus 
Fu Pinchonnés pour ses nouveles ;
Car bones Ior furent et beles, 
Et gracieuses et plaisans. 
Partout fu chascuns moult joians.
# |
Iluec n'est gaires demorez 
Pinchonnès, ains s'en est alez 
À Chastel Noble, au roi Carmant. 
Quant il vit Pinchonnet venant, 
Demanda li qu'ert devenus 
Li chevaliers qui combatus 
S'estoit as gens Bleopatris, 
Ne s'il estoit ou mors ou vis.
# |
Quant Pinchonnès l'ot salué, 
Lors li a dit la verité 
De ce que demandé li a. 
"Sire," fait il, "sachiez cil là 
Qui ci endroit fit la bataille
PageV02P152
Ce fu Cléomadès, sans faille. 
Sachiez que vraiement le sai ; 
Car avoeques lui m'en alai. 
Par le commant de mon seignour, 
Nouveles plaines de douçour 
Vous dirai, qui bien doivent plaire. 
Clarmondine la debonaire, 
Vostre fille, à Salerne vi 
Le jour devant que j'en parti, 
Saine et haitie et en bon point. 
Or ne vous en soussiez point ; 
Car sachiez, c'est veritez fine, 
Que retrouvée a Clarmondine 
Cléomadès ; et ce fut cil 
Qui l'autrier geta de peril 
En vostre court les III puceles."
"Garde que tu dies nouveles," 
Fait Carmans, "qui soient créables." 
"Sire, cestes ferai estables," 
Fait Pinchonnès, "et ne m'amez 
Jamais, se ce n'est veritez." 
# |
Lors fu li rois Carmans si liez 
Qu'il ne pot demorer sor piez, 
Ains s'assist, et puis apela 
Pinchonnet, et si l'embraça 
Entre ses bras tout en séant. 
Onques mais n'ot joie si grant. 
"Ha ! Pinchonnet," fait il, "merci ! 
Garde pour Dieu qu'il soit ainsi 
Que tu me fais ici entendre !" 
"Sire, faites m'ardoir ou pendre 
S'il n'est ainsi que je vous di. 
Trois semaines ot dès lundi 
Que je me departi de là, 
Et le jour devant enporta
PageV02P153
Vostre fille Cléomadés 
K'encor ert là li chevalés 
Sor quoi premerains l'enmena. 
La pucele et le cheval r'a, 
Ce sachiez bien certainement."
# |
Lors lor a devisé comment 
Clarmondine esploitié avoit ; 
Au plus adroit qu'il le savoit 
Lor a mot à mot recordé. 
Et, après, lor devisé 
De Cléomadés autressi, 
Comment de là se departi 
Et comment amuser les sot 
Tant que il Clarmondine r'ot, 
Folio54v
Et comment au roi se nomma 
À l'eure qu'il parti de là. 
Bien leur dist k'en Espaigne aloit 
Et que Clarmondine enportoit.
"Mais s'onques nus fu esperdus 
N'esbahis, rois Meniadus 
Le fu, et plusour autre aussi ; 
Car toute la besoigne vi. 
Bien sai k'à vous envoiera 
Tantost k'en sa terre venra 
Cléomadès, j'en sui certains."
# |
De joie fu comblés et plains 
Li rois Carmans, ce povez croire. 
Bien croit que la chose soit voire 
Que Pinchonnès li ot contée.
# |
Lors est cele nouvele alée 
Par la vile et par le chastel. 
Mener oïssiez maint revel 
Parmi rues, parmi maisons ;
PageV02P154
Car il en estoit bien saisons 
Que là fust grant joie menée 
Où si grant chose ert recouvrée 
Que si adrecie pucele 
Com ert Clarmondine la bele.
# |
Tost fu cele nouvele alée 
En maint lieu parmi la contrée. 
Partout en furent esjoï 
C. tans plus que je ne vous di. 
Chascuns à Pinchonnet donnoit 
Plus que il prendre ne vouloit. 
De ce ne couvient pas parler. 
Liez fu qui li povoit donner 
Pour les nouveles k'aporta. 
Li rois Carmans tant li donna, 
Que à tous jours, sachiez de voir, 
En fil miex et lui et son hoir.
# |
Messagiers fist apareillier 
Li rois Carmans sans detriier. 
Devers sa fille les envoie. 
Cil se mirent tost à la voie ; 
Car moult les prioit de baster 
Carmans, et de tost retorner, 
Et cil li ont bien en couvent 
Qu'il revenront hastéement.
# |
Or ne soit jà de ce ensoigne ; 
Car il hasteront la besoigne, 
De ce ne couvient pas douter. 
Et Pinchonnès, sans arrester, 
Prent. dou roi eongié. Lors s'en part. 
Au chemin se met cele part 
Où son seignour Durbant cuidoit. 
Par tous les lieus où il venoit 
Disoit nouveles de celi 
PageV02P155
Dont plus estoient esjoï 
M. tans que dire ne saroie. 
Tous li pays bruioit de joie.
# |
Sachiez que Pinchonnès estoit 
Moult liez quant bien dire povoit. 
C'est chose bien aferissans 
Quant menestrex est bien disans 
Et que il se gart de mesdire ; 
Car ramentevoir doit et dire 
Li menestrex de bon afaire 
Le bien, et dou mal se doit taire, 
Partout, en quel lieu que il soit, 
Ou n'est pas menestrex à droit. 
Drois menestrex se doit garder 
De mesfaire et de mesparler. 
Ne doit mos issir de sa bouche 
Qui nul point de mesdit touche. 
Tous jours doit estre apareilliez 
Que li biens soit par lui nonciez
Par tous les lieus où il venra. 
Bien ait qui ainsi le fera !
# |
Pinchonnès n'a pas detriié. 
Tant a erré et chevauchié 
Qu'il est venus à Mont Estrait. 
Ce vous puis je dire entresait 
Que Durbans grantjoie li fist. 
Andeus ses bras au col li mist. 
Le premier mot k'à lui parla, 
Ce fu ce qu'il li demanda 
Que Meschéans d'amours faisoit, 
Ne pourquoi il laissié l'avoit, 
Ne s'il estoit ou vis ou mors.
# |
Dist Pinchonnès: "Sire, c'est tors
PageV02P156
Qu'il ait non d'amours Meschéans , 
K'ainc d'amours ne fu miex chéans 
Nus hom, qu'il l'en est or cheü, 
Conment qu'il en fust mescheü. 
À grant merveille vous venroit 
Se saviiez qui cil estoit. 
Je croi que moult grant joie auriez 
Se le voir de lui saviiés. 
Li chevaliers dont vous parlez 
C'est Cléomadès ; ce créez, 
Car c'est certaine chose et voire, 
Par ses fais le povez vous croire 
Et savoir tout certainement. 
Sa prouece et son hardement 
Devez bien metre en retenance ; 
Car valu vous a la vaillance 
Dont en lui moult grant plenté a,
Et croi k'encore vous vaurra 
Ce k'à vous a amour si grande. 
Par moi Cléomadès vous mande 
Salus, et que vers lui venez 
Au plus tost que onques povez, 
Et se li amenez Sartant, 
Ce vous prie, se l'amez tant. 
Or vous dirai que il faisoit 
En ce pays. Il requeroit 
Clarmondine, qu'il enporta 
Ainsi que vous savez pieça. 
Sachiez que vraiement vous di 
Que le darrainjour que je vi 
Cléomadès et Clarmondine,
Ert li uns de l'autre en saisine. 
Cléomadès, conme la soie,
L'enportoit." Lors ot si grant joie 
PageV02P157
Durbans, que il ne pot mot dire. 
De joie conmença à rire. 
# |
Lors Pinchonnet par la main prent, 
À Sartan l'enmaine erranment 
Au lieu là où il se gisoit; 
Car encor pas garis n'estoit 
Dou mal que il avoit eü. 
Quant il a Pinchonnet veü, 
Tous li cuers de joie li rist. 
Pinchonnès le salue, et dist 
Que Diex santé li envoiast. 
Lors li dist que il se hastast 
Folio55r
De garir ; car cil le mandoit 
En cui toute bonté manoit' 
K'à lui venist hastéement.
"C'est Cléomadès vraiement, 
Sire," fait il, "qui vous salue." 
Ilueques a ramenteüe 
Trestoute la chose et l'afaire 
Comme cil qui bien le sot faire.
# |
Que feroie lonc parlement ? 
Tout lor a conté ensement 
Conment la chose estoit alée 
Et conment avoit retrouvée 
Clarmondine Cléomadès. 
Se festiiés fu Pinchonnès 
Et conjoïs, n'el demandés. 
De maintes pars fu acolés 
Pinchonnès à cele venue. 
Et la nouvele est espandue 
Parmi le chastel, et alée, 
Que Clarmondine ert retrouvée, 
Et que cil Cléomadès fu 
Qui avoit Sartan abatu,
PageV02P158
Et Durban, lor seignor, conquis. 
Partout fu chascuns esjois 
De ces nouveles ; car plaisans 
Estoient et moult avenans.
# |
De par Cléomadès errant 
Salua la fenme Durbant 
Pinchonnès; pas ne l'oublia, 
Car Cléomadès l'en pria ; 
Et la fenme Sartan aussi 
Et lor conpaignie autressi 
Li pria moult de saluer. 
De ce vous lairai or ester. 
Moult durement le mercierent ; 
Souventes fois pour lui prierent.
# |
Se je deviser vous vouloie 
De chascun trestoute la joie 
Que il pour les nouveles orent 
Quant la certaineté en sorent, 
Trop me seroit pesant et grief ; 
Je n'en venroie mais à chief.
# |
Cléomadès requis eüssent 
Durbans et Sartans, se ne fussent 
Les essoignes et les grietés 
Que Sartans ot eües tés 
K'ainc puis ne fu de santé nès 
K'à lui jousta Cléomadès, 
N'ainc puis se ne pot si aidier 
Que il peüst nes chevauchier ; 
Car andoi enpensé avoient 
Que ensamble le requerroient 
Pieça que Durbans meü fust, 
Se Sartan atendu n'eüst.
PageV02P159
Des nouveles Pinchonnet furent 
Lie et joiant k'estre le durent. 
Bien et bel fourni son message 
Pinehonnès, à loi d'onme sage, 
Que il n'i a rien oublié 
D'ainsi qu'il li fu commandé. 
De la nouvele qu'ot contée 
Fist maint cuer lie[z] par la contrée 
De la terre le roi Carmant. 
Mais de ce me tairai à tant.
# |
Si dirai conment esploita 
Cléomadès, quant s'en ala 
De Salerne, atout Clarmondine, 
Deseur le cheval qui ne fine 
D'aler tant qu'il plaist à celui 
Qui set la maniere de lui, 
Mais que il soit seur lui montez. 
Sachiez que li chevaus ert tez 
Que je le vous ai dit devant. 
Cléomadès esploita tant 
K'esloignie ot Salerne si 
Que il li plot et abeli.
# |
Quant de Salerne partis fu, 
Après ce a pou atendu 
Qu'il n'ait son cheval avalé 
El premier lieu qu'il ot trouvé, 
Où il faisoit bel et plaisant. 
Une fontenele sourdant 
Trouva souz I arbre en I pré. 
Flouretes avoit grant plenté 
El pré, et amont et aval. 
Lors a avalé son cheval 
Droit en costé la fontenele 
Qui Clere et sourdant sor gravele
PageV02P160
Estoit. Moult i faisoit joli.
# |
Cléomadès là descendi. 
Car moult avoit grant desirrier 
De garder de trop traveillier 
Clarmondine, se il pouist ; 
Car moult volentiers li feïst 
Chose qui li venist en gré. 
De ce avoit grant volenté, 
Si grant qu'il ne povoit ; 
Car de si très loial amour 
L'amoit, c'on ne povoit penser 
Conment plus loiaument amer 
Peüst nus hom que il faisoit. 
Et Clarmondine aussi estoit 
Pointe au cuer d'un tout si fait point ;
Car tout en aussi loial point 
Amoit ele lui com il lui. 
Amours le commandoit ainsi. 
Et il le commant en faisoient 
De cuer, si que plus ne povoient 
Au commant d'Amours obéir ; 
Ains se penoient de servir 
Amours si amoureusement 
K' Amours lor service en gré prent 
Com des II plus loiaus amans 
Qui aine fussent Amours servans.
# |
Cléomadès fu descendus 
Souz l'arbre, et si ot mise jus 
Clarmondine dou chevalet. 
Lés la fontaine, ou praëlet 
L'enmena, et lors si s'assirent. 
Moult volentiers l'uns l'autre virent ; 
Car de loial amour s'amoient. 
D'amoreus iex se regardoient.
PageV02P161
Longuement ensamble parlerent ; 
Li uns l'autre moult raconterent 
De ce k'avenu Ior estoit.
# |
Dist Cléomadès : "J'ai bien droit, 
Très douce dame, d'obéir 
Vous et Amours ; car desservir 
Ne puis jamais, se Diex me voie, 
Ce que pour moi quéistes voie 
Si diverse que vous quéisets 
Quant vous le hors dou sens feïstes. 
Folio55v
Vers moi avez loial esté ; 
De cuer avez mainte grieté 
Par la grant loiauté eüe 
K'envers moi avez maintenue. 
Or le me doinst Diex desservir 
Si vraiement que le desir."
# |
Et Clarmondine l'en mereie, 
Conrne sage et bien ensaignie, 
Et li dist moult courtoisement 
Et moult trés apenséement : 
"Sire, plus avez fait pour moi 
Que je pour vous, ainsi le croi, 
Quant vous m'avez voulu requerre 
En tant pays, en tante terre. 
Mainte paine, mainte pensée, 
Conment m'eüssiez retrovée, 
Avez eü pour moi souvent, 
Dont je vous mercie forment. 
De Dieu vous soit guerredonné 
K'envers moi avez si ouvré. 
De desservir tout mon vivant
Ai desir et volenté grant."
# |
À Cléomadès moult plaisoit
PageV02P162
Que Clarmondine en gré prendoit 
De ce que tant l'avoit requise. 
Mainte parole bien assise 
Et bele, et à point recordée , 
Fu d'aus deus là endroit moustrée ; 
Car sens et raison et avis 
Ot en aus, plus que ne devis 
Ne que deviser ne saroie.
# |
Joie de cuer en cele voie 
Estoit lor maistres chambellens. 
Sachiez que Anuis ne Tormens 
N'estoit point en leur conpaignie. 
Joie i avoit si grant maistrie 
K'Anuis ne povoit tour trouver 
Par quoi il peüst arrester, 
Ne Tormens. Et si i clamoient 
Droit, pour ce qu'il i avoient 
Mes an et jour, et encor plus. 
Mais Joie leur dist que venus 
Ert en aus li rois de Leeee, 
Par quoi ne Anuis, ne Tristece, 
Ne Tormens en aus ne povoit ; 
Ailleurs aler les couvenoit ; 
K'en aus orent Ior ostel pris
Deduis, Solas, et Jus, et Ris ; 
Et est Amours en aus estable 
Qui de tout ce est connestable. 
"Querez vostre arrestanee aillours ; 
Ci ne sera plus vos sejours. 
Si malement me deboutastes, 
Quant vous en mon lieu sejornastes, 
Que je ne povoie trouver 
Lieu où me pouisse arrester. 
Trop i clamastes grant hausage, 
Dont ne feïstes pas que sage.
PageV02P163
Amours m'a en mon droit remis. 
Le lieu ai saisi et pourpris. 
Je claim le lieu par iretage. 
Jamais n'i maintenrez hostage, 
Tant que g'i aie tel povoir 
Com g'i cuit orendroit avoir."
# |
Anuis et Tormens se partirent 
De cel lieu, k'apertement virent 
Que il en estoient bani. 
# |
Cléomadès, si com vous di, 
Sist souz l'arbre lès la fontaine. 
De cele moult servir se paine 
Que il aime de cuer entier. 
Un petitet la fist mengier, 
Et il avoeques li menga. 
Cil mengiers moult li agrea 
De cuer, et aussi fist il li 
De cel mengier bien departi. 
Les entremés à droit amours, 
Amorous regart et douçours 
Estoient, et plaisance aussi 
Li entremés que je vous di. 
Assez ont mengié et beü. 
Moult Ior plot ce qu'il ont eü.
# |
Lors vint Clarmondine la bele 
Lès l'arbre, sous la fontenele, 
Et dist que là se dormiroit 
I petit ; car lassée estoit. 
Et Cléomadès dit li a 
Que sor son giron dormira 
Et se reposera assez. 
Lors est tantost avant passez. 
Souz l'arbre s'assiet, et la prent
PageV02P164
Sor son giron moult doucement. 
À Clarmondine forment plot 
Li oreilliers qu'ele adont ot. 
Sor maint oreillier ot geü ; 
Mais n'en ot onques nul eü 
Qui au euer li fust si plaisans 
Com cil li fu, ne miex séans.
# |
La pucele lors s'endormi ; 
Et Cléomadès la couvri 
Moult très doucement et moult bel 
D'un des corons de son mantel, 
Ainsi com ele se dormoit. 
Et Cléomadès regardoit 
À merveilles la grant biauté 
bont ele avoit si grant plenté 
Qu'ele plus avoir n'en povoit. 
La rose forment se penoit 
De la flour de lis honnorer 
En son très douz viaire cler. 
Manoient ces flours par acort 
Si qu'il n'i ot point de descort, 
N'i avoir povoit descordance, 
Tant estoient d'une acordance.
# |
L'une des flours tant l'autre amoit, 
Que li une à l'autre partoit 
Tout ce qu'ele avoit à droiture ; 
Car conmandé Ior ot nature 
Que eles cel lieu miex amassent 
Et k'en cel lieu miex s'acordassent 
K'en lieu où aine esté eüssent 
Ne où jamais aler deüssent.
PageV02P165
Bien avoil la rose. et li lis 
Fait le conmant et le devis 
Que nature lor avoit fait, 
Sans oubliance et sans mesfait.
# |
À Cléomadès tant plaisoit 
La grant biauté k'en li véoit, 
Qu'il n'en avoit povoir d'oster 
Ses iex, ne d'aillours regarder, 
Ne il n'en avoit volenté. 
Si oeil s'i erent acordé 
Folio56r
Si, par le conmant de son cuer, 
K'aillours ne pensast, à nul fuer. 
Tant li ert plaisans la façon 
Dou front, dou nés et dou menton 
Et de la gorgete polie, 
Plus blanche que n'est nois negie 
Et de la bouche vermeillete 
Plus que ne soit en may rosete 
Qui n'est pas toute parcreüe, 
Que adès avoit sa veüe 
Tornée vers son douz viaire.
# |
Ne vous saroie pas retraire 
Conment Hardemens le prioit 
De li baisier, mais il n'osoit. 
Bien s'i fust Desirs acordés ; 
Mais Raisons li disoit : "Soufrés ; 
Gardés que vous ne la baisiez, 
K'espoir Amour corrouceriez ; 
Et on se doit moult bien garder 
De son bon seignor tormenter. 
Et Amours vous a retenu 
À soi, et voUs a maintenu
PageV02P166
En courtoisie puiscedi 
Qu'ele vous retint avoec li. 
Amours feriez larrecin grant 
Se vous la baisiez en dormant. 
Loiaus Amours onques n'ama 
Larrecin, ne jà ne fera."
# |
Dist Hardemens : "Vous la baisastes 
Le premier jour que la trouvastes 
À Chastel Noble, par mon los." 
"Par verité tesmoignier os 
Que vous la baisastes à droit," 
Dist Raisons : "car encor n'estoit 
D'Amour saisis ne retenus ; 
Par quoi il est or plus tenus 
À Amours, qu'il n'estoit adont." 
# |
Et lors Hardemens li respont 
Que jà pour ce ne le laira ; 
Car il puiscedi la baisa 
K 'Amours l'ot retenu o soi. 
"Ceste chose vraiement soi," 
Fait Hardemens ; "car je i fui. 
Souvent ai esté avoee lui. 
Par moi mainte chose faita : 
Je ne sai qu'il or en fera."
# |
"Certes," dist Raisons, "bien le croi. 
Aussi a il ouvré par moi 
Et par Avis, mon conpaignon, 
Qui ainc ne li fist se bien non. 
Nous li avons valu souvent ; 
Aussi avons nous mainte gent. 
Vous estes souvent trop hastiex. 
Aussi vraiement, m'aït Diex, 
K'ainc à faire ne li loai 
PageV02P167
Outrage, ne jà ne ferai. 
Ce k'à Chastel Noble revint 
Et qu'il la baisa, ce avint 
Par moi, une moult grant pitié 
K' avoir n'el peüst esveillié 
Si coiement que d'un baisier; 
Car de noise n'avoit mestier 
Adont, ains li ert moult contraire. 
Pour ce m'acordai à ce faire. 
N encore pas de li n'estoit 
Saisis si qu'il est orendroit. 
Et, puis que il en est saisis, 
En son cuer doit penser tous dis 
Conmept Amours très loiaument 
Soit servie amoreusement ; 
Car qui loiaument sert Amours
Il doit garder l'onnour tous jours 
De cele cui il amera, 
Ou envers Amours faussera ; 
Car Amours veut estre menée 
Par Loyauté et gouvernée. 
Je ne di pas que, s'ele estoit 
Esveillie, et il li prioit 
D'un baisier amoreus loial, 
Eschieu de folie et de mal, 
Plain de voloir et de desir 
De loiaument Amours servir 
Que cis baisiers ne me pleüst, 
S'il avenist que ainsi fust."
# |
Cléomadès, conme courtois, 
Devers Raison, à cele fois, 
Se tint. Courroucier ne l'osa ; 
Mais à Desir moult en pesa. 
Aussi fist il à Hardement. 
Mais plus en pesa grandement 
PageV02P168
Desir, k'à Hardement ne fist, 
Que Raisons en tel point le mist 
Que il ne baisast la pucele ; 
Car mouli sambloit à Desir bele. 
Pour ce bien loé li eüst 
À baisier, se Raison pleüst. 
# |
Hardemens plus ne s'en mella 
Adont. Mais Desirs bien jura 
Qu'el cuer Cléomadès manroit 
Tant que il achevé aroit 
Partie de la volenté 
Dont Raisons l'a ore resté. 
Et Raisons dist bien li plairoit 
Quant tans et lieus et poins seroit, 
Et bien en lairoit convenir, 
Ce dist, Hardement et Desir ; 
Mais avoec en la conpaignie 
Seroit, mais n'i vorroit Maistrie 
Mener, ne ele ne Avis. 
Mais avoec lui seront tous dis 
Ele et Avis et Atemprance ; 
Car norri l'avoient d'enfance.
"Moult l'amons et l'avons amé ; 
Car tous jours a par nous ouvré, 
Et à tous jours mais l'amerons. 
Tout son vivant à lui serons."
Ainsi fist Raisons remanoir 
À Desirrier son douz vouloir.
# |
Quant la bele ot assez dormi, 
Lors s'esveilla et dist : "Ainmi, 
Biaus dous amis, où estes vous ?" 
"Je sui eh, biaus très fins cuers dous, 
Debonaires et afaitiez. 
De vostre repos sui moult liez. 
PageV02P169
Dormi avez moult doucement."
"Ai ge dormi trop longuement ? 
Fait ele. Vous anuie il?" 
"Certes, damoisele, nenil" 
Fait il ; "car rions ne me porroit 
Anuier, puisqu'il vous plairoit, 
Ne chose ne me porroit plaire 
Qui de riens vous deüst desplaire. 
Folio56v
Si me soit Amours en aye !"
# |
Et Clarmondine l'en mercie, 
Si conme pucele sachant 
Doit mercier loial amant. 
Lors li dist: "Sire, je vous pri 
Que nous nous partonmes de ci, 
Et hastéement le faisons. 
Je sonjoie ore c'uns lyons 
Me vouloit vous retolir. 
Lors me sambla que vous ferir 
L'alastes, et si l'oceïstes. 
Lors entre vos bras me preïstes. 
Si grant paour eü avoie 
Que entre vos bras me pasmoie. 
Pour moi geter de pasmoison,
Me baisastes près dou menton, 
Ce me fu avis, une fie. 
Je ne sai que ce senefie."
# |
Dist Cléomadès : "Se j'osoie, 
Ce songe vous averiroie, 
S'il ne vous devoit anuier." 
"Sire, nenil, ains vous requier 
Que m'en dites la verité 
De ce k'en [avez] avisé."
PageV02P170
"Puisqu'il vous plaist, et je dirai,"
Fait il, "a ce k'avisé en ai. 
Ore, quant dormistes le miex 
Par samblant, car vos très dous iex 
Aviiés cluigniez doucement, 
Lors me tint à grant parlement 
Desirs, qui forment me looit 
Vous abaisier ; mais ne plaisoit 
À Raison que je le feïsse. 
Vis li ert que je mesfeïsse 
As nobles poins d'amours roiaus 
Dont nus ne set, s'il n'est loiaus. 
Espoir courroucie en fussiez 
Se vous perceü eüssiez 
De moi si faite mesprison. 
Ce senefie le lyon
Qui de moi vous vouloit oster, 
Ce que je osai nes penser, 
Que je vous eüsse baissie 
K'estre en peüssiez courroucie. 
Et, s'ainsi me fust avenu 
Que il me fust tant mescheü 
Que courroucie vous eüsse, 
Errant de duel ocis me fusse, 
Et lors fusson nous departi. 
Ce que je lyon féri 
Ce senefie la Temprance 
Par quoi j'entrai en la doutance 
De vous courroucier ; dont bon gré 
Sai Courtoisie et Loiauté.
Et ce que le lyon ocis 
Senefie que je tous dis 
Sui et serai et ai esté 
PageV02P171
Desirans et en volenté 
De vous amer et obéir 
Et de faire vostre plaisir. 
Et le baisiers que à vous fis, 
Si k'en dormant vous fu avis, 
Senefie loial amour 
Qui confermée est de douçour. 
Le songe ai à droit averé 
D'ainsi que l'aviiez conté, 
Selonc ce que g'i puis viser."
# |
"Sire, moult ne doit agréer," 
Fait la bele, "que tant m'amés, 
Que moi à courroucier doutés 
Tant que vous oi recorder ci. 
C. mile fois vous en merci ; 
Et, pour la loiauté que voi 
En vous, I baisier vous Otroi, 
Par si que plus ne m'en querrez 
busques à tant que vous m'arez 
Espousée." Et quant cil l'entent,
De joie à Dieu ses mains en tent, 
Et l'en mercie, conme cis 
En cui manoit sens et avis. 
Et lors doucement la baisa. 
Cis baisiers Amours agréa, 
Et à raison, car ce fu drois, 
Car il fu loiaus et courtois.
# |
Lors a la pucele remise 
Desus le cheval, en tel guise 
Que ele avoit devant esté. 
Et lors n'i a plus arresté 
Cléomadès, ains s'en ala. 
À lie[z] cuer se parti de là 
PageV02P172
Quant apointié ot son cheval. 
Ainsi maint mont, maint plain, maint val 
Alerent. Souvent s'arrestoit 
Par les biaus lieus, quant les trouvoit, 
Pour faire cele reposer 
Qu'il amoit de cuer sans fausser. 
Adès reposer la faisoit 
Toutes les fois que li plaisoit. 
Ainsi, trestout esbaniant, 
Alerent sor le cheval tant 
Que à Sebile vinrent droit, 
Un mardi, si qu'il ajornoit.
# |
Tout ne vous ai pas devisé 
Conment l'uns l'autre avoit conté 
Son afaire et son couvenant. 
Sor le cheval, tout en venant, 
Recordé orent tout à fait 
L'uns l'autre kan qu'il orent fait, 
Et conment chascuns esploita 
Si com li livres dit vous a 
Que vous avez devant oy. 
Trop i metroie lonc detri 
Se le recordoie autre fois ; 
Ce ne seroit raisons ne drois, 
Et pour ce le lairai ester. 
On ne porroit pas aesmer 
La très grant joie qu'il avoient 
De ce que retrouvé s'estoient. 
# |
Sachiez que à cele ajornée 
Faisoit si douce matinée, 
Que ce estoit uns fins souhais. 
Droit devers le chastel s'est trais 
Cléomadès moult belement. 
D'aillours descendre n'a talent. 
PageV02P173
El jardin pas ne s'arresta 
Où il premierement laissa 
Clarmondine que il r'avoit. 
Sachiez que bien li ramenbroit 
Des meschiés dont ot eü plus 
Que dire ne vous saroit nus. 
Près de la sale, en I praël 
Où il faisoit moult noble et bel, 
Folio57r
Clarmondine lors deslia 
Et jus dou cheval mise l'a ; 
Car ne l'ot talent de laissier 
En sus de lui plain pié arrier. 
Tous jours par la main la tenoit,
Et ele meïsme r'avoit 
En li cel meiSme penser 
K' en sus de lui n'osoit aler. 
Adès près de lui se traioit ; 
Car des meschiés li souvenoit 
Qu'ele avoit longuement eüs. 
# |
À Cléomadès est venus 
Uns hom qui gaitoit sor la tour. 
Tout errant ot corné le jour 
Que Cléomadès venus fu. 
Maintenant a reconneü 
Cléomadès que il le voit. 
Lors s'en vint devers lui tout droit. 
Devant lui s'est agenoilliez. 
"Sire, "fait il, "bon jour aiez 
Et vostre conpaignie aussi, 
K'ainc riens si volentiers ne vi, 
Si m'ait Diex, com je vous voi, 
Ne de riens si grant joie n'oi 
Que de ce qu'estes repairiez." 
"Bien voi que me reconnoissiez," 
Fait Cléomadès. "Biaus amis, 
PageV02P174
Qui estes vous ?" — "Gaite tous dis 
Ai esté céens moult lonc tans ; 
Gaitié i ai près de XXX ans."
# |
Cléomadès li demanda 
Se ses peres li rois ert là, 
Ne sa mere, ne ses serours, 
Ne s'il sont ou là ou aillours, 
Qu'il l'en die la verité. 
Et cil, qui ot cuer avisé, 
Pensa que pas ne li diroit 
Ce que ses peres mors estoit ; 
Car trop à tans entre en la porte 
Cil qui males nouveles porte. 
# |
"Sire," fait il, "de vostre pere 
Ne sai où est ; mais vostre mere 
[Et] Vos trois sereurs vi er soir. 
Et vous puis bien dire pour voir 
Que, se savoient vo venue, 
Que tost seroit ci acorue 
D'eles toute la mains aperte ; 
Car tenir doivent à grant perte 
Ce k'avoir vous cuident perdu. 
Sachiez que maint cuer esperdu 
A en Espaigne, qui auroient 
Grant joie se ci vous savoient."
# | 
Cléomadès errant li dist 
Que par léens savoir feïst 
Que il estoit là revenus. 
Et cil n'est pas arresteüs, 
Ains est partout léens alez. 
À chascuns dist : "Levez ! levez! 
N'est pas Cléomadès perdug. 
En ce chastel est descenduz.
PageV02P175
Trestout certainement le sai, 
Car hui en ce jour veü l'ai ; 
Et, si n'est pas li jours moult viex, 
Nepourquant le vi mes iex 
Hui en ce jour puis k'ajorna. 
Honnis soit qui plus dormira : 
Et si vous di, à bone estrine, 
Que ramené a Clarmondine 
Qui li fu de Crompart emblée ; 
Sachiez que il l'a ramenée."
# |
Cil qui ces nouveles ooient 
Au plus tost qu'il onques povoient 
Se levoient de mainte part ; 
Et cele nouvele s'espart 
Partout et dou Ione et dou lé. 
Tost furent par Iéens levé. 
La gaite pas ne s'oublia. 
Droit en la chambre s'en ala 
Là où la royne gisoit 
Et ses filles que moult amoit. 
# |
La gaite hautement hucha 
Si que tantost les esveilla ; 
Car bien savoit qu'il ne povoit 
Mesfaire, s'il les esveilloit. 
Et, quant il les ot esveillies : 
"Or sus," fait il, "etsoiés lies; 
Car nouveles dire vous sai 
Dont chascune lie ferai, 
Plus lies c'onques ne fussiez 
De nouveles que seüssiez. 
J'ai Cléomadès parlé 
Puiscedi qu'il fu ajorné. 
Vostre frere, que tant amés, 
Je vous menrai, se vous voulés ; 
PageV02P176
Là je le laissai maintenant."
# |
Et chascune se lieve errant. 
Quant ceste nouvele entendirent, 
Conme dervées sus saillirent. 
Li une sa cote saisist, 
Et l'autre son peliçon prist. 
Chascune premerain vestoit 
Ce k'à main premier li venoit. 
# |
Done Ynabele fu levée, 
Qui n'estoit pas la mains hastée, 
Ains fu toute la premeraine. 
À la gaite dist : "Or nous maine 
Là où tu mon chier fill veïs." 
"Je n'el ferai pas à envis," 
Fait la gaite, "ains vous i menrai ; 
Droit enz el praël le laissai, 
Entre la sale et les II tours."
# |
Et celes s'en vont, le grant cours, 
Droit au lieu que dire li oient. 
Si tost que Cléomadès voient 
Le reconnurent maintenant. 
Et Cléomadès, tout errant, 
Si tost que sa mere perçoit, 
Encontre li s'en ala droit. 
Moult très à point la salua. 
Et sa mere mot ne sonna ; 
Car n'avoit de parler povoir. 
À terre la couvint cheöir 
Si tost que ele vit celui 
Qu'ele amoit plus que li n'autrui ; 
Car ses cors porter ne povoit 
La joie que ses cuers avoit.
PageV02P177
À terre cheöir la couvint, 
Et Cléomadès avant vint ; 
Moult doucement l'en releva. 
Ses sereurs qui estoient là 
L'ont tant baisié et acolé, 
K'à pou que ne l'ont desciré. 
Folio57v
Tant l'ont estraint et enbracié, 
Que ce fust à veöir pitié ; 
Car de lui si grant joie avoient 
K'assez conjoïr n'el povoient. 
# |
À Clarmondine sont venues, 
K'à envis s'en fussent tenues. 
Bel et à point l'ont festiie, 
Et honnorée et conjoïe. 
Chascune entre ses bras la tint. 
Kan queu de joie i apartint 
Li firent. Mais merveille avoient 
De la grant biauté k'en li voient.
# |
Si très tost que done Ynabele 
Perçut Clarmondine la bele, 
Si tost com pot vers li ala, 
Et Cléomadès l'adestra. 
Quant Clarmondine l'aperçut, 
Contre li vint. Faire le dut ; 
Car pas à aprendre n'estoit 
De ce que on faire devoit, 
Ains ert de tous biens si aprise 
Que à piece ne fust reprise 
De riens dont ele eüst mespris, 
Tant ot cuer sage et bien apris. 
Done Ynabele doucement 
Clarmondine entre ses bras prent 
Et li dist que très bien venue 
Soit, et à joie receüe. 
PageV02P178
Dist Clarmondine: "Douce dame, 
Diex vous garde en cors et en ame, 
Et vous et vos filles aussi ! 
Dou lie[z] samblant moult vous merci 
Que vous et eles fait m'avez." 
Dist la royne : "O moi venez 
En ma chambre ; car moult lassée 
Me samblez; mais bien reposée 
Serez ains que vous m'eschapez."
"Dame, ainsi iert com vous vorrez,"
Dist Clarmondine sagement. 
Et lors la royne erranment 
En a Clarmondine menée. 
De joie fu riche et comblée 
Clarmondine quant ele voit 
Que ehaseuns liez de li estoit.  
# |
Qui lors veïst acoupre gens 
De chascune part par léens 
Bien deïst que joie i eüst 
Qui joie connoistre seüst ; 
Car, si très tost que il véoient 
Cléomadès, Dieu en looient 
Si haut, qu'il sambloient dervé 
De ce k'avoient retrouvé 
Cléomadès, que tant amoient 
Que plus amer ne le povoient. 
# |
Par la vile fu tost seüe 
Ceste nouvele et espandue ; 
Car la gaite partout couroit 
rue en rue, et Ior nonçoit 
Que Cléomadès revenus 
Estoit. Mais je croi c'onques nus 
N'oy de tel joie parler 
Com oy partout demener. 
PageV02P179
Li premier levé esveilloient 
Ceaus qui par la vile dormoient. 
N'espargnoient huis ne fenestre. 
Partout, à destre et senestre, 
Aloient l'uns l'autre esveillant. 
N'i oïssiez pas Dieu tonnant, 
Tel noise et tel baudour menoient 
De la grant joie qu'il avoient 
De ce que Cléomadès r'ont. 
Vers le chastel acoru sont. 
Quant Cléomadès veöir porent, 
Aine nule si grant joie n'orent 
K' à cele heure qu'il le revirent. 
À Dieu grans graces en rendirent. 
# |
Lors veïssiez letres escrire 
Et en parchemin et en cire, 
Et envoier par la contrée 
D'Espaigne, qui est longue et lée. 
Chascuns à son ami mandoit 
Ce que Cléomadès estoit 
Revenus, et qu'il l'ont veü. 
Quant Espaignol l'ont entendu, 
be nouveles si esjoi's 
Ne fu onques mais li pays 
Conme Espaigne fu à cel tans. 
Partout fu la joie si grans, 
Que n'i sauroie sonme metre, 
Jà tant m'en seüsse entremetre ; 
Car aussi qu'il fussent dervé 
Acoroient cil dou regné 
À Sebile veöir celui 
Que chascuns amoit plus que lui, 
Car à paines croire povoient 
Que ventis fust, s'il n'el véoient. 
PageV02P180
Que vaurroit que plus vous diroie? 
Bien oreilt raison d'avoir joie. 
Mais de ce vous lairai ester, 
Et si vous vorrai recorder 
Com Cléomadès esploita. 
# |
Droit le secont jour qu'il vint là, 
Sot la nouvele de son pere, 
Qui moult li fu au cuer amere ; 
Mais ce qu'il n'el pot amender 
Couvint qu'il le laissast ester. 
Et encore keurt cis usages, 
Et entre fouls et entre sages, 
Que ce c'on ne puet adrecier 
Couvient souventes fois laissier. 
Nepourquant moult le regreta 
Et moult grant duel pour lui mena ; 
Mais sa mere, done Ynabele, 
Le reconfortoit, conme cele 
Qui ert apensée tous jours, 
Et aussi firent ses serours. 
# |
S'il eüst son pere trouvé 
En vie et en bone santé, 
Clarmondine eüst espousée 
Tout erranment, sans demorée. 
Mais, corn cil qui tous biens savoit, 
Pensa que pas n'espouseroit 
Si tost après cele nouvele ; 
Car ne seroit pas chose bele, 
Ains seroit chose mal séant. 
# |
Moult furent ses serours engrant 
Et sa mere aussi d'aaisier 
Clarmondine, et de festiier 
De kanques eles faire sorent 
De quoi en gré servir la porent. 
PageV02P181
De ehaseun fu tantost amée 
Clarmondine ; car tant senée 
Folio58r
Estoit, et de bone maniere, 
Qu'il n'est nus qui ne l'eüst chiere. 
À tous se savait faire amer. 
Car en li n'avoit point d'amer, 
Ne d'orgueil, ne d'outrecuidance ; 
Mais douceur plaine d'atemprance 
Et humilité et raison 
Orent en li fait Ior maison 
Et lor estage à remanant, 
Et furent à tout son vivant, 
Ne je ne croi k'ainc puis Iojassent 
En lieu où eles tant amassent 
K'en son cuer; car moult ert gentis 
Li cuers, et à bien ententis
# |
Cléomadès lors s'avisa
K'au roi Carmant envoiera, 
Ne jusqu'à tant n'espouseroit 
Que il nouveles resaroit 
De lui ; car espoir venroit là 
Puisque il sa fille i saura. 
Et moult vorroit, s'estre povoit, 
Que il i fust à ce point droit 
Que il deveroit espouser ; 
Et, pour plus la chose haster, 
Pensa que seur son chevalet 
I feroit aler un vallet. 
# |
Le vallet fist apareillier, 
Fort et viguereus et legier, 
Qui seur le chevalet ira. 
Cléomadès li devisa 
Conment iroit et revenroit 
Et com fait chemin il tenroit
PageV02P182
Et conment il feroit aler 
Le chevalet, et arrester. 
Dist cil : "Or n'en soiez en soigne ; 
Car je ferai bien la besoigne, 
Se je ne muir, ou maladie 
Ne me vient, qui le me detrie."
# |
Cléomadès au roi Carmant 
Manda par lettres d'amour tant, 
[Et] d'amistiez et de salus, 
Que il n'en i couvenoit plus. 
Kan qu'il apartint mander 
Li manda sans riens oublier. 
Si fist Clarmondine autressi. 
Son pere manda tout ainsi 
Que sa besoigne estoit alée. 
Conme sage et bien avisée, 
Nule riens ne mist en oubli 
De ce que à mant aferi. 
Tout ainsi que mandoit son pere, 
Mandoit ele aussi à sa mere, 
Qui morte ert, mais pas n'el savoit, 
Pour ce lettres li envéoit ; 
Car, s'ele de sa mort seüst, 
Moult grant meschief de cuer eüst.
# | 
Cléomadès, quant devisa 
Ses lettres, pas n'i oublia 
Qu'il ne priast au roi Carmant 
Que il li amenast Durbant 
Et Sartan ; car moult les devoit 
Amer : bien raison i avoit. 
Moult li pria qu'il n'oubliast 
Que il Liadès n'amenast, 
Et Flourete et Gayete aussi. 
Nule riens ne mist en oubli 
PageV02P183
Qui mander apart,enoit. 
Sachiez que bien li souvenoit, 
De Pinchonnet à cele fois. 
Moult erl avisez et courtois. 
En sa lettre forment prioit 
Au roi Carmant, se tant l'amoit, 
Que o lui venir le feist 
Et que il l'en ressouvenist 
Quant à Durbant envoieroit 
Et à Sartan : moult le vouloit. 
Bien et à point sot deviser 
La besoigne, sans oublier 
Riens de ce qu'il i apartint. 
Et li messagés avant vint. 
Lors est sor le cheval montés, 
Quant de ce fu bien arréés
Que à son mouvoir aferoit. 
Et il, qui retenu avoit 
Des chevilles l'ensaignement, 
Prist congié, Et lors erranmeni 
La maistre cheville torna 
Dou cheval, et il l'enporta 
Si tost com cil vouloit aler 
Qui le cheval devoit mener. 
# |
Que vaurroit que je vous diroie 
Conment se maintint en la voie ? 
Sages fu et bien ensaigniez, 
Et avisez et afaitiez ; 
Et pour ce [que] il estoit tés 
Li fu li chevalés livrés. 
Ne couvenist querre plus sage, 
Qu'il ert, pour bien faire I message, 
PageV02P184
Son cheval si à point mena 
Et tant fist et tant esploita, 
Que en Toscane vint tout droit 
Là où li rois Carmans estoit 
À I sien chastel noble et gent 
Que on apeloit Mont Clarent 
Au tans de lors, ce dist l'estoire 
Qui est moult gracieuse et voire. 
# |
Enmi ce chastel descendi 
Li messagés dont je vous di, 
Moult à point et moult sagement. 
Moult se merveillerent la gent 
De toutes pars, quant l'ont veü. 
Li plusour ont reconneü 
Le cheval, s'en furent moult lié. 
Le messagier ont festiié ; 
Car bien pensoient qu'il venoit 
Devers Cléomadès tout droit. 
Et cil à point les salua 
Et leur dist que pas III jours n'a 
Qu'il vit Clarmondine la bele ; 
Et, quant cil oient tel nouvele 
Pe cele qu'il amoient tant, 
euer furent lie[z] et joiant. 
De toutes pars joie demainent ; 
Devers le roi Carmant l'enmainent.
# |
Le cheval avoec lui portoit 
Li messagés ; car n'el vouloit 
Derrier lui laissier tant ne quant. 
Devant le noble roi Carmant 
Vint li messagés, ce me samble, 
Et il et li chevaus ensamble. 
Tost fu dou roi reconneüs. 
Folio58v
Et, quant li rois le cheval voit, 
PageV02P185
Lors pensa k'à lui envoioii 
Cléomadès, s'en fu moult liez. 
# |
Devant lui s'est agenoilliez 
Li messagiers moult sagement ; 
Salué l'a, et lors li tent 
Les lettres k'aportées ot, 
Com cil qui bien faire le sot, 
Premier de par Cléomadès, 
Et de par Clarmondine après. 
Et li rois les lettres reçoit 
Qui moult liez en son cuer estoit 
Des nouveles que il entent. 
Les lettres Iut tout erranment. 
Sachiez k'ens es lettres trouva 
Chose qui moult li agréa ; 
Car bien li devoit, agréer. 
Le messagier fist demorer 
Là endroit tant com il li plot, 
Et cil fist kan que li rois vot 
Et qu'il li plot à commander. 
# |
lui vous lairai ore ester. 
Dou roi et de ceaus dou pais 
Fu honnorés et conjoïs. 
Quant poins en fu, il retorna 
Quant au roi Carmant agréa. 
# |
À Cléomadès revenrai ; 
Car toute l'estoire vorrai 
De point en point si deviser 
Que je n'i cuit riens oublier. 
# |
Cléomadès moult honnoroit
Sa mere, dont il avoit droit ;
Car cil qui honneure sa mere
PageV02P186
Et qui obéist son pere, 
Fait Dieu honneur et lui aussi. 
Sages est qui le fait ainsi, 
Et qui autrement le fera 
Trop à tart s'en repentira ; 
Car on ne puet trop honnorer 
Pere et mere, ne trop amer. 
Cléomadès riens ne feïst 
chose qui apartenist 
Que sa mere savoir deüst, 
K'ainçois que il empris l'eüst, 
Que à sa mere n'en parlast 
Pour savoir que ele en loast. 
# |
Sa mere et ses serours conta 
Cléomadès conment il a 
Alé par maint divers pays 
En requerant cele tous dis 
Que Diex li a ore rendue. 
Grant partie a amenteüe 
Conment ala, ne conment vint, 
Ne k'en la voie li avint, 
Conment à Salerne ert venus 
Et conment rois Meniadus 
Ot fait Clarmondine garder. 
"Certes s'en doit on moult loer," 
Dist clone Ynabele, "tel roi 
Qui si gentil euer a en soi 
Conme li rois dont voUs parlez. 
Bons jours li soit hui ajornez ; 
Car moult a fait grant courtoisie. 
Diex le gart et doinst bonne vie ; 
Car il a fait que gentiex rois. 
Et que sages et que courtois."
# |
Ses trois filles le tesmoignoient 
PageV02P187
Meniadus torment prisoient, 
Et disoient bien que noblece 
Et droite honnour et gentillece 
L'avoient à ce atorné 
Que il avoit ainsi ouvré, 
Et que cil qui mais en orroient 
Parler, plus prisier l'en devroient. 
# |
Clarmondine leur a conté 
La grant honnour et la bonté 
Que la mere ce roi li fist. 
Tout leur conta et tout leur dist 
Conme de trés douce matere 
Trouva la fille et la mere, 
Et conment eles l'onnoroient 
Et de li garde se prenoient, 
Et nuit et jour, et tempre et tart. 
"Dame Diex les maintiengno et gart," 
Fait Clarmondine, "et leur doinst joie 
Si vraiement que le vorroie ! 
Car bien le devroie voloir. 
Se de riens avoie povoir 
Qui leur fust besoins et mestiers, 
Moult le feroie volentiers ; 
Car bien l'ont vers moi desservi."
# |
Quant done Ynabele entendi 
Conment Clarmondine ot parlé 
En son cuer l'en sot moult bon gré, 
Et ses filles moult l'en loerent 
Et à grant bien li atornerent ; 
Car de très grant bien li venoit 
De ce que ele ainsi disoit. 
Cléomadès meësmement 
Li dist : "Bele, se Diex m'ament, 
Pour ce que si d'aus vous loez,  
PageV02P188
Se jamais nouveles oez 
En quoi je leur puisse valoir 
De cuer et de cors et d'avoir, 
À mon povoir leur aiderai, 
Se mestiers est et je le sai." 
Et Clarmondine l'en mercie
À point, conme bien ensaignie.
# |
Les trois serours Cléomadès 
Pensoient nuit et jour adès 
Conment plus honnorer povoient 
Clarmondine, cui tant amoient 
Que plus n'el povoient amer ; 
Car en li n'avoit point d'amer. 
Sens, humilités et, raison 
Ert adès en li en saison, 
Et apensement et avis 
Monteplioit en li tous dis, 
De jour en jour, de plus en plus, 
Plus que dire ne saroit nus. 
Li biens de li et la biauté 
Et la grant debonaireté 
Qui en son cuer estoit manans 
Li fist faire mains cuers amans ; 
Car cil qui miex la connoissoient 
C'estoient cil qui miex l'amoient.
# |
De ce ne vous vueil plus parler ; 
Aincois vous vorrai deviser 
Com Cléomadès esploita. 
À sa mere dist qu'il vorra 
Une feste faire arréer 
Tele que cil puissent conter 
Folio59r
Qui à cele feste seront 
K'à bele feste esté aront, 
Et que cele feste sera 
PageV02P189
Arréée quant là venra 
Li rois Carmans qu'il ot mandé ; 
Car moult avoit grant volenté 
De lui recevoir noblement 
Et d'onnorer lui et sa gent.
# |
"Biaus fiex," ce dist done Ynabele, 
"Drois est que la feste soit bele, 
Après tel perte recouvrée 
Dont Espaigne ert si esgarée ; 
Mais bien y a joie rendue 
La vostpe douce revenue, 
Et ce k'avez ci amenée 
La plus bele qui aine fust née 
Et fille à roi de grant value 
Qui Ionc tans a esté perdue. 
Bien doit on grant joie mener 
À si grant perte recouvrer. 
Biaus fiex, com de vous et de li 
Onques si douce riens ne vi 
Qu'ele est, Diex la vueille sauver ! 
On ne la porpoit trop loer, 
Tant y a de tous biens plenté 
Parmi toute la grant biauté 
Dont ele a tant, k'à fin souhait 
Ne couvient qu'ele plus en ait. 
Or soit si la feste arréée 
Et de tout si bien estofée 
Que on puist dire k'ainc nul jour 
Ne fu feste de tel valour." 
"Ma dame, fais en iert vos grés,"
Fait Cléomadès, "n'en doutés." 
# |
À Cléomadès moult plaisoit 
Ce que sa mere tant prisoit 
Clarmondine, et tant l'avoit chiere,  
PageV02P190
Et tant li moustroit bele chiere. 
Joie ot de ce que tout l'amoient 
Pour la bonté k'en li véoient. 
# |
À Sebile erent assamblé 
Li haut baron de son regné. 
Les féautés et les homages 
Recut de sa gent, conme sages, 
Ainsi qu'il i apartenoit 
Selonc le tans qui lors estoit. 
N'ai cure de ce raconter. 
Cléomadès a fait crier 
La feste qu'il vorra tenir, 
À si lonc terme que venir 
I puist on de pluseurs contrées 
Sans faire trop grandes jornées ; 
K 'adonc se fera coronner 
Et vorra sa fenme espouser, 
Et iert sa fenme coronnée. 
Ainsi fu la feste criéée. 
# |
À Sebile fust establié 
La feste. Or est drois que vous die 
En quel lieu cele feste fu. 
Ainsi que je l'ai entendu 
Me plaist k'entendre le vous face. 
Arainne a à non cele place ; 
À droit la vous cuit deviser. 
Si com j'ai oy recorder, 
Encore est ainsi apelée , 
PageV02P191
Tesmoing ceaus de cele contrée. 
Defors les murs, près dou chastel, 
Siet cil lieus. Moult i faisoit bel 
Au tans dont vous m'oez parler. 
Près de là vient li flues de mer, 
Et si a riviere corant. 
Place y a bele et lée et grant. 
Là fu la grant feste tenue 
Tele k'ainc puis ne fust veüe 
Nule qui s'i apartenist 
Ne de riens à li se presisi. 
# |
Cléomadès lors s'avisa 
K 'à Meniadus mandera 
Par lettres la certaineté 
De ce que il a là esté, 
Et que il Cléomadès fust, 
Et que seur le cheval de fust 
En ot Clarmondine portée 
De Salerne, et l'avoit gardée 
Si que il l'en savoit bon gré, 
Et li seroit guerredonné. 
S'il povoit jamais chose faire 
Qui lui ne les siens deüst plaire, 
Il ne s'en feroit pas priier, 
Ains le feroit de cuer entier. 
# |
Cléomadès moult anuia 
Que dès dont ne s'en avisa 
Que à Chastiau Noble tramist 
Le cheval de fust. Bien vousist 
Qu'il s'en fust dès dont avisez ; 
Car cil au cheval fust alez 
Au roi Carmant et là ensamble. 
Nonpourquant par raison li samble 
Qu'il n'est pas drois qu'il i envoit 
PageV02P192
Le cheval, pour ce qu'il avoit 
Par le cheval cele perdue 
Dont il cuida faire sa drue, 
Et croit que, se là revenoit 
Li chevaus, et il le véoit, 
Qu'il en aroit au euer anui. 
Miex vient qu'il i envoit autrui ; 
Car riens qui li deüst desplaire 
Ne vorroit pas volentiers faire, 
Ains le vorroit moult honnorer. 
À cele lettre deviser 
Fu sa mere done Ynabele, 
Si fu Clarmondine la bele, 
Qui moult lie de cuer estoit 
De ce que tel chose mandoit 
Cléomadès Meniadus. 
Grans amistiez et grant salus 
Manda Clarmondine la gente 
La royne et sa fille Argente, 
Et le roy, bien raison y a, 
Car bon et courtois le trouva.
# | 
À Meniadus a mandé 
Cléomadès moult d'amisté 
Et de courtoisie et d'onnour 
Et li a fait savoir le jour 
De la feste que tenir doit ; 
Et moult durement li prioit 
Qu'il i venist se il peüst, 
Et bien certainement seüst, 
S'il i venoit, que au sien mant 
Venroit d'ui ce jour en avant 
Là où il le vorroit avoir, 
Et metroit et cors et avoir 
PageV02P193
Folio59v
En lui et en s'onnour garder, 
Se tant le vouloit honnorer 
Que il à sa feste venist. 
As messagés pria et dist 
Que il d'el aler se hastassent 
Et que tost arrier retornassent. 
Et cil dient qu'il le feront. 
À tant de là parti se sont. 
# |
Messagiers sages et senez, 
Chevaliers preus et alosez 
I envoia, ne sai pas kans ; 
Mais bien sai que l'un des conmans 
Que Cléomadès eonmanda 
À eaus quant partirent de là, 
Ce fu ce qu'il amonestassent 
Sa feste, et savoir le laissassent 
Par tous les lieus là il venroient ; 
Et cil dient qu'il le feroient.
# | 
Et lors n'i ont plus detriié. 
Tant ont erré et chevauchié 
Que Meniadus ont trouvé. 
De par celui l'ont salué 
Qui là les avoit envoiez. 
Lors li fu presentez li briés 
Moult à point et moult sagement. 
Et li rois moult courtoisement 
Les recut, et moult les honneure. 
La royne droit à cele heure 
Entra léens que je vous di, 
Et Argente sa fille aussi. 
# |
Li messagé les saluerent 
Et lors de là en sus alerent. 
Et li rois sa mere apela 
PageV02P194
Et sa suer ; errant lor moustra 
Le brief que aporté li ont 
Li messagé qui iluec sont ; 
Et lor a nonmé de par cui 
Le brief ont aporté à lui. 
# |
Quant la royne l'entendi, 
Moult durement li abeli, 
Et moult desiroit à savoir 
Que il puet en ce brief avoir, 
Ne pour quoi a là envoié 
Cléomadès. I,ors a brisié 
Li rois le seël, et Ieü 
A le brief; et, quant entendu 
Ot ce que mandé li avoit 
Cléomadès, qui tant valoit, 
Moult l'en sot bon gré, et pensa 
Que il à sa feste sera 
Au jour que il li a mande, 
S'il puet ; ainsi l'a enpensé. 
# |
Une grant piece ilueques furent 
Que de là endroit ne se murent. 
Li uns après l'autre lisoit 
Cele lettre, et moult Ior plaisoiC 
Ce que en la lettre trouvoient. 
Cléomadès moult en prisoient, 
Et moult li savoient bon gré 
Qu'il avoit telement ouvré 
Et que bien ert en lui séant 
La valour dont il avoit tant 
Que hom n'en povoit avoir plus. 
Lors dist li pois Meniadus 
Que il à cele festo ira. 
La royne erranment Ioa 
Que il ne demeure à nul fuer
PageV02P195
Aussi fist Argente sa suer ; 
Car moult li a fait honnour grande 
Cléomadès, quant il li mande 
Lui aidier si humblement 
Vers toute maniere de gent, 
Et que cil qui li Ioeroient 
Qu'il n'i alast, grant mal feroient. 
# |
Lors a Meniadus mandé 
Son conseil, et Ior a moustrè 
Le brief; et, quant cil le brief oent 
L'aler la feste li loent. 
À l'aler trestout s'assentirent 
Quant le courtois mant entendirent 
De quoi la lettre avoit parlé. 
Lors furent avant apelé 
Li messagé qui moult estoient 
Courtois, et moult de bien savoieut. 
Li rois meïsmes dit leur a 
K 'au mant Cléomadès ira 
Et que moult grant gré li savoit 
De ce que il mandé l'avoit, 
Et que il mouvroit temprement ; 
Et cil l'en enclinent forment. 
# |
Moult leur demanda la royne 
Conment le faisoit Clarmondine, 
La douce, la bien ensaignie, 
Et se ele ert saine et haitie ; 
Et cil là respondent point 
Et li dient : "Dame, en bon point 
La laissames, quant nous meümes 
De Sebile, et commarat eümes 
De par li de vous saluer. 
Nous n'el devons pas oublier ; 
Car moult le commanda de cuer, 
PageV02P196
Et le roi aussi et sa suer 
Nous dist que nous saluissiens. 
Et vous mande bien qu'il n'est riens 
Qu'ele peüst faire pour vous 
Que ses cuers ne soit tous jalous 
Qu'ele ne feïst son povoir 
De ce qui vous porroit valoir ; 
Car bone et loial vous trouva."
# |
La royne moult agréa 
Ce que Clarmondine ot mandé 
À li tel debonaireté. 
As messagiers moult longuement 
Parla, et leur moustra conment 
Ele s'ert Iéens maintenue. 
Dist leur c'onques ne fu veüe 
Fenme e'on deüst miex amer 
De li ; c'on ne porroit trouver 
Plus bele ne miex entechie. 
De son mant ibrment la mercie. 
La royne courtoisement 
Et sa fille Argente ensement 
Moult li manderent de saluz. 
De ce ne voUs parlerai plus. 
# |
Li messagier ont congié pris 
Sagement, conme bien apris, 
Au roi et à ceaus qui là furent 
Là où il congié prendre durent. 
Li rois leur fist grans dons donner, 
Et il le vorrent refuser, 
Mais ainc ne s'en vorrent deffendre 
Que il ne leur couvenist prendre. 
Folio60r
Moult liement de là sevrerent. 
Vers Espaigne s'acheminerent, 
PageV02P197
Et Meniadus arréer 
Fist son afaire et aprester 
Pour aler là où il devoit 
Si com à lui apartenoit ; 
Car à la foste noblement 
Veut aler, à plenté de gent 
Des meillours que trouver porra. 
Son attire bien arréa. 
Mais de lui ore me tairai. 
À Cléomadès revenrai. 
# |
Le jour meiSme que nonmée, 
Fu la feste k'ai devisée, 
Celui meïsme jour moustra 
Cléomadès et devisa 
À son conseil qu'il aferroit 
Que on feïst raison et droit 
Melocandis et Baldigant ; 
Car il avoit cuer et talant 
Que il à son povoir tenroit 
Kan que en couvenant avoit 
Ses peres, et eaus [et] autrui, 
N'en vorroit faillir à nului. 
"Car tant fu loiaus et gentis, 
C'on doit en verité ses dis 
Tenir, et je les i tenrai, 
Se Dieu plaist; jà n'en defaurrai."
# | 
Quant done Ynabele l'entent, 
Moult li plaist, tantost s'i assent ; 
Et moult l'en ont tout cil loé 
À cui il avoit ce moustré. 
# |
Lors Cléomadés envoia 
Versles II rois, ples n'arreesta,
Qui ses serours avoir devoient,
PageV02P198
Et leur mande bien que il soient 
À la feste qu'il doit tenir, 
Et qu'il se hastent de venir. 
Et li message s'en alerent. 
Les rois en leur pays trouverent. 
Premiers vinrent à Baldigant, 
Car celui trouverent avant. 
Conme gent avisée et sage 
Fournirent à droit lor message ; 
Liement furent receü. 
Quant Baldigans a entendu 
Ce que Cléomadès li mande, 
Onques mais n'ot joie si grande. 
Des messagiers fist son devoir ; 
Car moult ot en lui de savoir. 
Tost fist son afaire arréer 
Pour vers Cléomadès aler, 
Et li message n'atendirent 
Iluec gaires. Quant lor point virent, 
Congié prirent ; lors s'en tornerent. 
# |
Tant esploitierent et errerent 
Qu'il trouverent Melocandi,s 
À I sien chastel, ce m'est vis, 
Qui avoit non Mont Arrousé. 
Là ont Melocandis trouvé 
Qui les reçut moult liement. 
Quant il sot la raison conment 
Il erent venu et pourquoi, 
Onques tel joie n'oi en soi ; 
Et il au plus tost que il pot, 
Quant cele nouvele oye ot, 
Fist arréer tout son afaire 
Pour vers Espaigne erranment traire.
Les messages tant honnora,
Que chascuns de lui se loa.
PageV02P199
Baldigans mandé li avoit 
En quel lieu il l'atenderoit, 
Et il i vint au plus briément 
Qu'il onques pot, moult liement. 
Il et Baldigans, ce me samble 
Murent à I jour tout ensamble 
Pour aler là où moult amoient 
Ce que onques veü n'avoient. 
# |
D'aus vous lairai I pou ester. 
De Cléomadès vueil parler, 
Qui durement s'esmerveilloit 
De ce que cis ne revenoit 
Qui deseur le cheval de fust 
S'en ert alez ; car bien deüst 
Estre grant pieça revenus. 
Lors pense que il soit perdus,
Ou que il ne set revenir, 
Ou ne set son cheval tenir 
Par quoi le puist faire arrester. 
À ces poins prist moult à penser 
# |
Ainsi k'en cel penser estoit, 
Cléomadès garde ; si voit 
Le cheval qui ert revenus. 
Droit ens ou lieu ert descendus 
Li escuiers hui l'enmena 
Dont il parti quant s'en ala. 
Quant cil dou chastel l'ont seü, 
Encontre lui sont acoru 
De toutes pars et de tous lez. 
Conjoïs fu et acolez. 
Savoir povez, moult liez en fu
Cléomadès quant l'a veü.
# |
Quant li vallés l'ot salué 
PageV02P200
Lors li a mot à mot conté 
Conment fourni ot son message. 
À très avisé et très sage 
Le tint Cléomadès forment, 
Quant il a entendu conment 
II ot esploitié et erré. 
Et lors l'a li vallés mené 
À une part, et li conta 
Que morte estoit, moult grant pieça, 
La fenme le bon roi Carmant, 
Dont ou pays sont moult dolant. 
"Mais de ce k'avez retrouvée 
Clarmondine, est si repueplée 
La terre de joie en tous lieus, 
Que, aussi me vueille aidier Dieus. 
Que pas recorder me saroie 
La centime part de la joie 
Qu'il ont de ce k'avoir devez 
Clarmondine, oil tant a biautez, 
Cil de la terre au roi Carmant, 
Viel et joene, petit et grant. 
Sachiez li rois Carmans venra 
Au plus tost qu'il onques porra. 
Par tout son pays envéoit 
Li rois Carmans, et si mandoit 
Gens à tous lez ; car noblement 
Vorra venir prochainement. 
Le jour que de là me parti 
Folio60v
Fu mandés Durbans, ce vous di, 
Et Sartans, pour voir, ses conpains, 
ce soiez vous tous certains. 
Tant vous os bien dire pour voir, 
Moult vous desirent à vëoir 
rois et cil de son pays. 
En la terre avez moult d'amis. 
Pour vous ai esté honnorés 
PageV02P201
Et conjoïs de tous costés."
# |
Cléomadès moult abeli 
La besoigne, quant l'entendi. 
Dès dont la verité savoit 
Que la royne morte estoit 
Qu'il ot à Chastel Noble esté ; 
Mais Clarmondine l'ot celé. 
Lors pensa que il li diroit 
Ains que ses peres venus soit, 
Pour ce c'un pou eüst passé, 
Ains son venir, de la grieté 
Qu'ele ara d'oyr tel nouvele. 
# |
Vers sa mere done Ynabele 
En a mené celui errant 
Qui venus est dou roi Carmant. 
Le messagier parler oïrent. 
toutes pars grant joie firent 
Des nouveles qu'il aportoit.
Et lors vint Clarmondine droit 
À lui. Moult doucement li prie 
Que il de son pere li die 
Et de sa mere, que il font 
Et se il sain et haitié sont. 
Et cil point la respondi 
Tant com à lui en afrri, 
Com cil qui estoit avisez. 
Après ce est de là sevrez 
Qu'il ot la besoigne anoncie 
D'ainsi qu'ele li fu charchie. 
# |
Cléomadès lors conseilla 
À sa mere, et conté li a 
Que morte ert la bone royne 
Qui estoit mere Clarmondine, 
Et bien looit c'om li deïst  
PageV02P202
Ains que li rois Carmans venist, 
Pour ce k'à li fust revenue 
Un pou ains que l'eüst veiie 
Ses peres, ne que venus soit. 
C'ert li mieudres, ce li sambloit, 
Et la royne s'i assent 
Et dist que ne laira noient 
Que ne li die après mengier ; 
Plus longuement n'en quiert targier.
# | 
Done Ynabele regretoit 
En son cuer forment et plaignoit 
Done Clarmonde ; car souvent 
Ot oy parler mainte gent 
D'el honnour et des biens de li. 
Après mengier, si com vous di, 
En a Clarmondine menée, 
Com cele qui ert avisée, 
En sa chambre où ele gisoit ; 
Car li lis Clarmondine estoit 
Delez le sien lit Oignant. 
IA jut tout adès jusqu'à tant 
Que Cléomadés espousée 
L'ot, et qu'ele fu coronnée. 
Les trois serours Cléomadès 
Gisoient lès li, près à près. 
Lés son lit leur lit fait estoient ; 
Car toute l'amour li moustroient 
Qu'eles li povoient moustrer 
Pour li et leur frere honnorer. 
# |
Done Ynabele li moustra 
La besoigne com ele va 
D'endroit de la mort de sa merc. 
Au cuer li fu sure et amere, 
Si que il l'en couvint pasmer 
PageV02P203
De duel, quant ot oy parler 
La royne done Ynabele. 
Moult li fu griés cele nouvele. 
Et ses filles la confortoient 
Et entre leur bras la tenoient ; 
Car moult erent de bon afaire. 
Au miex qu'eles le sorent faire 
La confortoient telement 
Qu'el confort ne failloit noient.
# | 
N'est pas merveille se duel ot 
Clarmondine, quant ele sot 
Que sa mere estoit trespassée. 
Mais, conme sage et avisée, 
Portoit le duel que ele avoit ; 
Car s'en naturex le faisoit 
Dont en li ot à remanant. 
De son duel me tairai à tant. 
À Cléomadès anuia 
Forment ie duel qu'ele mena. 
lie li conforter se penerent
Entr'aus tant qu'il la ramenerent 
En point, au plus tost que il porent, 
Au miex que il faire le sorent. 
# |
Cléomadès ne detria. 
Rois, ducs, contes, princes manda, 
Chevaliers, dames, damoiseles ; 
Partout fait savoir les nouveles 
De la feste qu'il veut tenir. 
S'avint ainsi qu'il vit venir 
Les messages le roi Carmant, 
Qui moult erent lie[z] et joiant 
C'on leur avoit pieça conté 
Seur le chemin la verité 
De ce pour quoi meü estoient
PageV02P204
De leur pays. Et, quant il voient 
Cléomadès, salué l'ont 
Et li ont moustré que il sont 
Et pour quoi il sont là venu. 
De par le roi Carmant salu 
Li font, à point et sagement ; 
Et, quant Cléomadès entent 
Leur nouveles, joie en ot grant. 
As messagiers fist lié semblant. 
Quant dou roi Carmant parler ot, 
Moult en fu liez et moult li plot ; 
Car bien set que grant joie aroit 
Clarmondine, s'ele savoit 
La nouvele qu'il a oïe 
De son pere, moult seroit lie. 
# |
Les messagiers a honnorés 
Et festiés et aparlés 
Et bel et à point conjoïs, 
Com avisez et bien apris. 
Et cil sagement et à droit 
Li dirent ce que li mandoit 
Li rois Carmans, com avisé 
Que il n'i ont riens oublié. 
# |
Folio61r
Moult plot Cléomadès li mans 
Que li manda li rois Carmans, 
Si que moult en fu esjoïs. 
Lors a I sien vallet tramis 
Vers sa mere done Ynabele 
Et vers Clarmondine la bele, 
Et leur mande que là venra 
Et k'avoeques lui amenra 
Les messagiers le roi Carmant 
Qui à lui sont venu errant. 
Et li vallés, quant l'entendi
PageV02P205
La royne, le dit ainsi 
Que Cléomadès li rouva. 
Quant Clarmondine entendu a 
Ces nouveles, moult en fu lie, 
Un granment fu rassouagie 
Des maus qu'ot eüs pour sa mere, 
Quant nouveles sot de son pere. 
# |
Cléomadès léens entra. 
Les messagiers o lui mena 
Droit là où Clarmondine estoit. 
Quant Clarmondine les perçoit, 
Si tost qu'ele les a veüs 
Tantost les a reconneüs, 
Et cil, si tost qu'il l'ont veüe, 
L'ont erranment reconneüe. 
Grant joie orent quant il la virent. 
Devant li à genous se mirent. 
À paines porent il parler, 
Quant il la durent saluer, 
De la grant joie qu'il avoient 
ce que devant aus véoient 
Clarmondine la debonaire, 
Qui de tous biens ert exemplaire 
Et de toute biauté la flour. 
Ne peüssent joie greignour 
Avoir qu'il orent, tant sont lié. 
Là il erent agenoillié. 
Les keurt Clarmondine acoler. 
Si tost qu'ele à eus pot parler 
De très fin cuer les festioit, 
L'un après l'autre r'acoloit. 
# |
Le premier mot k'à aus parla, 
De son pere leur demanda ; 
Et cil li dirent que haitié 
PageV02P206
Le laissierent, et de cuer lié
De ce que nouvele savoit
Que ele retrouvée estoit ;
Car dit li avoit Pinchonnès
Tout ainsi que Cléomadès
L'ot à Salerne retrouvée.
Et conment l'en avoit portée.
S'en est li rois moult esjoïs,
Et il et cil de son pays,
Que la chose va ensement
Et en gracient Dieu souvent.
Moult fu Clarmondine esjoïe
De ce qu'ele ot nouvele oye
De son pere et de ses amis.
# |
Li message, com bien apris,
Orent moult à point saluée
Done Ynabele la senée ;
Et ele si les aparla,
Que chascuns d'aus moult la prisa.
# |
Tout ce que conmandé lor fu
Ont bien et bel amenteü
Et à point et courtoisement.
Et Cléomadès erranment
Les fist en la chambre asseöir,
Car tout veut enquerre et savoir
Dou bon roi Carmant la purté.
Et cil li ont dit verité
De tout kan que il enquis a.
# |
De Pinchonnet leur demanda ;
Et cil li ont conté conment
Le message fist sagement
Que il au roi Carmant manda.
Et lors Cléomadès dit a
PageV02P207
Que il de lui moult se looit,
Et que par son conseil estoit
Premiers vers Salerne tornez.
"Ne ne croi que mais assenez
Fusse, se il esté n'eüst,
En lieu où Clarmondine fust :
Mais par son conseil assenai
Au lieu là où je la trouvai."
# |
Quant done Ynabele l'entent,
Si dist : "Biaus fiex, se Diex m'ament,
Grandement l'en doit estre miex ;
Si sera il, s'i m'aït Diex."
"Dame, de ce ne soit douté ;
Il et li sien seront amé
De moi, et riches les ferai,
Pour la grant amour k'à lui ai."
# |
Dist Clarmondine : "Autel vous di.
Je le doi bien amer aussi,
Quant par son sens me retrouvastes
Et là où j'estoie assenastes.
Et, se je vif, meri li iert
Si com à tel service afiert ;
Car de très anuieus anuis
M'a getée li sens de lui,
Ainsi que vous le tesmoigniez."
"Damoisele, bien le sachiez,"
Fait Cléomadès, "que ainsi
A esploitié que je vous di."
# |
Se Pinchonnès adont seüst
Que sa besoigne eu tel point fust
Que Cléomadès tant l'amast
Et k'ainsi de lui se loast,
Le cuer eüst lie[z] et joiant.
PageV02P208
Là endroit demorerent tant
Li message que raisons fu.
Telement furent receü
Qu'il apartint, ou miex assez.
En sa chambre les ot menez
Clarmondine par pluseurs fois,
Et bien enquis conment li rois
Ses peres s'estoit maintenus
Des meschiés qu'il avoit eüs ;
Et cil, si qu'il apartenoit,
L'en dirent ce qu'il en estoit.
# |
Quant poins en fu, congié rouverent ;
Car longuement demoré erent
Selonc ce k'en couvent avoient
Que leur voiage hasteroient
Quant partirent dou roi Carmant.
"Or ne vous alez si hastant,"
Dist Cléomadès, "biau seignour ;
Car mes mesages, l'autre jour,
Revint de lui, si que bien set
De sa fille la veritet.
Toute la chose li mandai,
Conment ne ou la retrouvai ;
Et, pour ce que il miex seüst
Que la chose certaine fust,
Le chevalet i envoiai
Sor quoi Clarmondine enportai,
Pour ce que le cheval et moi
Avoit veü, si com je croi,
Quant de Chastel Noble parti
O sa fille que véez ci.
Et m'a mandé que ci venra
Pour ce, lo que vous demorés
Ici endroit et I'atendez
PageV02P209
Tant que il soit ici venus ;
Car je croi qu'il soit jà meüs,
Pour Clarmondine soulacier
Vous vorroie de ce priier
Et pour li tenir conpaignie ;
Car forment la resléecie
Vostre venue, ce m'est vis."
# |
"Sire," font cil, "moult à envis
Iriemes contre vostre gré;
Mais dou roi nous fu conmandé
Que nous kan que nous peüssiemes
De revenir nous hastissiemes.
Mais, pour faire vo volenté,
Nous sonmes d'un point avisé,
C'est que de ceaus que ci avons
La moitié ici laisserons,
Et l'autre moitiez s'en ira
Au roi Carmant, et noncera
La chose si qu'il l'ont trouvée."
Cléomadès dist bien li grée
Que la chose soit ensement,
Et Clarmondine s'i assent.
# |
Ainsi là endroit demorerent
Li un ; et li autre en alerent
Liement vers le roi Carmant.
Que vous iroie je contant?
Tant ont alé qu'il encontrerent
Le roi Carmant, et li conterent
La besoigne com ele va ;
Et, quant li rois entendu a
Conment la chose estoit alée,
Lors li fu sa joie doublée.
Et lui et tous ceaus qui là erent
Se ces nouveles agreerent,
PageV02P210
Ce ne fait pas à demander.
# |
Je ne vous sai pas deviser
En quel pays fu encontrés
Li rois Carmans dont vous oés
Des messagiers, si com vous di ;
Mais, ainsi que je l'entendi
Quant l'estoire m'en fu contée,
Partis estoit de sa contrée
Li rois Carmans, et s'en venoit
Vers la feste à Sebile droit,
Si bel et si très noblement
Et à plenté de si grant gent,
Que c'ert merveille à esgarder.
Se tous vous vouloie nonmer
Les grans princes, les grans barons,
Qui venoient par vaus, par mons,
Et par plaignes et par boscages,
Par praëries, par rivages,
O le roi et sa conpaignie,
Trop seroit l'estoire alongie.
# |
Là endroit o le roi estoient
Durbans et Sartans, et avoient
As messagiers le roi parlé.
De Cléomadès demandé
Ont moult ; car si de cuer l'amoient,
Que plus amer ne le povoient.
Sartans estoit auques garis.
Moult estoit chascuns esjoïs
Des nouveles que il oïrent.
Li messagier à Durbant dirent
Que de Pinchonnet se looit
Cléomadès, et moult l'amoit.
# |
Lors li recorderent conment
PageV02P211
De lui ot parlé bonement.
"Ne savons pas se l'amenez,
Mais, s'il n'est ci, si le mandez.
Car sachiez damage i aroit
Trop grant, se il là ne venoit,
Selonc ce k'avons entendu."
Et Durbans leur a respondu
Que il vient en la conpaignie :
"Moult sui liez quant a desservie
L'amistié de Cléomadès."
À ce mot vint là Pinchonnès.
Joians fu quant il entendi
Que sa besoigne va ainsi
Que cil ont iluec recordé
Durbant et Sartant, et conté.
# |
Moult estoient lié et joiant
De toutes pars petit et grant.
Moult plus liement s'en venoient
Que il devant ce ne faisoient
Que de Clarmondine la bele
Eüssent oy la nouvele
Si bonne que il l'entendoient
De ceaus qui veüe l'avoient.
# |
Mais d'aus ore à tant me tairai,
Pour ce que dire vous vorrai
Conment fu la place arreée
Où la feste fu estorée
Dont je vous ai devant parlé.
# |
Palis haut, et large fossé
Estoient fait trestout entour.
Demie liue ot près de tour
La place, ainsi com je l'entent.
Or vous deviserai briément
PageV02P212
Conment on avoit compassée
Icele place, et ordenée.
# |
La place si couverte estoit
Partout là où il couvenoit,
Que on ne peüst pas viser
Que nus i peüst amender.
Et tout li autre estorement
Estoient si noble et si gent
Et si bien fait et si adroit
Que on miex faire ne povoit,
Si k'à paines nus i seüst
Amender, jà tant soutiex fust.
Et ot par defors les palis
Tabliaus en pluseurs lieus assis
Sor très haus sapins, qui estoient
Li plus haut que trouver povoient.
# |
Folio62r
De ces tabliaus i avoit quatre
À quoi se devoient esbatre
À la feste li chevalier,
Li damoisel, li escuier
De lancier de leur gavelos ;
Et encore atorne on à los
Qui plus apertement i lance.
Vraiement sachiez, sans cuidance,
K'Espaignol tienent moult à bel
Le jeu de lancier au tablel ;
Et gent d'autre pays plusour
L'atornent à très grant vigour,
Et dient que de ce mestier
Ne se saroit nus bien aidier
Se il n'ert très bien chevauchans
PageV02P213
Et dou cheval duis et sachans.
# |
Très apers et amanevis
Est li jeus que je vous devis,
Si que nus ne s'en puet meller
S'il ne set le cheval mener
À point, et adroit chevauchier,
Et c'afiert bien à chevalier
Que il soit dou cheval maniers;
Car d'armes est tex li mestiers,
Que il i couvient aperté
Et de bien faire volenté.
Qui bée à venir à prouece
Il doit de cuer haïr perece.
S'à haute honnour veut avenir,
De ces poins li doit souvenir.
# |
Et se il ces poins a apris
Et il veut monter en grant pris,
Voist s'en au tornoi, pour savoir
Quel force il puet en lui avoir,
Et quel asprece et quel vigour :
C'est li drois chemins de valour.
Et se il veut certainement
Savoir de lui le hardement,
Voist à la guerre ; là sara
Quel hardement en lui ara ;
Car, se il vient à poigneïs,
Se il est couars ou hardis
Iluec grant partie verra
Quel hardement en son cuer a.
# |
Et, s'il vient à bataille grant
Là parsara le couvenant
De lui, si com d'avisement,
Et de seürté ensement
PageV02P214
K'à bataille couvient entendre,
Ou d'assaillir ou de deffendre,
Ou d'esparse gent raloiier,
Ou de desvoiez ravoiier,
Ou de viser en quel costé
Li anemi soient grevé,
Ou d'avoir l'ueil à ses amis
Que nus n'en soit à meschief mis
Dont il soit tenus de reskeurre.
À bataille n'est onques heure
Que n'ait mestier d'estre avisez
Qui preus veut estre à droit clamez ;
Car à bataille, ce dist on,
Est adès prouece en saison,
Et avis et apensemens,
Et seürtés et hardemens.
# |
Arréée fu l'arréance
De la feste, sans oubliance
Riens qui apartiengne à arroi
De feste estorée pourroi.
Briément vous en dirai la sonme.
Puis que Diex fist le premier home
Ne fu nule feste veüe
Si bel ne si bien pourveüe
Com cele fu, ne jamais n'iert,
De tout ce k'à grant feste afiert.
# |
Or vous dirai qui arréoient
Icele feste et pourvéoient :
Li doi frere que vous nonmai
Quant de la bataille parlai
Des V rois qui par fole envie
Cuidierent tolir terre et vie
A Marcadigas, qui fu rois
Droituriers et preus et courtois.
PageV02P215
Li ainsnés des freres ot non
Fercatas. De moult grant renon
Estoit ; car moult estoit vaillans
Et biaus et courtois et sachans.
Elyadas à non avoit
Li autres, qui assez savoit
De ce c'on doit laissier et faire.
Moult ert chascuns de bon afaire ;
Riche et poissant et preu et sage
Estoient, et de grant lignage.
# |
Cléomadès fais les avoit
Maistres de tout kan qu'il tenoit,
Pour ce que il sage et loial
Estoient, et preu et vassal.
Je di que bien avisé sont
Grant seigneur, se de tel gent font
Maistre d'aus et de lor pays,
Que cil que je ci vous devis.
Qui laisse le grain pour la paille
Et lait le noiel pour l'eschaille
Quant la noisete est depecie,
Il m'est vis que il fait folie.
Pour ce di je que moult feront
Que sage, et bon conseil aront
Cil qui atrairont entour eus
Les sages, les loiaus, les preus;
Car en tel gent, ce m'est avis,
Gist adès honnours et pourfis
En chascun tans et en tous lieus ;
Et si en doit on amer mieux 
Le grant seigneur quant il est tex,
Que gouvernés est ses hostex
De gent qui soient desirant
PageV02P216
D'onneur, et de honte doutant.
# |
Sormans li Rous, Garsianis,
Galdas des Mons, Bondars li Gris,
Et Agambars li Lons aussi,
Tous ces V rois que je vous di
Ot Cléomadès grant pieça
Mandez, si que jà erent là
Des gens de chascun grant plenté.
Pris estoient et arréé
Li ostel où descenderoient
Cil roi quant là venu seroient.
# |
De toutes pars à grant esploit
Venoient à la feste droit
Tout cil qui venir i devoient.
Tout li chemin charchié estoient.
Folio62v
De toutes pars, de pluseur gent.
Moult s'en venoient liement
De tous pays et de tous lés.
# |
Cléomadès, com avisés,
Ala contre le roi Carmant.
Noblement le vint au devant,
Quant il fu venus en Espaigne.
Avoec lui avoit grant conpaigne ;
Car bien estoit aferissant.
Joie et feste et honnour si grant
Fu faite en celi encontrée,
Que n'en aroie devisée
La moitié en I jour d'esté.
Li rois Carmans a acolé	
Cléomadès, et festiié
L'a de cuer, et souvent baisié.
# |
De sa fille li demanda ;
PageV02P217
Et Cléomadès dit li a
Qu'ele estoit saine et haitie,
Et de sa venue si lie,
Que pas dire ne li saroit
La très grant joie qu'ele avoit
De ce que là devoit venir.
"De vous veöir a grant désir," 
Dist Cléomadès, "ce sachiez."
Lors fu li rois Carmans moult liez
Quant de sa fille a entendu
K'en bon point et haitie fu.
# |
Tout erranment Cléomadès
Li demanda de Lyadès
Et de sa conpaigne Florete,
Et li demanda de Gayete,
Si tost qu'ot passé son salu.
Et li rois li a respondu
Que il les amaine avoec lui.
Dist Cléomadès : "Liez en sui ;
Car bien sai que lie en sera
Vostre fille, quant les verra."
# |
Lors li demanda de Durbant
Et de son conpaignon Sartant.
Et il sorvinrent là tout droit
El point que il d'aus demandoit.
Pour ce estoient là venu
Que il avoient entendu
Que Cléomadès là estoit
Venus, dont chascuns joie avoit.
Avoec aus venoit Pinchonnès.
Quant les perçoit Cléomadès
Moult liement vers aus ala.
PageV02P218
Durbant les bras au col geta;
Lui et Sartan conjoï si
C'on doit conjoïr son ami.
De cuer lie et de vrai samblant.
Leur fist honnour et joie grant.
# |
À festiier pas n'oublia
Pinchonnet, ainçois l'embraça
Entre ses bras plus d'une fois.
"Se je vous aim," fait il, "c'est drois,
K'à mon besoing mestier n'i eustes
Et bons et bien servans me fustes ;
Envers moi desservi avez,
Par quoi bien devez estre amez
De moi et de tous mes amis :
Si serez vous, ce vous plevis."
Et Pinchonnès, moult sagement,
Et à point et courtoisement
L'en mercia bien et adroit,
Conme cil qui tout bien savoit.
# |
Que vous feroie je lonc plait?
Cléomadès et dit et fait
A à chascun [tout] son devoir ;
Ce puet on vraiement savoir,
Car en tous [liex] ert avisez
Et de tout si bien apensez 
Que il jamais riens n'oubliast
Qui à courtoisie amontast ;
Miex que ne saroie retraire
Sot kan c'on doit laissier et faire.
# |
À merveille fu regardez
Cléomadès de tous costez
PageV02P219
De ceaus qui là endroit estoient
Pour la valour k'en lui savoient.
Quant il fu là endroit venus,
De tous fu volentiers veüs.
Sachiez qu'il n'oublia nient
De demander com faitement
La fenme Durbant le faisoit,
Et la Sartant. Riens n'oublioit
De chose de quoi raisons fust
Dont ressouvenir li deüst.
Durbans et Sartans sagement
L'en respondirent telement
Com à tel demande apartint.
# |
Sachiez que près de lui les tint
Cléomadès andeus ensamble.
S'avint en ce point, ce me samble,
K'entre Lyadès et Gayete
Vinrent là, et s'i vint Florete.
# |
Jà avoit d'eles demandé
Cléomadès, et on conté
Li ot que eles là estoient.
Joie ont quant Cléomadès voient,
Et il d'eles refu moult liez.
Tout maintenant s'est aprochiez
D'eles, quant il les vit venir ;
Amiablement conjoïr
Les sot, et à point aparler.
Les puceles, sans arrester,
De leur dame li demanderent,
Le premier mot k'à lui parlerent,
Et il de li tant dit leur a
Que chascune joie mena
Des nouveles que de li oient.
PageV02P220
De tous ceaus qui iluec estoient
Fist Cléomadès son devoir,
Ne vous puis pas ramentevoir
Quan qu'il i ot et dit et fait
Sans oublia[n]ce et sans mesfait.
Le roi et sa gent honnora.
Parmi sa terre les mena
Si bien, si bel et si à point,
Que de defaute n'i ot point
De riens qui montast à honnour.
# |
À Sebile droit à tiers jour
Vinrent, qu'il les ot encontrés ;
Mais, ains que dedens fust entrés
Li rois Carmans, il ne sa gent,
Vinrent contre lui noblement
Cil de la cité, acesmé
Com gent de grant nobilité.
# |
Que vaurroit que plus vous diroie ?
Tant d'onnour, de feste et de joie
Folio63r
Li firent qu'il en i couvint.
V jours devant la feste vint
Li rois Carmans, ne plus ne mains,
Et sachiez bien que puis ne ains
Ne fu nus rois plus liement
Receüs, ne plus grandement,
Qu'il fu le jour que il vint là.
Parmi Sebile chevaucha,
Et Cléomadès l'adestroit.
De dras d'or et de soie estoit
La cité couverte et parée.
Mainte dame bien acesmée
Et mainte damoisele aussi
I ot, le jour que je vous di.
PageV02P221
Tant ot de richece en tous lieus,
Que, s'uns hom eüst C mil ieux,
Se fussent il tout encombré
De veöir la très grant plenté
De coronnes et de fremaus,
Et de cercles d'or à esmaus,
Et de gent de très noble atour
Çà et là, devant et entour.
De richece tant i avoit,
C'on esmerveillier s'en povoit.
# |
Maint riche rubi d'Oriant
I veïssez reflamboiant ;
Mainte esmeraude de valour
I avoit de fine colour ;
Et mainte autre diverse pierre
Peüssiez veöir fine et chiere.
Se vous à ce jour là fussiez
Et partout veöir peüssiez,
Veöir peüssiez maint jouel
K'en la vile k'ens ou chastel
Assez i peüssiez veöir.
# |
Or vous vorrai amentevoir
Conment la royne Ynabele,
Ele et Clarmondine la bele,
Encontre le roi s'en venoient,
Et ses filles après sivoient.
Moult orent conpaignie gente
Dont li devisers m'atalente
Quele la conpaignie estoit.
Bien CCC dames i avoit,
Que damoiselles que puceles ;
Et sachiez vraiement que eles
Erent filles à haus barons,
Ainsi k'en escrit le trouvons.
PageV02P222
Et estraites de grans lignies.
De blans chainses erent vesties
Trestoutes, fors que la royne.
Ele, sans plus, et Clarmondine
Estoient vestues, samblans,
De vestements simples, plaisans,
Divers, de si riche façon
Que deviser les porrait on ;
Car bien estoit séans simplece
En eles, selonc la tristece
Dont la mors ot leur cuers conblés,
Si que devant oy l'avez.
De ce vous lairai ore ester.
Des CCC dames vueil parler,
Qui sambloient angle enpené,
Car blanc estoient et ridé
Li chainse, et erent orfroisie
D'orfrois qui erent esmaillie ;
Et i ot petis rubies
De lieus en lieus, et saphires,
Et petites esmeraudeles
Qui moult erent plaisans et beles,
Et pelles gros, par rieule mis,
Blans et fins, et à point assis.
# |
Ainsi contre le roi aloit
Donc Ynabele, et si tenoit
Clarmondine par la main destre.
Savoir poez que bon fist estre
Là on pot tel chose esgarder
Que vous m'oez ci deviser.
# |
Au roi Carmant forment plaisoit
Kan que de toutes pars véoit.
PageV02P223
Tant ala que il est venus
Au chastel. Tantost descendus
Est que il dedenz fu entrés.
Cléomadès s'ert si hastés
De descendre, que erranment
Le roi Carmant par la main prent.
# |
Lors veïssiez route avenant
Parmi cele place venant.
Un petitet devant venoit
Done Ynabele, et si tenoit
Clarmondine par la main blanche.
Plus k'yvoires ne nois seur branche
Erent et les mains et li cors ;
Car d'autant com passe fins ors
De comparison le laiton,
Nient plus fenme ne savoit on
Que ele n'eüst tout passé
De gente taille et de biauté,
Et de bonté et de plaisance,
Et de sens norri d'atemprance.
De joie ot le cuer esmeü
Clarmondine quant a veü
Son pere le bon roi Carmant ;
Et il de joie r'avoit tant
Pour sa fille que il véoit,
Que il plus avoir n'en povoit.
Moult ert chascuns liez et joians.
# |
Conme courtois rois et sachans,
A la royne saluée ;
Et ele, com sage et senée,
À point son salu li rendi,
Tout ainsi qu'il i aferi.
Et lors a sa fille saisie,
Entre ses bras, et l'a baisie.
PageV02P224
Et ele aussi lui embraça ;
Tout en lermoiant le baisa.
À paines soustenir se pot
De la très grant joie qu'ele ot
Quant son pere tint enbracié.
Que de joie, que de pitié,
En ont lermoiié li plusour.
Tant savoit de bien et d'onnour
Li rois Carmans, que nus hom plus.
As trois puceles fist salus,
Quant salué ot la royne
Et que baisié ot Clarmondine.
Les autres dames salua
Bel et à point. Moult agréa
À chascun kan k'en lui véoient.
La maniere de lui prisoient.
Courtois lor sambloit et sachans
Et gracieus et avenans.
# |
Folio63v
Adès par la main le tenoit
Cléomadès, qui bien moustroit
Samblant que il de cuer l'amast,
Et chose à faire desirast
Par quoi l'eüst bien honnoré.
# |
En une chambre l'ont mené
C'on avoit noblement parée
Pour lui ; car si bien arréée
Ne fu ainc puis ne jamais n'iert
De kan que à noblece afiert.
# |
Se dedens la chambre fussiez,
Riens fors dras d'or ne veïssiez
Ne en comble ne en paroit ;
Riens fors que dras d'or n'i paroit
N'à huis, n'à fenestre ensement,
PageV02P225
N'à piler. Nes le pavement
Avoit on de dras d'or couvert ; 
Losengiez ert d'or et de vert
Li dras d'or que je vous devis
Qui sor le pavement ert mis.
# |
Quant en la chambre fu entrés
Li rois, lors primes acolés
Fu de sa fille, et conjoïs.
De joie, de soulas, de ris
En cele chambre tant avoit,
Qu'ele toute plaine en estoit.
Plus que dire ne vous saroie
Avoit li uns de l'autre joie.
N'aroie à piece recordée
La grant joie qui fu menée
Entre Clarmondine et son pere.
Bien li souvenoit de sa mere ;
Mais n'en ert pas poins de parler.
Nepourquant, l'en couvint plorer,
Que ele tenir ne s'en pot ;
Et li rois fist tant que il sot
Pourquoi ele ploroit ainsi.
De ce la reconfortoit si
Li rois, qu'il en estoit tenus.
De ce ne vous parlerai plus,
C'on doit passer au plus briément
Con puet issi fait parlement.
Bon fait legierement passer
Ce que on ne puet amender
Et chose qui n'est profitable
Ne à deviser agréable.
Se plus i ot, plus n'en dirai,
Car d'autre chose à parler ai.
# |
Or vous dirai conment Flourette,
PageV02P226
Ele et Lyadès et Gayete
Furent liement receü[e]s
Quant à la court furent venues.
Cléomadès les ot mandées,
Et eles s'estoient hastées
Du plus que eles onques porent ;
Car si très grant desirrier orent
De Clarmondine tost veöir,
Que eles ne porent avoir
De nule riens plus grant desir.
Lie fu, quant les vit venir,
Clarmondine. Bien le moustra ;
Car encontre eles se leva,
Et les acola toutes trois
Et les baisa souventes fois.
Toutes trois à genous estoient.
Clarmondine les mains baisoient
Et ce dont ele estoit vestue.
"Dame, avoir vous cuidiens perdue,"
Font eles, "mais nous vous r'avons,
Dont Dieu bien gracier devons
De cuer, et souvent merciier."
De leur genouls les fist drecier
Clarmondine la debonaire,
Qui de tous biens ert exemplaire.
# |
Les trois damoiseles avoient
Joie de ce qu'eles véoient
Lor dame, dont maint grief torment
Avoient eü moult souvent.
Mais bien ert lor roë tornée ;
Car joie avoient recouvrée.
Clarmondine moult lie estoit
De ce que ele les r'avoit
Avoec li en sa conpaignie ;
Car loiaument l'orent servie
PageV02P227
Et ensaignie et doctrinée.
# |
Lors est Clarmondine r'alée
Vers son pere. Et Cléomadès
Prist lors par la main Lyadès
Et les autres II damoiseles.
Bien vit à lor samblant que eles
Estoient lies et joians.
Et il, com courtois et sachans,
Vers la royne les mena
Sa mere, et les en acointa :
Et la royne receües
Les a toutes trois et tenues
Entre ses bras moult liement
Et moult très debonairement,
Si conme il ert aferissant.
Et ses trois serours, tout errant,
Les trois damoiseles saisirent,
Courtoisement les conjoïrent ;
Car sages et courtoises erent,
Et leur frere de cuer amerent
Si que ce qu'il amoit amoient,
Et que ce qu'il vouloit vouloient.
# |
Moult agréa au roi Carmant
La grant joie et le lié samblant
Que on lui et sa gent faisoit;
Car chascuns forment se penoit
Que il fussent si arréé
Que ce fust dou tout à lor gré.
# |
Or ne vous ai pas dit conment
Cléomadès soigneusement
Durban et Sartan honnoroit.
Adès près de lui les tenoit,
Par quoi moult de gent demandoient
PageV02P228
Que cil dui chevalier estoient
Que lors sire Cléomadès
Tenoit si près de lui adès.
# |
Conjoïs les ot la royne
Forment, et ele et Clarmondine.
Et mercié, et aparlés
D'el honnour et des grans bontés
Que Cléomadès fait avoient ;
Par lui meïsme le savoient,
Car pieça lor avoit conté
Ce qu'il avoit en aus trouvé,
Et il respondu en avoient
Ne plus ne mains si qu'il devoient.
# |
S'ainc menestrex fu bien venus,
Ne conjoïs, ne chier tenus,
Folio64r
Dont fu Pinchonnès honnorés
Et conjoïs de tous costés
De dames et de damoiseles,
De chevaliers et de puceles,
Et d'escuiers et d'autre gent.
La royne meïsmement
Li fist tel feste et tel soulas,
Qu'ele le tint entre ses bras,
Et li dit que gré li savoit
De ce que de lui se looit
Cléomadès si grandement.
Et cil moult apenséement
L'en respondi tout son devoir ;
Car moult ot en lui de savoir.
# |
Feste de cuer et joie fine
Li fist la bele Clarmondine
Et les serors Cléomadès.
Si honnorés fu Pinchonnès
PageV02P229
C'onques menestrex ne fu si.
Et il l'avoit bien desservi,
Et il ert bien qui connoissoit
Le service qu'il fait avoit ;
Car sages ert et entendans
Et en droiture connoissans,
Car chascuns desservi avoit
Par quoi si honnorés estoit.
# |
Grant eür a à servir gent
Qui aient tel entendement
Que service sachent merir
Ceaus qui le sevent desservir ;
Car moult souvent ont le bienfait
Cil qui n'ont pas service fait
Par quoi le deüssent avoir.
Ce puet on en mains lieus veöir
Que cil qui desservi aront
Le merir, au merir faurront ;
Et en porteront le merite
Cil qui aront esté tout quite
De desservir le guerredon
Dont il enporteront le don.
Souventes fois est avenu
Ce que j'ai ci amenteü.
Ne sont ne avisé ne sage
Cil qui maintiennent tel usage ;
Mais je ne l'amet à nului.
Bien se gart chascuns endroit lui
Qu'il paie le desservëour.
Si aura aumosne et honnour ;
Car qui autrui service prent,
Pechié fait, se il ne le rent.
PageV02P230
Que vous iroie je contant?
Honnour et feste et joie tant
Fu faite Carmant et les siens,
Que de defaute n'i ot riens
De tout ce k'à honnour amonte.
Ains croist de jour en jour et monte
La grant joie c'on li faisoit ;
Car chascuns de cuer s'en penoit.
Sachiez qu'il n'ot pas oublié
Que à sa fille demandé
N'eüst trestout son errement ;
Et ele tout si faitement
Qu'ele ot esploitié et erré,
Li ot tout dit et recordé,
Dont li rois moult bon gré li sot
Que ele ainsi esploitié ot.
Car moult ot ouvré sagement,
Ce li sambloit, et soutilment.
Et très à point s'onnour gardée.
Au besoing fu bien avisée.
Conme loiaus et bone et sage,
Moult la prisoit en son corage.
# |
Bien avez entendu conment
Li rois Carmans très noblement
Fu honnorés et receüs
Quant à Sebile fu venus.
Or seroit bien raisons et drois
Que je de tous les autres rois
Vous deïsse conment venoient.
# |
Sachiez que forment se hastoient
Melocandis et Baldigans ;
Car chascuns ert moult desirans
De tost venir là où estoient
Celes que il avoir devoient.
PageV02P231
Chascuns si noblement venoit
K'à noble roi apartenoit.
Honnorablement se maintinrent.
II jours avant la feste vinrent.
Il ne couvint pas ensaignier
D'aus honnorer et festiier
Cléomadès ; car si le fist
Que de nule riens n'i mesprit.
Bien fist kan qu'il i aferi,
Et il et la royne aussi,
Et cil de la vile et sa gent.
Receü furent bel et gent.
Bel et bien se sorent avoir ;
Car moult ot en aus de savoir
Et d'apensement et d'avis.
Conme courtois et bien apris,
Dou roi Carmant tost s'acointierent.
La maniere d'aus moult prisierent
Cil et celes qui iluec erent ;
Kan k'en aus virent, moult loerent.
Leur saluz à ceus qui là furent
Firent là où faire le durent,
Conme roi courtois et sachant,
Et avisé et biau parlant.
Celes avoient saluées
Et de moult lié cuer esgardées
Qui lor fenmes devoient estre.
Moult lor plot la biauté et l'estre
Que chascune d'eles avoit ;
Et à eles moult replaisoit
La maniere k'en aus véoient,
De tant que veüs les avoient.
# |
Celui meïsme jour avint
Que li rois Sormans li Rous vint
À Sebile, et Bondars li Gris.
PageV02P232
Lendemain vint Garsianis,
Et vint li rois Galdas des Mons,
Et li rois Agambars li Lons.
Chascuns des rois sa route avoit
Et o lui sa fenme amenoit,
Fors un qui n'ert pas mariés,
Qui Galdas des Mons ert nommés.
Cil n'avoit onques fenme eüe ;
Rois estoit de moult grant value.
# |
Les roynes qui là venoient
En lor conpaignie amenoient
Dames, puceles, damoiseles,
Dont moult en i avoit de beles,
Folio64v
Et venoient en paremens
Si nobles, si riches, si gens,
Que il estoit aferissant.
Haut et cler venoient chantant
Les routes, si qu'eles aloient ;
Ordenéement chevauchoient,
Car chascune dame tenoit
I chevalier qui l'adestroit.
# |
Cléomadès, à grant conpaigne
De ceaus de la terre d'Espaigne,
Contre chascune route aloit.
Tout ce que il i aferoit
D'aus recevoir et honnorer
Faisoit, sans riens nule oublier,
As dames et as damoiseles,
As chevaliers et as puceles,
As rois, as princes, as barons.
N'ert pas mestiers qu'il fust semons
De faire à chascun son devoir ;
Car tant ot en lui de savoir,
Que à piece oublié n'eüst
PageV02P233
Riens que par droit faire deüst.
# |
O lui estoit li rois Carmans,
Et si ert li rois Baldigans,
Si ert li rois Melocandis.
Dux et contes, princes, marchis
Ot moult en cele conpaignie.
Mainte chançonnete jolie
Peüst on là oyr chanter.
Tout ainsi que m'oez conter
Entrerent dedens la cité.
# |
Je vous ai autre fois conté
Conment la citez ert parée ;
Partout estoit si arréée
De tout ce qui estre i devoit,
Que nule riens n'i defailloit.
Partout, à destre et à senestre,
Veïssiez à mainte fenestre
Maint chief de dame bien paré.
Noblece entr'ele et richeté
Estoient là en point si grant,
Que durement esmerveillant
Et cil et celes s'en aloient
Qui la grant noblece véoient
C'on peüst veöir à tous lés.
# |
Chascuns des V rois est alés
À son ostel, si com il durent.
Leur ostel si arréé furent
Que il à aus apartenoit.
Sagement et bel et à droit
Alerent veöir la royne,
Quant poins en fu, et Clarmondine,
Et les autres dames aussi :
Ce ne mirent pas en oubli.
PageV02P234
La royne à droit receüs
Les ot, et liement veüs.
Chascuns des rois s'esmerveilloit
De la grant biauté qu'il véoit
En Clarmondine ; et bien disoient
C'onques si bele riens n'avoient
Veüe conme cele estoit.
Chascuns moult durement prisoit
Et sa maniere et sa biauté.
Li et son estre ont moult loé.
En tel maniere que vous di
Se sont d'ilueques departi ;
À lor ostel sont revenu.
# |
Jà ot Cléomadès veü
Moult de dames en lor ostés ;
Car de tout ce ert avisés
Que il estoit aferissant.
Entre lui et le roi Carmant
Alerent les dames veöir :
Bien en firent tout lor devoir.
Baldigans ert avoec tous dis ;
Il et li rois Melocandis
Et de barons moult grant plenté
Par tous les lieus orent esté
Où il orent raison d'aler.
Se tout vouloie recorder
Si com Cléomadès ala,
Et conment tous ceus honnora
À cui il ert tenus dou faire,
Je metroie tant au retraire
Que ce seroit trop longuement.
Et, pour ce, vous di je briement
Conment vers chascun se maintint.
Bien fist ce qu'il i apartint.
De tout fist si bien sa partie,
PageV02P235
Qu'il n'est nus qui grant bien n'en die.
# |
À lendemain estre devoit
La feste à Sebile tout droit
Que li roi furent parvenu
Qui ci vous sont amenteü.
En jardins, en maisons, en rues,
Erent plusours festes tenues
Parmi la cité de Sebile.
Feste manoit lors en la vile
Qui forment i estoit amée
Et de tous avant apelée.
# |
Encore n'estoit pas venus
Li nobles rois Meniadus ;
Mais jà estoit ses ostex pris
Et arréés et à point mis
Pour lui et pour toute sa gent.
De chevaliers ot o lui cent
Ou plus, et de dames autant.
Lendemain, ains soleil levant,
Ot fait Cléomadès savoir
Tous les barons qu'il pot avoir,
K'encontre lui vorra aler.
Moult les fist priier de haster,
Et il le firent tout ainsi.
De tous les rois nus n'i failli
Qui lors erent là assamblé.
Bien matin vinrent tout monté.
Contre Meniadus alerent.
Assez près de là l'encontrerent ;
Car moult matin levez estoit
Pour ce que la feste devoit
Estre à Sebile celui jour.
Bien sambloit rois de grant valour
Meniadus, si com venoit;
PageV02P236
Car li pays resplendissoit
Des chiers paremens que avoient
Il et cil qui o lui estoient.
# |
O Meniadus ert venue
Sa mere, k'à envis tenue
Se fust de cele reveöir
Qui souvent li ot fait doloir
Le cuer, quant à Salerne fu,
Pour le bien k'en li ot veü.
Folio65r
Dames avoit o li plenté
Des plus beles de lor regné
Et mainte pucele très gente.
La royne et sa fille Argente,
Et les dames dont je vous di,
Et les damoiseles aussi,
Estoient là endroit venues
En cloches vers et en sambues
À escuciaus de riche ouvraigne
Semez fais des armes d'Espaigne.
Li escuchon bien fait estoient ;
Sor le vert très bien avenoient.
En tés atours que je devis
Venoit la royne, et ses fis
Et si chevalier avoec lui.
# |
Je n'aroie pas conté hui
Com très à point fu festiiés
Meniadus, et merciiés
De Cléomadès, d'el honnour
Qu'il li faisoit à celui jour :
Dont Meniadus moult bon gré
Li sot, que tele humilité
Li moustroit, et amour si grant.
Lors torna vers le roi Carmant,
Si tost qu'il li fu ensaigniés.
PageV02P237
"Sire," fait il, "bon jour aiez."
Et li rois Carmans erranment
Meniadus son salu rent.
# |
Dist Meniadus : "Biaus dous sire,
N'aiez vers moi courrous ne ire
Se je vostre fille gardai ;
Car onques vers li ne pensai,
Si me doinst Diex de ci partir,
Riens dont me deüssiez haïr.
Ne savoie qui ele estoit,
Fors ce k'entendre me faisoit ;
Car sachiez bien, se je seüsse
Que o moi vostre fille eüsse,
Je le vous eüsse mandé.
Ce vous di je par verité."
Lors dist Carmans qu'il l'en savoit
Bon gré, et qu'il l'en mercioit,
Et se peneroit dou merir
S'il en povoit en lieu venir.
Meniadus moult l'en mercie
Et moult envers lui s'umelie.
# |
Li roi, li baron qui là furent
S'acointierent, si com il durent,
De Meniadus et des siens ;
Et il, qui plains ert de tous biens,
Se r'acointa d'aus ensement,
Bel et à point et sagement.
# |
Vers la royne debonaire,
Qui avoit à non Bien-doit-plaire,
S'en est li rois Carmans alés
Et Cléomadès lés à lés ;
Ensamble entr'aus II s'en alerent
Où la royne et sa fille erent.
PageV02P238
Courtoisement ont saluée
Li et sa fille la senée
Et les dames qui là estoient.
À grant merveille regardoient
Cléomadès toutes les gens ;
Biaus et bons lor sambloit et gens.
# |
Quant passé furent li salu ,
Lors se sont de là esmeü.
Entre le noble roi Carmant
Et Cléomadès le sachant
Venoient delez la royne.
Parlé y ot de Clarmondine
Assez et en bonne maniere.
"Bien li moustre que je l'ai chiere,"
Fait la royne, "quant, pour li
Veöir, vieng de mon pays ci,
Pour ce que tant fait à amer,
C'on ne la porroit trop loer,
C'onques ne vi jour de ma vie
De tous biens si bien entechie."
À Cléomadès moult plaisoit
Que la royne ainsi disoit.
# |
Lors est la route acheminée
Et moult noblement aroutée.
II et II moult bel chevauchoient.
Dames et chevalier chantoient
Bien et bel et joliement.
Moult le faisoient liement
Chevalier, dames et chascuns.
De tous ne s'en faignoit nesuns.
# |
Ainsi en la cité entrerent.
Moult volentiers les esgarderent
Cil de la vile et dou chastel ;
PageV02P239
Car moult noblement et moult bel
Venoient, et moult très à droit
Li atours d'aus à tous plaisoit.
Baldigans et Melocandis,
Conme courtois et bien apris,
Adestroient Meniadus
Quant à son ostel fu venus
Et il et sa mere et lor gent.
# |
Et Cléomadès congié prent,
Tel com il aferi à prendre ;
Car il n'erent pas à aprendre
Entre le roi Carmant et lui.
De là se sont parti andui.
À grant conpaignie s'en vont
Enz ou chastel. Là venu sont,
Les dames n'i ont pas trouvées ;
Car jà s'en estoient alées
Toutes ensamble, grant pieça,
Au lieu où la feste sera.
# |
Lors veïssiez gens arréer
Pour dedenz le palis entrer
Où la grant feste estre devoit.
Chascuns cele part se traioit.
Que vous feroie je lonc conte?
Maint roi et maint duc et maint conte
Et maint prince de grant valour
Ot à Sebile celui jour.
Et mainte dame bonne et bele
I ot, et mainte damoisele.
# |
Trop longuement i meteroie
Se de chascun vous devisoie
Conment il estoient paré.
Je l'aroie trop comparé,
PageV02P240
Ains que li voirs vous en fust dis :
Uns ans me seroit trop petis
À deviser ent la moitié.
# |
Meniadus n'ot detriié.
Sa route ot faite reparer.
Vers la feste prist à aler ;
Car Cléomadès li pria
De haster quant parti de là.
# |
Folio65v
Ainsi dedens la feste entrerent.
À merveilles les esgarderent
Tout cil qui venir les véoient ;
Car si très noblement venoient,
C'on n'i peüst pas amender
Jà tant i seüst on viser.
# |
Jà erent entrées les routes
En la feste, et venues toutes.
Cele ert toute la daërraine
Que li rois Meniadus maine.
# |
Chascuns durement se hastoit.
Car errant espouser devoit
Clarmondine Cléomadès,
Et li doi roi tantost après
Qui ses serours prendre devoient.
Prest et apareillié estoient ;
Et avoit on fait aporter
Les coronnes pour coronner
Cléomadès et Clarmondine.
Done Ynabele la royne,
Qui savoit kan c'on devoit faire,
Ala encontre Bien-doit-plaire
Quant ele sot qu'ele venoit ;
Car si grant volenté avoit
PageV02P241
D'onnorer roi Meniadus,
Que ele avoir le povoit plus,
Et sa mere et sa suer aussi.
Grant route avoit ovoeques li
De dames et de chevaliers,
De damoisiaus et d'escuiers.
# |
À Clarmondine moult pesoit
De ce que aler n'i povoit ;
Car ele estoit toute arréée
Pour estre assez tost espousée,
Si que ele raison n'avoit
De partir de là où estoit,
Car erranment devoit monter
Pour devers le moustier aler ;
Car eglises erent adont
Aussi que eles ore sont,
Là où lor fenmes espousoient,
Selonc la loi que lors tenoient
Cil qui erent à celui tans
Dont cis livres est ramenbrans.
# |
Done Ynabele la sachant
Honnour et feste et joie grant
Fist Meniadus et sa gent.
Bien-doit-plaire par la main prent
Et l'en a avoec li menée ;
À son povoir l'a honnorée,
Et Argente sa fille aussi.
Cele le mist pas en oubli.
Vers Clarmondine les mena,
Et Clarmondine s'adreça
Vers eles quant les vit venir,
Car ele ne s'en pot tenir
Ne ne dut, si qu'il li sambla.
La mere et la fille baisa ;
PageV02P242
Si faite joie et tel samblant
Lor fist qu'il ert aferissant.
Sagement les sot conjoïr
De cuer plain, de loial desir.
Cléomadès vint cele part
Qui de les honnorer sa part
Fist si, qu'il n'i ot k'amender.
De ce vous lairai ore ester.
# |
Si vous dirai com faitement
À celui tans coronnement
Estoient fait et estoré.
Sachiez k'adont ert ordené
Que, quant on les rois coronnoit
Et les roynes, que c'estoit
En la place trestout enmi
Là où on avoit establi
Le lieu où la feste en devoit
Estre, quant tel chose avenoit.
# |
Mais, ainçois avoient esté
À lor moustiers, et aoré
Les diex qu'il adont aoroient,
Selonc l'usage qu'il avoient
Au tans dont vous m'oez parler,
Devant aus faisoient porter
III coronnes d'or noblement.
Or vous deviserai quel gent
Ces trois coronnes d'or portoient.
C'erent troi evesque, et estoient
Revestu, selonc lor maniere,
De vesteüre noble et chiere,
Et portoit on samis vermaus
Deseur le roi et deseur aus.
Ainsi vers lor moustier aloient,
Et arriere ainsi revenoient.
PageV02P243
Des trois coronnes vous dirai,
Selonc ce que entendu l'ai,
Pour quoi il en i avoit trois ;
Car ce est bien raison et drois.
La moienne senefioit
Que cil à droit tenir devoit
Ceaus cui il avoit à garder,
Qui on devoit là coronner.
Et cele qui estoit à destre
Senefioit que ne doit estre
Nus rois pereceus d'entreprendre
Sa terre et s'onnour à deffendre.
La senestre si senefie
C'on hée orgueil et felonnie
Et trayson et fausseté
Et outrage et desloiauté,
Et c'on ait l'escu enbracié
D'umilité et de pitié
Et de raison et d'atemprance
Et de largece sans beubance.
# |
Et li samis vermaus desus
Senefie que rois ne dus
Ne princes, ne doit, pour paour,
Defaillir de droit, si l'honnour
Aime, ne, s'en Dieu est créans,
Estre espandus en doit ses sans
Par quoi li drois soit retenus,
Et de ce est chascuns tenus
Selonc lui que droit maintenir
Doit cil qui à Dieu veut venir ;
Car Diex n'a de nule gent cure
Se il ne maintienent droiture.
# |
Vers l'eglise alerent ainsi
Que je l'ai devisé ici
PageV02P244
Cléomadès et Clarmondine.
Là veïssiez mainte royne
Et maint roi en riches atours.
Onques puis, ne là ne aillours,
N'ot nule si noble assamblée
Que il ot là cele jornée.
Folio66r
Si riches atours i avoit,
Que chascuns s'en esmerveilloit.
# |
Sor I palefroi ert montée
Clarmondine, si acesmée
Que vous m'orrez jà deviser.
Vestue ert d'un drap d'outre mer,
Moult merveilleus et moult divers ;
Car il n'ert blans, ne noirs, ne pers,
Ne vers, ne jaunes, ne vermaus.
C'estoit un drois adevinaus,
K'à paines povoit nus savoir
Quel color il povoit avoir ;
Et toute autele ert la sambue.
Palefroi de si grant value
Que estre povoit palefrois
Avoit ; et s'estoient d'orfrois
Riches, ce k'au frain aferi.
Par fine verité vous di
Que li frains ert d'or afiné.
Or ne vous ai pas devisé
De quoi li arçon erent fait
De la sele ; mais, sans lonc plait,
Vous en dirai la verité.
D'or estoient, bien dru semé
D'esmeraudes et de rubis,
Li arçon que je vous devis.
Une orle de gros pelles blans
PageV02P245
I ot, qui bien i ert séans.
Li poitraus le frain ressambloit :
C'est chose qui aferissoit.
# |
Dou roi Carmant ert adestrée.
Meniadus l'ot saluée
Et ot à li parlé assez,
Et l'adestroit à l'autre lez.
# |
D'un fil d'or erent galonné
Si cheveil, dont si grant plenté
Ot, qu'il n'en i couvenoit plus,
K'ainc si biaus chiés ne fu veüs.
Une petite coronnete
À riches pierres, legerete,
Ot la bele sor son chief mise.
Or est drois que je vous devise
De la coronne la façon.
Seur le cercle, tout environ,
Avoit très fins rubis perciés
En vergeletes d'or fichiés ;
Et seur la pointe des vergeles
Ot petites esmeraudeles ;
Et autour de chascune chasse
Avoit une fine toupace
En vergeletes d'or, ainsi
Com li rubi dont je vous di.
Et li cercles ert fais au miex
Que faire le pot hom soutiex
# |
À sa cote I fermail avoit
Qui moult très grant chose valoit ;
Et avoit assis en milieu
Un très precieus camahieu
Avironnés de dyamans
Dont li plus petis estoit grans,
PageV02P246
Et i ot assez d'autres pierres
Qui moult erent fines et chieres.
Et ert d'une ceinture çainte
Où de riches pierres ot mainte.
Moult ert riche cele ceinture ;
D'or et de pierres à nature
Estoit ouvrée bien et bel.
En cote estoit et en mantel
Dont la penne ert riche et diverse
De bestes qui naissent en Perse.
Les nons des bestes pas ne sai,
Pour ce à nonmer les lairai.
Moult ert riche la forreüre ;
I tant sans plus de vesteüre
Ot la bele, ne plus ne mains.
Uns malades devenist sains
Qui assez peüst regarder
Son très gent cors, et son vis cler,
Et son très biau chief crespe et blont.

Ainsi vers le moustier s'en vont.

Elyador, la suer ainsnée
Cléomadès, si acesmée
Venoit après qu'il convenoit.
Or vous dirai qui l'adestroit.
II	l'adestroit Bondars li Gris
Entre lui et Garsianis.
Feniadisse après sivoit,
Qui ainsi acesmée estoit
Que il estoit aferissant.
Doi roi qui erent moult poissant
PageV02P247
Icele pucele adestroient,
Et vous dirai qui il estoient :
Li uns ert Agambars li Lons,
Sormans li Rous ert li secons.
Marine après eles venoit. ;
Argente par la main tenoit,
La suer au roi Meniadus.
Galdas des Mons s'ert embatus
Avoec eles, qui moult savoit
De bien, pour ce les conpaignoit.
Dames erent de bon afaire
Done Ynabele et Bien-doit-plaire.
L'une lés l'autre chevauchoient,
Après cele route sivoient.
De II rois adestrées furent
Qui par raison faire le durent.
Baldigans et Melocandis
Erent li roi que je devis,
Qui ces II dames adestroient.
Les autres roynes venoient
Après, toutes en ordenance.
Sachiez que noblece et plaisance
Et richece en la route estoient,
Qui moult bien paroir s'i faisoient.
# |
Or n'ai pas dit qui adestrerent
Cléomadès. Mais qui il erent
Vous arai je dit moult briement:
N'i metrai pas trop longuement.
À son destre lés ot Durban
Et au senestre lez Sartan ;
Pour ce k'onnorer les vouloit,
À aus adestrer se faisoit.
Savoir vouloient pluseur gent
Qui cil erent qui telement
Adestroient Cléomadès,
Que lés lui estoient adès.
PageV02P248
Et ce n'ert pas merveille grant,
Ains ert chose bien aferant ;
Car, quant on voit un grant seignour
Qui fait à un bon povre honnour,
Aucun se painent de savoir
Qui il est ; dont cil font savoir
Folio66v
Qui vuelent connoistre les boins
Et vuelent retenir les poins
Par quoi on puet bons devenir
Et à haute honnour avenir,
Et qu'il se vueillent entremetre
Des poins de bien à œvre metre.
# |
Pou vaut semers sans recueillir
Et bien oyr sans retenir.
Cil qui ot et voit et retient
As poins de haute honnor se tient,
Mais k'en son cuer ait volenté
Qu'il ait le mont d'onneur monté.
Et qui est li mons honnorables ?
C'est li haus mons, qui est estables,
Dont mais nus ne descendera
Puis que il montez i sera ;
C'est li haus mons de Paradis,
Là où Diex met tous ses amis.
Tout cil qui monteront ce mont
De tous maus eschapé seront,
Et seront venu à tous biens
Si que il ne lor faurra riens.
Sage seront cil qui pener
Se vorront de ce mont monter ;
Car cil qui ne s'en peneront
PageV02P249
En la male valée iront
D'enfer, là où ne va nus biens ;
Car là ne claime bien fais riens,
Car bien fais a son droit estage
En Paradis à heretage,
De ce vous vueil briement parler.
Bon fait sa vie en bien user ;
Car cil qui en bien l'usera
De joie coronnés sera
D'une coronne esjoïssans,
Dont cil coronné à tous tans
Seront, qui trespassé aront
Ce siecle ainsi qu'il deveront.
# |
Au moustier vinrent. Lors descent
Cléomadès tout erranment.
Lors de toutes pars descendirent
Si tost que descendu le virent.
Et li evesque, qui portoient
Les coronnes, venu estoient
Droit à l'entrée dou moustier.
Clarmondine sans detriier,
Fu errant avant amenée ;
Et Cléomadès espousée
L'a, et ele lui espousé,
Dont Desirs sot Raison bon gré.
# |
Melocandis lors espousa
Elyador, qu'il moult ama
Tout son vivant, et ele lui ;
Moult amerent l'uns l'autre andui.
De Melocandis ert moult près
Baldigans, qui, errant après,
Espousa moult très liement
Feniadisse o le cors gent.
Ainsi fu fait bien et à droit
PageV02P250
Que on à celui tans l'usoit.
# |
Quant espousé orent tout troi,
Si com vous ai dit, li troi roi,
Lors vinrent li evesque avant.
À Cléomadès, tout errant,
Mirent sor le chief la coronne,
Dou destre lez, qui moult ert bonne.
À Clarmondine ainsi le firent ;
La destre coronne li mirent,
Qui pour li fu là aportée,
Et li fu la petite ostée
Dont devant parlé vous avoie.
Ne demandez pas s'il ot joie
Là où vit tel gent espouser
Et errant après coronner
Conme li preus Cléomadès
Et Clarmondine, qui adès
Avoit en bien usé son tans,
Et fist, tant qu'ele fu vivans.
# |
Chascuns dedens le moustier vint.
Fait fu kan qu'il i apartint,
Selonc ce que adont usoient
Cil qui à celui tans estoient.
Enz el moustier tant demorerent
Que poins en fu. Lors s'en tornerent.
Quant ainsi orent aoré
Lor Diex, qu'il ert acoustumé,
Leur II coronnes leur osterent
Cil qui seur les chiés leur poserent.
Quant dou moustier issirent fors,
Les senestres coronnes lors
Leur assist on deseur les chiés.
Tout en autel point, ce sachiés,
Que il au moustier venu erent,
PageV02P251
Tout ainsi arrier s'en r'alerent, 
Fors tant que coronne portoit 
Cléomadès, qui pas n'avoit 
Coronne eue au venir là. 
Autre difller]ence n'i a, 
Et ce k'autre coronne avoit 
Clarmondine, que ne souloit. 
# |
Se vous à ce point là fussiez, 
Plenté d'estrumens oyssiez : 
Vièles et sauterions, 
Harpes, et gigues, et canons, 
Leüs, rubebes et kitaires. 
Et ot en pluseurs lieus nacaires 
Qui moult très grant noise faisoient ; 
Mais fors des routes mis estoient. 
Cymbales, rotes, timpanons, 
Et mandoires, et micanons 
I ot, et cornes et douçaines, 
Et trompes et grosses araines. 
Cors sarrazinois et tabours 
I avoit moult en lieus plusours. 
Estrumens de mainte maniere 
I ot, et avant et arriere, 
De toutes pars et de tous lés, 
Que je ne vous ai pas nonmés ; 
Car de maint pays i estoient 
Menestrel qui assez savoient 
De ce k'afiert à menestrel, 
Li un d'un et li autre d'el. 
# |
Ainsi en la place rentrerent. 
Et lors Cléomadès menerent 
Tout droit au lieu où arréés 
PageV02P252
Ert Il siege[s] où coronnés 
Devoit estre la tierce fois. 
Tout ce qu'il ert raisons et drois 
Fu fait, et lui et Clarmondine. 
Lors fu rois et ele royne, 
Quant les tierces corones orent. 
Ainc plus biau roi veöir ne porent 
Folio67r
Nus ne nule, ne loing ne près, 
Com fu li rois Cléomadès ; 
Et de Clarmondine la bele 
Repot on bien dire que ele 
Fu la plus bele coronnée, 
Qui ainc fu royne clamée. 
# |
Moult fu cil mariages gens 
Et graciiés de toutes gens ; 
Car il fu, à tesmoing l'estoire 
Qui est tesmoignie pour voire 
De la plus bele et du plus bel 
Qui fussent puis le tans Abel.
# | 
Devisé vous ai moult briement 
D'aus II le tiers coronnement. 
Si ai je fait les autres II ; 
Car longue riote n'est preus, 
Car trop plus fu grandement faite 
La chose que ne l'ai retraite. 
Mais il n'est mestiers ne besoins 
Que tous vous recorde les poins 
Que on fist aus coronner, 
Et pour ce le lairai ester. 
# |
Le roi Cléomadès leverent 
Dou lieu là où le couronnerent, 
Li roi, li prince, li baron, 
Dont là avoit moult grant foison. 
PageV02P253
Lors le menerent asseöir 
Au haut dois, si que bien veöir 
Le povoit on de tous costés. 
Clarmondine son destre lés 
Li sist ; car la coustume estoit 
Adont c'om ainsi le faisoit. 
# |
Sachiez que cele conpaignie 
Fu de mainte gent graciie 
Le jour, et prisie et loée. 
Et lors fu li aigue cornée 
En pluseurs lieus. Lors s'apresterent, 
Pour servir, cil qui tenu erent 
De servir à cele jornée. 
Mainte coupe d'or ou dorée 
Veïssiez maint baron tenir 
Pour roi Cléomadès servir. 
Bacins d'or et d'argent tenoient 
Cil qui au roi donner devoient 
L'aigue pour ses mains alaver. 
# |
Or vous vorrai je deviser 
Qui à la table le roi sist ; 
Ainsi que l'estoire le dist, 
Vous en dirai la verité. 
Après ce qu'il orent lavé, 
Elyador, sa suer ainsnée , 
A li rois lés lui apelée 
À son senestre lés tout droit ; 
Car à son destre lés séoit 
Clarmondine, car raisons fu 
Selonc ce k'avez entendu 
Que il estoit acoustumé. 
Li rois Carmans, au cuer sené, 
Sist lés sa fille Clarmondine
La très gracieuse royne.
PageV02P254
Et Feniadisse après sist ; 
Li rois Carmans lés lui la prist, 
Et rois Meniadus après. 
Lés la serour Cléomadès, 
Elyador, la debonaire, 
Sist la royne Bien-doit-plaire ; 
Après cele ne séoit nus. 
Tout droit après Meniadus 
Se sist Marine, et puis Argente. 
Moult fu cele tablée gente. 
# |
Bien sambloit la feste roiaus. 
Quatre haus dois i ot, si haus 
Que cil qui à ces dois séoient 
En pluseurs lieus veöir povoient 
La noblece qui i estoit. 
Done Ynabele se séoit 
Delez le roi Melocandis 
À I des dois que je devis, 
Et delez le roi Baldigant. 
Conme bonne dame et sachant, 
Ot les autres roynes prises 
Et les ot delez li assises. 
La fenme au roi Bondapt le Gris 
I sist, et la Garsianis, 
Et la fenme au roi Agambart, 
Qui ert dame de bonne part ; 
Et la fenme le roi Sormant 
I sist, qui moult ert avenant. 
# |
Que vous feroie je Ione conte ? 
Roi, roynes, et duc, et conte, 
Chevalier, dames, autre gent, 
Sirent au mengier noblement. 
À la feste que je devis 
Gent: avoit de maint pays
PageV02P255
Moult i ot de chevalerie. 
Mais la sonme ne sai je mie 
Combien il en i pot avoir, 
Ne [je] n'en diroie fors voir ; 
N'onques de ce ne me parlerent 
Les II dames qui me conterent 
De ceste matere l'estoire. 
Mais des nouviaus chevaliers, croire 
Povez bien ce que j'en dirai. 
La sonme vraiement en sai ; 
Car la sonme en soi par les dames, 
Cui Diex gart en cors et en ames, 
Dont je vous ai devant parlé ; 
D'eles en sai la verité : 
Bien en i ot M et, VII cens. 
# |
Li jours fu biaus et Clers et gens,
Et li airs temprés à nature. 
Ne fist trop chaut ne trop froidure, 
Mais si à point, k'à souhaidier 
Servi furent à ce mengier ; 
Si que conmunaument disoient 
Cil qui à cele feste estoient, 
K'ainc n'orent veü en lor vie 
Feste si grandement servie 
Com cele fu de trestous biens, 
Car à nului ne faloit riens. 
Li pois Cléomadès donna, 
Le jour que on le couronna, 
À Durbant une duehe[t]é 
Et à Sartan une conté, 
Ains qu'il s'assesist au mengier ; 
Car rans rinces ne doit laissier 
Que ses dons ne soit tost donnez
Puisque dou faire est avisez
PageV02P256
Et que il dou faire a raison, 
Courtement faire le doit on. 
Durbans et Sartans sagement 
L'en mercierent bonnement, 
Folio67v
Et à Dieu graces en rendirent. 
Devant Cléomadès servirent 
Andoi ce jour moult liement 
Et moult très afaitiement. 
# |
Je n'aroie à piece visé 
Conment j'eüsse recordé 
Com les routes erent parées 
Et très richement estofées ; 
À chascun més que on servoit 
Chascuns sa route reparoit 
De ceaus qui les routes avoient. 
Li menestrel qui là estoient 
N'avoient pas povoir d'entendre 
Qu'il peüsseut tous les dons prendre 
C'on leur offroit de tous costez. 
De paremens ert si troussez 
Cil qui tout le mains en avoit, 
Que à paines aler povoit. 
# |
Noblement servirent ce jour 
Cléomadès, lor bon seignour, 
Cil qui erent tenu dou faire. 
Après mengier, les napes traire 
Firent, et erranment laver ; 
Et, quant il fu poins de lever, 
Lors se leverent erranment, 
Car moult se hastoient forment 
Partout li chevalier nouvel 
Pour aler lancier au tablel. 
Et les dames et li seignour 
S'en alerent lors sans demour
PageV02P257
Seur les eschafaus asseöir. 
De là porent à plain veöir 
Com faitement se maintenroni 
Cil qui au tablel lanceront. 
# |
Moult apartement s'arréerent 
Cil qui par raison tenu erent 
D'aler ces tabliaus lancier. 
De la vile, sans detriier, 
S'en issirent de grant randon 
Roi, duc, conte, prince, baron, 
Et chevalier et damoisel. 
Maint cheval corant et isnel 
Peüssiez veöir eslaissier, 
Et mainte gent qui bien aidier 
Se sorent dou cheval mener 
Pour faire lancier et torner 
Ou pour faire grans saus pourprendre. 
N'en estoient pas à aprendre. 
Assez de ceaus en i avoit. 
Chascuns durement se penoit 
De lui maintenir telement 
Que on en parlast bonement ; 
Car cil qui au tablel lançoient 
Là endroit regardé estoient 
En pluseurs lieus de pluseurs gens. 
Moult est li jeus apers et gens. 
# |
Galdas des Mons si s'i prouva 
Ce jour, que on moult l'en loa. 
Aussi fist on Melocandis. 
Baldigans et Garsianis 
En refirent si Ior partie, 
Que drois est que on bien en die. 
Aussi fist li rois Agambars ;
Ne croi que plus droit traisist ars
PageV02P258
Droite fleche bien enpennée, 
Quant ele est adroit entesée, 
Que il des javelos faisoit 
Au tablel, quant il les lançoit. 
Mais seur tous le pris enporta 
Meniadus, c'on li donna 
L'esprevier, pour le miex lançant 
Et pour le plus bel chevauchant. 
Cil jeus à cel tans s'estendoit 
Plus loing qu'il ne fait orendroit. 
Par tous pays conmunaument 
Jouoient de ce geu souvent 
Li chevalier, quant il vouloient 
Moustrer l'aperté qu'il avoient. 
# |
En pluseurs lieus par la cité 
Ert feste en grant autorité. 
Danses, baus, caroles et jeu 
Estoient veü en maint leu. 
Parmi Sebile, en lieus plusours, 
Reviaus et deduis et baudours 
Erent adont si sormonté 
Qu'il estoient roi coronné. 
# |
Moult se sont bel esbaniié. 
Après ce qu'il orent lancié 
Au tablel, et assez joué, 
Se sont en la vile rentré. 
Quant poins et tans et lieus en fu, 
En la feste sont revenu. 
# |
Forment fu loez et prisiez 
[Et] de toutes gens graciez 
Meniadus, et ce qu'ot fait. 
Mais je ne vous ai pas retrait 
Conment Amours l'ot atorné 
PageV02P259
À ce qu'il ot son cuer donné 
Tout entierement à Marine ; 
Car perdue avoit Clarmondine. 
Cele ne porroit recouvrer. 
Mestiers li ert d'aillours penser, 
Se il fenme prendre vouloit ; 
Car cele failli avoit, 
Et il fait bon son cuer oster 
De ce e'on ne puet amender. 
# |
Moult li sambloit Marine bele, 
Et vraiement si estoit ele. 
Lors ne fust plus bele trouvée 
Qu'ele ert, ne miex endoctrinée, 
Fors que Clarmondine, sans plus ; 
Mais à cele ne devoit nus 
Comparer nule autre biauté, 
Tant en par avoit grant plenté. 
# |
Meniadus entalenta 
Que il Marine rouvera 
À Cléomadès ; mais, avant, 
En parlera au roi Carmant 
Et à sa mere et à sa gent ; 
Car son cuer si entierement 
A dou tout Marine otriié, 
K'en sa prison le tient liié 
Amours si amiablement 
Que il n'a vouloir ne talent 
De cele prison eschaper, 
Ains li plaist moult à demorer 
En la prison que je vous di. 
Sa mere et son conseil aussi 
Le moustra qu'il i apartint ; 
Et li leur consaus à ce vint, 
Que il li loerent à prendre 
PageV02P260
Marine, s'ele veut entendre 
Folio68r
À ce que la chose li plaise. 
# |
Moult fu Meniadus à aise 
Quant d'aus tele parole entent. 
Lors se pensa que erranment 
Vers le roi Carmant s'en iroit, 
Et son conseil o lui menroit, 
Et li mousterroit la besoigne 
Dont il avoit au cuer grant soigne 
Conment ele fust achevée. 
Bien-doit-plaire a o lui menée, 
Sa mere, cui il moult amoit, 
Et à ce bien raison avoit; 
Car chascuns doit sa mere amer 
Et à son povoir honnorer. 
# |
Devant le roi Carmant s'en vinrent. 
D'une part à conseil le tinrent, 
La besoigne à point li moustrerent 
Pourquoi là endroit venu erent. 
Au roi Carmant moult agréa, 
Et dist que il en parlera 
Au roi Cléomadès errant. 
Que vous iroie je contant? 
Li rois Carmans, sans arrester, 
Ala cele chose moustrer 
À Cléomadès, cui moult plot 
La chose, quant oye l'ot. 
Aussi fist il done Ynabele 
Et à Clarmondine la bele ; 
Et ceaus qui au conseil estoient 
Le mariage moult looient, 
Que il ne s'en descorda nus. 
Et li rois Carmans revenus 
Est d'iluec à l'autre partie.
PageV02P261
Quant Meniadus a oye 
La chose ainsi qu'il la raporte, 
De son cuer la joieuse porte 
S'ouvri contre celui raport ; 
Car Amours ot en lui pris port 
Par quoi couvint la porte ouvrir 
Pour celui raport recueillir 
Que li rois Carmans raporta. 
Moult chier de cuer ce raport a 
Meniadus, quant il l'entent. 
# |
À Cléomadès erranmelli 
Les enmena li rois Carmans. 
Et Meniadus, com sachans, 
Moult bel et moult à point moustma 
La besoigne qui li toucha 
À Cléomadès, sans detri. 
"Sire rois," fait il, "je vous pri 
Que vous vostre suer me donnez, 
Marine. À bonne heure fui nez 
Se vous m'en otroiés le don. 
Rendu m'arés biau guerredon 
De ce que gardai Clarmondine, 
Se donner me voulez Marine. 
Certes, moult en seroie liez 
Se donner la me vouliiez ; 
Car estre moult liez deveroie 
Se je la suer avoir povoie 
De roi de tel adrecement 
Com vous estes, se Diex m'ament." 
Fait Cléomadès com courtois : 
"La demandés ; et, quant tex rois, 
Com vous estes, ma suer demande, 
Ce seroit vilonnie grande
PageV02P262
Et folie dou refuser ; 
Pour ce, m'i plaist à acorder. 
Liez en doi estre, et je si sui 
Si que ne sai roi aujour d'ui 
À cui je la donnasse avant 
Que à vous, fors le roi Carmant, 
Mon chier seigneur, que je voi ei ; 
Car à lui nului n'aati. 
Je ne le di pas pour losenge, 
Sachiez, ne pour fausse Ioenge : 
En vous est moult bien emploiie 
Ma suer, et je la vous otrie." 
# |
Lors fu li rois Meniadus 
Si liés, qu'estre ne povoit plus. 
Cléomadès en mercia 
À point. Lors sont alés droit là 
Où Marine ert. Que vous diroie? 
Fiancie l'a à grant joie 
Pour à lendemain espouser. 
De ce vous lairai or ester. 
Tost fu cele nouvele alée 
Par la cité. Forment agrée. 
Tous ceaus qui parler en ooient 
Ce mariage moult looient, 
Et moult fu à chascun plaisans ; 
Car moult ert biaus et avenans 
Meniadus, et afaitiez. 
# |
Quant li jours fu paranuitiez, 
Chaseuns vers son osiel se trait. 
Je n'aroie à piece retrait 
La grant feste ne le deduit 
Qui en pluseurs lieus, cele nuit, 
Fu menée par la cité. 
De joie avoit partout plenté. 
PageV02P263
Quant poins en fu, couchieir alerent
Li doi roi qui marié erent 
Aus Il serours, si com vous di. 
Arréé furent li lieu si, 
Où chascuns d'aus gesir devoit, 
Que nobles rois aferoit. 
Selonc ce k'adont ert usé 
Fn fait, et point ordené. 
# |
S'onques chambre fu bien parée, 
Dont fu cele bien arréée 
Qui pour Cléomadés le roi 
Fu arréée. Tout l'arroi 
N'en aroie pas devisé 
En tout le plus Ione jour d'esté, 
Tant i par avoit grant noblece. 
Et se dou lit la grant richece
Vous disoie, où conchier devoit, 
À grant merveille vous venroit 
De la richece la devise. 
D'ouvrage de diverse guise 
Erent les estofes dou lit. 
Avoir deüst si grant delit 
Qui assez le peüst veöir, 
Que mais n'en queïst remouvoir. 
Moult estoit biaus â regarder. 
# |
Ou lit que m'oez deviser 
Jut li rois avoec Clarmondine. 
Avoec aus jut une royne 
C'on apele Loial Amour, 
Qui coronnée ert de douçour. 
Folio68v
Cele royne moult amoient. 
Par son conseil ouvré avoient,
Et firent de là avant
Tous jours tant com furent vivant.
PageV02P264
Adès en loiauté se tinrent, 
Et loiaument Amours maintinrent. 
Icele nuit ainsi se jurent 
Si lié de cuer que estre durent. 
# |
Et lendemain, quant poins en fil, 
Se leverent, quant tant geü 
Orent, que raisons aportoit. 
Clarmondine enpensé avoit 
K'à Clèomadès rouvera 
I don, et ele li rouva ; 
Et il le don, tout erranment, 
Li otroia moult liement.
# |
"Sire," fait ele, "or vous dirai 
Quels li dons est k'avoir vorrai. 
Sachiez que moult lie seroie 
Se je mariée véoie 
Argente, en I lieu soufisant ; 
Et li dons que je vous demant, 
C'est que vous vous vueilliez pener 
De li hautement marier. 
Ce est li dons que je vous proie."
# | 
Cléomadès l'ot ; s'en ot joie. 
À Clarmondine bon gré sot 
De la requeste, et moult li plot ; 
Et il dist que il en fera 
Tout son povoir. Lors s'avisa 
Que Galdas des Mons là estoit 
Qui ainc fenme eüe n'avoit ; 
Et pense bien que il fera
PageV02P265
Partie de ce qu'il vorra. 
À Clarmondine l'a moustré, 
Cui la chose vint moult à gré. 
D'ainsi que moustrée li ot, 
Au plus tost que il onques pot 
Fist tant k'au roi Galdas parla. 
Tant li dist et li devisa, 
Qu'il arréa le mariage 
De lui et d'Argente la sage, 
Par l'assentement des parties, 
Qui joians en furent et lies. 
Si furent toute l'autre gent. 
À tous plaisoit conmunaument, 
Et disoient, que gracieus 
Ert li mariages d'aus II , 
Car bonne et bele ert et plaisans 
Argente, et cil preus et vaillans 
Et biaus, qui avoir la devoit. 
Que vaurroit c'on plus vous diroit? 
# |
Marine et Argente arréées 
Furent, et au moustier menées. 
Telement arréées furent, 
Que eles par droit estre durent. 
Et cil qui avoir les devoient 
Aussi si arréé estoient 
Que de tout ce riens n'i failloit 
Que à chascun d'aus couvenoit. 
# |
Pour ce que on ne die pas 
Que je de l'estoire trespas 
Riens nule, nonmer vous vorrai 
Ceaus, ainsi que entendu l'ai, 
Qui les puceles adestrerent 
Quant vers le moustier en alerent.
Marine par devant aloit ;
PageV02P266
Rois Cléomadès l'adestroit 
Tout droit au lés par devers destre, 
Et Melocandis à senestre. 
Et Argente venoit après. 
son destré lez ert moult près 
Li rois Carmans, qui l'adestra ; 
Et li rois Baldigans ala 
Delez li, au senestre lez. 
Au moustier, qui fu Ions et lez, 
S'en vinrent. Errant espouserenf 
Li roi, et lors s'en retornerent. 
# |
Quant fait orent tout leur devoir, 
Je vous puis bien dire pour voir 
Que la feste fu moult plus grant 
Celui jour, que le jour devant, 
Se on la pot faire plus grande. 
Nus ne vouloit vin ne viande, 
Ne riens c'on seiist deviser, 
C'on ne le feïst delivrer 
Tous ceaus qui mestier en avoient 
Et qui demander le vouloient. 
Car la feste miex pourveüe 
Fu, que nule qui ainc veiie 
Fust, ne devant ne puis ce di ; 
L'estoire le tesmoigne ainsi, 
Qui est veritable et certaine. 
# |
En la place c'on claime Arainne, 
Fu le jour, defors les palis, 
Mains riches chevaus poursaillis ; 
Car tout errant après mengier 
Alerent au tablel lancier 
Trestout li chevalier nouvel. 
Prince, baron et damoisel 
I alerent esbanoier.
PageV02P267
Chascuns pour son cors avancier 
I aloit. Que sage faisoient, 
Et encore demain feroient 
Que sage, cil qui entremetre 
Se vorroient, et paine metre 
D'avancier aus et Ior honnour, 
Pour ataindre non de valour ! 
# |
Par dedens les palis estoient 
Mainte gent qui moult se penoient 
festiier à leur povoir. 
En maint lieu peüssiez veöir 
Danses, caroles, jeus et baus. 
En haut, deseur les eschafaus, 
Sist la royne Clarmondine. 
Delez li sist sa suer Marine, 
Et si sist Argente la bele. 
La royne done Ynabele 
I sist, et si sist Bien-doit-plaire, 
Qui moult ert bonne et debonaire 
Et en toute honnour connoissans. 
# |
Entre eles sist li rois Carmans, 
À cui moult durement plaisoii 
La, maniere que il véoit 
En done Ynabele la sage, 
Forment prisoit en son corage 
Sa contenance et sa maniere. 
D'onneur faire estoit si maniere, 
Là où ele à faire aferoit, 
Que chascuns amer la devoit ; 
N'avoit en li à amender 
Riens nule c'on peüst viser
# |
Folio69r
De jour en jour plus la prisoit
Li rois Carmans, et plus l'amoit,
PageV02P268
Tant k'Amours I commant li fist 
Tel que à fenme la preïst, 
Et que il se vousist pener
De li faire à ce acorder 
Que ele prendre le vousist. 
En tel penser Amours le mist ; 
Car dame estoit bel et plaisans 
Done Ynabele, et avenans. 
Et il de cuer entierement 
Dou tout à ce faire s'assent, 
S'avoir la puet, que il la praigne, 
Et que tost la besoigne enpraigne ; 
Et pensa qu'il en parleroit 
Quant poins et tans et lieus seroit. 
# |
Li rois Carmans en tel point fu 
O les dames. Moult ont veü 
Partout de joie et de revel ;
Maint cheval corant et isnel 
Povoient veöir eslaissier ; 
Maint riche baron, maint princier, 
Maint bacheler, maint damoisel 
Povoient veöir au tablel 
Lancier moult très apertement. 
Moult festioient liement. 
# |
Devant cel eschafaut avoii 
Une estache qui soustenoit 
Un grant bacin large d'argent. 
Veöir povoient mainte gent 
La geline d'or qui estoit 
En ce bacin, et com aloit 
Par desus le bacin chantant 
PageV02P269
Et si poucin après sivant. 
Seur une autre estache delez 
Ert li hom d'or mis et posez, 
Qui tex ert que tromper devoit 
Qui envers celui penseroit 
Cui il ert, mal ne trayson, 
Tout errant orroit on le son 
De la trompe que il tenoit. 
Et li chevaus de fust estoit 
Lés l'oume d'or ; veöir le porent 
Trestout cil qui veöir le vorrent. 
Durement s'en esmerveilloient 
Cil et celes qui les véoient. 
Divers erent, et bel et chier ; 
C'ert bien chose à esmerveillier 
Que des joiaus que je devise. 
Nul ne les voit qui ne les prise. 
# |
Ainsi là endroit se séoient 
Les dames, et si regardoient 
Le deduit de trestous costez. 
Veöir en povoient assez. 
Quant tant orent iluec esté 
Que poins en fu, lors sont levé.
# | 
Li rois Carmans pas n'oublia 
Le conmant k'Amours fait li a, 
Ains fist tout erranment mander 
Son conseil. Sans plus arrester, 
Cele besoigne leur moustra, 
Et chascuns tantost li loa 
Qu'il le ferst hastéement, 
Se la royne s'i assent, 
Done Ynabele, k'à meillour 
Ne povoit il donner s'amour. 
PageV02P270
Au roi Carmant vint moult en gré 
Ce que sa gent li ont loé 
Qu'il la preïst. Lors s'avisa 
Que à sa fille en parlera 
Ains k'à Cléomadès le die. 
Ainsi le fist. Lors fu moult lie 
Clarmondine, quant ce entent ; 
Car de cuer amoit durement 
Done Ynabele, car trouvé 
Avoit en li tant d'amisté 
Et de douçour et de tous biens, 
Qu'ele l'amoit sor toute riens. 
Cele besoigne moult li plot ; 
Moult la loa et moult la vot. 
# |
Que vous iroieje contant, 
Ne la besoigne pourloignant ? 
À Cléomadès en parla 
Li rois Carmans. Moult agréa 
Cléomadès quant l'entendi • 
À la royne en parla si, 
Sa mere, qu'ele s'otria 
À ce que son plaisir fera. 
Mais ainçois grant debat i mist 
Que ele otroier se vousist 
À li jamais remarier. 
Nepourquant l'i fist acorder 
Ses fiex, ou vousist ele ou non ; 
Et bien li moustra par raison 
Que ele pas ne mesprenoit 
S'ele si vaillant roi prenoit, 
Et si preudoume et si sachant, 
Conme le noble roi Carmant. 
Et ele tant son fill ama 
Qu'ele courroucier ne l'osa,
Ains fist dou tout sa volenté.
PageV02P271
Le mariage a créanté 
Cléomadès, et pris en main. 
Les noces furent lendemain 
Si grandes et de tel afaire 
Que on les pot onques miex faire. 
Tout kan que il i couvenoit 
Fu fait grandement et droit, 
Si que il ert aferissant. 
# |
Adès aloit en grandissant 
La feste en joie et en honnour, 
De plus en plus, de jour en jour. 
De festiier, de caroler, 
Et de plenté de dons donner 
À ceaus qui tenu en estoient, 
Cil qui honnour faire devoient 
N'el metoient pas en oubli. 
Plus en faisoient que ne di 
Et que ne saroie retraire. 
Et pour ce me vueil de ce taire ; 
Car à piece nonmés n'aroie, 
Jà si pener ne m'en saroie, 
Les dons qui là furent donné, 
Tant en i par ot grant plenté. 
# |
Dou roi Cléomadès sai bien 
Que il n'oublia nule rien 
K 'à honnour à faire aferist, 
Ainsi que l'estoire le dist. 
Ainc rois à feste ne donna 
Tant de grans dons que il fist là. 
As dames et as chevaliers 
Chevaus, palefrois et deniers, 
Folio69r
Plenté de dras d'or et de soie, 
Or monnéé et sans monnoie, 
Coronnes, fermaus et joiaus 
PageV02P272
Donna assez, riches et biaus. 
Hanas d'or, pos, platiaus d'argent 
Donna li rois à pluseur gent, 
Et d'autres manieres de dons, 
Tant que n'en sai dire les nons ; 
Si que tout cil qui là estoient 
Entre aus conmunaument disoient 
C'onques mais n'avoient veüe 
Feste de si très grant value 
Com cele, ne mais ne feroient. 
De tout la feste moult prisoient. 
# |
Quatre jours la feste dura. 
Les trois puceles maria 
Cléomadès, si com orés, 
Dont vous devant oy avés, 
Qui Clarmondine orent servie 
La bele, la bien ensaignie; 
Et il leur fu guerredonné 
À leur plaisir et à leur gré, 
Ainsi com je le vous dirai, 
Car la chose vraiement sai.
# | 
Florete espousa Fercatas, 
Et Gayete ot Elyadas ; 
Et à un autre grant seignour, 
Riche de grant terre et d'onnour, 
Refu Lyadès mariée. 
Chascune fu si assenée, 
Que grandes dames toutes trois 
Furent. Ce fu raisons et drois, 
Car bien l'avoient desservi ; 
Et, pour ce, leur fu si meri 
K'à tous jours riches et manans 
Furent, tant com furent vivans. 
PageV02P273
De Pinchonnet fist chevalier 
Li rois ; car forment l'avoit chier, 
Et il faisoit tant amer, 
C'on le devoit bien honnorer; 
Car sages et courtois et nès 
Et gracieus ert Pinchonnès, 
Ne mais I seul mot ne deïst 
Où on riens entendre pouist 
Fors que honnour et courtoisie, 
Sa desserte li fu merie 
Si grandement, qu'il et si hoir 
En porent tous jours miex valoir, 
Grant terre et noble seignorie 
Li fu, de par le roi, baillie, 
Et de lui si maistre le fist 
Li rois, si com li livres dist, 
Qu'il ne vousist rien conmander 
Que nus li osast refuser ; 
Car li rois ainsi le vouloit, 
Et cil ert tex qu'il le valoit. 
# |
Cléomadès, com nobles rois 
Et conme sages et courtois, 
Fourni sa feste, et acheva. 
Or vous dirai cui il donna 
Le trompeëur d'or qu'il avoit. 
C'ert uns joiaus que moult amoit ; 
Car il faisoit moult à amer. 
De par lui le fist presenter 
Au roi Carmant, et cil le prist 
Qui dou present grant joie fist, 
Car le jouel forment prisa ; 
Moult li plot et li agréa, 
# |
Les trois poucins et la geline 
Fist presenter à la royne
PageV02P274
Qui Bien-doit-plaire avoit à non. 
La dame prisa moult le don ; 
Car moult estoient riche et bel 
Et noble et plaisant tel juel. 
Bien avez devant entendu 
Quele cele geline fu, 
Et quel estoient li poucin, 
Qui estoient d'or si très fin 
C'on povoit plus or afiner. 
# |
Le cheval ne volt pas donner ; 
Ains pensa qu'il le retenroit 
À son oes, car par lui estoit 
À la très grant joie venus 
D'amours, où, espoir, avenus 
Ne fust jamais, se ce n'eüst 
Esté par le cheval de fust. 
Et, pour ce, le cheval retint 
À son oes, que ce l'en avint. 
# |
De ce à parler vous lairons : 
D'autre chose vous parlerons. 
N'est si grans cours qu'il ne couviengne 
Departir, conment qu'il aviengne, 
Fors la grans cours de Paradis ; 
Mais icele dure tous dis 
Et a duré et durera. 
Sages iert qui se penera 
Que à cele court puist venir 
Qui durera sans departir 
Tous jours en joie parmenable ; 
Icele cours est honnorable. 
Là on n'a onques fors que joie. 
Tenir couvient la droite voie 
Qui à cele court veut aler 
Dont vous m'oez ici parler ; 
PageV02P275
Car jà nus n'i assenera, 
Se il droite voie ne va. 
# |
Plenté de gent là demorerent; 
Et moult grant plenté s'en alerent. 
Or vous dirai qui demora 
Là endroit, et qui s'en ala. 
Meniadus et rois Carmans, 
Melocandis et Baldigans 
Remesent, et Galdas des Mons. 
Moult avoit priié et semons 
Galdas de ceaus qui là estoient 
Que il à la venue soient 
De sa fenme, quant l'enmenroit; 
Car grant feste à tenir baoit 
En son pays, à sa venue. 
Cele chose fu bien seüe. 
# |
Tout li autre roi s'en alerent. 
La feste moult forment loerent 
Tout cil qui i orent esté; 
En lor pays sont retorné. 
Vraiement vous di, sans mentir, 
Que Cléomadès, au partir, 
Fist tout son devoir à chascun, 
Que il n'i oublia nesun 
De ceaus dont li dut souvenir ; 
Et au r'aler, et au venir, 
Fist très grandement et droit 
Tout kan que il faire en devoit.
# | 
Folio70r
Je ne sai pas com lonc termine 
Done Ynabele la royne 
Et li rois Carmans demorerent 
Iluec. Mais à ce s'acorderent 
Cléomadès et il ensamble,
PageV02P276
Et Meniadus, ce me samble, 
Baldigans et Melocandis, 
Tous s'acorderent, ce m'est vis, 
K'à la feste Galdas iroient. 
Par raison laissier n'el devoient; 
Car tant priiés les en avoit 
Galdas, que il plus ne povoit, 
Tant qu'il s'i erent acordé. 
À Sebile ont tant demoré 
Que estre lor sambla raison ; 
En leur conpaignie en saison 
Ert deduis et feste et solas. 
Envoié ot li rois Galdas 
En son pays pour arréer 
Sa feste ; car moult honnorer 
Vorra Cléomadès, s'il puet, 
Et ceaus que il là mener veut.
# |
De Sebile se dessevrerent 
Quant poins en fu, et tant errerent 
Par leur jornées, que venu 
Sont en Gascoigne, où receü 
Furent droit et liement ; 
Car Bondars li Gris telement 
Les honnora en son pays, 
Que il n'en dut estre repris 
De nului, mais de tous loez, 
Car il en fist tant que assez, 
Si que de lui tous se Ioerent. 
D'iluec à Toulouse tornerent 
Où la feste arréée estoit 
Si que il miex ne couvenoit. 
La feste fu si maintenue 
Qu'ele pour bele fu tenue. 
ce que à grant feste apent 
Fu estofée noblement 
PageV02P277
La feste que rois Galdas tint. 
# |
Après la fest,e, ainsi avint 
Que droit en Toscane tornerent. 
Cil dou pays si honnorerent 
Done Ynabele à sa venue, 
Qu'ele telement receüe 
Fu, que il n'i ot k'amender. 
Grant joie veiSt on mener 
Ceaus dou pays pour Clarmondine 
Car tout l'amoient d'amour fine. 
# |
J'aroie trop à deviser 
Se je vouloie recorder 
Des festes les estoremens, 
Les richeces, les paremens, 
Les dons qui donné i estoient 
De ceaus qui donner les devoient. 
Trop en seroit li contes Ions. 
Pour ce à briés mos vous disons 
Que chascuns, ce sachiez de voir, 
En fist grandement son devoir, 
Si que il n'i ot k'amender. 
Droit devers Salerne à aler 
Leur plot, si le firent ainsi. 
Par fine verité vous di 
Que feste bele et riche i ot ; 
Car li rois Meniadus sot 
Kan c'on devoit faire et laissiet'. 
Si à droit les sot festiier, 
Que on pas viser ne seüst 
Que nus amender i peüst 
ne riens qui afiere à grant feste. 
Bele et riche fu et honneste 
La feste, et droit estofée. 
PageV02P278
Clarmondine, com avisée 
Et conme courtoise et sachant, 
Fist envers les X fenmes tant 
Qui la garderent quant là fu, 
Ainsi com avez entendu, 
Que riches furent et manans 
Tous jours tant com furent vivans. 
Et celes moult l'en mercierent. 
Souventes fois à Dieu prierent 
Que il li rendist guerredon 
Dou très grant bienfait et dou don 
Que chascune de li avoit. 
Que vaurroit c'om plus vous diroit ? 
# |
Grandement furent honnoré 
À Salerne. Tant demoré 
Ont que raison lor sambla. 
Li rois Melocandis pria 
Moult durement au roi Carmant, 
Entre lui et roi Baldigant, 
K'en leur pays vousist venir ; 
Moult l'i vorroient conjoïr 
À leur povoir, et honnorer. 
Mais il ne s'i volt acorder. 
Non fist Cléomadès aussi, 
Ne Meniadus. Tant vous di 
Que bien en firent leur devoir, 
Se priere i peüst valoir, 
Baldigans et Melocandis. 
Mais, ainsi com dist li escris, 
Là endroit fu la departie 
be la plus noble conpaignie 
Que nus qui à celui tans fust 
En nul pays veüe eüst. 
# |
Se tout vous vouloie retraire
PageV02P279
L'anui de cuer et le contraire 
Que chascuns ot au dessevrer, 
J'aroie trop à recorder. 
Done Ynabele chastia 
Ses filles, et moult leur pria 
Qu'eles fussent obéissans 
Envers leurs seigneurs, et soufrans, 
Et les tenissent à amour ; 
Car dame ne puet graindre honnour 
Avoir, que son seignor amer 
Et obéir et foi porter. 
Et eles debonairement 
Orent à leur mere en couvent 
Que eles ainsi le feroient. 
Les naves seur le port estoient 
Là où cil devoient entrer 
Qui aler devoient par mer. 
# |
Au bon roi Carmant congié prirent 
À point, quant de là se partirent, 
Et prirent congié à leur mere ; 
Au roi Cléomadès leur frere 
Prirent congié tout en plorant 
Et moult durement souspirant, 
Et à Clarmondine la gente, 
À Bien-doit-plaire et à Argente 
Et à Meniadus aussi. 
Près que li cuers ne leur parti, 
Quant eles d'iluec dessevrerent. 
En la mer en plorant entrerent. 
# |
À Cléomadès prist congié 
Melocandis, et moult priié
Li a que en son pays viengne
Et que il de ce li souviengne.
Et Cléomadès dit li a,
PageV02P280
Sans faille, que il le fera, 
Et qu'il ne lairoit, à nul fuer, 
Que il ne reveïst sa suer 
Et lui, au plus tost qu'il porroit ; 
De ce à envis se tenroit. 
À Baldigant tout ensement 
L'ot Cléomadès en couvent. 
Moult l'en alerent merciant 
Andoi. Lors entrerent à tant 
En leur nés, quant congié ont pris. 
Conme courtois et bien apris 
Prirent leur congié, sans mesprendre, 
Partout là où le durent prendre. 
# |
Lors sont dedens leur nés entré. 
Tost furent leur voile levé 
Après ce, car li tans estoit 
Tex que meilleur ne couvenoit. 
De là furent tost eslongnié. 
Des iex et des cuers convoiié 
Les ont cil qui là demorerent. 
Tant com porent les esgarderent. 
Done Ynabele onques oster 
N'en pot ses iex, tant k'esgarder 
Les peüst, ne petit ne grant. 
Et cil là esploitierent tant 
K'en la terre Melocandis 
Arriverent, ce m'est avis. 
Ainçois que en la Baldigant.
# | 
Feste et joie et honnour si grant
Fu faite là que il couvint. 
Tout ainsi qu'il i apartint 
Fu festiie et honnorée 
Elyador en la contrée 
De quoi ele royne estoit.
PageV02P281
Chascuns durement se penoit 
De faire joie à sa venue ; 
De tous fu liement veüe. 
Rois Melocandis feste tint 
Si riche que il là couvint 
De ce que grant feste apent.
Et lors après tout erranment 
Que cele feste fu passée, 
S'en alerent sans demorée 
En la terre roi Baldigant. 
Là r'ot feste très noble et grant, 
Riche et bele, et si ordenée 
Que de tout fu bien estofée.
# | 
As II serours moult bien plaisoit 
La grant honnour qu'on leur faisoit 
De toutes ars et de tous lés. 
# |
Quant là ot demoré assez, 
Melocandis, lors s'en parti ; 
Droit en sa terre reverti, 
Et Baldigans là demora. 
Chascuns d'aus tant sa fenme ama 
Que il par droit la dut amer. 
Moult se penoient d'onnorer 
Eles, et eles autressi 
Refaisoient d'aus tout ainsi. 
Tant qu'il vesquirent, honnorerent 
Li uns l'autre, et tant s'entr'amerent 
Com gent se pueent entr'amer 
De fins cuers loiaus, sans amer. 
Mais d'aus à parler vous lairai ; 
Dou roi Cléomadès dirai. 
# |
À Salerne tant demora 
Qu'il li plot et qu'il li sambla
PageV02P282
Entre lui et le roi Carmant. 
Meniadus, qui savoit tant 
De bien et d'onnour que nus plus, 
Les a là endroit detenus 
Tant qu'il les i pot detenir. 
Lors lor plot de là à partir, 
Quant tant i orent demoré 
Que drois et raisons ot porté. 
Lors prist congié, tout en plorant, 
Clarmondine dou roi Carmant 
Son pere, et de done Ynabele 
Moult très doucement, conme cele 
Qui bien sot ce c'on devoit faire. 
la royne Bien-doit-plaire 
Prist congié moult piteusement, 
Et moult la mercia forment 
D'el honnour et de l'amisté 
Qu'ele ot souvent en li trouvé. 
# |
Quant congié ot pris Clarmondine 
Et à Argente et à Marine 
Et partout là où le dut prendre, 
Tantost après, sans plus atendre, 
Se parti de là erranment. 
Tout prioient conmunaument 
La gent que Diex la conduisist 
Et à bonne fin la presist ; 
Car tout cil qui la connoissoient, 
Ou qui oï parler avoient 
Des biens de li, de la biauté, 
D'el honnour, d'el humilité 
Dont en li grant plenté avoit, 
L'amoient ; si avoient droit, 
Car on doit bien tel dame amer 
Com cele dont m'oez parler.
PageV02P283
Conme courtois et bien apris, 
Ot li rois Cléomadès pris 
Tel congié k'à lui aferi. 
Nule riens ne mist en oubli 
K'à ce à faire apartenist. 
Ains que de là se partesist, 
Li ot rois Carmans en couvent, 
Et Meniadus ensement, 
Que courtement en lieu venroient 
Là où reveöir se porroient ; 
Et ce firent il quant il porent, 
Non pas toutes les fois qu'il vorrent. 
# |
De ce plus ne vous parlerai. 
Mais, ainsi que j'entendu ai 
De ceste estoire le certain, 
Li rois Carmans droit lendemain 
Que Cléomadès s'en ala, 
Se parti bien matin de là. 
Done Ynable ensaignie ot 
Sa fille de ce qu'ele sot 
Que bon à ensaignier li fu. 
Souvent li ot amenteü 
Folio71r
Que ele son seignour amast 
Et à son povoir l'onnorast ; 
Et ele, tout en lermoiant, 
Li ot dit qu'ele feroit tant, 
S'ele povoit, que jà de li 
N'aroient honte si ami. 
# |
Meniadus son devoir fist 
À chascun, si qu'il n'i mesprist 
De riens que il faire i deüst 
Dont nus reprendre le peüst, 
Ne de conroi, ne de riens née.
Chascuns revint en sa contrée,
PageV02P284
Ainsi que vous ai recordé. 
Mais ne vous ai pas devisé 
Conment Bien-doit-plaire ensaigna 
Sa fille, ains que partist de là. 
Com bone mere, chastoiie 
L'avoit, et adroit ensaignie 
De ce k'à bon chastoi afiert. 
De ce plus parlé ne vous iert. 
# |
Bien-doit-plaire de cuer ama 
Marine, et forment l'onnora. 
Et Marine, conme sachant, 
Fist vers li et vers chascun tant 
Que tout cil dou pays l'amerent ; 
Car tant de biens en li trouverent, 
Et d'amour et d'umilité, 
Que tout la tinrent en chierté. 
De Meniadus honnorée 
Fu tout son vivant, et amée ; 
Et il refu, tant qu'il vesqui, 
Amez et honnorez de li. 
De ce à parler vous lairons. 
# |
Carmans et rois Galdas des Mons 
Partirent ensamble de là. 
Se Marine à ce point plora, 
Ce ne fait pas à demander, 
Quant ele en vit sa mere aler, 
Done Ynabele, qui li ot 
Ensaignié tout ce qu'ele sot 
Que bon li fu à ensaignier. 
De ce plus parler ne vous quier. 
# |
Telement se maintint Marine, 
Que tenue bonne royne 
Fu de tous ceaus qui ainc la virent, 
PageV02P285
Ne qui de li parler oïrent. 
Done Ynabele ot moult priié 
Bien-doit-plaire, au prendre congié, 
Que ele Marine ensaignast 
À faire ce qu'ele cuidast 
Que il li fist bon à savoir. 
Et cele en fist tout son devoir.
# | 
Li rois Carmans en son regné 
Revint. Moult avoient mené 
Seur le chemin, il et Galdas, 
Vie de feste et de soulas, 
Et moult li uns l'autre honnorerent. 
Tant esploitierent et errerent, 
Que en Toscane sont venu. 
Là a Carmans tant detenu 
Le roi Galdas qu'il onques pot. 
Tant i fu k'à aler l'en plot. 
Lors s'en ala quant poins en fu ; 
Mais, ains que il fussent meü 
Ne il ne Argente la bele, 
Ot Carmans et done Ynabele 
Fait leur devoir entierement 
Vers aus et vers toute leur gent. 
Li rois Carmans là demora, 
Et li rois Galdas s'en ala, 
Ainsi que vous ai devisé. 
# |
Dame plaine d'umilité 
Et d'onnour et de sens rassis 
Orent Toscan, ce lor fu vis. 
Dieu moult très durement looient 
Dou restorier que il avoient 
De Clarmonde qui morte estoit.
Chascuns apaiez s'en tenoit.
Ele et Carmans, tout leur vivant,
PageV02P286
Honnorerent l'uns l'autre tant 
Et la pais l'un l'autre garderent, 
Que il tele vie menerent 
Que bone gent doivent mener. 
# |
Or vous vorrai je deviser 
De Galdas et d'Argente aussi. 
Par fine verité vous di 
Que Argente si se prouva 
Que li rois Galdas moult l'ama 
Et honnora tant qu'il vesqui ; 
Et ele lui ama aussi, 
Com bone dame son seigno[u]r 
Doit amer et porter honnour. 
# |
À Cléomadès revenir 
Me plaist, pour ce que parfournir 
Vueil le certain de ceste estoire. 
Sachiez que à celui tempoire 
Ne fu nus rois qui se presist 
À lui, ne qui le ratainsist 
De hardement ne de prouece, 
De sens, d'onnour ne de largeee, 
Ne d'apensement ne d'avis. 
Tels teches com je vous devis 
Ot Cléomadès si lonc tans 
Que il fu au siecle vivans. 
Tant qu'il vesqui, monteplia 
Haute honnour en lui, et monta 
De plus en plus, de jour en jour. 
Ses cuers n'avoit onques sejour 
Que adès ne fust sa pensée 
Conment honnours fust gouvernée ; 
Et tex ert li cuers Clarmondine, 
Qui fu si très parfaite et fine 
De bien, de sens et de biauté,
PageV02P287
De foi, d'onnour, d'umilité, 
Et de tout ce c'on puet penser 
C'on puet à bonté atorner, 
Car riens qui à amender fust 
Nus en li trouver ne peüst. 
# |
Moult fu douce la conpaignie 
De gent de tous biens si garnie 
Que il andui ensamble estoient ; 
Se à soufrir en avoient 
Pour garder foi et loyauté. 
Bien leur avoit guerredonné 
Amours, pour cui l'avoient fait ; 
Car je puis bien dire entresait 
C'onques gent tant ne s'entr'amerent 
Qu'il firent, tant com il durerent. 
# |
Rois de tout parfais et entiers, 
Sages et preus et droituriers 
Fu Cléomadès, dont vous ai 
Dit l'estoire si com la sai. 
Folio71v
Sachiez que il et ses serours 
Orent fils et filles plusours 
Dont moult issi nobles lignages. 
Moult i ot de preus et de sages 
Et de gent de bonté garnie 
En ceaus de celi là lignie. 
Mais de leur fais amenteü 
Onques nule riens ne me fu 
PageV02P288
Dont je seüsse la purté 
De la certaine verité 
En quel maniere se maintinrent 
Cil qui de Cléomadès vinrent 
Et de ses serours ensement. 
Je ne vorroie nulement 
Ajouster riens en ceste estoire 
Fors que certaine chose et voire. 
# |
De leur hoirs parlé vous eüsse 
Se je la verité seüsse 
De leur fais ; mais je ne le sai. 
Pour ceste raison m'en tairai. 
Mais, se vous savoir en voulez 
Plus avant, en Espaigne alez. 
Ou Toulete ou Sebile, 
Je ne sais pas en laquel vile 
De ces II, plus tost trouveriez 
L'estoire, se ia queriiés ; 
Car, espoir, ont été ostées 
Les cronikes, et remuées, 
Où ceste matere fu prise 
Que nus n'ot qui moult ne la prise. 
# |
Qui de ceste estoire vorra 
Avant savoir, il couvenra 
Que il la matiere tant quiere 
Que il la truist, se il l'a chiere ; 
Car les dames qui m'en conterent 
Ce qu'en ai dit, n'en deviserent 
Fors tant que dit vous en ai ci. 
Dieu de lor conmant moult merci. 
Quant ains me firent entremetre 
ceste estoire en rime metre, 
À mon povoir me sui penez
Que leur conmans fust achevez. 
PageV02P289
Les dames qui me commanderent 
À faire ce livre, moustrerent 
Roiaument leur humilité. 
Or me doinst I)iex que leur gré 
l'aie ma paine emploiie. 
le li pri que il m'en aye. 
Nonmer les vueil, k'en couvent l'ai, 
En ce livre, et je le ferai. 
Dont me couvient bien aviser 
En ce que on ne puist trouver 
Fourme me voie qui ensaigne 
Riens nule qui leur nons apraigne 
À ceaus qui querre les vorront. 
N'en dout riens, jà ne trouveront 
Chose escrite, n'en ai pas soingne, 
En quoi on me truist en mençoingne, 
Mais en verité la plaisans ; 
À ce fait bon estre tendans. 
Rien ne vaut chose mençongnable ; 
le m'en tieng à la veritable. 
E ! Diex ! donnés me sens par quoi 
Nonmer les puisse, si com doi ! 
# |
Maintenant, se Diex me consaut, 
Ai nonmé une, qui moult vaut ; 
Dont me couvient l'autre nonmer. 
A Diex ! tant parfont amer ! 
Moult est chascune bonne et sage, 
En fais, en dis et en usage ; 
Bien doivent à Dieu obéir, 
Liement cuer et cors offrir ; 
Adès monteplient en bien ; 
Ne croi k'en eles faille rien. 
Ce don leur donna Diex sans doute.
Haïr leur fist mauvaistié toute;
En leur cuers mist, ainsi le croi,
PageV02P290
Amours, pour lui amer en foi. 
Nonmées les ai, ce sachiez. 
Ne cuit pas k'entendu l'aiez, 
Ne je ne quier ne ne vorroie. 
# |
Diex leur doinst grant honnor et joie, 
Et tant faire en leur plaine vie, 
Que la douce Virge Marie 
de lor ames present 
À Dieu, le jour dou jugement. 
Et Diex par sa grant bonté vueille 
Que ce present en gré recueille ! 
# |
Ce livre de Cléomadès 
Rimai je li rois Adenès. 
Menestrex au bon duc Henri 
Fui. Cil m'aleva et norri, 
Et me fist mon mestier aprendre ; 
Diex l'en vueille guerredon rendre 
Avoec ses sains en Paradis ! 
Loiaus princes fu et gentis, 
Et bons, et biaus, et dous, et frans, 
Et courtois. Ne fu ce duels grans 
Quant tex princes si tost moru 
Conme li bons dux Henris fu. 
# |
De sa mort fu duels et pitiez. 
Mais ne pot estre respitiez 
De la mort ; car avoir le vot 
Cil qui bien povoir dou faire Ot : 
Ce fu Diex, qui les bons eslit 
À son oes. Pour ce, tost le prist.
PageV02P291
Et bien i parut à sa fin 
K'envers Dieu avoit le cuer fin ; 
Car si son afaire afina 
Au tans qu'il morut et fina, 
Que ne se porroit afiner 
Nus hom miex, pour en bien finer, 
Que il s'afina finement. 
Moult prist gracieus finement. 
Moult doit bien estre l'ame fine 
De celui qui en tel point fine 
Que il fina à son finer. 
Li cors fist si l'ame afiner, 
K'ainc afinés ne fu fins ors 
Miex que l'ame afina li cors. 
# |
Diex, par sa très douce poissance, 
Ait en gré prise la finance 
De son daërrain paiement;
Car moult le paia saintement. 
Ne li couvint pas sermonner 
Ne de Dieu riens amonester. 
Il meïsmes s'amonestoit, 
Lui et les autres sermonnoit 
Qui iluec erent assamblé. 
De gent i avoit grant plenté ; 
Car il meïsmes conmanda 
À tous ceaus qui estoient là 
Folio72r
C'on fei'st tous les huis ouvrir, 
Et peüssent à lui venir 
Tout cil qui venir i vorroient, 
Et povre et riche, s'il vouloient ; 
Et on le fist tout ensement. 
Plenté de monnoie et de gent 
Erent assamblé entour lui ; 
Je meïsmes aussi i fui,
Qui puis bien dire, sans doutance,
PageV02P292
K'ainc plus bele reconnoissance 
Ne pot avoir nus hom mortés, 
Que il ot. Diex en soit loés ! 
# |
Je vous pri que pour lui priiez 
Que Diex li pardoinst ses pechiez 
Si vraiement qu'il pardonna 
Sa mort, le jour que l'assena 
Longis de la lance ou costé 
Quant par lui fumes racheté. 
Et tout cil soient beneöit 
Qui diront : "Amen Diex l'otroit!"
# | 
De Brabant tint la seignorie 
Cil dux. Or doinst Diex bone vie 
Ceaus et celes qui de lui sont 
Venu, et qui mais en venront, 
En gart le bon conte Guion 
De Flandres, cui loer doit on, 
Car en lui maint, par verité, 
Fois et honnours et charité ; 
Et certes, se à lui n'estoie, 
De la bonté plus parleroie 
De lui et de ses bons enfans 
En cui loiautez est manans. 
À tant m'en vueil ore passer : 
Li biens se sara bien moustrer. 
Lui et les siens Diex garder vueille 
Et tous à s'amour les accueille ! 
# |
Et puist le duc Jehan garder 
De Brabant ; en honnour monter 
Le vueille, et li doinst chose faire 
Qui lui et au siecle puist plaire ! 
Lui et mon seignor Godefroit
Maintes fois m'ont gardé dou froit
PageV02P293
Cil dont je faz ci mencion, 
Diex lor en rende guerredon ; 
Car n'ai povoir dou desservir. 
Diex le vueille à tous ceaus merir 
Qui m'ont fait et donné dou leur! 
Benoit soient mi bienfaiteur! 
Diex gart chascun, lui et les siens, 
Et lor mire trestous les biens 
Que il ont moi et autrui fais, 
Et lor pardoinst tous leur mesfais, 
Et nous doinst, par son dous plaisir, 
K'à bonne fin puissons venir ! 
Et Diex le nous otroit ainsi ! 
C'est la fin de ce livre ici. 
# |
ENVOI 
À noble conte, preu et sage, 
D'Artois, qui a nus son usage 
En Dieu honnorer et servir, 
Envoi mon livre, pour oyr 
Conment il est fais et dités. 
Or vueille Diex que il soit tés 
Que li quens le reçoive en gré, 
Et li doinst, par sa grant bonté, 
Honnour d'armes et d'amour joie ! 
Si m'ait Diex, je le vorroie. 
Ainsi soit il que je l'ai dit. 
Amen, amen, et explicit. 
EXPLICIT LI ROUMANS DE CLÉOMADÈS
*** END